គង់ សុឋានរិទ្ធ
01 មករា 2014
វីអូអេខ្មែរ
កម្មកររោងចក្រកាត់ដេរធ្វើបាតុកម្ម តែត្រូវកម្លាំងប៉ូលិសបំបែក។ ក្រុមកម្មករបានតវ៉ាទាមទារប្រាក់សោហ៊ុយសងជំងឺចិត្ត។
ភ្នំពេញ —
កម្មកររោងចក្រជាច្រើនពាន់នាក់បានបន្តធ្វើបាតុកម្មនៅពីមុខក្រសួងការងារនិងបណ្តុះបណ្តាលវិជ្ជាជីវៈនៅថ្ងៃអង្គារនេះបើទោះបីជាមិនមានការចរចាអំពីការដំឡើងប្រាក់ខែក៏ដោយ។
នេះជាបាតុកម្មឈានដល់ថ្ងៃទីបីហើយដើម្បីទាមទារដំឡើងប្រាក់ខែគោលឲ្យដល់១៦០ដុល្លារអាមេរិកក្នុងមួយខែរបស់ក្រុមកម្មកររោងចក្រ។ប៉ុន្តែរហូតមកដល់ថ្ងៃនេះនៅតែមិនមានដំណោះស្រាយនៅឡើយទេ។
ក្រុមកម្មករដែលភាគច្រើនធ្វើដំណើរដោយថ្មើជើងរហូតដល់ដប់គីឡូម៉ែត្រឬច្រើនជាងនេះបានមកប្រមូលផ្តុំគ្នានៅមុខក្រសួងការងារនិងបណ្តុះបណ្តាលវិជ្ជាជីវៈចាប់តាំងពីព្រឹកដោយមានលើកបដាតូចៗទាមទារការដំឡើងប្រាក់ខែរបស់ខ្លួន។
មហាវិថីសហព័ន្ធរុស្ស៊ីដែលឆ្លងកាត់មុខក្រសួងនេះត្រូវបិទដោយការធ្វើបាតុកម្មនេះ។
កងកម្លាំងបង្រ្កាបបាតុកម្មរបស់រដ្ឋាភិបាលដែលប្រដាប់ដោយដំបងនិងខែលបានប៉ុនប៉ងបង្រ្កាបក្រុមបាតុករកាលពីព្រឹកមិញប៉ុន្តែបានដកថយទៅវិញនាពេលក្រោយមកនៅពេលដែលក្រុមកម្មករមិនព្រមបញ្ឈប់ការតវ៉ារបស់ខ្លួន។
គ្មានមន្ត្រីផ្លូវការណាម្នាក់ពីក្រសួងការងារចេញមកជួបចរចាជាមួយក្រុមកម្មករនោះទេក្រោយពីក្រសួងនេះបានបើកការចរចាអំពីការដំឡើងប្រាក់ខែកម្មករជាមួយតំណាងសហជីពចំនួនប្រាំមួយកាលពីថ្ងៃសុក្រសប្តាហ៍មុននិងនៅថ្ងៃច័ន្ទម្សិលមិញនេះ។ប៉ុន្តែការចរចាមិនបានឈានដល់ការសម្រេចណាមួយនោះទេ។
កម្មករបានរំសាយក្បួនបាតុកម្មវិញនៅវេលាម៉ោងពីររសៀលដោយកំណត់ការធ្វើបាតុកម្មនៅតាមតំបន់រោងចក្ររៀងៗខ្លួននៅថ្ងៃព្រហស្បតិ៍ទី២ខែមករា ឆ្នាំ២០១៤។
អ្នកស្រីយ៉ាង សោភ័ណ្ឌ ប្រធានសម្ព័ន្ធសហជីពកម្ពុជាបានថ្លែងទៅកាន់ក្រុមកម្មករមុននឹងប្រកាសរំសាយ។
អ្នកស្រីនិយាយថា៖ «ដើម្បីក្រពះរបស់ពួកយើង យើងទាំងអស់គ្នាត្រូវតែមានសេចក្តីសង្ឃឹម។ខ្ញុំចង់ឲ្យបងប្អូនទាំងអស់គ្នាបន្តរួបរួមគ្នាតទៅមុខទៀត។យើងមិនចប់ត្រឹមនេះទេ»។
ការធ្វើបាតុកម្មរបស់កម្មកររោងចក្រក្រោយពីពួកគេមិនទទួលយកការដំឡើងប្រាក់ខែគោលដល់ពួកគេឲ្យដល់ចំនួន៩៥ដុល្លារអាមេរិកនៅឆ្នាំ២០១៤នេះ ។ ហើយរដ្ឋាភិបាលសន្យាថានឹងបន្តឲ្យមានការដំឡើងប្រាក់ខែដល់កម្មករឲ្យដល់១៦០ដុល្លារអាមេរិកក្នុងមួយខែទាល់តែចាំដល់ឆ្នាំ២០១៨។ ប៉ុន្តែកម្មករនិងក្រុមសហជីពទាមទារការដំឡើងប្រាក់ឈ្នួលឲ្យដល់១៦០ដុល្លារអាមេរិកសម្រាប់ឆ្នាំ២០១៤នេះដោយយោងលើកម្រិតអតិផរណានៃតម្លៃទំនិញលើទីផ្សារដែលបង្កការលំបាកសម្រាប់ការរស់នៅរបស់ពួកគេ។
លោក រ៉ុង ឈុន ប្រធានសមាគមគ្រូបង្រៀនឯករាជ្យនិងជាប្រធានសហភាពសហជីពកម្ពុជាបានប្រាប់ដល់កម្មករថា៖ «ថ្ងៃទី២ (មករា) យើងនៅបន្តធ្វើទ្រង់ទ្រាយធំដដែលប៉ុន្តែនៅតាមតំបន់និងតាមរោងចក្រនិមួយៗ។ហើយកម្មករមិនបាក់ទឹកចិត្តទេពីព្រោះកម្មករយល់ច្បាស់ហើយ។ការដែលអូសបន្លាយពេលវេលានេះនឹងធ្វើឲ្យកម្មករកាន់តែក្តៅក្រហាយ»។
មន្ត្រីនៃសមាគមរោងចក្រកាត់ដេរនៅកម្ពុជាដែលហៅកាត់ថាGMAC មិនអាចទាក់ទងបានទេនៅថ្ងៃនេះ។
ប៉ុន្តែនៅក្នុងសេចក្តីប្រកាសព័ត៌មានរបស់ខ្លួននៅថ្ងៃអង្គារនេះGMAC បញ្ជាក់ថាស្ថានភាពនៅតែអាក្រក់សម្រាប់ក្រុមកម្មករដោយសារតែមានការបង្ខំឲ្យកម្មករដទៃទៀតចេញធ្វើបាតុកម្មហើយGMAC បានចោទប្រកាន់ថាការដឹកនាំបាតុកម្មរបស់ក្រុមសហជីពមានចរិកនយោបាយនិងបានអំពាវនាវឲ្យរដ្ឋាភិបាលចាត់វិធានការតាមផ្លូវច្បាប់ប្រឆាំងពួកគេ។
ទោះជាយ៉ាងណាក្រុមបាតុករបានប្រកាសក្នុងអំឡុងពេលកំពុងធ្វើបាតុកម្មថាពួកគេមកចូលរួមធ្វើបាតុកម្មដោយមិនមានការបង្ខិតបង្ខំនោះទេ។
លោកអំ សំអាត ប្រធានគ្រប់គ្រងបច្ចេកទេសស៊ើបអង្កេតរបស់អង្គការការពារសិទ្ធិមនុស្សលីកាដូ ដែលតាមឃ្លាំមើលការធ្វើបាតុកម្មរបស់ក្រុមកម្មករមានប្រសាសន៍ថាការចាត់វិធានការណាមួយលើមេដឹកនាំសហជីពប្រៀបដូចជាការយកសាំងទៅដាក់លើភ្លើងហើយក្រុមកម្មករនឹងមិនបញ្ឈប់សកម្មភាពរបស់ខ្លួននោះទេ។
កាលពីថ្ងៃច័ន្ទក្រសួងការងារនិងបណ្តុះបណ្តាលវិជ្ជាជីវៈបានអំពាវនាវឲ្យកម្មករនិងថៅកែរោងចក្រចាប់ផ្តើមធ្វើការឡើងវិញនៅថ្ងៃទី២ខែមករាហើយការកំណត់ប្រាក់ឈ្នួលដល់កម្មករគឺត្រូវយកតាមសេចក្តីសម្រេចរបស់គណៈកម្មការប្រឹក្សាការងារកាលពីថ្ងៃទី២៤ខែធ្នូ។គណៈកម្មការនេះបានកំណត់ដំឡើងប្រាក់ខែគោលដល់កម្មករត្រឹម៩៥ដុល្លារក្នុងមួយខែ។
បន្ថែមពីនោះក្រសួងការងារព្រមានជាថ្មីម្តងទៀតថានឹងចាត់វិធានការផ្លូវច្បាប់ចំពោះការរំខានណាមួយដល់រោងចក្រនិងដល់កម្មករ៕
អត្ថបទព័ត៌មានទាក់ទង
- កម្មករច្រើនម៉ឺននាក់ធ្វើបាតុកម្មនៅមុខក្រសួងការងារទាមទារឡើងប្រាក់ខែ
- អ្នករត់ម៉ូតូឌុប និងអ្នករត់រ៉ឺម៉កទាមទារឱ្យបញ្ចុះថ្លៃសាំងមក៤០០០រៀលក្នុងមួយលីត្រ
- ការចរចាដំឡើងប្រាក់ខែកម្មករបរាជ័យជាថ្មីទៀត
$160 per month is so LOW when the cost of living is so HIGH!!! The politicians and the corrupted ministers should think that if these workers are your own childre! Do not care of YOURSELVES, not the others!!! GOD will know. Cambodia is No longer a Communist state, please do not use a communist style to govern!!!
。，សូម ប៉ូលីស ប៉េអ៊ឹម កុំ ឆោត ល្ងង់ ទៅបំរើ បុគ្គល ទៀត ត្រូវ ជួយ ប្រជាពលរដ្ឋ កម្មករ
ការពារ សន្តិសុខ អោយពួកគាត់ ! ( « ធ្វើផ្តេសផ្តាស់ ប្រយ័ត្ន រង គ្រោះ ជំនួស គេ ! ») !
。，ចំណែក ប្រជាពលរដ្ឋ កម្មករ ក៏ ត្រូវ គោរព ប៉ូលីស ប៉េអ៊ឹម កុំ ធ្វើ អ្វី ផ្តេសផ្តាស់ ដាក់គាត់ បើ
គាត់ មិនធ្វើ អី យើង នោះ !
ចុចអានគំនិតថ្មី!ៗរបស់លោក ប្រធានគណបក្សសង្គ្រោះយួន