ដោយ៖ ឡាយ សាមាន
ថ្ងៃចន្ទ ទី21 ខែតុលា ឆ្នាំ2013
http://vodhotnews.com
កញ្ញា ពៅ បញ្ញាពេជ្រ (កណ្តាល) / រូបថតដោយ ឡាយ សាមាន
អតីតតារាចម្រៀងរបស់ផលិតកម្មរស្មីហង្សមាស ដែលរងគ្រោះដោយសារការបាញ់ប្រហារកាលពីឆ្នាំ២០០៧ កញ្ញា ពៅ បញ្ញាពេជ្រ ប្រកាសថា ខ្លួនមានបំណងចង់ចូលប្រឡូកវិស័យសិល្បៈវិញ បន្ទាប់ពីរូបនាង បានឃ្លាតឆ្ងាយពីទស្សនិកជនអស់រយៈពេលជិត៦ឆ្នាំ។
កញ្ញា ពៅ បញ្ញា ពេជ្រ ប្រាប់VODក្នុងកម្មវិធីតន្ត្រីសប្បុរសធម៌កាលពីថ្ងៃអាទិត្យ ទី២០ ខែតុលា រូបនាង ស្វាគមន៍ចំពោះបណ្តាផលិតកម្ម ឬ ក្រុមហ៊ុនណា ដែលចង់បានរូបនាងធ្វើជាតារាចម្រៀង។ កញ្ញាបន្តថា បើទោះជានាងមិនអាចក្រោកដើរបាន ប៉ុន្តែនាងនៅអាចច្រៀងបាន និងរក្សាទឹកដមសំនៀងបានល្អ។ នេះជាលើកទី១ ដែលរូបនាងបានចូលរួមក្នុងកម្មវិធីតន្ត្រីសប្បុរសធម៌ ដើម្បីជួយសិស្សក្រីក្រ។
ក្នុងកម្មវិធីនោះ ពៅ បញ្ញាពេជ្រ បានបង្ហើរសំនៀងចំនួន៣បទ គឺបទ “សង្ឃឹមថ្ងៃមួយ” “Because I Love You” និងបទ “អនិច្ចាអ្នកស្រែ”។ យ៉ាងណាក៏ដោយ កញ្ញា មិនអាចក្រោកឈរច្រៀងបានទេ គឺត្រឹមតែអង្គុយនៅលើកៅអីដើម្បីបង្ហើរសំនៀង ប៉ុន្តែសំនៀងរបស់នាង នៅតែទទួលបានការគាំទ្រពីសំណាក់អ្នកចូលរួម។
ពៅ បញ្ញាពេជ្រ បញ្ជាក់ថា សព្វថ្ងៃនាងប្រឹងប្រែងរស់ដោយសារមានការគាំទ្រពីបងប្អូនមិត្តភ័ក្ត្រ និងក្រុមគ្រួសារបស់នាង ដែលធ្វើឲ្យនាងមានចិត្តតស៊ូ និងបន្តរស់នៅតទៅទៀត។ ពៅ បញ្ញាពេជ្រ បន្តថា សព្វថ្ងៃស្នាមរបួស ទាំងក្នុង និងក្រៅ ជាសះស្បើយអស់ហើយ ប៉ុន្តែមួយកំណាត់ជើងចុះក្រោមមិនអាចកម្រើកបាន និងបន្តលេបថ្នាំទៀត។
កម្មវិធីតន្ត្រីសប្បុរសធម៌នោះ ក៏មានការចូលរូមពីតារាសម្តែង និង តារាបង្ហាញម៉ូតមួយចំនួន គឺអ្នកនាង ចន ចន្ទលក្ខណា កញ្ញ ឌួង ហ្សូរីដា និង កញ្ញា សូដានីតា។ កញ្ញា ចន ចន្ទលក្ខណា ក៏បានឧបត្ថម្ភថវិកាមួយចំនួនជូនកញ្ញា ពៅ បញ្ញាពេជ្រ រីឯកញ្ញា ដួង ហ្សូរីដា និង កញ្ញា សូដានីតា ក៏បានសម្ដែងទឹកចិត្តអាណិតអាសូរដូចគ្នាចំពោះ កញ្ញា ពៅ បញ្ញាពេជ្រ ហើយបានអំពាវនាវឲ្យសិល្បករ សិល្បការិនី និងអ្នកគាំទ្ររូបនាងទាំងអស់ ជួយឧបត្ថម្ភដល់រូបនាង។
ពៅ បញ្ញាពេជ្រ ត្រូវបានជនមិនស្គាល់មុខលបបាញ់ប្រហារ ធ្វើឲ្យរងរបួសធ្ងន់ធ្ងរកាលពីថ្ងៃទៅ២៣ ខែកុម្ភៈ ឆ្នាំ២០០៧ ក្បែររបងក្រសួងឧស្សាហកម្មរ៉ែ និងថាមពល ហើយត្រូវបានក្រុមគ្រួសារជញ្ជួនទៅព្យាបាលនៅបរទេសភ្លាមៗ និងបានត្រឡប់មកវិញកម្ពុជាវិញ បន្ទាប់ពីគ្រួសារអស់លទ្ធភាពព្យាបាល៕
សរសេរមកកាន់ លោក ឡាយ សាមាន តាមរយៈ laysamean168@yahoo.com
សូមអរគុណដល់ដារាទំាអអស់ដែលចេះជួយយកអាសារគ្នា
នៅពេលដារាដទែទៀតមានទុកហើយនិងចេះជួយដល់សង្គម
ខ្មែរខ្លួនឯងផងសូមអោយកញ្ញា ពៅបញ្ញាពេជ្ញស៊ូៗ