ដោយ៖ ពេជ្រ សុធារី
ថ្ងៃព្រហស្បតិ៍ ទី3 ខែមេសា ឆ្នាំ2014
http://vodhotnews.com
ស្តាប់សំឡេង៖ |
ចម្លងទុក |
មើលរូបភាពបន្ថែម
រដ្ឋសភានៃព្រះរាជាណាចក្រកម្ពុជា (រូបថត តាំង វីដា)
កាលពីថ្ងៃទី០១ ខែមេសានេះ រដ្ឋសភានៃព្រះរាជាណាចក្រកម្ពុជា បានបើកសម័យប្រជុំរបស់ខ្លួនលើកទី២ នីតិកាលទី៥ លើរបៀបវារៈចំនួន៤ ដែលមានតំណាងរាស្ត្រគណបក្សប្រជាជនកម្ពុជា ដែលជាគណបក្សកាន់អំណាចចំនួន ៦៨រូបចូលរួម ក្រោមអធិបតីភាពរបស់ប្រធានរដ្ឋសភា លោក ហេង សំរិន។ សម័យប្រជុំ សភាលើកទី២នេះ គឺជាង៦ខែ បន្ទាប់ពីគណបក្សសង្គ្រោះជាតិ ធ្វើពហិការ ក្នុងការបើកសម័យប្រជុំសភាដំបូង កាលពីថ្ងៃទី២៣ ខែកញ្ញា ដែលពេលនោះមានតែតំណាងរាស្ត្របក្សប្រជាជនកម្ពុជា តែ៦៨រូប ដែលស្បថចូលកាន់តំណែង មិនមានវត្តមានបេក្ខជនជាប់ឆ្នោតតំណាងរាស្ត្រគណបក្សសង្គ្រោះជាតិ ៥៥រូប។
នៅក្នុងសម័យប្រជុំនោះដែរ ព្រះមហាក្សត្រ ក៏បង្ហាញពីព្រះរាជហរទ័យរបស់ព្រះអង្គ តាមរយៈព្រះរាជសាររបស់ទ្រង់ ដោយសង្ឈឹមថា រដ្ឋសភា ដែលតំណាងប្រជាពលរដ្ឋខ្មែរទាំងមូល នឹងបន្តខិតខំប្រឹងប្រែង ដោះស្រាយបញ្ហាប្រឈមនានា ដើម្បីសម្រេចឲ្យបាននូវទិសដៅរួមរបស់កម្ពុជា ជាជំហ៊ានៗ ធានាបាននូវសង្គមកម្ពុជាមួយ ដែលរឹងមាំ មានសន្តិភាព ស្ថិរភាពនយោបាយ សន្តិសុខ និងសណ្តាប់ធ្នាប់សង្គម មានការអភិវឌ្ឍន៍ប្រកបដោយចីរភាព និងសមធម៌។
ព្រះរាជសារ បន្តថា ជាមួយនឹងការប្រកាន់ខ្ជាប់ យ៉ាងម៉ឺងម៉ាត់ នូវគោលការណ៍លទ្ធិប្រជាធិបតេយ្យសេរីពហុបក្ស ការគោរពសិទ្ធិ និងសេចក្តីថ្លៃថ្នូរ របស់មនុស្ស ជាសង្គមមួយ ដែលមានកោសិកាផ្សាភ្ជាប់គ្នា និងត្រូវពង្រឹង ដើម្បីធានាថា ប្រជាជនកម្ពុជា មានចំណេះដឹងខ្ពស់ និងមានវប្បធម៌ល្អប្រសើរ ថ្លៃថ្នូរមានជីវភាពសមរម្យ និងមានការរស់នៅ ប្រកបដោយសុខដុមរមនា ទាំងក្នុងរង្វង់គ្រួសារ និងសង្គមជាតិ។
តើសភាជាតិ បានបំពេញតួនាទីរបស់ខ្លួនហើយឬនៅ ខណៈដែលកម្ពុជា កំពុងជួបប្រទះនូវបញ្ហាដីធ្លី ការរំលោភសិទ្ធិមនុស្ស ការបង្ក្រាបកម្មករនៅផ្លូវវេងស្រេងបណ្តាលឲ្យកម្មករស្លាប់ជាច្រើននាក់ ប្រព័ន្ធយុត្តិធម៌រងការរិះគន់ថាមិនឯករាជ្យជាដើមនោះ?
លោកបណ្ឌិត ឡៅ ម៉ុងហៃ អ្នកវិភាគឯករាជ្យ យល់ថា សភាកម្ពុជាបច្ចុប្បន្ន នៅមិនទាន់មានលក្ខណៈស្របតាមច្បាប់នៅឡើយទេ ខណៈដែលសមាជិកសភានៅមិនគ្រប់ទៅតាមការសម្រេចរបស់ក្រុមប្រឹក្សាធម្មនុញ្ញ កាលពីឆ្នាំ២០១២ ដែលតម្រូវឲ្យមានសមាជិកយ៉ាងតិច ១២០រូប។ លោកថា បើទោះមានសមាជិកភាមានគ្រប់ក៏ដោយ ប៉ុន្តែកន្លងមក លោកសង្កេតឃើញថា តំណាងរាស្ត្រមួយចំនួន មិនបានអនុវត្តតាមតួនាទីរបស់ខ្លួនទេ នៅពេលដែលពលរដ្ឋរងទុក្ខ ហើយរត់ទៅពឹងពាក់តំណាងរាស្ត្ររបស់ខ្លួនឲ្យជួយនោះ «តំណាងរាស្ត្រខ្លះ គឺគេមិនចង់ឲ្យប្រជាពលរដ្ឋធ្វើបាតុកម្មនោះទេ យកញត្តិយកអីទៅដាក់អីទេ អ្នកខ្លះខ្ញុំឃើញដើរជៀសមិនចង់ជួបទេប្រជាពលរដ្ឋខ្លួនឯង អញ្ចឹងអត់បានបំពេញតួនាទីរបស់ខ្លួនឯងទេ»។
កាលពីថ្ងៃទី០២ ខែមេសា ប្រធានគណបក្សសង្គ្រោះជាតិ លោក សម រង្ស៊ី ក៏ផ្ញើលិខិតថ្វាយព្រះមហាក្សត្រ ទូលថ្វាយរឿងការបើកសម័យប្រជុំរដ្ឋសភាលើកទី២ នីតិកាលទី៥នេះដែរ។ លោកសម រង្ស៊ី បានលើកឡើងក្នុងលិខិតថា ក្នុងឋានៈទូលព្រះបង្គំជាប្រធានគណបក្សសង្គ្រោះជាតិ ដែលតំណាងឲ្យប្រជាពលរដ្ឋយ៉ាងតិច៣លាននាក់ ទូលព្រះបង្គំសូមព្រះបរមរាជានុញ្ញាតទូលថ្វាយព្រះករុណាជាអង្គម្ចាស់ ទ្រង់ព្រះមេត្តាជ្រាបថា រដ្ឋសភាបច្ចុប្បន្ន ដែលបង្កើតឡើងកាលពីថ្ងៃទី២៣ ខែកញ្ញា ឆ្នាំ២០១៣ គឺជាសភាឯកបក្ស ដែលតំណាងមកពីគណបក្សប្រជាជនកម្ពុជាតែប៉ុណ្ណោះ មិនមែនតំណាងឲ្យពលរដ្ឋខ្មែរទាំងមូលឡើយ ដោយសារពុំមានតំណាងរាស្ត្រគ្រប់ចំនួន១២០រូប ចូលរួមក្នុងសម័យប្រជុំដំបូងនៃរដ្ឋសភា ដូចដែលតម្រូវដោយមាត្រា៧៦នៃរដ្ឋធម្មនុញ្ញនៃព្រះរាជាណាចក្រកម្ពុជា។
លោក គល់ បញ្ញា នាយកប្រតិបត្តិនៃគណៈកម្មាធិការ ដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ថា ខុមហ្វ្រែល (COMFREL) ក៏បានលើកឡើងដែរថា តួនាទីរបស់តំណាងរាស្ត្រ ដែលជាតំណាងឲ្យប្រជាពលរដ្ឋ គឺត្រូវជួយដោះស្រាយបញ្ហារបស់ប្រជាពលរដ្ឋ នៅពេលដែលពលរដ្ឋរងគ្រោះដោយសារបញ្ហាដីធ្លី រងនូវការបាញ់សម្លាប់ដូចនៅផ្លូវវេងស្រេង ឬរងនៅការរំលោភសិទ្ធិមនុស្សណាមួយ តាមរយៈការអន្តរាគមន៍ទៅអាជ្ញាធរឲ្យដោះស្រាយ ឬកោះហៅរាជរដ្ឋាភិបាល ទៅឆ្លើយបំភ្លឺទៅលើករណីណាមួយ ដែលសង្ស័យថាមានភាពមិនប្រក្រតី។
ប៉ុន្តែបច្ចុប្បន្ន លោកសង្កេតឃើញថា តំណាងរាស្ត្រពុំបានបំពេញភារកិច្ចរបស់ខ្លួន ដូចមានចែងក្នុងរដ្ឋធម្មនុញ្ញ ឬគោលការណ៍លទ្ធិប្រជាធិបតេយ្យនោះទេ «ព្រោះដោយសារតែវាមានបញ្ហារឿងប្រព័ន្ធនយោបាយនៅស្រុកយើង ប្រព័ន្ធបោះឆ្នោតនៅស្រុកយើង ឬក៏ច្បាប់របស់យើងមួយចំនួន ដូចច្បាប់បោះឆ្នោតអីដែលធ្វើឲ្យទន់ខ្សោយនៃអ្នកតំណាងរាស្ត្រ។ តួនាទីរបស់គាត់ គឺអាចមានតួនាទីជាតំណាងរបស់ប្រជាពលរដ្ឋ យើងឃើញគាត់ អត់មានតំណាងប្រជាពលរដ្ឋ ភាគច្រើនឃើញតំណាងឲ្យគណបក្សអីអញ្ចឹងទៅ ដល់ពេលធ្វើការទៅ ភាគច្រើនតាមតែ គណបក្ស តាមមេដឹកនាំគណបក្សហ្នឹង វាអត់មានទិដ្ឋភាពជាតំណាងរបស់ប្រជាពលរដ្ឋ ទោះបីយើងប្រើពាក្យតំណាងរាស្ត្រ ប៉ុន្តែវាអត់មានភាពជាតំណាងរាស្ត្រ វាមានតំណាងនៃគណបក្សទៅវិញ»។
លោក គល់ បញ្ញា ក៏បានពន្យល់ពីតួនាទីសំខាន់ៗរបស់តំណាងរាស្ត្របន្តថា ក្រៅពីធ្វើការក្នុងនាមតំណាងរបស់ប្រជាពលរដ្ឋ ដោះស្រាយបញ្ហារបស់ប្រជាពលរដ្ឋហើយ តំណាងរាស្ត្រនិមួយៗមានតួនាទីក្នុងការអនុម័តច្បាប់ ដោយមានការឆ្លុះបញ្ចាំងពីស្ថានភាពប្រជាពលរដ្ឋនៅតាមមណ្ឌលរបស់ខ្លួន ហើយត្រូវមានការពិភាក្សាដេញដោលឲ្យបានលម្អិត ទៅលើសេចក្តីព្រាងច្បាប់និមួយៗ ជាពិសេសច្បាប់ថវិកាជាតិ ក្នុងចំណោមតំណាងរាស្ត្រមកពីគ្រប់គណបក្សនយោបាយទាំងអស់ ដែលមានអសនៈក្នុងសភា។ ជាមួយគ្នានេះដែរ តំណាងរាស្ត្រ ក៏ត្រូវត្រួតពិនិត្យលើការអនុវត្តច្បាប់របស់រាជរដ្ឋាភិបាល តុលាការ ក៏ដូចជាអាជ្ញាធរផងដែរ ថាត្រឹមត្រូវឬអត់? ប្រសិនបើរកឃើញថាការអនុវត្តច្បាប់មិនមានភាពត្រឹមត្រូវ នោះតំណាងរាស្ត្រក្នុងសភាជាតិ ត្រូវយកច្បាប់នៅទៅពិភាក្សា និងធ្វើវិសោធនកម្មជាថ្មី។
របាយការណ៍របស់អង្គការខុមហ្វ្រែល ចេញផ្សាយកាលពីអាណត្តិទី៤ រកឃើញថា ក្នុងរយៈពេល ៣ខែ ពីខែកក្កដា ដល់ខែកញ្ញា តំណាងរាស្ត្រគណបក្សប្រជាជនកម្ពុជា សរុបចំនួន ៥៨រូប ក្នុងចំណោមតំណាងរាស្ត្រចំនួន ៩០រូប បានចុះមូលដ្ឋានខ្លួន ចំណែកគណបក្សសមរង្ស៊ី មានតំណាងរាស្ត្រចំនួន ១៨រូប ក្នុងចំណោមតំណាងរាស្ត្រ ២៦រូប បានចុះមូលដ្ឋាន។ ដូច្នេះតំណាងរាស្ត្រគណបក្សសមរង្ស៊ី បានចុះមូលដ្ឋានបានច្រើនជាងគណបក្សប្រជាជនកម្ពុជា។ របាយការណ៍នោះ ក៏បានកត់សម្គាល់ផងដែរថា ប្រធានអង្គប្រជុំសភា តែងតែការពារដល់មន្ត្រីរាជរដ្ឋាភិបាល ដែលមកបំភ្លឺនៅរដ្ឋសភា តាមរយៈមិនឲ្យតំណាងរាស្ត្រសួរបន្ថែម ឬសួរដេញដោលទៅលើចម្លើយរបស់មន្ត្រីទាំងនោះ។
លោកបណ្ឌិត សុខ ទូច អ្នកវិភាគនយោបាយឯករាជ្យ ពន្យល់ថា ប្រទេសណាក៏ដោយ ឲ្យតែគណបក្សមួយ គ្រប់គ្រងទាំងស្ថាប័នកំពូលៗរបស់ជាតិទាំងបី គឺស្ថាប័ននីតិប្រតិបត្តិ នីតិបញ្ញតិ្ត និងប្រព័ន្ធតុលាការ មានន័យថា តំណាងរាស្ត្ររបស់គណបក្សនោះ គាំទ្រនូវសកម្មភាពរបស់រដ្ឋាភិបាល ទោះបីរដ្ឋាភិបាលដើរលើផ្លូវខុស និងមិនអាចដោះស្រាយបញ្ហាជូនប្រជាពលរដ្ឋរបស់ខ្លួនបានឡើយ «ធម្មតាបក្សហ្នឹង កាន់អំណាច បក្សហ្នឹងទទួលអំណាចវិញ វាអត់មានតុល្យភាពទេ អាហ្នឹងគឺថាទីមួយ ប្រជាជនយើងត្រូវដឹង បើសិនជាបក្សមួយ គាត់កាន់អំណាចផង គាត់ទៅជាអង្គនិតិប្រតិបត្តិផង អង្គនិតិបញ្ញត្តិផង ហើយនៅចូលអង្គតុលាការទៀត អាហ្នឹងចង់មិនចង់ វាមិនអាចសាច់ឯង អារសាច់(ខ្លួន)ឯងនោះទេ»។
សភាជាតិកម្ពុជា បច្ចុប្បន្នមានចំនួន ១២៣អសនៈ ដែលមានន័យថា មានតំណាងរាស្ត្រមកពី គណបក្សនយោបាយដែលជាប់ឆ្នោតចំនួន ១២៣រូប។ អ្នកវិភាគឯករាជ្យ លើកឡើងថា សភាជាតិនៅអាណត្តិថ្មីនេះ នៅពុំទាន់មាននីត្យានុកូលភាព ឬភាពស្របច្បាប់នៅឡើយទេ ហើយការបំពេញកាតព្វកិច្ចរបស់តំណាងរាស្ត្រក្នុងអាណត្តិថ្មី និងអាណត្តិមុន ក៏នៅមានភាពខ្វះចន្លោះនៅឡើយ។
អ្នកវិភាគ ពន្យល់ថា ដើម្បីឲ្យសភាជាតិ មាននីត្យានុកូភាពពេញលេញ ឬមានលក្ខណៈស្របច្បាប់ គឺត្រូវមានតំណាងរាស្ត្រដែលជាប់ឆ្នោតទាំង ១២៣រូប ចូលរួមប្រជុំ ហើយគួរផ្តល់អំណាចដល់គណបក្សនយោបាយដែលពុំមានអសនៈនៅសភា អាចចូលរួមដឹកនាំសភា ដើម្បីជួយពង្រឹងការងារឲ្យបានរឹងម៉ាំ។ ក្រៅពីនោះ រដ្ឋសភា ត្រូវមានតុល្យភាព ពង្រឹងឯករាជ្យភាពរបស់ខ្លួន ដោយប្រើអំណាចនិតិបញ្ញតិត្រួតពិនិត្យទៅលើនីតិប្រតិបត្តិ ហើយតំណាងរាស្ត្រទៀតសោត ត្រូវប្រាស្រ័យទាក់ទងជាមួយប្រជាពលរដ្ឋក្នុងមណ្ឌលរបស់ខ្លួនជាប្រចាំ ដោះស្រាយបញ្ហារបស់ពលរដ្ឋ យកមតិរបស់ប្រជាពលរដ្ឋទៅពិភាក្សា និងស្នើឲ្យរដ្ឋសភាអនុម័ត ដើម្បីឲ្យរដ្ឋាភិបាលអនុវត្តជាដើម៕
សូមសរសេរមកកាន់កញ្ញា ពេជ្រ សុធារី តាមរយៈ sotheary@vodhotnews.com
The current National Assembly is illegally performing its role for the interest of people and nation. it is an illegal and unlegitimate form! Actually the National Assembly is the representative of the whole people, not representative of a party ( CPP). CPP could not sit in the National Assembly alone to work for the interest of the whole people! Half of people in this kingdom voted for CNRP! You must think rightfully! You do not be so silly!
It has been seen quite obvious that RGC has controlled the Senate and parliament not by representative voices but by number of fake democracy. To control, PM appears to get everyone from other factions on board, however the true color of CPP doing the works.
Corruption has been known for some years and created by CPP a d its boss to shield a d confused Cambodians. Three pillars system comprised of Nation Religion and the king has been weakened very badly. Quality of this system is not there as it expected to achieve after peace agreement.
To revive the system, it is imperative that this single party parliament is fully revoked.
no doubt dictatorship always using that kind of ruling one man comment the whole government sector. CPP party controlling every thing in some time SDACH PEAL HUN SEN in his speak kicking international community around like they did not know any thing about Cambodia he dose not even care on what ever they request. he said PARIS peace agreement was no more presumable to his government .that mean he kick them out. this is HUN SEN political stubbornness the way he thought no any bodies can do any thing to him. not so long Mr ICC will teaching you a lesson