ដោយ៖ ថុល ស្រីលក្ខណ៍
ថ្ងៃសុក្រ ទី17 ខែមករា ឆ្នាំ2014
http://vodhotnews.com
អតីតប្រធានគណបក្ស ហ្វ៊ុនស៊ិនប៉ិច និងជាតិនិយម សម្តេចក្រុមព្រះនរោត្តមរណឫទ្ធិ ប្រកាសមិនជាប់ទាក់ទងនឹងគណបក្សទាំងពីរនេះបន្តទៀតឡើយ ខណៈគណបក្សទាំងពីរនេះមិនបានអាសនៈ ក្នុងការបោះឆ្នោតអាណត្តិទី៥នេះ។
សេចក្តីថ្លែងការណ៍របស់ខុទ្ទកាល័យសម្តេចក្រុមព្រះ ចេញផ្សាយនៅថ្ងៃទី១៥ខែមករា ឲ្យដឹងថា ក្រោយពីបានអានសេចក្តីថ្លែងការណ៍របស់គណបក្សហ្វ៊ុនស៊ិនប៉ិច កាលពីថ្ងៃទី២៥ខែធ្នូ ខុទ្ទកាល័យសម្តេចក្រុមព្រះនរោត្តមរណឫទ្ធិ ជម្រាបមតិជាតិ និងអន្តរជាតិថា សម្តេចក្រុមព្រះ គ្មានគោលការណ៍គាំទ្រ គណបក្សហ្វ៊ុនស៊ិនប៉ិច និងជាតិនិយមទេ ព្រោះថា ប្រជាពលរដ្ឋអ្នករាជានិយម អ្នកសីហនុនិយម អស់ជំនឿហើយនឹងថ្នាក់ដឹកនាំនៃគណបក្សទាំងពីរ ដែលធ្លាប់ក្បត់នឹងព្រះអង្គ។ ខុទ្ទកាល័យ អំពាវនាវដល់គណបក្សទាំងពីរ កុំយកព្រះនាមរបស់ព្រះអង្គទៅច្រលូកច្រលំ នឹងនយោបាយប្រជាភិថុតិ។ សម្តេចក្រុមព្រះ ប្រកាសថា គណបក្សជាតិនិយម មិនមែនជាគណបក្សសម្តេចក្រុមព្រះទៀតទេ។
សេចក្តីថ្លែងការណ៍បន្តថា សម្តេចក្រុមព្រះ ក៏មិនមានចេតនាទៅដឹកនាំគណបក្សហ្វ៊ុនស៊ិនប៉ិច ដែលប្រជារាស្ត្រ អ្នករាជានិយម អ្នកសីហនុនិយម បានទាត់ចោលទាំងស្រុងនាការបោះឆ្នោតរដ្ឋសភានីតិកាលទី៥នេះឡើយ។ ខុទ្ទកាល័យ ព្រមានចំពោះបុគ្គលណា ដែលយកព្រះនាមរបស់ព្រះអង្គទៅប្រើប្រាស់ ក្នុងគោលបំណងកេងចំណេញនយោបាយ នោះខុទ្ទកាល័យនឹងចាត់វិធានការតាមផ្លូវច្បាប់ជាធរមាន។
អគ្គលេខាធិការគណបក្សហ្វ៊ុនស៊ិនប៉ិច លោក ញឹក ប៊ុនឆៃ មានប្រសាសន៍ថា ការប្រកាសជំហរ របស់សម្តេចក្រុមព្រះនរោត្តមរណឫទ្ធិ គឺស្របទៅនឹងអ្វីដែលអ្នកដឹកនាំ បក្សនេះចង់បាន។
អ្នកវិភាគនយោបាយ លោកបណ្ឌិត សុខ ទូច ថ្លែងថា មិនទាន់ហួសពេល ដែលគណបក្សទាំងបងប្អូនគ្នានេះត្រូវស្តារកេរ្តិ៍ឈ្មោះរបស់ខ្លួនឡើងវិញទេ។ លោកបញ្ជាក់ថា សម្តេចក្រុមព្រះនរោត្តមរណឫទ្ធិ គួរចូលរួមពង្រឹងបក្សនេះ ឲ្យមានប្រជាប្រិយភាពឡើងវិញ តាមរយៈធ្វើជាទីប្រឹក្សានៃបក្សនេះទើបជាការល្អប្រសើរ។
គណបក្សហ្វ៊ុនស៊ិនប៉ិច និងគណបក្សជាតិនិយម បានប្រកាសចងសម្ព័ន្ធភាពគ្នា មុនការបោះឆ្នោតក្នុងខែកក្កដា ឆ្នាំ២០១៣ ទៅតាមគំនិតផ្តួចផ្តើមរបស់លោក ហ៊ុន សែន ប៉ុន្តែគណបក្សដែលធ្លាប់ជាប់ឆ្នោតដឹកនាំប្រទេសកាលពីអាណត្តិទី១នោះ មិនបានអាសនៈទៀតឡើយ នៅអាណត្តិទី៥នេះ៕
សូមសរសេរមកកាន់កញ្ញា ថុល ស្រីលក្ខណ៍ តាមរយៈ sreyleak@vodhotnews.com
〉。， បក្ស ហ្វុន ស៊ីនប៉ិច ធ្លាក់ប្រជាប្រិយ ដោយសារ ពុករលួយ ផង និង រណប ហ៊ុន សែន ផង !
វាល្មមដល់ថ្ងៃរលាយហើយ ដោយសារឈ្នះឆ្នោតហើយមិនចេះដឹកនាំ គិតតែពុករលួយ ស្រីញី អូន បង និងធ្វើជាអសយ៉ងអោយហុ៊ន សែន វាឥចឹងហើយ…!!!