ដោយ៖ ស៊ុន ណារិន
ថ្ងៃចន្ទ ទី5 ខែឧសភា ឆ្នាំ2014
http://vodhotnews.com
លោក Brad Adams នាយកប្រតិបត្តិប្រចាំតំបន់អាស៊ី នៃអង្គការឃ្លាំមើលសិទ្ធិមនុស្សអន្តរជាតិ (រូបថតពី៖ tamilnet.com)
អង្គការសិទ្ធិមនុស្សអន្តរជាតិ(Human Rights Watch) អំពាវនាវឲ្យរដ្ឋាភិបាលកម្ពុជា ដកសេចក្តីព្រាងច្បាប់ចំនួនបីទាក់ទងនឹងប្រព័ន្ធតុលាការ និងស្នើឲ្យម្ចាស់ជំនួយចាត់វិធានការ ដើម្បីធានាថាប្រព័ន្ធតុលាការពិតជាមានភាពឯករាជ្យ។
សេចក្តីព្រាងច្បាប់ទាំងនោះ រួមមាន សេចក្តីព្រាងស្តីពីរៀបចំអង្គការតុលាការ សេចក្តីព្រាងច្បាប់ស្តីពីរៀបចំនិងប្រព្រឹត្តទៅនៃឧត្តមក្រុមប្រឹក្សានៃអង្គចៅក្រម និងសេចក្តីព្រាងច្បាប់ស្តីពីលក្ខន្តិកៈចៅក្រម និងព្រះរាជអាជ្ញា ដែលត្រូវបានបញ្ជូនទៅរដ្ឋសភា ដើម្បីត្រួតពិនិត្យ និងអនុម័ត។
សេចក្តីថ្លែងការណ៍របស់HRW ចេញផ្សាយកាលពីថ្ងៃទី០៤ខែឧសភា ឲ្យដឹងថា រដ្ឋាភិបាលកម្ពុជា គួរតែដកសេចក្តីព្រាងច្បាប់លើប្រព័ន្ធតុលាការទាំងបីនោះ ដែលធ្វើឲ្យអន់ថយនូវភាពឯករាជ្យរបស់តុលាការ ដែលត្រូវបានការពារដោយរដ្ឋធម្មនុញ្ញ និងច្បាប់អន្តរជាតិ។ សេចក្តីថ្លែងការណ៍បន្តថា ប្រទេសជាម្ចាស់ជំនួយ គួរតែទាមទារឲ្យមានកំណែទម្រង់ពិតប្រាកដសម្រាប់ភាពឯករាជ្យនៃប្រព័ន្ធតុលាការនៅកម្ពុជា ហើយគួរតែប្រឆាំងជាសាធារណៈទៅលើសេចក្តីព្រាងច្បាប់នេះ ដែលនាំឲ្យមានការបន្តបម្រើបន្ថែមទៀតនៃការគ្រប់គ្រងរបស់លោកនាយករដ្ឋមន្ត្រី ហ៊ុន សែន លើប្រព័ន្ធតុលាការ។
សេចក្តីថ្លែងការណ៍របស់HRW ឲ្យដឹងទៀតថា ពង្រាងច្បាប់ទាំងនោះ បានដាក់រដ្ឋមន្ត្រីក្រសួងយុត្តិធម៌ ជាអ្នកសម្រេចចិត្តសំខាន់ៗក្នុងការសម្រេចនានាដោយតុលាការ និងឧត្តមក្រុមប្រឹក្សានៃអង្គចៅក្រម។
នាយកប្រចាំតំបន់របស់អង្គការឃ្លាំមើលសិទ្ធិមនុស្សអន្តរជាតិលោក ប្រេដ អាដាម (Brad Adams) មានប្រសាសន៍ថា
អត្ថបទទាក់ទង
«រដ្ឋាភិបាលកម្ពុជា បានសន្យាជារៀងរាល់ឆ្នាំទៅប្រជាជន និងម្ចាស់ជំនួយ ថានឹងចាត់វិធានការបង្កើតប្រព័ន្ធតុលាការឯករាជ្យ ប៉ុន្តែបានបរាជ័យក្នុងការរក្សាសន្យានេះ»។
កន្លងទៅ មជ្ឈមណ្ឌលសិទ្ធិមនុស្សកម្ពុជា(CCHR) បានអំពាវនាវឲ្យរដ្ឋសភាផ្អាកការអនុម័តសេចក្តីព្រាងច្បាប់ចំនួនបី ដែលគណៈរដ្ឋមន្ត្រីអនុម័ត កាលពីថ្ងៃទី១៨ ខែមេសានេះ ដើម្បីទុកពេល ឲ្យស្ថាប័នពាក់ព័ន្ធបញ្ចេញយោបល់លើសេចក្តីព្រាងនេះជាមុនសិន។សេចក្តីថ្លែងការណ៍របស់មជ្ឈមណ្ឌលសិទ្ធិមនុស្សកម្ពុជា បានជំទាស់នឹងគណៈរដ្ឋមន្ត្រី ដែលអនុម័តសេចក្តីព្រាងច្បាប់ ទាក់ទងប្រព័ន្ធតុលាការចំនួនបី។
កន្លងទៅ លោកនាយករដ្ឋមន្ត្រី ហ៊ុន សែន បានរិះគន់សង្គមស៊ីវិលមួយចំនួន ដែលទាមទារការត្រួតពិនិត្យសេចក្តីព្រាងច្បាប់របស់រាជរដ្ឋាភិបាល ដោយលោកចាត់ទុកថា នេះផ្ទុយពីរដ្ឋធម្មនុញ្ញ និងមិនមែនជាកិច្ចរបស់ខ្លួន។លោកនាយករដ្ឋមន្ត្រី មានប្រសាសន៍ថា រាជរដ្ឋាភិបាល បានស្តាប់ច្រើនហើយពីប្រជាពលរដ្ឋ ហើយបញ្ញត្តិច្បាប់ ដែលមានចែងក្នុងរដ្ឋធម្មនុញ្ញ គឺមិនមានការអនុញ្ញាតឲ្យគណៈរដ្ឋមន្ត្រី ប្រគល់សេចក្តីព្រាងច្បាប់ទៅនរណាម្នាក់ គឺមានតែអ្នកព្រាងច្បាប់ បញ្ជូនទៅគណៈរដ្ឋមន្ត្រី និងទៅរដ្ឋសភា ដើម្បីអនុម័ត។ លោកបញ្ជាក់ថា គណៈរដ្ឋមន្ត្រី មិនមានកន្លែងទៅសុំយោបល់សង្គមស៊ីវិល ហើយសង្គមស៊ីវិល កុំអាលទាមទារសិទ្ធិហួសពេល និងសុំឲ្យមានការអៀនខ្មាស និងកុំទាមទារកិច្ចការរបស់គេមកធ្វើ៕
សរសេរមកកាន់លោក ស៊ុន ណារិន តាមរយៈsun_narin@vodhotnews.com
cambodia P-M some time talk really rubbish.mr adam if you talk justic in cambodia it is ajoke.mr phi c porm said no money no justic .so far the people in ministry of health never brougth to justic only payback to department when they did stealing money from the department.in cambodia the criminal get away from jail and the victim alway in the jail ,so bad the system of justic in cambodia who ever have money alway win the case because the jugde so corruted.GOD bless all cambodian people’