ប្រជាពលរដ្ឋនៅស្រុកកំពង់លែង និងស្រុករលាប្អៀរ ខេត្តកំពង់ឆ្នាំង ចោទក្រុមហ៊ុនបញ្ជូនពលករចេញទៅធ្វើការនៅក្រៅប្រទេសមួយឈ្មោះ អាយ.អាយ.អែស (IIS) ថាបានបោកប្រាស់ប្រាក់ពលករ។ ក្រុមប្រជាពលរដ្ឋអះអាងថា ពួកគាត់បានបង់ប្រាក់ឲ្យទៅក្រុមហ៊ុនក្នុងម្នាក់ៗចាប់ពី ១៥០ដុល្លារ ដល់ ៤០០ដុល្លារ នៅអំឡុងខែតុលា ឆ្នាំ២០១២ ដើម្បីបានចេញទៅធ្វើការនៅប្រទេសថៃ តាមរយៈក្រុមហ៊ុននេះ ក៏ប៉ុន្តែរហូតមកដល់បច្ចុប្បន្ន ពួកគាត់នៅតែមិនទាន់អាចចេញទៅធ្វើការបាន។
ដោយ ជិន ជេដ្ឋា
2014-01-01
RFA
ស្ដាប់ ឬ ទាញយកសំឡេង
ប្រជាពលរដ្ឋចំនួន ៦គ្រួសារ រស់នៅស្រុកកំពង់លែង និងស្រុករលាប្អៀរ ខេត្តកំពង់ឆ្នាំង កំពុងតែស្វែងរកកិច្ចអន្តរាគមន៍ពីស្ថាប័នពាក់ព័ន្ធនានា ដើម្បីជំរុញឲ្យក្រុមហ៊ុនបញ្ជូនពលករមួយឈ្មោះ អាយ.អាយ.អែស មានទីតាំងនៅរាជធានីភ្នំពេញ សងប្រាក់ជូនពួកគាត់វិញ ខណៈដែលពួកគាត់ជាប់បំណុលធនាគារជាច្រើនរយដុល្លារ ដោយសារតែខ្ចីយកទៅបង់ឲ្យក្រុមហ៊ុននេះ។
ប្រជាពលរដ្ឋម្នាក់ក្នុងចំណោម ៦គ្រួសារ អ្នកស្រី ថាន ចន្នី មានប្រសាសន៍ថា ក្រោយពីរង់ចាំចេញទៅធ្វើការងារនៅប្រទេសថៃ អស់រយៈពេលជាង ១ឆ្នាំកន្លះ មិនបានលទ្ធផលអ្វីនោះ ពួកគាត់បានសម្រេចចិត្តទាមទារឲ្យក្រុមហ៊ុនសងប្រាក់មកវិញ ហើយក៏លែងចង់ទៅធ្វើការអ្វីទៀតនោះដែរ ពីព្រោះខ្លាចគេយកទៅខុសកន្លែងដែលខ្លួនចង់ធ្វើ ឬមានការបោកប្រាស់ផ្សេងៗកើតឡើង៖ «គេសន្យាត្រឹមតែបីខែទៀតទេបានឡើងទៅហើយ បើអត់បានទៅ គេប្រគល់លុយឲ្យយើងវិញ។ ដល់ពេលខ្ញុំទៅសួរដល់ក្រុមហ៊ុនហ្នឹង គេថាអត់មានលុយប្រគល់ឲ្យវិញទេ ព្រោះអីលុយហ្នឹងធ្វើប៉ាសស្ព័រ (Passport = លិខិតឆ្លងដែន) អស់ហើយ ដល់ពេលខ្ញុំសុំប៉ាសស្ព័រ គេថាយកប៉ាសស្ព័រទៅទាល់តែបង់ ៥០ដុល្លារទៀតទើបបានប៉ាសស្ព័រហ្នឹង»។
អ្នកស្រីបញ្ជាក់ថា គ្រួសាររបស់អ្នកស្រីបានខ្ចីប្រាក់ពីគ្រឹះស្ថានមីក្រូហិរញ្ញវត្ថុ ក្រេឌីត ចំនួន ៨០ម៉ឺនរៀល និងបញ្ចូលលុយផ្ទាល់ខ្លួនមួយចំនួន ដើម្បីឲ្យគ្រប់ចំនួន ១លាន ២សែនរៀល យកទៅបង់ឲ្យក្រុមហ៊ុន អាយ.អាយ.អែស ដោយសង្ឃឹមថានឹងបានទៅធ្វើការងារនៅប្រទេសថៃ ទាំងពីរនាក់ប្ដីប្រពន្ធ។
ទាក់ទងនឹងបញ្ហានេះ មន្ត្រីផ្នែកព័ត៌មាននៃក្រុមហ៊ុន អាយ.អាយ.អែស លោក ជាតិ សារិន មានប្រសាសន៍បញ្ជាក់ថា ជាទូទៅពលករដែលបានបង់ប្រាក់រួចហើយ គឺមិនអាចដកយកវិញបាននោះទេ។ លោកថា តាមពិត ការងារពីប្រទេសថៃ បានធ្លាក់មកបណ្ដើរៗដែរ ក៏ប៉ុន្តែពេលខ្លះមិនត្រូវនឹងការងារ ឬរោងចក្រដែលពលករបានស្នើសុំ។ ដូច្នេះ ទើបមានករណីការយឺតយ៉ាវក្នុងការបញ្ជូនពលករចេញ៖ «បញ្ហាពលករខ្ញុំបានបញ្ជូនទៅជារឿយៗដែរ មិនមែនអត់បញ្ជូនទៅទេ ប៉ុន្តែលេខទូរស័ព្ទពួកគាត់ហ្នឹងពេលពួកខ្ញុំ ខល (Call = ទូរស័ព្ទ) ទៅជួនអត់ចូល»។
លោកបញ្ជាក់ថា ក្រុមហ៊ុន អាយ.អាយ.អែស គឺជាក្រុមហ៊ុនស្របច្បាប់ និងមានអាជ្ញាប័ណ្ណត្រឹមត្រូវពីក្រសួងការងារ ក្នុងការបញ្ជូនពលករចេញទៅធ្វើការនៅប្រទេសថៃ និងម៉ាឡេស៊ី ជាង ១០ឆ្នាំមកហើយ។ យ៉ាងណា លោកទទួលស្គាល់ថា បច្ចុប្បន្នមានពលករចំនួនពី ៣០០ ទៅ ៤០០នាក់ មិនទាន់បានចេញទៅធ្វើការនៅឡើយ ដូច្នេះទាមទារឲ្យពលករទាំងអស់អញ្ជើញមកដល់ក្រុមហ៊ុនផ្ទាល់ ដើម្បីពិភាក្សាពីបញ្ហាយឺតយ៉ាវ ឬការងារផ្សេងៗ។
ទាក់ទងនឹងបញ្ហានេះ ប្រធានមន្ទីរការងារ និងបណ្ដុះបណ្ដាលវិជ្ជាជីវៈ ខេត្តកំពង់ឆ្នាំង លោក ពៅ ស៊ីថា មានប្រសាសន៍ថា ខាងមន្ទីរមិនអាចជួយអ្វីបានដល់ក្រុមប្រជាពលរដ្ឋទាក់ទងនឹងបញ្ហានេះឡើយ ប៉ុន្តែលោកបានជំរុញឲ្យពលករទាំងនោះទៅជួបមន្ត្រីទទួលបន្ទុកនាយកដ្ឋានមុខរបរ និងហត្ថពលកម្មនៃក្រសួងការងារ ដើម្បីពិភាក្សា និងដោះស្រាយជុំវិញបញ្ហានេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
- មេដឹកនាំសហជីពថានឹងបន្តដឹកនាំកម្មករធ្វើកូដកម្មទោះបីរដ្ឋាភិបាលគំរាម
- ទស្សនៈអាជ្ញាធរមួយចំនួននៅខេត្តស្វាយរៀងចំពោះការតាមចាប់លោក ឈូក បណ្ឌិត
- ILO ជំរុញឲ្យដោះស្រាយជម្លោះកម្មកររោងចក្រកម្ពុជាជាបន្ទាន់
- កម្មករបន្តធ្វើបាតុកម្មមុខក្រសួងការងារនិងបិទផ្លូវជាតិមួយចំនួន
- ប្រាក់ខែគោលអប្បបរមារបស់កម្មករនៅប្រទេសអាស៊ាន
- ប្រាក់ខែគោលអប្បបរមារបស់កម្មករនៅប្រទេសអាស៊ាន
- រដ្ឋមន្ត្រីក្រសួងការងារព្រមានតំណាងសហជីពឲ្យឈប់ញុះញង់កម្មករ
- ជំនួបរវាងមន្ត្រីក្រសួងការងារនិងមេសហជីពរឿងប្រាក់ខែកម្មករបរាជ័យ
- កម្មករនៅកំពង់ឆ្នាំងធ្វើបាតុកម្មបិទផ្លូវជាតិលេខ៥
Hun sen is good leader that have no ability to find the job for our people. Our county have so much natural resources but this leader have no capacity to invent it. All the Hun sen farmilies are very happy that Khmers are poor but they are rich. 1,000,000$ per month. But poor people 1,000,000 tear per month.