ថ្ងៃ ចន្ទ 23 កញ្ញា 2013
ដោយ សឿន វឌ្ឍនា
RFI
ក្រុមយុវជនដើម្បីសន្តិភាព ព្រះសង្ឃ និងសកម្មជនដីធ្លីមួយចំនួន បានដង្ហែក្បួនស្វែងរកសន្តិភាព និងយុត្តិធម៌ក្នុងសង្គមម្ដងទៀត ខណៈពេលដែលនយោបាយកម្ពុជាកំពុងជួបប្រទះនឹងភាពតានតឹង និងក្រោយពេលមានហេតុការណ៍ហិង្សា ពីសំណាក់សមត្ថកិច្ច ទៅលើប្រជាជន អ្នកឃ្លាំមើលសិទ្ធិមនុស្ស និងអ្នកសារព័ត៌មាន កាលពីយប់ថ្ងៃអាទិត្យម្សិលមិញ។
សកម្មជនដីធ្លីបឹងកក់ និងបុរីកីឡាធ្វើកូដកម្មអត់អាហារនៅវត្តភ្នំ ថ្ងៃអាទិត្យទី២២ កញ្ញា ២០១៣។ CHRAC
នៅល្ងាចថ្ងៃចន្ទទី២៣ កញ្ញានេះ យុវជន ព្រះសង្ឃ និងសកម្មជនដីធ្លីប្រមាណ ១០០នាក់ បានដង្ហែក្បួនស្វែងរកសន្តិភាព និងយុត្តិធម៌សង្គមជាថ្មីម្ដងទៀត ពីវត្តភ្នំទៅកាន់ព្រះបរមរាជវាំងតាមបណ្ដោយផ្លូវព្រះស៊ីសុវត្ថិ មាត់ទន្លេ។
លោក អឿ ណារិត អ្នកសម្របសម្រួលយុវជនដើម្បីសន្តិភាព បានប្រាប់វិទ្យុអន្តរជាតិឲ្យដឹងថា ការដង្ហែក្បួននេះធ្វើឡើងដើម្បីទាមទាររកយុត្តិធម៌ និងជំទាស់ទៅនឹងដំណើរការរដ្ឋសភាជាលក្ខណៈឯកបក្សរបស់គណបក្សប្រជាជនកម្ពុជា ព្រមទាំងទាមទារកុំឲ្យកងកម្លាំងប្រដាប់អាវុធ ប្រព្រឹត្តអំពើហិង្សាទៅលើប្រជាពលរដ្ឋស្លូតត្រង់តទៅទៀត។
អ្នកសម្របសម្រួលយុវជនដើម្បីសន្តិភាពរូបនេះ បញ្ជាក់ថា ចំនួនក្រុមយុវជន និងប្រជាជនដែលចូលរួមដង្ហែក្បួនសន្តិភាព មានការថយចុះ ដោយសារប្រជាជនមានការភ័យខ្លាចចំពោះការបង្ក្រាបពីសំណាក់កងកម្លាំងសមត្ថកិច្ច។
គួររម្លឹកថា កាលពីយប់ថ្ងៃអាទិត្យទី ២២ កញ្ញាម្សិលមិញ អាជ្ញាធរសមត្ថកិច្ចចំរុះបានបង្កឲ្យមនុស្សមិនតិចជាង ១២នាក់រងរបួស ធ្ងន់ និងស្រាល ក្នុងការបំបែកកូដកម្មបង្អត់អាហាររបស់សកម្មជនដីធ្លីបឹងកក់ និងបុរីកីឡា នៅក្នុងបរិវេណរមណីយដ្ឋានវត្តភ្នំ។ ក្នុងចំណោមអ្នករងរបួសទាំងអស់ ក្នុងនោះក៏មានអ្នកសារព័ត៌មាន និងអ្នកឃ្លាំមើលសិទ្ធិមនុស្សផងដែរ។
ឆ្លើយតបទៅនឹងអំពើហិង្សានេះ គណៈកម្មាធិការប្រព្រឹត្តិកម្ម ក្រុមការងារពិសេសសិទ្ធិលំនៅដ្ឋាន និងគណៈកម្មាធិការខុមហ្វ្រែល បានចេញសេចក្តីថ្លែងការណ៏រួមគ្នាមួយ ថ្កោលទោសចំពោះទង្វើរបស់កងកម្លាំងចម្រុះរាជធានីភ្នំពេញ ដែលបានប្រដាប់ដោយខែល ដំបងឆក់ ចំពាម និងប្រដាប់ឆក់ ថែមទាំងបានដឹកនាំមនុស្សអនាចារមួយក្រុមមកវាយប្រហារលើអ្នកភូមិបឹងកក់ និងបូរីកីឡា ក្នុងពេលដែលពួកគាត់កំពុងធ្វើកូដកម្មបង្អត់អាហារនៅរមណីយដ្ឋានវត្តភ្នំ។ សេចក្តីថ្លែងការណ៏នេះចោទថា ទាំងនេះ គឺជាការរំលោភសិទ្ធមនុស្សដ៏ធ្ងន់ធ្ងរ ហើយរដ្ឋាភិបាលគួរតែដាក់ទោសជនដែលប្រព្រឹត្តទាំងនោះ។
គួរបញ្ជាក់ថា ក្បួនដង្ហែសន្តិភាពបានបញ្ឈប់នៅមុខរបាំងលួសបន្លារបស់ក្រុមសមត្ថកិច្ច នៅម្ដុំព្រះអង្គដង្កើរ។ មុននឹងរំសាយក្បួន ព្រះសង្ឃបានគង់សូត្រធម៌នៅទីនោះ និងមានសង្ឃដីការទៅកាន់ក្រុមសមត្ថកិច្ច ឲ្យឈប់ប្រើប្រាស់អំពើហិង្សាលើប្រជាជន៕
១. ពួកវាប្រជុំ ពួកវារាយបន្លាលួស រំខានប្រជារាស្រ្ត ស្ទះគ្រប់តែផ្លូវ
២. ប្រជារាស្រ្តប្រមាណបួនដប់នាក់ប្រជុំ ពួកវាធ្វើបាបគេ។ គ្រាន់តែមួយយប់ របួសជិត១០នាក់។
៣. អូហ៍ អាមួយនេះចរិកវាឃោឃៅមិនកែសោះ អោយវាធ្វើនាយករដ្ឋមន្រ្តីបន្លាលួសបន្តទៅទៀតទៅ!