ដោយ៖ វង្ស សុម៉ាលីន
ថ្ងៃព្រហស្បតិ៍ ទី19 ខែធ្នូ ឆ្នាំ2013
http://vodhotnews.com
កញ្ញា សុគន្ធ និសា តារាចម្រៀងប្រចាំផលិតកម្មថោន កាលពីកន្លងទៅ
គ្រាន់តែចប់ការសម្ដែងក្នុងរឿង«ចងចាំ» ដែលជាខ្សែរឿងបើកឆាករបស់ផលិតកម្មថោន និងជារឿងលើកដំបូងរបស់ខ្លួនភ្លាម តារាចម្រៀងល្បីឈ្មោះនាងសុគន្ធ និសា បានបង្ហាញពីឆន្ទៈត្រៀមទុកក្នុងឆ្នាំ២០១៤តែម្ដង។ បន្ថែមពីលើការប្រកាសនេះ នាងក៏សម្ញែងឲ្យដឹងពីយុទ្ធសាស្ត្រមួយចំនួន ដើម្បីត្រឡប់មកកាន់ភាពល្បីខ្លាំង ក្នុងពិភពចម្រៀងនោះថែមទៀតផង។
សុគន្ធ និសា និយាយថា ក្នុងឆ្នាំ២០១៤ខាងមុខ នាងបានសម្រេចចិត្តប្រកាន់ជំហរចំនួន២ ដើម្បីលើកទឹកចិត្តអ្នកគាំទ្រ ក៏ដូចជាដើម្បីបង្កើនប្រជាប្រិយភាពរបស់ខ្លួនឲ្យបានល្អឡើងវិញ។ ជំហរដែលនាងបញ្ចេញក្នុងជំហានដំបូងនោះ គឺមិនទទួលសំណើចេញច្រៀងនៅក្រៅប្រទេសក្នុងអំឡុងឆ្នាំ២០១៤ខាងមុខ បើទោះជាមានស្ពុនស័ររាប់មិនអស់ ទទូចឲ្យនាងចេញទៅច្រៀង នៅលើទឹកដីឆ្លងប្រទេស ដោយសូម្បីតែនៅអំឡុងចុងឆ្នាំ២០១៣ក៏មានស្ទើររើខ្លួនមិនរួច។ ការតាំងចិត្តនេះ ហាក់ស្របនឹងការចង់បានរបស់អ្នកគាំទ្រភាគច្រើន ដែលចង់ឲ្យនាងត្រាំត្រែងឲ្យបានពេញលេញ ក្នុងកាលៈទេសៈដែលនៅកម្ពុជា ចាប់ផ្ដើមមានការប្រគំតន្ត្រីគគ្រឹកគគ្រេងឡើងវិញ នៅអំឡុងខែប្រាំងនេះ។ ជំហររបស់នាង ក៏ស្របតាមការចង់បានរបស់នាងខ្លួនឯងផងដែរ ដែលចង់បានពេលគ្រប់គ្រាន់ ក្នុងការមើលខុសត្រូវមុខជំនួញទាំងពីរ គឺហាងផឹកស៊ីមួយកន្លែង និងហាងថ្មីមួយកន្លែងទៀតនៅសាលា៨មិនា ដែលទើបដំណើរការ។ សុគន្ធ និសា ប្រាប់ថា ក្នុងប្រវត្តិសិល្បៈ ស្ទើរតែគ្មានប្រទេសណាមួយ ដែលមានបងប្អូនខ្មែររស់នៅ ហើយនាងមិនបានទៅនោះទេ។ ទោះយ៉ាងណា នោះមិនមែនជាហេតុផល ដែលធ្វើឲ្យនាងលែងចង់ចាកចេញទៅក្រៅប្រទេសនោះឡើយ ដោយ គ្រាន់តែនាងខ្លួនឯងមានបំណងចង់ពង្រឹងការងារសិល្បៈ ក្នុងឆ្នាំថ្មីខាងមុខ ឲ្យបានរលូនជាងមុន ក្នុងពិភពចម្រៀងតែប៉ុណ្ណោះ។
បន្ថែមលើជំហរត្រាំត្រែងក្នុងស្រុក នាងក៏មានជំហរ មិនពង្រីករឿងអាវិជ្ជមាន ដែលជាក្ដីបារម្ភរបស់អ្នកគាំទ្រនាគ្រាមុននោះផងដែរ។ ក្រោយបញ្ចប់ឆ្នាំ២០១៣ នាងអះអាងថា រឿងមិនល្អទាំងអស់ ក៏នឹងរំលត់ទៅដែរ ដើម្បីឲ្យក្នុងឆ្នាំថ្មីខាងមុខ ក្លាយជាឆ្នាំដ៏ល្អសម្រាប់ជីវិតរបស់នាង ទាំងរឿងសិល្បៈ រឿងមុខជំនួញ និងរឿងផ្ទាល់ខ្លួន។ ជំហររបស់នាង បានក្លាយជាដំណឹងគួរឲ្យចាប់អារម្មណ៍ ក្នុងចង្កោមអ្នកចូលចិត្តគ្រប់ស្នាដៃរបស់តារាចម្រៀងរូបនេះ។
(សុគន្ធ និសា និងលោក ទេព រិនដារ៉ូ កាលពីកន្លងទៅ)
យោងតាមការបញ្ជាក់នៅអំឡុងដើមឆ្នាំខាងមុខ សុគន្ធ និសា នឹងបញ្ចេញខ្សែរឿង«ចងចាំ» ដែលនាងបានសម្ដែងជាតួឯក ដើម្បីស្ទាបស្ទង់ទីផ្សារ ក្នុងពេលខ្សែរឿងទាំងមូលដាក់បញ្ចាំង។ ទាំងរូបនាងផ្ទាល់ និងផលិតកម្មថោន បានរំពឹងយ៉ាងខ្លាំងថាខ្សែរឿងនេះ ទទួលជោគជ័យ ប៉ុន្តែគេមិនដឹងថា តើវាជោគជ័យបែបពេញទំហឹង ឬបានត្រឹមមួយឆាវដូចខ្សែរឿងដែលធ្លាប់រំពឹងខ្ពស់ មួយចំនួននោះទេ។ សុគន្ធ និសា ប្រាប់ថា ការបញ្ចេញខ្សែរឿង គឺយុទ្ធសាស្ត្រធំមួយ សម្រាប់ឆ្នាំ២០១៤ ខណៈដែលយុទ្ធសាស្ត្រនេះ គឺនៅមានទម្រង់ជាច្រើនទៀត ដើម្បីប្រទាញឲ្យបានច្រើននូវប្រជាប្រិយភាពបន្ថែម។ ក្នុងនោះ ការរំលេចក្បាច់រាំប្លែកៗ និងការចេញច្រៀងបទបែបក្រម៉ិចក្រម៉ើម គឺជាអ្វីដែលនាងបន្តដើរ នៅលើមាគគ៌ាសិល្បៈ។
សុគន្ធ និសា កំពុងទទួលកុងត្រាចេញច្រៀងខេត្តក្រុង បណ្ដាក់គ្នា ប្រជែងនឹងឱក សុគន្ធកញ្ញា សុខ ពិសី និងមាស សុខសោភា ដែលមិនទំនេរទាល់តែសោះ ចាប់តាំងពីដើមរដូវប្រាំងនេះ។ពាក់ព័ន្ធនឹងការសម្ដែងក្នុងរឿង«ចងចាំ» នាងអះអាងថា VOD បានដឹងគឺជារឿងត្រឹមត្រូវ ប៉ុន្តែចំពោះនាងសុំមិនបញ្ជាក់បន្ថែម ពាក់ព័ន្ធនឹងទិន្នន័យក្នុងការសម្ដែងរឿងនេះទេ។ ប៉ុន្តែអ្វីដែលនាងបញ្ជាក់បាន គឺជំហរមិនទទួលចេញសម្ដែងក្រៅស្រុក យុទ្ធសាស្ត្រមិនរំលេចដំណឹងស្នេហាថ្មីៗ និងផែនការផលិតស្ទីលប្លែកៗ ក្នុងពិភពចម្រៀងក្នុងឆ្នាំ២០១៤ខាងមុខ។ ក្រុមអ្នកគាំទ្រ ព្យាករណ៍ថា សុគន្ធ និសា នឹងក្លាយជាតារាលេចធ្លោជាថ្មី ប្រសិនបើយុទ្ធសាស្ត្រដែលនាងលើកឡើង ទទួលផ្លែផ្កាជាទីពេញចិត្ត៕
សរសេរមកកាន់ លោក វង្ស សុម៉ាលីន តាមរយៈ vongsomalin@yahoo.com
General stars and Tycoon happy when they hear she said.
Don’t say yet, Prove it Girl!!!!!!!!!!!!!!!!!!!!