ដោយ៖ កាន់ វិច្ឆិកា
ថ្ងៃចន្ទ ទី3 ខែមិនា ឆ្នាំ2014
http://vodhotnews.com
(រូបថតដោយកាន់ វិច្ឆិកា)
ប្រជាពលរដ្ឋកំពុងរស់នៅអគារប៊ុលឌីង ដែលត្រូវបានសាងសង់តាំងពីទសវត្សរ៍ទី៦០ អំពាវនាវឲ្យរដ្ឋាភិបាលជួយទិញអគារដែលពួកគាត់កំពុងរស់នៅ ក្នុងតម្លៃមួយសមរម្យ អាចទទួលយកបាន ខណៈអគារនោះ មានលក្ខណៈចាស់ទ្រុឌទ្រោមទៅហើយ។
ប្រជាពលរដ្ឋដែលរស់នៅលើអគារប៊ុលឌីង លោក មួង សុខនាថ ប្រាប់VODថា អគារនេះសាងសង់ឡើងតាំងពីសម័យបារាំង ហើយឥឡូវនេះ មានលក្ខណៈទ្រុឌទ្រោមណាស់ទៅហើយ។ លោកបន្តថាពេលខ្លះលោករស់នៅដោយមានការបារម្ភពីសុវត្ថិភាព ព្រោះថាអគារពុកផុយដោយកន្លែង ព្រមទាំងមានអាយុកាលយូរយារណាស់មកហើយ។ លោកបានអំពាវនាវឲ្យរដ្ឋាភិបាលជួយទិញអគារនេះ ដោយផ្តល់តម្លៃមួយសមរម្យជូនដល់ពួកគាត់ ដើម្បីឲ្យពួកគាត់មានលទ្ធភាពរកកន្លែងរស់នៅបានសមរម្យជាងនេះ។
ពលរដ្ឋម្នាក់ទៀតដែលរស់នៅលើអគារប៊ុលឌីងដែរនោះ អ្នកស្រី កែវ សុខា ប្រាប់ថាអ្នកស្រី មិនមានការបារម្ភពីការរស់នៅលើអគារនោះទេ បើទោះបីជាមើលពីសម្បកក្រៅវាហាក់ដូចជាទ្រុឌទ្រោមក៏ដោយ តែពីខាងក្នុងវិញ វានៅតែមានសភាពរឹងមាំដដែល។ ទោះបីជាយ៉ាងណាក៏ដោយ អ្នកស្រី ក៏មិនអាចរស់នៅទីនេះរហូតដែរ ដូច្នេះ អ្នកស្រីសុំឲ្យរដ្ឋាភិបាល ក៏ដូចជាក្រុមហ៊ុនដែលចង់វិនិយោគ ជួយទិញអគារនេះ ក្នុងតម្លៃសមរម្យមួយដែលអាចទទួលយកបានទាំងអស់គ្នា។
អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ លោក បេង ហុងសុជាតិខេមរ៉ូ មានប្រសាសន៍ថា អគារប៊ុលឌីងពិតជាមានអាយុវ័យចំណាស់មែន តែរដ្ឋមិនអាចធ្វើអ្វីបាននោះទេ ព្រោះវាជាទ្រព្យសម្បត្តិឯកជន។ លោកបន្តថា ទោះជាយ៉ាងណាក៏ដោយ ប្រជាពលរដ្ឋ ដែលរស់នៅលើអគារនោះ អាចស្នើសុំទៅរដ្ឋាភិបាលប្រសិនជាមានការបារម្ភពីភាពពុកផុយនៃអគារនោះ ដើម្បីឲ្យរដ្ឋាភិបាលចុះត្រួតពិនិត្យ និងរកដំណោះស្រាយទៅតាមសភាពជាក់ស្តែង។
កាលពីដើមខែកញ្ញា ឆ្នាំ២០១០ សាលារាជធានីភ្នំពេញ បានជូនដំណឹងថា អ្នករស់នៅក្នុងតំបន់អតីតប៊ុលឌីងស ក្នុងខណ្ឌចំការមន អាចត្រូវបានបង្ខំឲ្យចាកចេញពីអគារ ប្រសិនបើអ្នកជំនាញសាលាក្រុងរកឃើញថា អគារនេះ ទ្រុឌទ្រោម និងគ្មានសុវត្ថិភាព។ លិខិតនោះបានឲ្យដឹងថា ដើម្បីជៀសវាងគ្រោះថ្នាក់ សាលារាជធានីបានបង្គាប់ប្រជាជនទាំងអស់ ដែលកំពុងរស់នៅ ឲ្យឈប់ជួសជុល ឬសាងសង់សំណង់បន្ថែម ពីលើអគារដែលមានស្រាប់ បើគ្មានការអនុញ្ញាតពីមន្ត្រីជំនាញ ព្រមទាំងត្រៀមខ្លួនដើម្បីចាកចេញពីអគារ ទៅរកទីកន្លែងថ្មីរស់នៅ។
VOD មិនទាន់អាចសុំការបំភ្លឺបន្ថែមពីអ្នកនាំពាក្យសាលារាជធានី លោក ឡុង ឌីម៉ង់ បាននៅឡើយទេ។
អ្នកគ្រប់គ្រងទូទៅក្រុមហ៊ុន ខ្មែររៀលអ៊ីស្ទេត លោក គឹម ហៀង មានប្រសាសន៍ថា ការវាយតម្លៃអចលនទ្រព្យ ត្រូវស្រាវជ្រាវច្រើនដំណាក់កាល និងច្រើនប្រភេទ តួយ៉ាងដូចជាដីនៅតំបន់អគារប៊ុលឌីងនេះ ប្រសិនជាដីធម្មតាដែលមិនមានបញ្ហាពាក់ព័ន្ធច្រើន ឬមានប្លង់ត្រឹមត្រូវ អាចមានតម្លៃ៣០០០ដុល្លារក្នុង១ម៉ែត្រការ៉េ ប៉ុន្តែដោយសារតែដីនេះ មានលក្ខណៈស្មុគ្រស្មាញ ដូច្នេះបើតាមការវាយតម្លៃ អាចទទួលបានត្រឹម១៦០០ដុល្លារប៉ុណ្ណោះក្នុងមួយម៉ែត្រការ៉េ។
ពលរដ្ឋអះអាងថា រហូតមកដល់ពេលនេះ អគារប៊ុលឌីងនេះ មានពលរដ្ឋជាង១០០០គ្រួសារ កំពុងរស់នៅ និងប្រកបរបរចិញ្ចឹមជីវិត៕
សរសេរមកកាន់ កញ្ញា កាន់ វិច្ឆិកា តាមរយៈvicheika@vodhotnews.com
VOD មិនទាន់អាចសុំការបំភ្លឺបន្ថែមពីអ្នកនាំពាក្យសាលារាជធានី លោក ឡុង ឌីម៉ង់ បាននៅឡើយទេ។
____________________________
អ្នកកាសែតអាងអី អាងតែពាក្យមួយម៉ាត់ យករួចខ្លួន ដើម្បីធ្វើយ៉ាងណា បញ្ចេញការវាយប្រហាររបស់ខ្លួន ដោយពុំបាច់មានកិច្ចការពារពីចុងចោទ។
តែរឿងអាគារប៊ិលឌីងនេះ អ្នកណាកឬគេដឹងប្រវត្តដែរថា ជាអគារមួយដែលរដ្ឋបានគ្រប់គ្រង រៀបចំដើម្បី រំលាយចោល និងសាងសង់គម្រោងថ្មីពីយូរណាស់មកហើយ។ រដ្ឋាភិបាលបានចំណាយប្រាក់ និងរកដីតំបន់ជាយក្រុងឲ្យអ្នកប៊ីលឌីងនេះ តាំងពីឆ្នាំ ១៩៨៩ ឬ៩០ មកម្លេះ។ ហើយក្នុងអំឡុងពេលឆ្នាំ ២០០០ ក៏រៀបចំទៀត។
តែរឿងអ្វី បានជាដោះមិនចេញ ក៏ព្រោះតែចលនានយោបា ដែលលើកទឹកចិត្តមនុស្សឲ្យប្រឆាំងនឹងអាជ្ញាធរ។
ល្អទុកឲ្យគាត់នៅទីនេះ ទាំងមិនស្របច្បាប់រហូតដល់ថ្ងៃមួយ ដែលអគារបាក់រលំ ស្លាប់ដូចអគារបុគ្គលិកអគ្គីសនី នៅក្បាលថ្នល់ ទើបគាត់ដឹងខ្លួន។
យ៉ាងម៉េច ចង់ ១ ការ៉េ ១៦០០ ដុល្លា ?
គំនិត អា បុល bol អាក្រក់ណាស់ ! មុខអ្ហែង យ៉ាងម៉េច បែរ ទៅខាងណា បានជាអាក្រក់ម្លេះ !