សារព័ត៌មានក្នុងស្រុកជាច្រើន បានចូលរួមកាន់ទុក្ខការបាត់បង់ព្រះករុណា ព្រះបាទសម្ដេចព្រះ នរោត្ដម សីហនុ ដោយបោះពុម្ពផ្សាយនៅលើសារព័ត៌មាន ឬបោះពុម្ពនៅលើគេហទំព័រជាដើម។
ដោយ អាន ស៊ីថាវ
2012-10-19
វិទ្យុអាស៊ីសេរី
ព្រះបរមសពត្រូវបានដង្ហែតាមព្រះទីន័ងមកដល់វិមានឯករាជ្យ នៅថ្ងៃទី១៧ តុលា ឆ្នាំ២០១២។ RFA/Ven Sawath
ក្នុងចំណោមសារព័ត៌មានក្នុងស្រុកប្រមាណជិត ៤០០អង្គភាព បានរៀបរាប់ស្រដៀងគ្នាការកោតសរសើរការដឹកនាំដ៏ឆ្នើម រួមទាំងការលះបង់របស់ព្រះអង្គ ដើម្បីសន្តិភាព និងការអភិវឌ្ឍនៅប្រទេសកម្ពុជា។ សារព័ត៌មានបានបង្ហាញអំពីព្រះរាជសកម្មភាពរបស់ព្រះអង្គ ការសិក្សា ការសោយរាជ្យ រួមទាំងការតស៊ូនានា នៅលើឆាកអន្តរជាតិ ដើម្បីមាតុភូមិកម្ពុជា។
ទោះជាយ៉ាងណាក៏ដោយ បណ្ដាសារព័ត៌មានមួយចំនួន ក៏បានផ្ដោតសំខាន់លើការបញ្ជូនព្រះបរមសព ព្រះអង្គ ពីប្រទេសចិន ការតម្កល់ព្រះបរមសព រួមទាំងការអុជធូបបូជារបស់មន្ត្រីទូត សាធារណជន ចំពោះព្រះបរមសពផងដែរ។
គេហទំព័រកោះសន្តិភាព ដែលបោះពុម្ពផ្សាយព្រឹត្តិការណ៍សង្គមប្រចាំថ្ងៃ បានផ្លាស់ប្ដូរគេហទំព័ររបស់ខ្លួនប្រែជាសខ្មៅ ដើម្បីបង្ហាញពីការកាន់ទុក្ខ ការសោយទិវង្គតព្រះបាទព្រះ នរោត្ដម សីហនុ។ គេហទំព័រដដែល ក៏បានចុះផ្សាយអំពីសកម្មភាពនានារបស់ព្រះអង្គ និងព្រឹត្តិការណ៍សាធារណជនទាំងឡាយ ចំពោះការចូលរួមសោកស្ដាយព្រះអង្គផងដែរ។
គេហទំព័ររស្មីកម្ពុជា ក៏បានបង្ហាញអំពីភាពស្រដៀងគ្នាដែរ ចំពោះការបោះផ្សាយនៅលើគេហទំព័ររបស់ខ្លួន អំពីប្រជាពលរដ្ឋស្រីប្រុស បានអុជធូប សំពះ ថ្វាយផ្កាឈូក ព្រមទាំងបានសូត្រធម៌ និងឧទ្ទិសព្រះរាជពរ ថ្វាយព្រះវិញ្ញាណក្ខន្ធសម្ដេចព្រះ នរោត្តម សីហនុ នៅមុខព្រះបរមរាជវាំង។
ចំពោះគេហទំព័រប្រចាំថ្ងៃរបស់កម្ពុជាថ្មី បានបោះផ្សាយអំពីសាររំលែកទុក្ខរបស់មន្ត្រីជាន់ខ្ពស់របស់រដ្ឋាភិបាលកម្ពុជា ដោយមានចាប់តាំងពីអភិបាលខេត្ត និងរដ្ឋមន្ត្រីក្រសួងនានាផងដែរ ចំពោះការសោយទិវង្គតព្រះបាទព្រះ នរោត្ដម សីហនុ ដែលបានបោះពុម្ពផ្សាយនៅខាងស្ដាំគេហទំព័ររបស់ខ្លួន។ ម៉្យាងវិញទៀត នៅលើគេហទំព័រក៏បានបង្ហោះព្រះឆាយាល័ក្ខណ៍ទាក់ទងនឹងព្រះរាជសកម្មភាពព្រះអង្គផងដែរ។
សារព័ត៌មានដែលបោះពុម្ពផ្សាយប្រចាំថ្ងៃជាភាសាបរទេសឈ្មោះថា ឌឹ ខេមបូឌា ដេលី បានសរសេរអត្ថបទអំពីការបញ្ចប់យុគសម័យ នរោត្ដម ព្រះសីហនុ ដែលបានបោះផ្សាយនៅលើគេហទំព័រផ្ទាល់។ អត្ថបទនោះបានបង្ហាញអំពីសកម្មភាពតស៊ូរបស់ព្រះអង្គ ក្នុងការទាមទារឯករាជ្យពីប្រទេសបារាំង បានដោយជោគជ័យនៅឆ្នាំ១៩៥៣។ អត្ថបទក៏បានបញ្ជាក់អំពីការតស៊ូដឹកនាំបញ្ចប់សង្គ្រាមត្រជាក់នៅឆ្នាំ១៩៨០ នៅប្រទេសកម្ពុជា ហើយរយៈពេល ១០ឆ្នាំក្រោយមក ប្រជាជនកម្ពុជា ទាំងអស់បានស្គាល់អំពីសុខសន្តិភាព នៅក្នុងប្រទេសទាំងមូល។
សារព័ត៌មានភ្នំពេញប៉ុស្តិ៍ ដែលបោះពុម្ពផ្សាយប្រចាំថ្ងៃ បញ្ជាក់ជាចំណងជើងធំ នៅថ្ងៃទី១៨ តុលា ថា កម្ពុជាពោរពេញដោយភាពក្រៀមក្រំ។ អត្ថបទនោះចង់បង្ហាញអំពីមនុស្សជាច្រើន ឈររង់ចាំទទួលស្វាគមន៍ព្រះបរមសព រួមទាំងការកាន់ទុក្ខសោកស្ដាយបំផុតនៅទូទាំងប្រទេស។ សារព័ត៌មានដដែល បានបង្ហាញអំពីមតិជាច្រើន ជុំវិញការសោយទិវង្គតព្រះបាទព្រះ នរោត្ដម សីហនុ ដោយមានទាំងអ្នកវិភាគសង្គម អ្នកនិពន្ធ ស្ថាបត្យករ និងសាធារណជននានា ដែលមតិទាំងនោះបង្ហាញអំពីភាពរីកចម្រើនគ្រប់វិស័យ ស្ថាបត្យកម្មធំៗ ការដឹកនាំជាមហាគំរូសម្រាប់សង្គមជាដើម។
ក្រៅពីសារព័ត៌មានក្នុងស្រុក ការរាយការណ៍របស់វិទ្យុ និងទូរទស្សន៍ ក៏បានចូលរួមចំណែកការរំលែកទុក្ខផងដែរ ចំពោះការបាត់បង់ព្រះបាទព្រះ នរោត្ដម សីហនុ។ ស្ថានីយទូរទស្សន៍ជាច្រើន បានផ្សាយសកម្មភាពដល់សាធារណជន អំពីព្រះរាជសកម្មភាពរបស់ព្រះអង្គ រួមទាំងព្រះរាជកិច្ចនានានៅប្រទេសកម្ពុជា និងអន្តរជាតិ។
ទូរទស្សន៍ជាតិកម្ពុជា បានប្រកាសអំពីការសោយទិវង្គតរបស់ព្រះអង្គ នៅថ្ងៃទី១៥ តុលា ជាថ្ងៃកាន់ទុក្ខរបស់ប្រជាជនកម្ពុជា និងនៅថ្ងៃបន្តបន្ទាប់ បានផ្សព្វផ្សាយអំពីសកម្មភាពនានា ក្រោមការដឹកនាំរបស់ព្រះអង្គ ដូចជាការជួបសន្ទនាជាមួយមន្ត្រីជាន់ខ្ពស់អន្តរជាតិ រួមទាំងព្រះរាជសកម្មភាពជួយជាមួយបងប្អូនប្រជាពលរដ្ឋនៅក្នុងសម័យកាលក្រោមការដឹកនាំរបស់ព្រះអង្គផងដែរ។ ទូរទស្សន៍ជាតិ ក៏បានចាក់ផ្សាយអំពីការបញ្ជូនព្រះបរមសពរបស់ព្រះបាទព្រះ នរោត្ដម សីហនុ ត្រឡប់មកពីប្រទេសចិន កាលពីថ្ងៃទី១៧ តុលា ផងដែរ។
ការផ្សព្វផ្សាយរបស់បណ្ដាញស្ថានីយទូរទស្សន៍ បានចាក់ផ្សាយអំពីការសោយទិវង្គតរបស់ព្រះអង្គមានភាពស្រដៀងគ្នា ដូចជាស្ថានីយទូរទស្សន៍ស៊ីធីអិន ទូរទស្សន៍អាស៊ីអាគ្នេយ៍ និងបណ្ដាញទូរទស្សន៍ផ្សេងទៀតជាច្រើន។ យ៉ាងណាក៏ដោយ ការផ្សព្វផ្សាយរបស់ស្ថានីយទូរទស្សន៍បាយ័ន បានផ្សាយផ្ទាល់អំពីការបញ្ជូនព្រះបរមសពមកប្រទេសកម្ពុជា រួមទាំងសកម្មភាពនៅតាមដងវិថី ទៅព្រះបរមរាជវាំងផង។
ចំពោះស្ថានីយទូរទស្សន៍ហង្សមាស បានបង្ហាញអំពីសាររំលែកទុក្ខក្រៀមក្រំផងដែរ ចំពោះការសោយទិវង្គតរបស់ព្រះអង្គ រួមទាំងការសរសើរព្រះរាជសកម្មភាពដឹកនាំទទួលបានឯករាជ្យនៅឆ្នាំ១៩៥៣។ ស្ថានីយទូរទស្សន៍ដដែល ក៏បានបញ្ជាក់ថា ការតស៊ូរបស់ព្រះអង្គបានធ្វើឲ្យប្រទេសថៃ ប្រគល់ទឹកដី និងខេត្តព្រះវិហារ មកឲ្យខ្មែរវិញនៅឆ្នាំ១៩៦២ ហើយព្រះអង្គក៏ជាតួអង្គសំខាន់សម្រាប់ការផ្សះផ្សាជាតិ ដែលឈានទៅរកការចុះកិច្ចព្រមព្រៀងទីក្រុងប៉ារីស នៅឆ្នាំ១៩៩១ រួមទាំងការបោះឆ្នោតជាតិ នៅឆ្នាំ១៩៩៣ ផងដែរ។
ទោះជាយ៉ាងណាក៏ដោយ ក្រៅពីសារព័ត៌មានក្នុងស្រុក វិទ្យុ និងទូរទស្សន៍ បានផ្សព្វផ្សាយអំពីការរំលែកទុក្ខក្រៀមក្រំ ប៉ុន្តែបណ្ដាញសង្គមហ្វែសប៊ុក (Facebook) បានរិះគន់អំពីភាពអវិជ្ជមានក្រោមការដឹកនាំរបស់ព្រះបាទព្រះ នរោត្ដម សីហនុ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
សូម ព្រះ មហាក្សត្រថ្មីនេះ បើក ព្រះ នេត្រ មើល ឃើញ ទឹកចិត្តរាស្រ្តផង ទៅបានទេ
ក្លាហានផងទៅមើល កុំសូវចេះ
តែលើកដៃផ្ងក់សំពះគេ មើលតែបង្គួយ នូវ អ្វី ដែល គេ បញ្ជានោះ ។ ពិចារណា មើលទៅ តើ
ទំហ៊ំ នៃទឹកចិត្តប្រជារាស្រ្តខ្មែរមាន ធំ និង ភក្តីភាព ប៉ុណ្ណា ចំពោះព្រះមហាក្សត្រ របស់ខ្លួន
នៅពេលនេះ នោះ
សូម្បី តែភាពខ្លោចផ្សារនឹងឈឺចាប់ពី អតីតកាល ក៏បានបំភ្លេច ចោល អស់ហើយដែរ ព្រម ទាំង
នៅតែចាត់
ទុកថា ព្រះរាជវង្ស នៅ តែមាន សារះសំខាន់បំផុត ចំពោះរាស្រ្ត ដដែល ។ ដូច្នេះ គួរ តែ ដឺង ថា
តើក្នុង ចិត្តរាស្រ្ត របស់ ព្រះ អង្គ ត្រូវ ការ និង ចង់បាន អ្វី ហើយ នោះ ។ បើ ពិបាក ធ្វើ ស្តេច ឬក៏
ធ្វើជាស្តេច ដូចទីងមោង សំរាប់ តែគេ ខ្ចីឈ្មោះ យក មកប្រើ ដើម្បី អំណាច របស់គេយកធ្វើបាប
ប្រជារាស្រ្ត ព្រមទាំង វិនាស អន្តរាយ ដល់ ប្រទេសជាតិ ទេ នោះ
គួរ តែ ឈប់ ទៅ មិនទាន់ហួសពេល ទេ ព្រះអង្គ ។ ពីព្រោះអ្នក ដែល ត្រូវ រាស្រ្ត ស្តីបន្ទោស នឹង
ដាក់បណ្តាសា នៅថ្ងៃក្រោយនោះ មិនមែនពួក វា ទាំងអស់ នោះ ទេ គឺព្រះ អង្គក៏មាន ចំណែក
នៅក្នុងនោះដែរ ។ ហើយជឿថា រាជានិយម ឬ រាជវង្ស ពិត ជា គ្មាន ទៀតទេ នៅ ក្នុង ទឹកចិត្ត
របស់រាស្រ្តខ្មែរ ។