ភ្នំពេញ: យន្តហោះ​ប៊ូ​អ៊ី​ញ​មួយគ្រឿង របស់​ក្រុមហ៊ុន​ខេ​ម​បូ​ឌា​អង្គរ​អ៊ែរ បាន​សម្ពោធ​ដាក់​ឲ្យ​ប្រើប្រាស់​ជា​ផ្លូវការ​រួចហើយ បន្ទាប់ពី​បាន​ជួល​ពី​ក្រុមហ៊ុន​ប្រទេស​បារាំង យកមក​ធ្វើ​អាជីវកម្ម​ហោះហើរ ក្នុង​រយៈពេល​វែង​នៅក្នុង​ប្រទេស​កម្ពុជា​។​

ថ្ងៃទី 6 មករា 2013
ដោយ: រតនា
CEN

សម្តេចសង្ឃកំពុងសូត្រធម៌ បង្កក់ប្រសិទ្ធីយន្តហោះ​ប៊ូ​អ៊ី​ញ​មួយគ្រឿង របស់​ក្រុមហ៊ុន​ខេ​ម​បូ​ឌា​អង្គរ​អ៊ែរ បាន​សម្ពោធ​ដាក់​ឲ្យ​ប្រើប្រាស់​ជា​ផ្លូវការ

លោក តឹក រ៉េត​សំរេច រដ្ឋលេខាធិការ​នៃ​ទីស្តីការគណៈរដ្ឋមន្ត្រី និង​ជា​តំណាង​ភាគហ៊ុន​រដ្ឋ នៃ​ក្រុមហ៊ុន អាកាសចរ​ជាតិ ខេ​ម​បូ​ឌា អង្គរ​អ៊ែ បាន​ថ្លែងប្រាប់​ក្រុមអ្នកកាសែត​នៅ​អាកាស​យាន្ត​ដ្ឋា​ន​អន្តរជាតិ​ភ្នំពេញ កាលពី​ព្រឹក​ថ្ងៃទី​៦ ខែមករា ឆ្នាំ​២០១៣ ថា នៅ​ថ្ងៃទី​៦ ខែមករា ឆ្នាំ​២០១៣ ក្រុមហ៊ុន​អាកាសចរ​ជាតិ ខេ​ម​បូ​ឌា អង្គរ​អ៊ែ (Cambodia Ankor AIR) បានទទួល​យន្តហោះ​ប្រភេទ អ៊ែ​បើ​ស A321 មួយគ្រឿង​ទៀត​ដែល​កំពុងតែ​ផលិត​ចេញ ដើម្បី​ប្រើ​យន្តហោះ​នេះ សម្រាប់​ការហោះហើរ​នៅក្នុង​តំបន់​។ រហូតមកដល់​ពេលនេះ​ក្រុមហ៊ុន​អាកាសចរ​ជាតិ ខេ​ម​បូ​ឌា អង្គរ​អ៊ែ មាន​យន្តហោះ​ប្រភេទ ATR ចំនួន​២​គ្រឿង​សម្រាប់​ប្រើប្រាស់​ហោះ​ផ្លូវ​នៅក្នុង​ស្រុក ភ្នំពេញ​-​សៀមរាប និង សៀមរាប​-​ភ្នំពេញ និង​ហោះ​ពី​ខេត្តសៀមរាប​ទៅកាន់​ក្រុងព្រះសីហនុ ហើយ​និង​គ្រោង​ហោះ​ពី​ក្រុងព្រះសីហនុ មក​ភ្នំពេញ ហើយ​បើ​យើង​ធ្វើ​ដូចនេះ និង​អាច​ភ្ជាប់​ការហោះហើរ​ជា​ត្រីកោណ​ពី​រាជ​ធា​និ​ភ្នំពេញ ទៅកាន់​តំបន់​ទេសចរ​ខេត្តសៀមរាប ហើយនឹង​ទៅកាន់​តំបន់ឆ្នេរ​សមុទ្រ​កម្ពុជា នៃ​ក្រុងព្រះសីហនុ ហើយ​ប៉ូល​ទាំងបី នៃ​តំបន់​សេដ្ឋកិច្ច​ដែលមាន​សក្តានុពល​រប​ស់​កម្ពុជា ត្រូវបាន​ភ្ជាប់​ដោយ​ក្រុមហ៊ុន​អាកាសចរ​ជាតិ ខេ​ម​បូ​ឌា អង្គរ​អ៊ែ​។​

​លោក តឹក រ៉េត​សំរេច បាន​បញ្ជាក់ថា យន្តហោះ​នេះ​យើង​យកមក​ពី​បារាំង សហគមន៍​អឺរ៉ុប ជា​ក្រុមហ៊ុន​ដែល​ផលិត គឺ អ៊ែ​ប៊ើ​ស ដោយ​ជួល​ក្នុង​រយៈពេល​វែង​។ ធម្មតា​ការរកស៊ី​ក្រុមហ៊ុន​ណា​ក៏ដូចជា ក្រុមហ៊ុន​ណា ហើយ​ក្រុមហ៊ុន​នៅលើ​ពិភពលោក​នេះ គឺ​គេ​ជួល គេ​មិនដែល​ទិញ​ទេ​។ ព្រោះ​បើ​យើង​យកលុយ​ទៅ​ទិញ​១២០​ទៅ​១៣០​លាន​ដុល្លារ​ទៅ​ទិញ​នោះ គឺ​ការធ្វើ​ជំនួញ​បែបនេះ​មិន​មានការ​ឆ្លាត​វៀងវៃ​ទេ​។ យើង​មាន​ប្រភេទ​យន្តហោះ​ធំ​នេះ​៣​គ្រឿង គឺ​មួយគ្រឿង​មាន​អាយុ​១០​ឆ្នាំ​ហើយ ហើយពីរ​គ្រឿង​ទៀត​ដែល​យើង​បានទទួល​កាលពី​សប្តាហ៍​មុន​នៅ​ខេត្តសៀមរាប ហើយ​មួយ​ថ្មី​នេះ គឺជា​ប្រភេទ​យន្តហោះ​ថ្មី​។ នេះ​គឺជា​ផែនការ​នៃ​ការធ្វើ​អាជីវកម្ម​របស់​ក្រុមហ៊ុន​អាកាសចរ​ជាតិ​កម្ពុជា​អង្គរ​អ៊ែ ចាប់តាំងពី​ពេល​បង្កើតឡើង​កាលពី​ឆ្នាំ​២០០៩​នោះ ហើយ​ឥឡូវ​ឆ្នាំ​២០១៣ មាន​អាយុ​ជាង​៣​ឆ្នាំ​ហើយ​។​

​លោក​បាន​លើកឡើងថា ការបន្ថែម​យន្តហោះ​ថ្មី​ពីរ​គ្រឿង​នេះ កម្ពុជា​អង្គរ​អ៊ែ និង​ប្រើប្រាស់​ដើម្បី​បើក​ទៅកាន់​គោលដៅ​អន្តរជាតិ​សំខាន់ៗ​រួមមាន ភ្នំពេញ ទៅ​ហាណូយ គឺ​ចាប់​របើក​ជើងហោះហើរ​ត្រង់​ផ្ទាល់​ជា​លើកដំបូង និង​ហោះ​ចាប់ពី​សប្តាហ៍​នេះ​ទៅ ហើយ​ហោះ​ពី​សៀមរាប​ទៅកាន់​ទីក្រុង​បាងកក ហោះ​ពី​ភ្នំពេញ ទៅកាន់​ទីក្រុង​បាងកក និង​ហោះ​ពី​សៀមរាប​ទៅកាន់​ទីក្រុង​ភូ​កេ​ត ហើយ​នៅពេល​ឆាប់ៗ​នេះដែរ និង​ពង្រីក​បន្ថែម​ទៅកាន់​ប្រទេស​ចិន​
​ទីក្រុង​ក្វាង​ចូ​វ ហើយនឹង​រៀបចំ​ការហោះហើរ​ទៅកាន់​ទីក្រុង​ហុងកុង និង​សាំង​ហ្គា​រ​ពួរ នេះ​បើសិនជា​ទីផ្សារ​មាន​ភាព​អំណោយផល ហើយ​ក្រុមហ៊ុន​នៅតែ​អាច​រក្សាបាន​នូវ​ទីផ្សារ និង​ការធ្វើ​អាជីវកម្ម​របស់ខ្លួន គឺអាច​រក្សាបាន​មិនជា​ការគួរ​ឲ្យ​បារម្ភ​ទេ​។ ធម្មតា​ការបង្កើត​ក្រុមហ៊ុន​អាកាសចរ​ថ្មី យើង​ត្រូវការ​រយៈពេល​ពី​បី​ឆ្នាំ ទៅ​ប្រាំ​ដើម្បី​ពង្រីក ហើយ​ធានាថា អាច​រក្សាបាន​នៅលើ​ទីផ្សារ​នោះ​។ បើ​គិតពី​យុទ្ធសាស្ត្រ​នេះ​គឺ​ឃើញថា ក្រុមហ៊ុន អាកាសចរ​ជាតិ​កម្ពុជា អង្គរ​អ៊ែ បាន​ឆ្លងកាត់​ដំណាក់កាល​លំបាក​របស់ខ្លួន​៣​ឆ្នាំ​កន្លង​រួចមកហើយ ហើយ​និង​២​ឆ្នាំ​កន្លង​ទៅមុខទៀត​។​

​លោក តឹក រ៉េត​សំរេច បាន​សម្តែង​ការ​សង្ឃឹមថា “​យើង​សង្ឃឹមថា ចាប់ពី​ឆ្នាំ​ទី​៥ ទៅ​អាកាសចរ​ជាតិ​កម្ពុជា អង្គរ​អ៊ែ និង​មានលទ្ធភាព​ធ្វើខ្លួន​ឲ្យ​ទៅជា​ក្រុមហ៊ុន​អាកាសចរ​មួយ ដែល​និង​ក្លាយទៅជា​ដៃគូ​ដ៏​មាន​សារៈសំខាន់​ជាមួយ​ក្រុមហ៊ុន​បណ្តា​អាកាសចរ​ផ្សេងៗ​ទៀត​។ នៅ​អា​នាគ​ត​ខាងមុខ​យើង​និង​ពិនិត្យមើល​លទ្ធភាព​ដែរ ក្នុងការ​ហោះហើរ​ទៅកាន់​ទីក្រុង​សំខាន់​ណាមួយ​របស់​ប្រទេស​ឥណ្ឌា ព្រោះ​ឥណ្ឌា​ជា​ប្រទេស​ដែលមាន​ជនជាតិ​ឥណ្ឌា​ដែល​កាន់សាសនា​ហិណ្ឌូ​នោះ មាន​រហូត​ទៅដល់​៨០០​ទៅ​៩០០​លាន​នាក់ អីចឹង​ក្រុមហ៊ុន​យល់ឃើញថា អង្គរវត្ត​ដែលជា​ប្រាសាទ​ហិណ្ឌូ តែមួយគត់​ធំជាងគេ​នៅលើ​ពិភពលោក​នេះ គួរតែ​ធ្វើការ​ផ្សព្វផ្សាយ​ឲ្យ​បាន​ទូលំទូលាយ​” ហើយ​សង្ឃឹមថា ជាការ​នឹង​ការហោះហើរ​របស់​ក្រុមហ៊ុន អាកាសចរ​ជាតិ​កម្ពុជា អង្គរ​អ៊ែ និង​អាច​ទាក់ទាញ​ជនជាតិ​ហិណ្ឌូ​ពី​ប្រទេស​ឥណ្ឌា មក​ទស្សនា​ប្រាសាទ​ដែល​ធំជាងគេ​នៅលើ​ផែនដី​នេះ​នៅ​សៀមរាប​បាន​។​
​ ​
​ទាក់ទង​ទៅ​និង​តំលៃ​ជួល​យន្តហោះ​នេះ លោក តឹក រ៉េត​សំរេច បាន​បញ្ជាក់ថា ចំពោះ​តំលៃ​ជួល​យន្តហោះ​នេះ​លោក​មិនអាច​ប្រាប់​បានទេ ព្រោះ​វា​ជា​យុទ្ធសាស្ត្រ​នៅក្នុង​ការប្រកួតប្រជែង​របស់​ក្រុមហ៊ុន ហើយ​វា​ជា​កម្មសិទ្ធិ​របស់​ក្រុមហ៊ុន អាកាសចរ​ជាតិ​កម្ពុជា អង្គរ​អ៊ែ​។ ឧ​ទា​រណ៍ ក្រុមហ៊ុន​ធំៗ​ដែលជា​ក្រុមហ៊ុន​អាកាស​ល្បីៗ​នៅលើ​ពិភពលោក​នេះ ក៏​គេ​ជួល​ដែល ហើយ​គេ​មិនដែល​ទិញយក​មក​ទុក​ទេ​៕​