ដោយ៖ ញឹម សុខន
ថ្ងៃសុក្រ ទី3 ខែមករា ឆ្នាំ2014
http://vodhotnews.com
តុលាការរាជធានីភ្នំពេញ នៅរសៀលថ្ងៃសុក្រនេះ បានសម្រេចឃុំខ្លួនបណ្តោះអាសន្ន លោក វន់ ពៅ និងសកម្មជនសហជីព ៩នាក់ទៀត ដោយចោទប្រកាន់ពីបទហិង្សាដោយចេតនា និងបំផ្លិចបំផ្លាញទ្រព្យសម្បត្តិអ្នកដទៃ។
នៅក្នុងសវនាការសាកសួររយៈពេលជាង៤ម៉ោងមកនេះ ចៅក្រមស៊ើបសួរ លោកស្រី សែម សត្កិកូឡា បានសម្រេចឃុំខ្លួនបណ្តោះអាសន្នទៅលើសកម្មជនសហជីព និងសង្គមស៊ីវិលទាំង ១០រូបនេះ នៅក្រោមបទចោទថា បង្កហិង្សាដោយចេតនា និងបំផ្លិចបំផ្លាញទ្រព្យសម្បត្តិអ្នកដទៃ។ ប៉ុន្តែខណៈដែលសវនាការបានបញ្ចប់នៅម៉ោងជាង១រសៀលនេះ មិនទាន់មានព័ត៌មានថា ជនសង្ស័យទាំង១០នាក់នេះ ត្រូវបញ្ជូនទៅកាន់មន្ទីរឃុំឃាំងនៅឡើយទេ ស្របពេលដែលប្រជាពលរដ្ឋ និងព្រះសង្ឃ បានហ៊ុមព័ទ្ធតុលាការ ដោយទាមទារឲ្យមានការដោះលែងជនទាំង១០នាក់នេះជាបន្ទាន់។
តែសេចក្តីរាយការណ៍បានឲ្យដឹងថា កងកម្លាំងនគរបាលនិងកងរាជអាវុធហត្ថជាច្រើនរយនាក់ បាននឹងកំពុងប្រឈមមុខជាមួយប្រជាពលរដ្ឋ ដែលកំពុងហ៊ុមព័ទ្ធសាលាដំបូងរាជធានីភ្នំពេញ។
សូមជម្រាបថា មេធាវីរបស់ជនសង្ស័យទាំង១០នាក់នោះ មានចំនួន៦រូប ក្នុងនោះមានលោក ជួង ជូងី មេធាវីមកពីគណបក្សសង្គ្រោះជាតិផងដែរ។
ជនទាំង១០នាក់នេះ ក្នុងនោះមាន លោកវន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោក ថេង សាវឿន អ្នកសម្របសម្រួលសម្ព័ន្ធសហគមន៍កសិករកម្ពុជា លោក ពុទ្ធិស័ក្កិ ប្រជាសហគមន៍បឹងកក់ និងសកម្មជនសហជីព មួយចំនួនទៀត ត្រូវបានចាប់ខ្លួនកាលពីថ្ងៃព្រហស្បតិ៍ម្សិលមិញ ខណៈដែលពួកគេចូលរួមតវ៉ាជាមួយកម្មករនៅរោងចក្រក្នុងតំបន់សេដ្ឋកិច្ចភ្នំពេញ ក្នុងខណ្ឌពោធិសែនជ័យ រាជធានីភ្នំពេញ ហើយបានប៉ះទង្គិចជាមួយកងកម្លាំងទ័ពឆត្រយោង៩១១ មុខរោងចក្រយ៉ាកជីន។ ក្នុងហេតុការណ៍នោះបានបណ្តាលឲ្យកម្មករ និងព្រះសង្ឃជាច្រើនអង្គ/នាក់រងរបួស ហើយព្រះសង្ឃចំនួន ៥អង្គត្រូវបានឃាត់ព្រះកាយជាង១០ម៉ោង ទើបមានការដោះលែង៕
សរសេរមកកាន់លោក ញឹម សុខន តាមរយៈ sokhorn@vodhotnews.com
RELEASE THEM OR YOU STEP DOWN?
ខា ស៊ី អើយសូម អោយប្រាស័យ ដើម្បីប្រទេសរូបរួម សាមគ្គី មិនមែនបើ្រលទ្ធិបារាំងកុម្មុយនិស្តនៅកម្ពុជា ទេ ។ លោក ឈុន កុំឆ្កឹះឆ្កៀល ហួសហេតុពេកប្រាក់ខែគ្រូ សាស្ត្រាចារ្យ ឡើងសន្សឹមៗ។ សូមសម្តេចប្រកាសកុំយកពន្ធលើប្រាក់ខែគ្រូបង្រៀនអី សូមគ្រូ យោគយល់ដល់រាជរដ្ឋាភិបាលផង