ខេត្តកណ្តាល: កម្មករកាត់ដេរជាង ៧០០០ នាក់ នៅរោងចក្រកាត់ដេរ យ៉ុងវ៉ា១ និងយ៉ុងវ៉ា២ មកដល់ព្រឹកថ្ងៃទី១៣កុម្ភៈ ឆ្នាំ២០១៣ បានបន្តកូដកម្មបិទផ្លូវ ចូលដល់ថ្ងៃទី២ហើយ។ កូដកម្ម បិទផ្លូវ ចាប់តាំងពីថ្ងៃទី១២កុម្ភៈ នៅតែមិនមានការអើពើពីអាជ្ញាធរពាក់ព័ន្ធ ឬក៏ភាគីរោងចក្រចេញមុខសម្របសម្រួលដោះស្រាយនៅឡើយទេ រហូតដល់ម៉ោង ១១ និង ១៥ នាទី ព្រឹកថ្ងៃទី១៣កុម្ភៈនេះ។ នេះបើតាមអ្នកស្រី ចាន់ ដានី តំណាងស្ត្រីកម្មករ។
ថ្ងៃទី 13 កុម្ភៈ 2013
ដោយ: លី សិលា
CEN
ក្រុមកម្មកររោងចក្រកាត់ដេរ យ៉ុងវ៉ា១ និងយ៉ុងវ៉ា២ នៅក្រុងតាខ្មៅ ទីរួមខេត្តកណ្តាល បានធ្វើកូដកម្មតវ៉ា ដោយលើកបដា ចាក់មេក្រូ និងឈរបិទផ្លូវជាតិលេខ២១ ពីរង្វង់មូលតាខ្មៅ ទៅកាន់ផ្ទះសម្តេចនាយករដ្ឋមន្ត្រី ហ៊ុន សែន នៅតាំងក្រសាំង ចាប់តាំងពីព្រឹកម៉ោង ៦ និង ៣០ នាទី ព្រឹកថ្ងៃទី១២កុម្ភៈ ឆ្នាំ២០១៣។
ក៏ប៉ុន្តែការបិទកំណាត់ផ្លូវមុខរោងចក្រ យ៉ុងវ៉ា នោះ គឺមិនបង្កឲ្យចរាចរតាមផ្លូវជាតិលេខ២១ ត្រូវកាត់ផ្តាច់ទាំងស្រុងទេ ដោយសារតែតំបន់នោះមានផ្លូវវាង។ ដូច្នេះក្រុមកម្មករ ដែលបានជ្រើសយកជម្រើសបិទផ្លូវ ដើម្បីជំរុញឲ្យអាជ្ញាធរចេញមុខដោះស្រាយនោះ គឺមិនបានធ្វើឲ្យអាជ្ញាធរឈឺក្បាលប៉ុន្មានឡើយ។
យ៉ាងណាក៏ដោយ ក្នុងពេលកូដកម្មនោះ គេក៏ឃើញមានប៉ូលិស ប៉េអឹម និងអាជ្ញាធរមូលដ្ឋានចុះទៅច្រើនផងដែរ។ តែមិនមានវិធានការបង្ក្រាប ឬក៏បំបែកហ្វូងកម្មករឡើយ។
ក្រុមកម្មកររោងចក្រ យ៉ុងវ៉ា១ និងយ៉ុងវ៉ា២ បានធ្វើកូដកម្ម ទាមទារបើកប្រាក់ខែ នៅខែមករា និងប្រាក់អត្ថប្រយោជន៍នានា ដែលក្រុមហ៊ុនរោងចក្រកាត់ដេរ យ៉ុងវ៉ា១ និងយ៉ុងវ៉ា២ មិនបានបើកប្រាក់ខែឲ្យ ហើយមានដំណឹងថា ថៅកែរោងចក្របានរត់ចោល តាំងពីខែធ្នូ៕ S
There is nobody responsibility for people worked without pay, because those people lives in the lawless country of unsetting Government. So it is wasting their time to complian about get
pay with ignorant Goverment who lack ability to find the solution for its own people.