ដោយ៖ តាំង វីដា
ថ្ងៃសុក្រ ទី14 ខែកុម្ភៈ ឆ្នាំ2014
http://vodhotnews.com
ក្រុមសមត្ថកិច្ចដែលបានដាក់ពង្រាយនៅតំបន់រមណីយដ្ឋានវត្តភ្នំ (រូបថត៖ តាំង វីដា)
អាជ្ញាធររាជធានីភ្នំពេញ នៅព្រឹកថ្ងៃសុក្រនេះ បានដាក់ពង្រាយកម្លាំងការពារនៅរមណីដ្ឋានវត្តភ្នំ ដើម្បីរារាំងក្រុមយុវជនដែលចូលរួមយុទ្ធនាការមួយរយកោដិសំឡេង មិនឲ្យជួបជុំ និងធ្វើសន្និសីទសារព័ត៌មាននៅទីនោះឡើយ។
ក្រុមយុវជនប្រមាណ ២០០នាក់ មកពីសាកលវិទ្យាល័យ វិទ្យាល័យ និងអង្គការនានា គ្រោងធ្វើយុទ្ធនាការមួយរយកោដិសំឡេង ដែលជាយុទ្ធនាការមួយ ទាមទារឲ្យបញ្ឈប់ការប្រើអំពើហិង្សាលើស្ត្រី និងកុមារី នៅថ្ងៃទី១៤ខែកុម្ភៈនេះ ដែលជាថ្ងៃនៃក្តីស្រលាញ់ តាមរយៈការជិះកង់ ព្រមទាំងធ្វើសន្និសីទសារព័ត៌មាន នៅរមណីយដ្ឋានវត្តភ្នំ។ ប៉ុន្តែនៅព្រឹកនេះ គេសង្កេតឃើញកម្លាំងសមត្ថកិច្ចជាច្រើននាក់ បានដាក់ពង្រាយនៅជុំវិញវត្តភ្នំ មិនអនុញ្ញាតឲ្យយុវជនទាំងនោះ ប្រមូលផ្តុំឡើយ ដោយថា ថ្ងៃនេះជាថ្ងៃបុណ្យមាឃបូជា។
ក្រុមយុវជនទាំងនោះ បានសម្តែងការខកចិត្តដែលអាជ្ញាធាររារាំងពួកគាត់មិនឲ្យជិះកង់ ក្នុងយុទ្ធនាការទាមទារយុត្តិធម៌ និងបញ្ចប់អំពើហិង្សាលើស្ត្រី និងកុមារី។ ក្រុមយុវជនទាំងនោះ បានចាត់ទុកការរារាំងរបស់អាជ្ញាធរ ថាជាការរឹតត្បិតសិទ្ធិសេរីភាពក្នុងការសម្តែងមតិរបស់ពលរដ្ឋ។
(រូបភាពពីមជ្ឈមណ្ឌលអប់រំច្បាប់សម្រាប់សហគមន៍)
យុទ្ធនាការមួយរយកោដិសំឡេងក្នុងឆ្នាំនេះ ធ្វើឡើង ក្រោមប្រធានបទ <<សេចក្តីស្រឡាញ់ និងយុត្តិធម៌>> ក្នុងគោលបំណងចូលរួមជាមួយសកម្មជននៅទូទាំងពិភពលោក ដែលស្រលាញ់និងគាំទ្រស្ត្រីចំនួនមួយរយកោដិនាក់ ដើម្បីបង្ហាញសាមគ្គីភាពជាមួយស្ត្រីដែលបានរួចផុតពីអំពើហិង្សា តាមរយៈការបញ្ចេញសំឡេង និងរាំជាមួយគ្នា ដើម្បីទាមទាររកយុត្តិធម៌ និងបញ្ចប់អំពើហិង្សាលើស្ត្រី និងកុមារី។ យុទ្ធនាការនេះ មានសកម្មភាពផ្សេងៗដូចជា ការរាំជាក្រុម ការជិះកង់ បទសម្ភាសន៍តាមវិទ្យុនិងទូរទស្សន៍ និងការសម្តែងក្នុងការប្រគុំតម្ត្រី នៅល្ងាចថ្ងៃទី១៤ខែកុម្ភៈ នៅមជ្ឈមណ្ឌលពាណិជ្ជកម្មកោះពេជ្រ រាជធានីភ្នំពេញ៕
សរសេរមកកាន់លោក តាំង វីដា តាមរយៈ vida@vodhotnews.com
តាចាស់ ហ៊ុន សែន ខ្លាច របប ប្រជាធិបតេយ្យ ពិតប្រាកដ្ឋ ! តាចាស់ ហ៊ុន សែន ចង់ ធ្វើ របប
ប្រជាធិបតេយ្យ ក្លែងក្លាយ !
ដើរខុសហើយនូវតែអនុវត្តកាន់តែខុសទៀត សូមប្រវត្តិសាស្រ្តចារឹកទុកទៅចុះ៕
គេថា«យុវជន គឺជាទំពាំងស្នងឬស្សី» ចុះបើគេកាត់ទំពាំងមិនឲ្យដុះដូចនេះ តើអនាគតមានឬស្សីពីណាមក ?