Friday, 02 August 2013
ម៉ៃ ទិត្យថារ៉ា
ភ្នំពេញ ប៉ុស្តិ៍
កណ្តាលៈ អ្នកភូមិ ដំរីឆ្លង ឃុំ ស្អាងភ្នំ ស្រុក ស្អាង ខេត្ដ កណ្ដាល ដែលនាំគ្នារារាំងឲ្យបិទការិយាល័យបោះឆ្នោតក្នុងឃុំនេះកាល ពីថ្ងៃទី២៨ ខែកក្កដា ព្រោះតែឃើញជនចម្លែកជាច្រើនមកបោះឆ្នោតខុសពីធម្មតា កំពុងតែបារម្ភនឹងទូរទស្សន៍បាយ័នផ្សាយចោទប្រកាន់ថា ពួកគាត់រារាំងដំណើរការបោះឆ្នោត ហើយនិងមានការស្រង់ឈ្មោះពួកគេពីសំណាក់អាជ្ញាធរមូលដ្ឋាន។
លោក លី ម៉េង អ្នកចូលរួមការតវ៉ាម្នាក់នៅថ្ងៃនោះបានឲ្យដឹងថា ពលរដ្ឋកំពុងតែខឹងសម្បានឹងការផ្សាយមួលបង្កាច់របស់ទូរទស្សន៍ បាយ័នដែលចោទអ្នកភូមិ ដំរីឆ្លង ថា មានចេតនារារាំងមិនឲ្យពលរដ្ឋនៅក្នុងភូមិទៅបោះឆ្នោត។ លោកនិយាយថា៖ «យើងមិនបានរារាំងពលរដ្ឋមិនឲ្យបោះឆ្នោតទេ តែមកពីមានមនុស្សជាច្រើននាក់ដែលមកបោះឆ្នោតមុខប្លែកៗ និងមានយួនក៏មកបោះឆ្នោតដែរ។ ព្រោះតែភាពមិនប្រក្រតីបែបនេះទើបពួកយើងស្នើសុំឲ្យបិទការិយាល័យមួយនេះ»។
លោកបន្តថា ពលរដ្ឋគ្រាន់តែចង់ឲ្យការបោះឆ្នោតនេះប្រព្រឹត្តទៅដោយយុត្តិធម៌តែប៉ុណ្ណោះ ពុំមានចេតនារារាំងមិនឲ្យគេបោះឆ្នោតនោះទេ។ លោកថា បច្ចុប្បន្នអ្នកភូមិខ្លះកំពុងតែមានការបារម្ភ នឹងការដើរស្រង់ឈ្មោះពីមន្ត្រីប្រជាការពារភូមិ រកអ្នកណាដែលចូលរួមតវ៉ានៅក្នុងថ្ងៃបោះឆ្នោតនោះ។ លោកថា ៖ «មិនដឹងថាគេយកឈ្មោះនោះទៅធ្វើអ្វីទេ»។
លោក តាត សាមួន អាយុ ៦៦ឆ្នាំ ឲ្យដឹងដែរថា មន្ត្រីប្រជាការពារភូមិបានដើរកត់ឈ្មោះពលរដ្ឋ ដោយពុំប្រាប់ពីមូលហេតុទេ គេគ្រាន់តែថានៅសល់ ១០ ឈ្មោះទៀត ប៉ុន្តែ មិនដឹងថាជាឈ្មោះអ្វីទេ។ លោកថា៖ «បើតាមខ្ញុំគិតប្រហែលជាគេដើរស្រង់ឈ្មោះ ១០ នាក់ទៀតដើម្បីចាប់ខ្លួន ពីព្រោះនៅថ្ងៃបោះឆ្នោតគេចាប់ពលរដ្ឋម្នាក់ ប៉ុន្តែល្ងាចឡើងគេដោះលែងវិញ»។
លោកបញ្ជាក់ថា កាលពីថ្ងៃទី២៨ ខែកក្កដា នៅការិយាល័យបោះឆ្នោតលេខ ១២០៤ នៅក្នុងភូមិ ដំរីឆ្លង ឃុំ ស្អាងភ្នំ មានភាពមិនប្រក្រតីព្រោះមានពលរដ្ឋប្លែកមុខជាច្រើនមកបោះឆ្នោត ទើបអ្នកភូមិនាំគ្នាតវ៉ាឲ្យគេបិទការិយាល័យបោះឆ្នោតមួយនោះ។ លោកនិយាយថា៖«ពួកយើងភ័យខ្លាចពីរឿងគេកត់ឈ្មោះ ប៉ុន្តែខឹងរឿងគេចោទប្រកាន់ពួកយើងតាមទូរទស្សន៍បាយ័ន»។
លោក គឹម ចាន់គីរី អភិបាលស្រុក ស្អាង បានឲ្យដឹងថា អ្នកនៅក្នុងភូមិអះអាងថា មានពលរដ្ឋប្លែកមុខនោះ គឺគេមានប័ណ្ណចុះឈ្មោះបោះឆ្នោតត្រឹមត្រូវ ពីព្រោះអ្នកទាំងនោះមកស្នាក់នៅធ្វើការក្នុងតំបន់នោះ រួចក៏ចុះឈ្មោះនៅទីនោះដើម្បីបោះឆ្នោតតែម្តង។ លោកបន្តថា បើយោងតាមច្បាប់បោះឆ្នោតគឺពុំខុសអ្វីនោះទេ។
លោកអភិបាលបញ្ជាក់ទៀតថា ៖«ខ្ញុំគិតថាការរារាំងនោះ គឺមានចេតនាតែម្តង ពីព្រោះអ្នកដែលរារាំងនោះគឺមកពីខាងក្រៅមិនមែនអ្នកនៅក្នុងភូមិទេ នេះគឺជាការញុះញង់ជាប្រព័ន្ធតែម្តងដែលធ្វើឲ្យការបោះឆ្នោតមានបញ្ហា»។
លោក គឹម ចាន់គីរី អះអាងដែរថា៖ «គិតមកដល់ពេលនេះ ពុំមានអ្នកណាដើរកត់ឈ្មោះពួកគាត់ទេហើយបើមានសូមបង្ហាញសមត្ថកិច្ចយើងមកថា តើអ្នកណាជាអ្នកកត់ឈ្មោះពួកគាត់»។
លោក គឹម ហុង ប្រធានគណៈកម្មាធិការបោះឆ្នោតខេត្ត កណ្តាលបានបញ្ជាក់ថា ការិយាល័យបោះឆ្នោតភូមិ ដំរីឆ្លង នៅក្នុងឃុំ ស្អាងភ្នំ ស្រុក ស្អាង មានឈ្មោះអ្នកបោះឆ្នោតក្នុងបញ្ជីចំនួន ២៥៨ នាក់ ប៉ុន្តែបានមកបោះឆ្នោតតែ ៨៦ នាក់ក៏មានបញ្ហាប៉ុន្តែសន្លឹកឆ្នោតនៅតែរាប់យកជាការដដែល។
លោកបញ្ជាក់ថា៖ «រឿងទាក់ទងនឹងការបិទស្ថានីយបោះឆ្នោតនោះ ខាងលោកមិនចាត់ការនោះទេ គឺឲ្យតំណាងគណបក្សនយោបាយនីមួយៗដាក់ពាក្យបណ្តឹងទៅ គ.ជ.ប។ ទាក់ទិនរឿងដើរស្រង់ឈ្មោះនោះ ខ្ញុំមិនដឹងទេ វាជាសមត្ថកិច្ចរបស់អាជ្ញាធរ»។
លោក ទិត្យ ថាវរិទ្ធ អគ្គនាយកទូរទស្សន៍ បាយ័នពុំអាចទាក់ទងធ្វើការបំភ្លឺតបនឹងការរិះគន់នេះបានទេ កាលពីម្សិលមិញ៕
ខ្ញុំគិតថានយោបាយគំរាមគំហែងលែងមានប្រសិទ្ធភាពហើយពេលនេះ នៅទីណាក៍ដោយនៅលើ ពិភពលោកបើមានកាគំរាមគំហែងកាន់តែច្រើននោះការរើបំរាស់កាន់តែខ្ពស់។ យើងឃើញហើយថា បក្សប្រជាជននៅអាណត្តិនេះធ្លាក់កៅអីច្រើន តើនេះព្រោះតែអ្វី? មិនព្រោះតែការគំរាមគំហែងបំភិត បំភ័យទេឬ។ ដូច្នេះមានតែធ្វើអំពើរល្អទៅប្រជាជននោះទេទើបសង្ឃឹមថាបានសន្លឹកឆ្នោតពីគាត់ ព្រោះពួកគាត់យល់ច្បាស់ហើយថាសេរីភាពនិងយុត្តិធម៌គឺជាសេចក្តីប្រាថ្នារបស់ពួកគាត់តែមួយគត់ ស្អប់ខ្ពើមការគំរាមគំហែង។ នេះសរបញ្ជាក់ឲ្យឃើញថាប្រទេសប្រជាធិបតេយ្យគេត្រូវការសេរីភាព មិនមែនការគំរាមគំហែងនោះទេ គេមិនអាចធ្វើនយោបាយផ្តាច់ការក្នុងប្រទេសសេរីបាននោះទេ។
នេះជាការសងសឹកនយោបាយហើយ!!!
បក្សប្រជាជនជាសន្តានក្រោយរបស់ខ្មែរក្រហម ហេតុនេះ របៀបគ្រប់គ្រងអំណាចស្រដៀងគ្នានឹងពួកប៉ុលពត គឺផ្តាច់ការ ដូច្នេះ “អ្នកណាដែលហ៊ានប្រឆាំងបក្ស នឹងចាត់ទុកជាខ្មាំងដែលត្រូវតែកំទេច ” គ្រាន់តែ របបបច្ចុប្បន្ននេះ ផ្លាស់ប្តូររូបភាពពី”ការកាប់សម្លាប់ដោយផ្ទាល់ “មកជា “ការចាប់ដាក់គុក” វិញតែប៉ុណ្ណោះ ។
ពួកអ្នកអែងកំពុងដុតកំហឹងប្រជាពលរដ្ធអោយកាន់តែខ្លាំងទៀតហើយ ។ អ្នកអែង នឹងទទួលលទ្ធផលគួរអោយជួរចត់វិញជាមិនខានចាំមើលចុះ ។
ចប់ហើយស្រុកយើង គ្មានថ្ងៃរើរួចខ្លួនពីពួកកុម្មុយនីស្ត និងរបបកុម្មុយនីស្តផ្តាច់ការទេ!!!