Tuesday, 20 August 2013
ឆាយ ច័ន្ទនីដា
ភ្នំពេញ ប៉ុស្តិ៍
ភ្នំពេញៈ អាជ្ញាធរសង្កាត់ ទឹកល្អក់ ១ បានឲ្យដឹងកាលពីម្សិលមិញថា ប្រជាពលរដ្ឋក្នុងសង្កាត់នេះ ចំនួន ១០០០ នាក់ បានផ្ដិតមេដៃលើញត្តិគាំទ្រលទ្ធផលបឋមនៃការបោះឆ្នោត ខណៈដែលគណបក្សប្រឆាំង កំពុងតែធ្វើការតវ៉ាតាមផ្លូវច្បាប់។
លោក ប៉ិច សុឃឿន ចៅសង្កាត់ ទឹកល្អក់ ១ ក្នុងខណ្ឌ ទួលគោក បានឲ្យដឹងថា នៅក្នុងចំណោមពលរដ្ឋទាំង ៦០០០ នាក់ ដែលបានបោះឆ្នោតក្នុងសង្កាត់របស់លោក មានពលរដ្ឋប្រមាណជា ១០០០ នាក់ បានចុះហត្ថលេខាគាំទ្រលទ្ធផលបោះឆ្នោតបឋម។លោកថ្លែងថា៖ «ការងារយើង គឺមិនបង្ខំឲ្យគាត់ឲ្យគាំទ្រទេ គឺស្ថិតលើគាត់។ យើងមានលិខិត ហើយបើគាត់គាំទ្រ គាត់អាចជួបមេភូមិ និងចុះហត្ថលេខាតែម្តង។ បើគេមិនគាំទ្រក៏យើងមិនបង្ខំអ្វីដែរ»។
សកម្មភាពរបស់អាជ្ញាធរបែបនេះ ត្រូវបានមជ្ឈមណ្ឌលសិទ្ធិមនុស្សកម្ពុជា ថ្លែងក្នុងសេចក្តីថ្លែងការណ៍មួយ កាលពីម្សិលមិញថា ខ្លួនបានទទួលព័ត៌មានថា មានពលរដ្ឋជាច្រើន ក្នុងសង្កាត់ ទឹកល្អក់ ១ ត្រូវបានអាជ្ញាធរ «គាបសង្កត់ឲ្យចុះហត្ថលេខាលើញត្តិគាំទ្រ» លទ្ធផលបោះឆ្នោត ដែលមជ្ឈមណ្ឌលនេះយល់ថា ជាសកម្មភាព ដែលធ្វើឡើងពុំស្របតាមគោលការណ៍បោះឆ្នោតសេរី និង យុត្តិធម៌ ហើយបង្កឲ្យមាន «ការភ័យខ្លាចដល់ពលរដ្ឋ» នៅក្នុងសង្កាត់ ទឹកល្អក់ ១។
មជ្ឈមណ្ឌលសិទ្ធិមនុស្សកម្ពុជា សរសេរថា៖ «ញត្តិនេះ ពិតជាត្រឹមត្រូវតាមផ្លូវច្បាប់ បើពលរដ្ឋបានផ្តួចផ្តើមសរសេរដោយខ្លួនឯង ដោយមិនមានការភិតភ័យ។ ប៉ុន្តែករណីអាជ្ញាធរសរសេរញត្តិហើយប្រាប់ពលរដ្ឋឲ្យចុះហត្ថលេខាគាំទ្រ ធ្វើឲ្យមានការភ័យខ្លាចដល់ពលរដ្ឋជាច្រើននាក់ ដែលគិតថា បើគាត់មិនចុះហត្ថលេខាគាំទ្រ នោះគ្រួសារគាត់នឹងប្រឈមគ្រោះថ្នាក់»។
លោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជាបាននិយាយថា៖ «អាកប្បកិរិយា របស់អាជ្ញាធរបែបនេះ ជាការនិយាយជំនួសម្ចាស់ឆ្នោត ដោយបង្ខំឲ្យពួកគេ ក្រោកឈរឡើងគាំទ្រលទ្ធផលដែលមានការតវ៉ា ហើយការធ្វើបែបនេះ មិនមានប្រយោជន៍អ្វីឡើយតែជាការបន្ថែមភ្លើងទៅវិញទេ»។
មិនមែនមានតែនៅសង្កាត់ ទឹកល្អក់ ១ តែមួយនោះទេ ដែលអាជ្ញាធរ បានដើរប្រមូលស្នាមមេដៃ ឬហត្ថលេខាពីប្រជាពលរដ្ឋ ឲ្យគាំទ្រលទ្ធផលនៃការបោះឆ្នោតនោះ នៅសង្កាត់ផ្សេងៗទៀត និងនៅតាមផ្សារជាច្រើន ក្នុងរាជធានីភ្នំពេញ ព្រមទាំងនៅតាមបណ្តាខេត្តនានា ដូចករណីមួយនៅខេត្ត សៀមរាបដែលក្រោយការប្រកាសលទ្ធផលបណ្តោះអាសន្ន កាលពីថ្ងៃទី ១២ សីហាភ្លាម ប្រធានមន្ទីរទេសចរណ៍ខេត្តបានប្រកាសហៅសមាគមទេសចរណ៍នានា ឲ្យមកផ្តិតមេដៃ ឬចុះហត្ថលេខា គាំទ្រលទ្ធផលបោះឆ្នោត ដែលធ្វើឲ្យប្រជាពលរដ្ឋ និងអង្គការសង្គមស៊ីវិលជាច្រើនបានរិះគន់សកម្មភាពនេះ ថាជាការបំភិតបំភ័យថ្មីមួយទៀត។
គណបក្សប្រជាជនបានប្រកាសចាប់តាំងពីយប់ថ្ងៃទី២៨ ខែ កក្កដា តែប៉ុន្មានម៉ោងក្រោយពីការបោះឆ្នោតមកថា ខ្លួនទទួលបាន ៦៨ អាសនៈ ហើយគណបក្សសង្គ្រោះជាតិដែលជាគូប្រជែងទទួលបាន ៥៥ អាសនៈ។ ប៉ុន្តែគណបក្សសង្គ្រោះជាតិ បានប្រកាសនៅពេលក្រោយមកថា ខ្លួនទទួលបាន ៦៣ អាសនៈ ហើយគណបក្សប្រជាជន ទទួលបាន ៦០ អាសនៈ។ នៅពេលនេះគណបក្សប្រឆាំងកំពុងតែធ្វើការតវ៉ាទាមទារឲ្យមានការផ្ទៀងផ្ទាត់លទ្ធផលនៃការបោះឆ្នោតនេះ៕
ហេតុអីបានជាចាំបាច់បិទទ្វារមិនឲ្យប្រជាជនឈរមើលការរាប់សន្លឹកឆ្នោតដូចនៅកន្លែងដទៃទៀត
នៅក្នុងរដ្ឋធានី និងខេត្តមួយចំនួន។ ព្រោះតែចង់បង្កើនល្បិចកលដាក់លើឆន្ទៈប្រជាជនឬ?
====================
ដើម្បីឲ្យអស់មន្ទឹលសង្ស័យ នៅពេលយើងធ្វើប៉ាតុកម្មទាមទាយុត្តិធម៌និងសិទ្ធិសេរីភាព ពិសេសគឺ
សម្លេងសន្លឹកឆ្នោតដែលឈ្នះរបស់គណៈបក្សសង្គ្រោះជាតិ យើងសូមអំពាវនាវរាល់ប្រជាជនទាំង
អស់ដែលស្ម័គ្រចិត្តចូលរួមក្នុងប៉ាតុកម្មនោះផ្តាច់ជ្ញារចិត្តទាំងអស់គ្នាកុំប្រើអាវុធ កាំបិទ ពូថៅ ឬគប់
ចោលដុំថ្មទៅលើក្រុមអ្នកដែលមករារាំងយើងឲ្យសោះ គឺយើងគ្រាន់តែស្រែកនិងពោលពាក្យចង់
បានតំណោះស្រាយយុត្តិធម៌ដោយសន្តិភាព ដោយឲ្យរដ្ឋាភិបាលនិងក្រុមគ.ជ.ប អនុវត្តឲ្យមានក្រម
សិលធម៌ និងតម្លាភាពនៅចំពោះមុខប្រជាជនទទូទាំងប្រទេស។ គឺយើងធ្វើប៉ាតុកម្មដោយអហឹង្សា
ទាំងអស់គ្នា រួចហើយយើងចាំឃ្លាំមើលថាតើក្រុមណា បក្សណា កងកម្លាំងសមត្ថកិច្ចណាដែល
ហ៊ានប្រើអំពើហឹង្សាមកដាក់លើប្រជាជនយើងមុនគេ។ យើងចងចាំថាទោះជាយ៉ាងណាក៏ដោយ
ក៏យើងមិនប្រើហឹង្សាដាក់ពួកជនពាលទាំងនោះវិញដែរ។ យើងទុកឲ្យអ្នកសង្កេតការជាតិ និង
អន្តរជាតិគេមើលថាក្រុមណាផ្តាច់ការ ប្រហារជាតិសាសន៍របស់ខ្លួន! ពេលនោះយើងនិងឃើញ
ការពិតច្បាស់ជាមិនខាន។ យើងចាំមើលថាតើកងកម្លាំងប្រដាប់អាវុធគ្រប់ប្រភេទដែលត្រៀម
បំរុងកំចាត់ក្រុមប៉ាតុករយើងនេះគេហ៊ានលើដៃវាយប្រហារយើងក្នុងភាពសន្តិភាពនេះទេ។
យើងជឿជាក់ថាពិតជាមានក្រុមមនុស្សខិលខូច មនុស្សពាលចេញមុខនិងញុះញុងឲ្យកង
កម្លាំងទាំងនោះធ្វើសកម្មភាពមកលើប៉ាតុករយើងមិនខាន។ ទទន្ទឹមនិងនេះយើងក៏ជឿជាក់
យ៉ាងមុតមាំថាក៏មានក្រុមកងកម្លាំងប្រដាប់អាវុធដែលស្រឡាញ់ជាតិ ស្រឡាញ់សិទ្ធិសេរីភាព
ប្រាកដជាចេញមកការពារយើងមិនខាន ។ គឺចេញពីក្រុមដែលមករារាំងយើងនិងតែម្តង ហើយ
ប្រហែលជាពួកគេមិនប្រណីដល់ពួកដែលចេញមុខនិងញុះញុងពួកគេឲ្យមកប្រហារយើងផង
ក៏មិនដឹង។ នេះគេហៅថា ពេលវេលាកាំបិតចិតដងឯងហើយ!
ដូចនេះយើងជាប៉ាតុករស្នេហាជាតិ ស្នេហាប្រទេសជាតិ និងព្រះមហាក្សត្រត្រូវប្រកាន់ធម៌ស្ងប់
មិនតតាំង អ្វីទាំងអស់ គឺយើងគ្រាន់តែកាន់បដា ពាក្យស្លោក និងស្រែករកសន្តិភាព រកយុត្តិធម៌
តែប៉ុណ្ណោះបានហើយ! ។ អំពើល្អ និងភាពយុត្តិធម៌នឹងកើតមានដល់យើងមិនខាន! ជ័យយោ
ប្រជាជនខ្មែរ! ជ័យយោព្រះរាជាណាចក្រកម្ពុជា! ជ័យយោព្រះមហាក្សត្រ! ជ័យយោសិទ្ធិសេរីភាព!
ជ័យយោយុត្តិធម៌!