ដោយ៖​ ណាត សុភាព​
ថ្ងៃចន្ទ ទី3 ខែមិនា ឆ្នាំ2014
http://vodhotnews.com

អភិបាល​រាជធានី​ភ្នំពេញ​នៅ​ថ្ងៃ​ចន្ទ​នេះ អំពាវនាវ​ឲ្យ​អ្នក​មាន​ជម្លោះ​ដីធ្លី​តំបន់​បឹង​កក់ ដែល​សេសសល់​ពី​ការទទួល​បាន​សំណង ចូលរួម​សហការ​ជាមួយនឹង​សាលា​រាជធានី​ភ្នំពេញ ដើម្បី​ពន្លឿន​ការដោះស្រាយ​ឲ្យមាន​ប្រសិទ្ធិភាព​។​

​ក្នុង​ពិធី​ប្រគល់​ប័ណ្ណ​សំគាល់​កម្មសិទ្ធិ​កាន់កាប់​អចលនវត្ថុ ជូន​ប្រជាពលរដ្ឋ​ចំនួន​១៧​គ្រួសារ​ក្នុង​តំបន់​បឹង​កក់ សង្កាត់​ស្រះចក ខណ្ឌដូនពេញ អភិបាល​រាជធានី​ភ្នំពេញ លោក ប៉ា សុជាតិ​វង្ស ថ្លែងថា ដើម្បី​ឲ្យមាន​ជឿ​ទុកចិត្ត​លើ​សាលា​រា​ធានី​ភ្នំពេញ សូមប្រជាពលរដ្ឋ​តំបន់​បឹងកក់​ ដែល​សេសសល់​មិនទាន់​ទទួលបាន​សំណង សហការ​ជាមួយ​ស្ថាប័ន​មួយ​នេះ ដើម្បី​ពន្លឿន​ការដោះស្រាយ​បញ្ហា​ដីធ្លី​ តំបន់​បឹង​កក់​ឲ្យមាន​ភាពល្អប្រសើរ។

តំណាង​ពលរដ្ឋ​តំបន់​បឹង​កក់​អ្នកស្រី ទេព វ​ន្នី បាន​ស្វាគមន៍​ចំពោះ​ឆន្ទៈ​របស់ អភិបាល​រាជធានី ដែល​មាន​បំណង​ចង់​ដោះស្រាយ​បញ្ហា​ដីធ្លី​ជូន​ពួកគាត់​។ ប៉ុន្តែ​អ្នកស្រី អះអាងថា កន្លងមក ការសន្យា​របស់​សាលា​រាជធានី មិនទាន់​ធ្វើឲ្យ​ពួកគាត់​ជឿ​ទុកចិត្ត​នៅឡើយ​ទេ។​

កាលពី​ឆ្នាំ​២០១២ រាជរដ្ឋាភិបាល​កម្ពុជា លោក ហ៊ុន សែន បាន​ចេញ​អនុក្រិត្យ កាត់​ដី​នៅ​តំបន់​បឹង​កក់​ចំនួន​១២.៤៤​ហិកតា ទុក​ឲ្យ​ពលរដ្ឋ​ដែល​មិន​ព្រម​ចាកចេញ ដោយ​សំអាង​លើ​សំណង​តិចពេក​។ ​ប៉ុន្តែ​មក​ដល់ពេលនេះ​ជម្លោះ​ដី​ចំនួន​៧​ឆ្នាំ​នោះ មិន​ទាន់​បញ្ចប់​នៅ​ឡើយ​។​

​អ្នកគ្រប់គ្រង​បច្ចេកទេស​ឃ្លាំមើល​ការរំលោភ​សិទ្ធិមនុស្ស អង្គការ​លីកាដូ លោក អំ សំអាត យល់ថា បើ​អភិបាល​រាជធានី​ភ្នំពេញ មាន​ឆន្ទៈ​ដោះស្រាយ​ពិតមែន ជម្លោះ​ដីធ្លី​តំបន់​បឹងកក់ នឹង​ត្រូវ​ចប់ ហើយ​ការចេញ​តវ៉ា​ក៏ត្រូវ​បញ្ចប់​ដែរ​។

ជម្លោះ​ដីធ្លី​នៅ​តំបន់​បឹង​កក់​កើតឡើង តាំងពី​ឆ្នាំ​២០០៧ នៅពេល​ដែល​រដ្ឋាភិបាល ផ្តល់​ដី​តំបន់​នោះ ជា​ដី​សម្បទាន​សេដ្ឋកិច្ច​ឲ្យ​ក្រុម​ហ៊ុនស៊ូ​កាកូអ៊ីន រយៈពេល​៩៩​ឆ្នាំ ហើយ​រដ្ឋ​ទទួលបាន​ទឹកប្រាក់​ចំនួន ៧៩២០០០​ដុល្លារ​អាមេរិក​។ ដី​ដែល​រដ្ឋ​ផ្តល់​ឲ្យ​ទំហំ ១៣៣ហិកតា ប៉ះពាល់​ដល់​ប្រជាពលរដ្ឋ​ចំនួន ៤២៥២​គ្រួសារ​។​

​បច្ចុប្បន្ន​នៅ​សល់​ប្រជាពលរដ្ឋ ដែល​មិន​ទាន់​ទទួលបាន​ដំណោះស្រាយ​ប្រមាណ​៣៨​គ្រួសារ​ទៀត ហើយ​បច្ចុប្បន្ន​សកម្មជន​ដីធ្លី​ទាំងនោះ តែង​ចេញ​មុខ​តវ៉ា​ទាមទារ​ឲ្យ​សាលា​រាជធានី​ភ្នំពេញ ជួយ​ពន្លឿន​ដោះស្រាយ​ជូន​ពួកគាត់​ឲ្យមាន​ប្រសិទ្ធិភាព និង​ស្រប​តាម​អនុក្រិត្យ​របស់​រដ្ឋាភិបាល​៕

សូមសរសេរមកលោក ណាត សុភាព​​ តាមរយៈ sopheap@vodhotnews.com