Tuesday, 24 September 2013
សេត គឹមសឿន
ភ្នំពេញ ប៉ុស្តិ៍
ភ្នំពេញៈ តារាចម្រៀងលំដាប់កំពូលរបស់កម្ពុជាលោក ខេមរៈ សេរីមន្ត ទើបតែត្រឡប់មកពីប្រទេសបារាំងកាលពីពេលថ្មីៗនេះ ក្រោយពេលលោកបានចំណាយពេលមួយចំនួននៅក្នុងរដូវភ្លៀងនេះ ដើម្បីចេញច្រៀងក្នុងពិធីមង្គលការគេនៅប្រទេសបារាំងក្នុងតម្លៃខ្លួនមួយខ្ពស់។
ទោះបីជាមិនទាន់ទទួលបានសំណងប្រាក់ពីក្រុមហ៊ុនបង្កគ្រោះថ្នាក់ចរាចរណ៍ដែលធ្វើឲ្យរថយន្តតម្លៃរាប់ម៉ឺនដុល្លាររបស់លោកខូចខ្ទេចទាំងស្រុង ហើយនៅពេលនេះជារដូវភ្លៀងក្តី តែសម្រាប់តារាចម្រៀង ខេមរៈ សេរីមន្ត ហាក់ដូចជាមិនមានហានិភ័យនៃប្រាក់ចំណូលឡើយ ខណៈដែលថ្មីៗនេះលោកឆក់បានឱកាសចេញច្រៀងក្នុងពិធីមង្គលការគេនៅប្រទេសបារាំងដែលតាមប្រភពបានឲ្យដឹងថា តារារូបនេះត្រូវបានគេធានារ៉ាប់រងសព្វបែបយ៉ាងជាមួយនឹងតម្លៃខ្លួនមួយខ្ពស់។
លោក ខេមរៈ ភារុណ បងប្រុសបង្កើតរបស់ខេមរៈ សេរីមន្ត បាននិយាយថា៖«សេរីមន្ត បានចេញទៅច្រៀងនៅក្នុងពិធីមង្គលការគេមួយនៅបារាំងហ្នឹង កាលពីថ្ងៃទី១១ កញ្ញា កន្លងមកនេះ ហើយទើបតែត្រឡប់មកដល់វិញកាលពីថ្ងៃទី១៦ កញ្ញាថ្មីៗនេះ»។ លោកបានបន្តថា៖«សេរីមន្ត គេទៅនោះគឺតាមការអញ្ជើញរបស់គ្រួសារមួយគេរៀបការកូន ហើយគេនោះស្គាល់ពូរបស់ខ្ញុំនៅបារាំងហ្នឹង ដូច្នេះគេក៏អញ្ជើញតាមពូរបស់ខ្ញុំហ្នឹង»។
ជាមួយនឹងការចំណាយពេលខ្លីជិះយន្តហោះទៅច្រៀងក្នុងពិធីអាពាហ៍ពិពាហ៍គេនៅបារាំងមួយភ្លែតក៏មកវិញនេះ បើតាមការបង្ហើបរបស់ប្រភពកៀកកិតនឹងតារាចម្រៀងល្បីលំដាប់ប្រទេសរូបនេះបានឲ្យដឹងថា គ្រួសារដែលអញ្ជើញរូបគេទៅច្រៀងនៅក្នុងពិធីមង្គលការនេះ គឺជាគ្រួសារខ្មែរដ៏ស្តុកស្តម្ភមួយនៅប្រទេសបារាំង ហើយនៅក្នុងដំណើរចេញច្រៀងនោះ សេរីមន្ត បានទទួលការទំនុកបម្រុងសព្វបែបយ៉ាង ជាមួយនឹងប្រាក់តម្លៃខ្លួនខ្ពស់។ តែយ៉ាងណាចំពោះបញ្ហានេះលោក ខេមរៈ ភារុណ ហាក់ស្ទាក់ស្ទើរក្នុងការបង្ហើបរឿងនេះ។
ដោយចំណាយពេលគិតបន្តិចលោក ភារុណ បាននិយាយទាំងសំណើចថា៖«នៅក្នុងដំណើរទៅច្រៀងហ្នឹង គឺគេរៀបចំចំណាយឲ្យយើងសព្វយ៉ាងទាំងថ្លៃសំបុត្រយន្តហោះ ការស្នាក់នៅហូបចុក ហើយរឿងតម្លៃខ្លួនវិញមិនអាចប្រាប់បានទេតែធម្មតាការចេញឆ្លងដែនអ៊ីចឹងគឺច្រើនជាងធម្មតា»។
ទោះបីជារដូវភ្លៀងដែលសិល្បករមួយចំនួនបានហៅថា ជារដូវដេកស៊ីលុយចាស់ក្តី តែលោក ខេមរៈ ភារុណ បានឲ្យដឹងថា ខេមរៈ សេរីមន្ត កំពុងរវល់ជាមួយនឹងការសម្រុកថតភាពយន្តខ្នាតធំរបស់សាន់ដេ ក្នុងរឿង «ព្រាយក្បាលប្រាំបី» ដើម្បីឲ្យឆាប់ចប់ ខណៈដែលរដូវកើបប្រាក់នឹងឈានចូលមកដល់នាពេលឆាប់ៗនេះ។
លោក ភារុណ និយាយថា៖«នៅពេលនេះគេថតបានច្រើនហើយ អ៊ីចឹងអាចនឹងចប់ក្នុងពេលដ៏ខ្លីនេះ ដើម្បីត្រៀមខ្លួនទទួលការងារដទៃទៀត»៕
គេជិះរាប់លាននាក់ហើយចុះទៅចាប់អារម្មណ៏អីតារាហ្នឹង!!!!!!
គេជិះរាប់លាននាក់ហើយ(មិនឮសូរមាត់១ម៉ាត់) ចុះទៅចាប់អារម្មណ៏អីតារាហ្នឹង!!!!!! មានតែអែងឆ្កួតដែរ!!!!