បន្ទាយមានជ័យ: តំណែងអភិបាលខេត្តបន្ទាយមានជ័យ ត្រូវបានផ្ទេរប្រគល់ភារកិច្ចហើយកាលពីថ្ងៃទី ២ ឧសភា ២០១៣ នាសាលប្រជុំសាលាខេត្តបន្ទាយមានជ័យ ដោយមានលោកឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន។
ថ្ងៃទី 3 ឧសភា 2013
ដោយ: សូផុន
CEN
លោក អ៊ុង អឿន ត្រូវបញ្ចប់មុខតំណែងជាអភិបាលខេត្តបន្ទាយមានជ័យ ហើយចូលកាន់តំណែងនេះវិញដោយលោក ទ្រី ណារិន អភិបាលរងខេត្តបន្ទាយមានជ័យ ឡើងជាអភិបាលខេត្តបន្ទាយមានជ័យ។ ប៉ុន្តែលោក អ៊ុង អឿន នៅជាប្រធានគណបក្សប្រជាជនកម្ពុជាខេត្តនេះដដែល។
លោក អ៊ុង អឿន អភិបាលខេត្តបន្ទាយមានជ័យ ដែលត្រូវបញ្ចប់មុខតំណែងអោយដឹងថា ក្នុងអាណត្តិដឹកនាំរដ្ឋបាលខេត្ត លោកផ្ទាល់រួមនឹងប្រធានក្រុមប្រឹក្សាខេត្ត សមាជិក អភិបាលរងខេត្ត , អភិបាល-អភិបាលរងស្រុក/ក្រុងនិងប្រធានអនុប្រធាន មន្ទីរ អង្គភាព/បញ្ជាការដ្ឋានក្នុងខេត្ត ពីឆ្នាំ២០០៨ ដល់បច្ចុប្បន្ន បានសម្រេចជោគជ័យលើការងារសំខាន់ៗ រួមមានការងារព្រំដែន , ការងារសន្តិសុខនិងសណ្ដាប់ធ្នាប់សង្គម , វិស័យកសិកម្ម , វិស័យឧស្សាហកម្ម , ជលផល , ព្រៃឈើ , ពន្ធដារ , សាធារណការនិងដឹកជញ្ជូន , អភិវឌ្ឍន៍ជនបទ , អប់រំ , សុខាភិបាល , ទេសចរណ៍ , កែលំអសោភ័ណភាពក្នុងក្រុង , ទំនាក់ទំនងសហប្រតិបត្តិការអន្តរជាតិ ។ល។ ក្នុងនោះបានប្រឹងប្រែងកែទម្រង់កាន់តែស៊ីជម្រៅ ទូលំទូលាយ គ្រប់មន្ទីរអង្គភាពស្រុក/ក្រុង ឃុំ/សង្កាត់ ។
លោក អែវ ប៊ុនថុល អគ្គនាយករងនៃអគ្គនាយករដ្ឋបាលមូលដ្ឋានក្រសួងមហាផ្ទៃ បានអានព្រះរាជក្រិត្យនិងអនុក្រិត ដែលបញ្ជាក់ថា លោក អ៊ុង អឿន ត្រូវបញ្ចប់តំណែងជាទីប្រឹក្សាផ្ទាល់សម្ដេចនាយករដ្ឋមន្ត្រីហ៊ុន សែន។ ឯលោក ទ្រី ណារិន អភិបាលរងខេត្ត ត្រូវតែងតាំងជាអភិបាលខេត្តបន្ទាយមានជ័យ និងបានតែងតាំង លោក ចុង ផែត និងលោក អ៊ឹម ភាន់សុផល ជាអភិបាលរងខេត្ត។ តែងតាំងថ្មីជាអភិបាលរងខេត្តបន្ទាយមានជ័យដែរ គឺលោក អ៊ុំ រាត្រី ពីអតីតអភិបាលក្រុងសិរីសោភ័ណ និងលោកស្រី ប៉ុក ណាឌី អតីតអភិបាលរងស្រុកមង្គលបូរី ។ ក្នុងនោះតែងតាំងលោក ឃូ ពៅ អភិបាលស្រុកស្វាយចេក , លោក លី សុវណ្ណារិទ្ធ អភិបាលស្រុកព្រះនេត្រព្រះ , លោក សេង គី អភិបាលស្រុកភ្នំស្រុក និងតែងតាំងថ្មី លោកស្រី ចាន់ ថេង អភិបាលរងឡើង ជាអភិបាលក្រុងសិរីសោភ័ណ។
លោក ទ្រី ណារិន អភិបាលថ្មីខេត្តបន្ទាយមានជ័យ បានប្ដេជ្ញាចិត្ត ៨ ចំណុចសំខាន់ៗ រួមមាន គោរពខ្ជាប់ខ្ជួនរដ្ឋធម្មនុញ្ញ ច្បាប់ បទបញ្ញាត្តិ បទបញ្ជាគោលនយោបាយ គោរពនិងប្រតិបត្តិច្បាប់ស្ដីពីការគ្រប់គ្រងរដ្ឋបាល ការពារបូរណភាពទឹកដី សន្ដិសុខសណ្ដាប់ធ្នាប់តាមព្រំដែននៃភូមិសាស្ត្រទទួលខុសត្រូវ លើកកម្ពស់សមត្ថភាពដើម្បីអនុវត្តគោលនយោបាយវិមជ្ឈការ និងវិសហមជ្ឈការ រឹតចំណងសាមគ្គីភាព ឯកភាពផ្ទៃក្នុង ខិតខំអស់កម្លាំងកាយចិត្ត ប្រាជ្ញា សា្មរតី បំរើជាតិមាតុភូមិ សហការនឹងដៃគូនានា អនុវត្តជោគជ័យ គោលនយោបាយចាស់សកម្មភាពថ្មី លើវិស័យដីធ្លី ជលផល សហការនឹង គ.ជ.ប ដើម្បីគាំទ្រដំណើរការបោះឆ្នោតជ្រើសរើសអ្នកតំណាងរាស្ត្រ និតិកាលទី៥ នៃរដ្ឋសភាអោយមានភាពត្រឹមត្រូវ យុត្តិធម៌ និងជឿទុកចិត្តបាន។
គួរបញ្ជាក់ថា លោក ទ្រី ណារិន អតីតយុវជនដ៏សកម្មនិងមានស្មាដៃលេចធ្លោជាច្រើន។ លោកធ្លាប់ជាចៅសង្កាត់និរោធ ខណ្ឌមានជ័យ រាជធានីភ្នំពេញ រួចជាអភិបាលរងខណ្ឌ៧មករា រាជធានីភ្នំពេញ។ លោកធ្លាប់ជាអភិបាលក្រុងប៉ោយប៉ែត និងមុននេះជាអភិបាលរងខេត្តបន្ទាយមានជ័យស្រាប់។
លោកនាយឧត្តមសេនីយ៍ ឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន មានប្រសាសន៍សាទរ និង ជូនពរដល់អភិបាលខេត្ត មន្ត្រីថ្នាក់ដឹកនាំ ខេត្តនិងស្រុក/ក្រុង នៅខេត្តបន្ទាយមានជ័យក្នុងអណត្តិទី២ រដ្ឋបាលខេត្ត/ស្រុក។
លោកឧបនាយករដ្ឋមន្ត្រី បានបញ្ជាក់ថា លោក អ៊ុង អឿន អភិបាលខេត្តនិងអ្នកស្រី នួម សុភ័ណ កាន់តំណែងពុំទាន់គ្រប់ឆ្នាំនៃអាណត្តិរដ្ឋបាលខេត្តរបស់ខ្លួន ប៉ុន្តែបានទៅឈរឈ្មោះជាបេក្ខជនតំណាងរាស្ត្រមណ្ឌលបន្ទាយមានជ័យ ទើបត្រូវផ្ទេរតំណែងទៅមន្ត្រីថ្មីដូច្នេះ។ តែលោក អ៊ុង អឿន នៅតែបន្តការងារដឹកនាំ អនុវត្តស្ដារនិងអភិវឌ្ឍន៍ខេត្តដោយនៅជាទីប្រឹក្សាផ្ទាល់សម្ដេចតេជោហ៊ុន សែន , ជាតំណាងរាស្ត្រនិងជាប្រធានគណបក្សប្រជាជនកម្ពុជាខេត្តបន្ទាយមានជ័យ។ ក្នុងនោះ លោកត្រូវបន្តការទាក់ទាញនូវប្រភពវិនិយោគបរទេសពីខេត្តសម្ព័ន្ធភាពនៃខេត្តខ្លួន នៃប្រទេសចិន , កូរ៉េខាងត្បូង , វៀតណាម , ថៃ ជាដើម ។
លោកឧបនាយករដ្ឋមន្ត្រីលើកពីសមិទ្ធផលសំខាន់របស់រាជរដ្ឋាភិបាលដឹកនាំដោយសម្ដេចនាយករដ្ឋមន្ត្រីហ៊ុន សែន ផ្សារភ្ជាប់មកទិសដៅបន្តដែលខេត្តត្រូវចូលរួមអនុវត្តនិងការស្វាគមន៍ដល់មន្ត្រីវ័យក្មេងមបំរើការងាររដ្ឋបាលនិងជំនាញនានាក្នុងខេត្ត។ ក្នុងនោះលោកឧបនាយករដ្ឋមន្ត្រី ស្វាគមន៍ ស្ត្រី ពីររូបជាអភិបាលរងខេត្តនិងអភិបាលក្រុងផង ។
ដោយអះអាងថាមានជំនឿជាក់លើការប្ដេជ្ញាចិត្តរបស់លោក ទ្រី ណារិន អភិបាលថ្មីខេត្តបន្ទាយមានជ័យ លោកឧបនាយករដ្ឋមន្ត្រី កែ គឹមយ៉ាន បញ្ជាក់ថា អាណត្តិលោក អ៊ុង អឿន ជាអភិបាលខេត្តបានជោគជ័យ លើការពារបូរណភាពទឹកដីក្នុងយុទ្ធសាស្ត្រការពារជាតិនិងការស្ដារអភិវឌ្ឍន៍ខេត្ត ហេតុនេះអភិបាលខេត្តថ្មីបន្តការងារនេះនិងការងារចំពោះមុខ និងចំពោះអនាគត ដូចជាផ្លូវជនបទ ភ្លើងអគ្គិសនី , ប្រឡាយប្រព័ន្ធធារាសាស្ត្រ ហេដ្ឋារចនាសម្ព័ន្ធអប់រំ សុខាភិបាល , អភិវឌ្ឍន៍និងពង្រឹងគុណភាពធនធានមនុស្ស , ដោះស្រាយទំនាស់ដីធ្លី និងពិនិត្យដោះស្រាយរាល់សំណូមពរពលរដ្ឋពាក់ព័ន្ធការប៉ះពាល់ដីស្រែ និងចម្ការ នឹងក្រុមហ៊ុនរដ្ឋបាលជលផល។ ប្រសិទ្ធភាពនៃការទប់ស្កាត់បង្ក្រាបបទល្មើសនានា រួមទាំងបទល្មើសព្រៃឈើ , នេសាទ ការអនុវត្តគោលនយោបាយចាស់សកម្មភាពថ្មី៕
ដូរពីគេញទៅគយ វាដៀតែក្នូច។