ថ្ងៃ ចន្ទ 05 សីហា 2013
ដោយ គឹម យុទ្ធណា
RFI
ជាបន្តបន្ទាប់គ្នា នារយៈពេលចុងក្រោយនេះ មន្ត្រីជាន់ខ្ពស់គណបក្សប្រជាជនកម្ពុជាដែលកំពុងតែកាន់អំណាចជារដ្ឋាភិបាលចាំផ្ទះ បានទទួលជួបជាមួយនឹងមន្ត្រីការទូតជាច្រើនប្រទេសប្រចាំនៅកម្ពុជា។ ជំនួបនេះគឺត្រូវបានធ្វើឡើង បន្ទាប់ពីកម្ពុជាបានបញ្ចប់ការរៀបចំការបោះឆ្នោតថ្នាក់ជាតិរបស់ខ្លួន កាលពីពេលកន្លងទៅថ្មីៗនេះ និងខណៈដែលលទ្ធផលជាផ្លូវការនៃការបោះឆ្នោតមិនទាន់ចេញជាផ្លូវការនៅឡើយនោះ។
រដ្ឋមន្ត្រីក្រសួងមហាផ្ទៃ លោក ស ខេង ថ្លែងទៅកាន់អ្នកសារព័ត៌មាន នៅថ្ងៃចន្ទនេះ។ RFI/Siv Channa
ការទទួលជួបមន្ត្រីការទូតបរទេសទាំងអស់នោះ គឺបានរៀបចំឡើងពីសំណាក់មន្ត្រីជាន់ខ្ពស់គណបក្សប្រជាជនកម្ពុជា មានដូចជាលោក ហោ ណាំហុង ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេស និងលោក ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ ជាដើម។ គោលបំណងនៃការទទួលជួបមន្ត្រីការទូតបរទេស គឺដើម្បីនិយាយពីបច្ចុប្បន្នភាពនយោបាយ បញ្ហាសន្តិសុខ ដំណើរការទូទៅនៃការបោះឆ្នោត និងភាពមិនប្រក្រតីជុំវិញលទ្ធផលបោះឆ្នោតដែលប្រកាសឡើងដោយគណបក្សនីមួយៗ ។
ជាក់ស្តែង នៅព្រឹកថ្ងៃចន្ទនេះ ថ្លែងនៅចំពោះមុខក្រុមអ្នកសារព័ត៌មាន ក្រោយពីជំនួបការទូតមួយ នៅទីស្តីការក្រសួងមហាផ្ទៃ ជាមួយលោក Serge Mostura ឯកអគ្គរដ្ឋទូតបារាំងប្រចាំនៅកម្ពុជា លោក ស ខេង បានថ្លែងឲ្យដឹងថា នារយៈពេលប៉ុន្មានថ្ងៃកន្លងមកនេះលោកបានទទួលជួបមន្ត្រីទូតជាង១០ប្រទេសហើយ មកពីទូតបារាំង អង់គ្លេស អាមេរិក សហភាពអឺរ៉ុប និងបណ្តាទូតជាច្រើនទៀត។
លោក ស ខេង បន្តថា ក្នុងការជួបជាមួយមន្ត្រីទូតបរទេសទាំងអស់នោះ លោកបាននិយាយអំពីស្ថានភាពនយោបាយ និងបញ្ហាសន្តិសុខ នៅក្រោយការបោះឆ្នោត ពិសេសការចោទប្រកាន់ភាពមិនប្រក្រតីនៃការបោះឆ្នោត ដែលលទ្ធផលជាផ្លូវការនៅមិនទាន់ចេញនៅឡើយនោះ។ បន្ថែមពីលើនោះ លោកបានបញ្ជាក់ថា ការជជែកពីការស្វែងរកដំណោះស្រាយទៅលើបញ្ហានេះ គឺត្រូវបានលើកយកពិភាក្សាផងដែរ។ បើតាមលោក ស ខេង ការដោះស្រាយបញ្ហា គឺត្រូវផ្អែកលើវិធានការរក្សាសុខសន្តិភាព ស្ថិរភាពនយោបាយ រក្សាសណ្តាប់ធ្នាប់សង្គម ការគោរពគោលការណ៏ច្បាប់ និងការសម្របសម្រួលគ្នាដោយសន្តិវិធី។
រដ្ឋមន្ត្រីក្រសួងមហាផ្ទៃក៏បានបញ្ជាក់ជំហរប្រាប់អ្នកការទូតបរទេសថា យើងមិនអាចធ្វើអ្វីដែលខុសពីគោលការណ៏ច្បាប់បានទេ បើមិនដូច្នោះ វានាំឲ្យប៉ះពាល់ដល់ផលប្រយោជន៏ប្រជាពលរដ្ឋ ពិសេសនៅក្រោយការបោះឆ្នោតនេះ ដែលប្រជាពលរដ្ឋសង្ឃឹម និងជឿជាក់ថា សុខសន្តិភាពកម្ពុជាមានដំណើរការទៅមុខ។ លោកបានលើកជាក្តីព្រួយបារម្ភថា បើគណបក្សនយោបាយដែលទទួលការគាំទ្រ និងផ្តល់សេចក្តីទុកចិត្តពីសំណាក់ប្រជាពលរដ្ឋ មិនមានការស្រុះស្រួលគ្នា នោះវានឹងនាំឲ្យពួកគាត់មានការខកចិត្តក្នុងដំណើរនៅកម្ពុជានេះ។
បើយោងតាម លោក ស ខេង មន្ត្រីការទូតនានាបានសម្តែងការយកចិត្តទុកដាក់ទាក់ទងនឹងការពង្រឹងសុខសន្តិភាព ហើយនិងការដោះស្រាយបញ្ហានានា ដែលត្រូវធ្វើឡើងដោយសន្តិវិធី និងស្របតាមច្បាប់ជាធរមាន។ គួរកត់សម្គាល់ថា យុទ្ធនាការនយោបាយការទូតរបស់គណបក្សកាន់អំណាចបានធ្វើឡើង ខណៈដែលបក្សប្រឆាំងកំពុងបដិសេធលទ្ធផលបោះឆ្នោត និងទាមទារឲ្យស៊ើបអង្កេតដោយឯករាជ្យអំពីភាពមិនប្រក្រតីនានាក្នុងពេលបោះឆ្នោត៕
សួរថាតើ ប័ណ្ណបោះឆ្នោតទាំងអស់ប៉ុន្មាន? ប្រើក្នុងពេលបោះឆ្នោតអស់ប៉ុន្មាន?
តើ ប័ណ្ណបោះឆ្នោតទាំងអស់នៅសល់ប៉ុន្មាន?
សរុបឆ្នោតទាំងប្រើប្រាស់នឹងនៅសល់ គ្រប់ចំនួនដែរឬទេ?
មើលមុខអាសំគមឃ្វាលគោជាមួយខ្ញុំ គេធ្វើលោកធំ ក្លាយជាអ្នកមានគេលែងស្គាល់អ្នកក្រកាលនៅឃ្វាលគោជាមួយគ្នាហើយ…….!!!
The joint committee for the investigation of electoral irregularities can not be formed and proceeded unless there is an involvement from the independent organizations and under the observation from the United Nation representatives.