ដោយ៖ ឡាយ សាមាន
ថ្ងៃព្រហស្បតិ៍ ទី30 ខែមករា ឆ្នាំ2014
http://vodhotnews.com
ពន្ធនាគារត្រពាំងផ្លុង ដែលជាកន្លែងឃុំខ្លួនមនុស្សទាំង២៣ (រូបភាពដោយ ញឹម សុខន)
មន្ត្រីជាន់ខ្ពស់គណបក្សសង្គ្រោះជាតិ ប្រកាសថានឹងនាំក្រុមគ្រួសារអ្នកជាប់ឃុំ ទៅសួរសុខទុក្ខ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធលោក វន់ ពៅ និងអ្នកជាប់ឃុំ ២២នាក់ទៀត ដែលកំពុងជាប់ឃុំខ្លួននៅត្រពាំងផ្លុងនៅថ្ងៃទី៤ ខែកុម្ភៈខាងមុខនេះ។
សាលាដំបូងបានបដិសេធសំណើរបស់លោក យឹម សុវណ្ណ នៃគណបក្សសង្គ្រោះជាតិម្តងហើយ ប៉ុន្តែនៅដើមសប្ដាហ៍នេះ បេក្ខជនជាប់ឆ្នោតមណ្ឌលភ្នំពេញ នៃគណបក្សនេះ លោក សុន ឆ័យ បានដាក់លិខិតមួយទៀត ទៅប្រធានសាលាដំបូងរាជធានីភ្នំពេញ លោក ជីវ កេង ដើម្បីសុំសុំចូលជួបអ្នកជាប់ឃុំ ២៣នាក់ នៅត្រពាំងផ្លុងនៅថ្ងៃទី៤ ខែកុម្ភៈ។
លោក សុន ឆ័យ ប្រាប់VODថា មន្ត្រីគណបក្សសង្គ្រោះជាតិ២០រូប នឹងដឹកនាំក្រុមគ្រួសារអ្នកជាប់មួយចំនួន ចុះជួបសួរសុខទុក្ខ អ្នកទាំង២៣នាក់ ដែលកំពុងជាប់ឃុំខ្លួន នៅត្រពាំងផ្លុងខេត្តកំពង់ចាម ដើម្បីផ្តល់ថ្នាំព្យាបាល ស្បៀង និងថវិកា មួយចំនួនជូនពួកគាត់។
ប្រធានសាលាដំបូងរាជធានីភ្នំពេញ លោក ជីវ កេង មិនអាចទាក់ទងបានទេ។
អគ្គនាយកដ្ឋានពន្ធនាគារនៃក្រសួងមហាផ្ទៃលោក គុយ ប៊ុនសន មិនធ្វើអត្ថាធិប្បាយច្រើនលើបញ្ហានេះទេ តែលោកថា អ្នកដែលអាចចូលសួរសុខទុក្ខបាន មានតែសាច់ញាតិក្រុមគ្រួសារ ឪពុកម្តាយ និងកូនតែប៉ុណ្ណោះ។
កាលពីថ្ងៃទី២៤ ខែមករា លិខិតអគ្គនាយកដ្ឋានពន្ធនាគារនៃក្រសួងមហាផ្ទៃ អះអាងថា ការមិនឲ្យជួបជនជាប់ឃុំ ឈ្មោះ វន់ ពៅ ព្រោះកំពុងស្ថិតក្នុងដំណាក់កាលស៊ើបអង្កេតរបស់ស្ថាប័នតុលាការ ដូចនេះក្រៅពីគ្រួសារ និងមេធាវីរបស់ជនជាប់ឃុំមិនអាចអនុញ្ញាតឲ្យចូលជួបឡើយ។
មន្ត្រីស៊ើបអង្កេតជាន់ខ្ពស់ នៃអង្គការលីកាដូ លោក អំ សំអាត យល់ថា តាមច្បាប់ប្រជាពលរដ្ឋធម្មតាអ្នកស្គាល់គ្នា អាចចូលសួរសុខទុក្ខ អ្នកជាប់ឃុំបាន ជាពិសេសអ្នកតំណាងរាស្ត្រ។ លោកចាត់ទុកថា ការហាមមិនឲ្យអ្នកផ្សេងចូលជួបសួរសុខទុក្ខនេះ ជារឿងនយោបាយ។
កន្លងទៅនេះ មហាអំណាចចក្រភពអង់គ្លេស សហភាពអឺរ៉ុប និងអង្គការសង្គមស៊ីវិលជិត២០០ បានបើកយុទ្ធនាការដង្ហែដាក់ញ្ញតិទៅស្ថានទូតនានាប្រចាំកម្ពុជា ទាមទារឲ្យរដ្ឋាភិបាលដោះលែងអ្នកទាំង២៣នាក់ជាបន្ទាន់ ដោយពុំមានលក្ខខណ្ឌ៕
សូមសរសេរមកលោក ឡាយ សាមាន តាមរយៈ samean@vodhotnews.com
ស្តាប់ហើយគិតផង
http://www.youtube.com/watch?v=w-n2SveTvXo
http://www.youtube.com/watch?v=1tN9Zudy_BI
http://www.youtube.com/watch?v=2c-GYPGM470
http://www.youtube.com/watch?v=_QYMmJcYCPk