ភ្នំពេញ: រាជរដ្ឋាភិបាល គ្រោងបើកការដ្ឋានសាងសង់រូបសំណាក ព្រះមហាវីរក្សត្រ នៅថ្ងៃទី២០ ខែកុម្ភៈ ឆ្នាំ២០១៣ នៅខាងលិចនាគបាញ់ទឹក និងខាងកើតវិមានឯករាជ្យ។ ការសម្រេចដូច្នេះ បានធ្វើឡើង បន្ទាប់ពីមានកិច្ចប្រជុំអនុគណៈកម្មការចម្រុះសាងសង់ព្រះបរមរូប ព្រះបរមរតនកោដ្ឋ កាលពីល្ងាចថ្ងៃទី១១ ខែកុម្ភៈ ឆ្នាំ២០១៣ ដែលដឹកនាំដោយលោក សុខ អាន ឧបនាយករដ្ឋមន្ត្រី និងជារដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី។
ថ្ងៃទី 12 កុម្ភៈ 2013
ដោយ: រតនា
CEN
មន្ត្រីដែលជឿទុកចិត្ត បានប្រាប់ឲ្យដឹងថា នៅក្នុងកិច្ចប្រជុំនោះ មានការចូលរួមពីមន្ត្រីតំណាងក្រសួងវប្បធម៌ លោក កែប ជុតិមា អភិបាលសាលារាជធានីភ្នំពេញ តំណាងក្រុមហ៊ុនសិលា និងក្រុមវិចិត្រករ ដែលមានទឹកដៃសាងសង់រូបសំណាក។
ប្រភពពីមន្ត្រីដដែលបានឲ្យដឹងថា ទីតាំងសាងសង់រូបសំណាកព្រះមហាវីរក្សត្រ ស្ថិតនៅចម្ងាយ ២០០ ម៉ែត្រ ខាងកើតវិមានឯករាជ្យ (ខាងលិចនាគបាញ់ទឹក) លើសួនវិមានឯករាជ្យ។
នៅក្នុងកិច្ចប្រជុំនោះ ក៏បានលើកឡើងថា សម្តេចម៉ែ ព្រះមហាក្សត្រី នរោត្តម មុនីនាថ សីហនុ ព្រះអង្គក៏ចង់ចូលរួមចំណែកព្រះរាជទ្រព្យ ដើម្បីសាងសង់ រូបសំណាក សម្តេចព្រះមហាវីរក្សត្រនោះដែរ ប៉ុន្តែសម្តេចតេជោ ហ៊ុន សែន ត្រូវបានគេលើកឡើងថា បានទូលថ្វាយសម្តេចម៉ែថា ទុកភារកិច្ចនេះ ឲ្យរាជរដ្ឋាភិបាល ធ្វើការសាងសង់។
ប្រភពពីមន្ត្រីដដែលបានបន្តថា ក្រុមន្ត្រីជំនាញសាងសង់ បានបង្ហាញរូបសំណាក គឺសំរេចធ្វើអំពីស្ពាន់សុទ្ធ។ រូបសំណាក មានកំពស់ ៤,៥០ ម៉ែត្រ ហើយពីជើងទម្រ ទៅដល់ព្រះបរមរូបកំពស់ ៧,២០ ម៉ែត្រ។ ចំណែកពីក្រោមបុស្បុកទាំងមូល មានកំពស់ ២៧ ម៉ែត្រ ដែលមានដំបូលគ្របពីលើ។ ចំណែកជើងទម្រ ធ្វើពីថ្មភក់។
ចំណែកបុស្បុក ត្រូវបានសាងសង់តាមរចនាបថខ្មែរ។ មានទីធ្លាសួនច្បារ ព័ទ្ធជុំវិញសំរាប់់ធ្វើពិធីគោរពវិញ្ញាណក្ខខន្ធ នឹងក្រាលកាឡា ហើយភ្ញៀវបរទេស ដែលមកគោរពវិញ្ញាណក្ខន្ធ នៅវិមានឯករាជ្យ នឹងត្រូវទៅគោរពវិញ្ញាណក្ខន្ធនៅទីនោះដែរ។
នៅក្នុងពិធីបើកការសាងនោះដែរ តាមគំរោង នឹងមានការធ្វើក្រុងពាលី នៅថ្ងៃទី២០ ខែកុម្ភៈ ២០១៣ ប៉ុន្តែរង់ចាំការសុំព្រះរាជយោបល់ និងយោបល់ពីសម្តេចម៉ែ និងសម្តេចតេជោ ហ៊ុន សែន សិន។
មន្ត្រីដដែលបានឲ្យដឹងដែរថា រាជរដ្ឋាភិបាលបានសំរេច ឲ្យក្រុមហ៊ុនសិលា ជាអ្នកសាងសង់ ព្រះបរមរូប ព្រះមហាវីរក្សត្រនោះ ពីព្រោះក្រុមហ៊ុននេះ មានស្នាដៃសាងសង់រូបសំណាក់ សម្តេចតេជោយ៉ត និងសម្តេចតេជោមាស៕
“នៅក្នុងកិច្ចប្រជុំនោះ ក៏បានលើកឡើងថា សម្តេចម៉ែ ព្រះមហាក្សត្រី នរោត្តម មុនីនាថ សីហនុ ព្រះអង្គក៏ចង់ចូលរួមចំណែកព្រះរាជទ្រព្យ ដើម្បីសាងសង់ រូបសំណាក សម្តេចព្រះមហាវីរក្សត្រនោះដែរ”
ប៉ុន្តែសម្តេចតេជោ ហ៊ុន សែន ត្រូវបានគេលើកឡើងថា បានទូលថ្វាយសម្តេចម៉ែថា “ទុកភារកិច្ចនេះ ឲ្យរាជរដ្ឋាភិបាល ធ្វើការសាងសង់”។
ហាស ហា ចង់ធ្វើអាជីវកម្មតាំងពីរូបសំណាកឡើងទៅ!!!! បន្ទូលរបស់ព្រះនាង សោមា ដែលសរសេរក្នុងភ្នំពេញប៉ុស្ត៏ កាន់តែបញ្ជាក់ពីភាពត្រឹមត្រូវ!!! ធ្វើម៉េចទេ នេះជាកម្មរបស់ខ្មែរដែលមានចោរជាអ្នកកាន់កាប់រដ្ឋាភិបាល!!
សង់ខាងស្តូបមិត្តភាពកម្ពុជាវៀតណាមឡាវវិញទើបមានទីធ្លារធំទូលាយជាង