ដោយ៖ បូ សាវី
ថ្ងៃសុក្រ ទី24 ខែមករា ឆ្នាំ2014
http://vodhotnews.com
ស្តាប់សំឡេង៖ |
ចម្លងទុក |
មន្រ្តីអង្គការពីររូប ត្រូវសមត្ថកិច្ចចាប់ខ្លួនពីបទកំហែងយកប្រាក់ពីអ្នកដឹកឈើនៅខេត្ត សៀម រាប (រូបថតដោយ បូ សាវី)
មន្ដ្រីអង្គការការពារ និងអភិរក្សព្រៃឈើ និងជលផលកម្ពុជា ចំនួន២រូប ត្រូវបានសមត្ថកិច្ចនគរបាល ស្រុកស្វាយលើ ខេត្ដសៀមរាប ចាប់ខ្លួនបញ្ជូនមកស្នងការដ្ឋាននគរបាលខេត្ដ ដោយចោទពីបទកំហែងយកប្រាក់។
ករណីនេះកើតឡើង បន្ទាប់ពីក្រុមអ្នកដឹកឈើតាមរ៉ឺម៉កខុសច្បាប់ ប្រមាណ៥នាក់ ប្ដឹងទៅសមត្ថកិច្ច និងព្រះរាជអាជ្ញា អមសាលាដំបូងខេត្ដ កាលពីថ្ងៃព្រហស្បតិ៍ម្សិលមិញ ដោយចោទថា គំរាមកំហែងទារលុយ ពីពួកគេ ជិត៤០ម៉ឺនរៀលក្នុងម្នាក់ ជាថ្នូរនិងការមិនឃាត់ខ្លួនតាមផ្លូវច្បាប់។
អធិការនគរបាល ស្រុកស្វាយលើ លោក វ៉ន គា ប្រាប់VOD នៅព្រឹកថ្ងៃសុក្រនេះថា ក្រុមមន្ដ្រីអង្គការទាំងពីររូបនោះមាន លោក សុខ វិចិត្រ ជាប្រធានការិយាល័យ និងលោក សាន ភារុណ ជាអនុប្រធានសាខា ប្រចាំស្រុកវ៉ារិន ពួកគេទាំងពីររូប ជាបុគ្គលិកអង្គការការពារ និងអភិរក្សព្រៃឈើនិងជលផលកម្ពុជា មានស្នាក់ការនៅខេត្ដសៀមរាប។ លោកបន្ដថា ជនត្រូវចោទទាំងពីររូប បានដាក់កុងត្រូល ដោយមិនមានការអនុញ្ញាតពីអាជ្ញាធរមូលដ្ឋាន ដើម្បីចាំស្ទាក់ក្រុមអ្នករកស៊ីឈើ យកលុយនៅតំបន់នោះ ដែលលោកថា ជាករណីខុសច្បាប់ «យើងលុបបំបាត់ការដាក់ប៉ុស្ដិ៍ត្រួតពិនិត្យអនាធិបតេយ្យដែលអត់មានមកសហការជាមួយអាជ្ញាធរ ធ្វើនៅក្នុងដែនដីហ្នឹងត្រូវបានគេលុបបំបាត់ហើយ តែកុងត្រូលនៅក្នុងស្រុកស្វាយរិនត្រូវបានលុបបំបាត់ ទើបតែឃើញមកធ្វើសកម្មភាពបីថ្ងៃហ្នឹងទៀត រៀបចំសំណុំរឿងទៅកាន់ស្នងការ បាទព្រះរាជអាជ្ញាគេឲ្យចាត់ការ»។
ប្រធានអង្គការការពារ និងអភិរក្សព្រៃឈើ និងជលផលកម្ពុជា ប្រចាំតំបន់ខេត្ដសៀមរាប លោក ចាន់ វណ្ណសុង មានប្រសាសន៍ថា មន្ដ្រីទាំងពីរនាក់នោះ ពិតជាបុគ្គលិកអង្គការនេះមែន ប៉ុន្ដែមិនទាន់ដឹងពីករណីចាប់ខ្លួន មានជាប់ពាក់ព័ន្ធអ្វីពិតប្រាកដនៅឡើយទេ «បុគ្គលិកខ្ញុំ មន្ដ្រីខ្ញុំ ចាំមើលពួកគាត់សិនប្រហែលថ្ងៃគេយកមកហើយ ដើម្បីខ្ញុំចុះទៅរៀបចំកន្លែង ជួបអភិបាលស្រុកអី ប៉ុន្ដែមិនដឹងថា រឿងហ្នឹងវាកើតហេតុយ៉ាងម៉េច»។
ស្នងការប៉ូលីសខេត្ដសៀមរាប លោក សត ណាឌី មានប្រសាសន៍ថា លោកមិនទាន់ទទួលព័ត៌មាននេះនៅឡើយទេ។
VODមិនអាចទាក់ទងអយ្យការ អមសាលាដំបូង ខេត្ដសៀមរាប លោក ទី សុវណ្ណថាល់ ដើម្បីបំភ្លឺបន្ថែមពីករណីនេះបានឡើយទេ។
បើតាមពលរដ្ឋ ឲ្យដឹងថា មន្ដ្រីនគរបាល និងមន្ដ្រីកងរាជអាវុធហត្ថ និងបុគ្គលិក អង្គការផ្នែកបរិស្ថានមួយចំនួន នៅស្រុកស្វាយលើ បានយកតួនាទីរបស់ខ្លួន ប្រព្រឹត្ដខុសច្បាប់ ដោយធ្វើជាឈ្មួញរកស៊ីឈើ និងចាប់ឈើផង ប៉ុន្ដែត្រូវសមត្ថកិច្ចទាំងនោះបដិសេធ៕
សូមសរសេរមកកាន់លោក បូ សាវី តាមរយៈ savy@vodhotnews.com
សមមុខមន្រ្តីអង្គការអនាធិបតេយ្យទាំងនេះហើយ ត្រូវដាក់ទោសទណ្ឌអោយធ្ងន់។កុំអោយខូចឈ្មោះដល់អង្គការគេល្អៗត្រូវសិក្សាត្រូវប្រភពនិងអនុពា្ញតបង្កើតអង្គការនេះ ព្រោះអង្គការនេះមាននៅគ្រប់តំបន់ដែលសម្បូរធនធានធម្មជាតិនិងបទល្មើស។គ្រប់ស្នាក់ការរបស់វាច្រើនស្អេកស្កះតាមឃុំស្រុកក្នុងខេត្តនានាមិនដែលឃើញមានបុគ្គលិកប្រចាំការ។ ជួនកាលនៅលើកផ្លាកយីហោខាងមុខផ្ទះគេបោះបង់ចោលហើយដើរតែរកលុយពីអ្នកិបំផ្លាញធនធានធម្មជាតិមិនដែលអប់រំពលរដ្ធនិងមន្រ្តីល្មើសនឹងធនធានធម្មជាតិនានាកុំអោយបន្តបំផ្លាញធនធានឡើយ។ បើមិនជឿអ្នកតាដោះក្រមុំ អញ្ជើញដើរមើលក្នុងខេត្តមណ្ឌលគិរីនឹងបានដឹងហើយ។គ្មានឃើញអាជ្ញាធរណាឈឺក្បាលដឹងឭបើកភ្នែកមើលអង្គការនេះម្តងណាទេ។ប្រហែលមន្រ្តីថ្នាក់ខេត្តក្រុមណាមួយបានភាគហ៌ុនពីការជំរិតលុយបទល្មើជាមួយក្រុមអង្គការនេះហើយមើលទៅព្រោះពត៌មានខ្លះថាអង្គការនេះបង្កើតនិងទទួលស្គាល់ត្រឹមថ្នាក់ខេត្ត។អ្នកតាយើងក្រសួងមហាផែ្ទសើបមើលផង ថាតើបេសកកម្មរបស់អង្គការមួយនេះដើរដាក់កុងត្រូលជំរិតលុយបែបនេះប្ញក៌ក្រសួងអនុញាតដូចនេះមែន?
សមមុខមន្រ្តីអង្គការអនាធិបតេយ្យទាំងនេះហើយ ត្រូវដាក់ទោសទណ្ឌអោយធ្ងន់។កុំអោយខូចឈ្មោះដល់អង្គការគេល្អៗត្រូវសិក្សាត្រូវប្រភពនិងអនុពា្ញតបង្កើតអង្គការនេះ ព្រោះអង្គការនេះមាននៅគ្រប់តំបន់ដែលសម្បូរធនធានធម្មជាតិនិងបទល្មើស។គ្រប់ស្នាក់ការរបស់វាច្រើនស្អេកស្កះតាមឃុំស្រុកក្នុងខេត្តនានាមិនដែលឃើញមានបុគ្គលិកប្រចាំការ។ ជួនកាលនៅលើកផ្លាកយីហោខាងមុខផ្ទះគេបោះបង់ចោលហើយដើរតែរកលុយពីអ្នកិបំផ្លាញធនធានធម្មជាតិមិនដែលអប់រំពលរដ្ធនិងមន្រ្តីល្មើសនឹងធនធានធម្មជាតិនានាកុំអោយបន្តបំផ្លាញធនធានឡើយ។ បើមិនជឿអ្នកតាដោះក្រមុំ អញ្ជើញដើរមើលក្នុងខេត្តមណ្ឌលគិរីនឹងបានដឹងហើយ។គ្មានឃើញអាជ្ញាធរណាឈឺក្បាលដឹងឭបើកភ្នែកមើលអង្គការនេះម្តងណាទេ។ប្រហែលមន្រ្តីថ្នាក់ខេត្តក្រុមណាមួយបានភាគហ៌ុនពីការជំរិតលុយបទល្មើជាមួយក្រុមអង្គការនេះហើយមើលទៅព្រោះពត៌មានខ្លះថាអង្គការនេះបង្កើតនិងទទួលស្គាល់ត្រឹមថ្នាក់ខេត្ត។អ្នកតាយើងក្រសួងមហាផែ្ទសើបមើលផង ថាតើបេសកកម្មរបស់អង្គការមួយនេះដើរដាក់កុងត្រូលជំរិតលុយបែបនេះប្ញក៌ក្រសួងអនុញាតដូចនេះមែន?