ដោយ៖ ដួង សុខា
ថ្ងៃសុក្រ ទី8 ខែវិច្ឆិកា ឆ្នាំ2013
http://vodhotnews.com
ជំនួបចរចាលើកទីពីររវាងថ្នាក់ដឹកនាំជាន់ខ្ពស់នៃគណបក្សទាំងពីរ (រូបថត ញឹម សុខន)
មេដឹកនាំគណបក្សសង្គ្រោះជាតិ(CNRP) ដាក់ឱសានវាទឲ្យគណបក្សប្រជាជនកម្ពុជា(CPP) នៅត្រឹមចុងឆ្នាំនេះ ដើម្បីចរចាដោះស្រាយវិបត្តិនយោបាយដែលកើតមានក្រោយការបោះឆ្នោតជ្រើសតាំងតំណាងរាស្ត្រ នីតិកាលទី៥ កាលពីថ្ងៃទី២៨ ខែកក្កដា។ គណបក្សសង្គ្រោះជាតិព្រមានថា ខ្លួននឹងឈប់ចរចាជាមួយគណបក្សកាន់អំណាច ប្រសិនបើគណបក្សនេះមិនទទួលយកលក្ខខណ្ឌចរចារបស់ខ្លួន។
អនុប្រធានគណបក្សសង្គ្រោះជាតិ លោក កឹម សុខា ប្រកាសបែបនេះប្រាប់អ្នកសារព័ត៌មាន កាលពីថ្ងៃទី៦ ខែវិច្ឆិកា ពោលគឺមួយថ្ងៃ បន្ទាប់ពីក្រុមការងារបច្ចេកទេសគណបក្សឈ្នះឆ្នោតទាំងពីរជួបពិភាក្សាគ្នា នៅវិមានរដ្ឋសភា ប៉ុន្តែជំនួបបិទទ្វារនេះមិនបានទទួលលទ្ធផលអ្វីទ្បើយ។ លោក កឹម សុខា ឲ្យដឹងដែរថា ប្រសិនបើគណបក្សប្រជាជនកម្ពុជានៅតែបដិសេធស៊ើបអង្កេតពីភាពមិនប្រក្រតីនៃការបោះឆ្នោត គណបក្សលោកនឹងដឹកនាំធ្វើមហាបាតុកម្មកាន់តែធំ និងមានរយៈពេលយូរជាងមហាបាតុកម្មកន្លងមក។
ឱសានវាទរបស់គណបក្សសង្គ្រោះជាតិ ត្រូវបានប្រធានគណៈកម្មាធិការនាយកអង្គការឃ្លាំមើលការបោះឆ្នោត ខុមហ្វ្រែល(Comfrel) លោក ធន សារាយ គិតថាប្រហែលមិនមានប្រសិទ្ធិភាពទេ ដោយសារគណបក្សកាន់អំណាចរបស់លោកនាយករដ្ឋមន្ត្រី ហ៊ុន សែន នឹងមិនចុះញ៉មទៅនឹងគំនាបរបស់គណបក្សប្រឆាំងទ្បើយ៖
លោកលើកទ្បើងបែបនេះ ដោយសារកន្លងមក លោកសង្កេតឃើញថា គណបក្សសង្គ្រោះជាតិបានដឹកនាំធ្វើមហាបាតុកម្មបីលើកមកហើយ ដើម្បីទាមទាររកយុត្តិធម៌ និងការពិតជូនម្ចាស់ឆ្នោត ប៉ុន្តែគណបក្សកាន់អំណាចនៅតែច្រានចោលការទាមទារនេះ។
ក្នុងការចរចានយោបាយជាមួយគណបក្សកាន់អំណាច គណបក្សសង្គ្រោះជាតិលើករបៀបវារៈ៣ចំណុច ទី១គឺការទាមទារឲ្យមានការបង្កើតគណៈកម្មការឯករាជ្យស៊ើបអង្កេតពីភាពមិនប្រក្រតីនៃការបោះឆ្នោត ទី២ ការស្នើឲ្យថ្នាក់ដឹកនាំទាំង៩រូបនៃគណៈកម្មាធិការជាតិរៀបចំការបោះឆ្នោត ហៅកាត់ គ.ជ.ប លាលែងតំណែង។ ចំណុចទី៣ គឺការទាមទារឲ្យមានកំណែទម្រង់ប្រព័ន្ធបោះឆ្នោត ផ្អែកតាមអនុសាសន៍របស់អ្នករាយការណ៍ពិសេសអង្គការសហប្រជាជាតិស្តីពីសិទ្ធិមនុស្សនៅកម្ពុជា អង្គការខុមហ្វ្រែល និងវិទ្យាស្ថានជាតិប្រជាធិបតេយ្យសម្រាប់កិច្ចការអន្តរជាតិ ហៅកាត់ NDI។
អ្នកស្រាវជ្រាវឯករាជ្យពីការអភិវឌ្ឍន៍សង្គម លោក កែម ទ្បី វិភាគថា ការដាក់ឱសានវាទមិនមែនជាជម្រើសល្អទេ ពីព្រោះការចរចានយោបាយ ដើម្បីប្រយោជន៍ជាតិធំៗ គឺត្រូវការពេលវេលា ៖
លោកកែម ទ្បី លើកទ្បើងពីជម្រើសមួយ ដែលលោកគិតថាជាជម្រើសល្អបំផុតសម្រាប់គណបក្សសង្គ្រោះជាតិ គឺការព្រមទទួលយកលទ្ធផលបោះឆ្នោតដែលប្រកាសដោយ គ.ជ.ប គឺគណបក្សប្រជាជនកម្ពុជាទទួលបាន៦៨អាសនៈ គណបក្សសង្គ្រោះជាតិទទួលបាន៥៥អាសនៈ។ ប៉ុន្តែ លោកថា គណបក្សសង្គ្រោះជាតិត្រូវដាក់លក្ខខណ្ឌទៅឲ្យគណបក្សកាន់អំណាច គឺការផ្លាស់ប្តូរសមាសភាពនាយករដ្ឋមន្ត្រីបច្ចុប្បន្ន និងការស៊ើបអង្កេតពីភាពមិនប្រក្រតីនៃការបោះឆ្នោត ដែលប្រជាពលរដ្ឋចង់បាន។
លោកក៏បង្ហាញជម្រើសមួយទៀត ដែលលោកយល់ថាជាជម្រើសសមស្របសម្រាប់គណបក្សសង្គ្រោះជាតិ ជាជាងការដាក់ឱសានវាទ គឺការទទួលយកតំណែងនៅរដ្ឋសភា៖
គណបក្សប្រជាជនកម្ពុជា ដែលកំពុងដឹកនាំរាជរដ្ឋាភិបាលអាណត្តិទី៥ បដិសេធជាច្រើនលើកចំពោះការទាមទារឲ្យមានការសើរើលទ្ធផលបោះឆ្នោត ក្រៅក្របខណ្ឌ គ.ជ.ប និងក្រុមប្រឹក្សាធម្មនុញ្ញ។ គណបក្សនេះបកស្រាយថា ស្ថាប័នទាំងពីរនេះបានដោះស្រាយចប់ជាស្ថាពរហើយនូវភាពមិនប្រក្រតីនៃការបោះឆ្នោត។ ប៉ុន្តែ គណបក្សសង្គ្រោះជាតិលើកទ្បើងថា គ.ជ.ប និងក្រុមប្រឹក្សាធម្មនុញ្ញមិនឯករាជ្យ ដោយបំពេញការងារលម្អៀងទៅរកគណបក្សប្រជាជនកម្ពុជា។
ប្រធានក្រុមការងារបច្ចេកទេសចរចារបស់គណបក្សប្រជាជនកម្ពុជា និងជារដ្ឋលេខាធិការក្រសួងមហាផ្ទៃ លោក ព្រុំ សុខា ប្រាប់VODថា ប្រសិនបើគណបក្សសង្គ្រោះជាតិចង់ឲ្យការចរចាទទួលបានដំណោះស្រាយពិតប្រាកដ គណបក្សនេះមិនគួរដាក់ឱសានវាទបែបនេះទេ៖
លោកបន្តថា ការស្នើឲ្យមានការលាលែងតំណែងរបស់ថ្នាក់ដឹកនាំ គ.ជ.ប គឺត្រូវធ្វើទ្បើងតាមផ្លូវច្បាប់៖
លោកអះអាងថា គណបក្សប្រជាជនកម្ពុជានៅតែបើកចំហចំពោះការចរចាជាមួយគណបក្សសង្គ្រោះជាតិ។ ប៉ុន្តែ របៀបវារៈចរចារបស់គណបក្សប្រជាជនកម្ពុជា គឺត្រូវផ្អែកលើសេចក្តីការណ៍រួមរវាងថ្នាក់ដឹកនាំកំពូលគណបក្សទាំងពីរ កាលពីថ្ងៃទី១៦ ខែកញ្ញា ឆ្នាំ២០១៣ ដែលបានព្រមព្រៀងគ្នានឹងបង្កើតយន្តការមួយ ដើម្បីកែទម្រង់ការបោះឆ្នោតនាពេលខាងមុខ៕
សរសេរមកកាន់លោក ដួង សុខា តាមរយៈ duong.sokha@vodhotnews.com
តាមយោបល់កែម ឡី មាន ហ៊ុន សែន អត់ សម រង្សី ឬ អត់ សម រង្សី មាន ហ៊ុន សែន
this option will be not successful. I think that Mr. Sar Kheng should be a prime minister candidate but Hun Sen will not agree with this option
Sor Kheng? :DDD
តើបុរសខ្លាំងនៅកម្ពុជា អាចនឹងចាប់អារម្មណ៍ការវិភាគរបស់លោក កែម ឡី ឬទេ?