ដោយ ហង្ស សាវយុត
2014-06-11
RFA
ស្ដាប់ ឬ ទាញយកសំឡេង
នាយផ្នែកស៊ើបអង្កេតរបស់អង្គការទប់ស្កាត់បទល្មើសនៅកម្ពុជា ប្រចាំស្រុកត្រពាំងប្រាសាទ ខេត្តឧត្ដរមានជ័យ លោក លឹម ម៉េងឃាង ត្រូវកងរាជអាវុធហត្ថចាប់ខ្លួនយកទៅដាក់ខ្នោះជើង កាលពីយប់ថ្ងៃទី១៦ ខែមេសា ឆ្នាំ២០១៣។ Photo Provided
ក្រុមអង្គការសិទ្ធិមនុស្សក្រៅរដ្ឋាភិបាល នៅខេត្តឧត្តរមានជ័យ និងខេត្តព្រះវិហារ កំពុងព្រួយបារម្ភចំពោះទាហានខ្លះដែលតែងប្រើអំពើហិង្សាទៅលើប្រជាពលរដ្ឋជាជនស៊ីវិល។ ការព្រួយបារម្ភ ដោយសារតែកន្លងទៅ ពេលទាហានបង្កអំពើហិង្សា គឺអាជ្ញាធរមានសមត្ថកិច្ច និងតុលាការជាដើម ហាក់មិនសូវហ៊ានចេញមុខដោះស្រាយ ឬក៏ចោទប្រកាន់អ្នកពាក់ព័ន្ធទាំងនោះទេ។
ក្រុមអង្គការក្រៅរដ្ឋាភិបាលធ្វើការងារពាក់ព័ន្ធនឹងកិច្ចការពារសិទ្ធិមនុស្ស ឱ្យដឹងថា ក្នុងខែឧសភា កន្លងទៅ និងដើមខែមិថុនា នេះ ទាហានមួយចំនួនបានប្រើអំពើហិង្សាវាយតប់លើរូបកាយប្រជាពលរដ្ឋ ដែលខុសនឹងច្បាប់យ៉ាងធ្ងន់ធ្ងរ។
ក្រុមអង្គការសិទ្ធិមនុស្ស បានបញ្ជាក់ថា អំពើហិង្សាទាំងនោះកើតមាននៅតំបន់ជាប់ព្រំដែនខ្មែរថៃ នៃខេត្តឧត្តរមានជ័យ និងខេត្តព្រះវិហារ។
កាលពីថ្ងៃទី៣០ ខែឧសភា ឆ្នាំ២០១៤ កន្លងទៅ ប្រជាពលរដ្ឋចំនួន ២គ្រួសារ នៅភូមិជ្រឹងខាងកើត សង្កាត់កូនក្រៀល ក្រុងសំរោង ខេត្តឧត្តរមានជ័យ បានស្វះស្វែងរកជួបអង្គការសិទ្ធិមនុស្សក្រៅរដ្ឋាភិបាល ដើម្បីដាក់ពាក្យបណ្ដឹង បន្ទាប់ពីទាហាន១ក្រុមបានប្រើអាវុធបាញ់គំរាមពួកគេ។
ស្ត្រីអ្នកភូមិជ្រឹងខាងកើត ម្នាក់ឈ្មោះ ហាត់ ឡេ។ គាត់មានប្រសាសន៍ថា កាលពីព្រឹកថ្ងៃទី៣០ ខែឧសភា គាត់បានខ្ចីម៉ាស៊ីនរណាពីអ្នកជិតខាង មកកាត់ដើមតាសេកចំនួន ២ដើម នៅក្នុងដីចម្ការក្រោយផ្ទះរបស់គាត់។ បន្ទាប់ពីអាររលំបាន១ដើម ហើយអង្គុយឆាបធ្មេញរណា ស្រាប់លេចមុខទាហាន ៣នាក់របស់តំបន់ប្រតិបត្តិការសឹកខេត្តឧត្តរមានជ័យ ដែលមានអាវុធគ្រប់ដៃ សម្រុកចូលមកចាប់យករណានោះ។ កងទាហានដែលគាត់ស្គាល់ឈ្មោះ មុត ឈ្មោះ ឡាយ និងម្នាក់ទៀតមិនស្គាល់ឈ្មោះ បានបាញ់កាំភ្លើងគំរាមរូបគាត់៖ «ទាហាននោះ ៣នាក់ កាំភ្លើង ៣ដើម ម្នាក់១ដើម។ ខ្ញុំកំពុងតែអារឈើក្នុងដីខ្ញុំ ទាហានមកដល់ថា សុំចាប់ម៉ាស៊ីន ជនល្មើស គេបាញ់ផាំង! បាញ់ខ្ញុំ១គ្រាប់ ហើយឈ្មោះ ឡាយ នោះ ក៏វាយយកម៉ាស៊ីនពីដៃខ្ញុំ ឯមួយនោះក៏បាញ់សម្លុត១គ្រាប់ទៀត ២គ្រាប់»។
ក្នុងហេតុការណ៍នោះដែរ ស្ត្រីអាយុ ៤៥ឆ្នាំម្នាក់បានរងរបួស ដោយសារមុតនឹងម៉ាស៊ីន នៅពេលព្យាយាមទៅជួយដណ្ដើមយកម៉ាស៊ីនមិនឱ្យទាហានចាប់។
អ្នកស្រី អ៊ូ សាម៉ុល មានប្រសាសន៍ថា ក្នុងពេលដែលឈ្មោះ ហាត់ ឡេ អាររំលំដើមឈើ គឺមានសម្បុកអង្ក្រងច្រើន ហើយគាត់ក៏ចាកចេញពីផ្ទះបំណងទៅគោះយកអង្ក្រងនោះ។ ក៏ប៉ុន្តែ ពេលទៅដល់ស្រាប់តែជួបរឿងទាហានទៅចាប់យកម៉ាស៊ីនរណាពីឈ្មោះ ហាត់ ឡេ។ ពេលនោះ គាត់ក៏ចូលទៅប្រតាយប្រតប់ដណ្ដើមយកម៉ាស៊ីនរណាពីដៃទាហានវិញ បណ្ដាលឱ្យមុតរងរបួស។ ក្នុងពេលនោះ ទាហានក៏ប្រើកាំភ្លើងបាញ់សម្លុតគាត់ដែរ៖ «ទាហានគេសម្រុកមកចាប់ម៉ាស៊ីនហ្នឹង ហាត់ ឡេ ទាញម៉ាស៊ីនពីតាកំពុងតែឆាប។ ទាហាន ៣នាក់ សម្រុកចូលមកយកម៉ាស៊ីន បាញ់បញ្ឆិតៗមនុស្ស។ ដល់ពេលខ្ញុំមកជួយយកម៉ាស៊ីនវាហ្នឹង បាញ់ខ្ញុំ១គ្រាប់ ខ្ញុំកាន់ម៉ាស៊ីនរត់មកផ្ទះ»។
ទោះយ៉ាងណា វិទ្យុអាស៊ីសេរី មិនអាចទាក់ទងលោកឧត្តមសេនីយ៍ ម៉ុក សុវណ្ណ មេបញ្ជាការតំបន់ប្រតិបត្តិការសឹកខេត្តឧត្តរមានជ័យ ដើម្បីសុំប្រតិកម្មជុំវិញការចោទប្រកាន់នោះបានថាយ៉ាងណានៅឡើយ។
ចំណែកទាហានម្នាក់ឈ្មោះ ជ្រក់ ក្នុងចំណោមអ្នកជាប់ពាក់ព័ន្ធនឹងការបាញ់គំរាមប្រជាពលរដ្ឋនោះ បានបដិសេធមិនអធិប្បាយអ្វីទាំងអស់ ដោយលោកថាកំពុងជាប់រវល់៖ «អូ! អារឿងហ្នឹងខ្ញុំអត់ទាន់ដឹងទេ ខ្ញុំកំពុងជាប់រវល់ត្រួតពិនិត្យគ្រាប់ ត្រួតពិនិត្យកាំភ្លើងអីឱ្យវ៉ល់ ទាំងមេ ទាំងកូន ទាំងអស់នេះ»។
នៅភូមិថ្មដូន ឃុំគោកមន ស្រុកបន្ទាយអំពិល ខេត្តឧត្តរមានជ័យ វិញ ក្រុមទាហានបានព្រួតគ្នាវាយបុរសម្នាក់ឈ្មោះ អឿន កុសល បណ្ដាលឱ្យរងរបួសធ្ងន់ធ្ងរ កំពុងសម្រាកព្យាបាលក្នុងមន្ទីរពេទ្យនៅឡើយរហូតដល់ពេលនេះ។ ភរិយារបស់ លោក អឿន កុសល គឺអ្នកស្រី ចែម នឿន មានប្រសាសន៍ថា កាលពីមុនម្ដាយក្មេករបស់គាត់ធ្លាប់ជួលដីឱ្យក្រុមហ៊ុនទូរស័ព្ទ ០៩៧ ដំឡើងអង់តែន។ ក៏ប៉ុន្តែកាលពីថ្ងៃទី២១ ខែឧសភា កន្លងទៅ ម្ដាយក្មេករបស់គាត់បានឈប់ជួលដីឱ្យក្រុមហ៊ុនទូរស័ព្ទ ០៩៧ ក៏ប្រាប់ឱ្យបុគ្គលិករុះរើចេញពីដីរបស់គាត់ឱ្យអស់។ បុគ្គលិកក្រុមហ៊ុនក៏បានរុះរើ និងជញ្ជូនសម្ភារៈជាច្រើនចេញពីដីនោះហើយ គឺនៅសល់តែអង់តែន ៦កំណាត់។ នៅថ្ងៃទី២៦ ខែឧសភា ចំពេលដែលម្ដាយក្មេករបស់គាត់មិននៅផ្ទះ ក៏បុគ្គលិកក្រុមហ៊ុននាំគ្នាមកយកកំណាត់អង់តែន។ ពេលនោះប្ដីរបស់អ្នកស្រីក៏ឃាត់បុគ្គលិកក្រុមហ៊ុនទាំងនោះ ឱ្យរង់ចាំម្ដាយមកវិញសិន ស្រាប់តែបុគ្គលិកក្រុមហ៊ុន ០៩៧ ទាំងនោះ បានទៅហៅទាហានមកវាយតប់ប្ដីរបស់គាត់ បណ្ដាលឱ្យរងរបួសធ្ងន់ធ្ងរ៖ «ប្ដីខ្ញុំថាកុំប្រញាប់អីពូ! ចាំម៉ែខ្ញុំមកវិញសិន ទើបយកបាន ព្រោះម៉ែខ្ញុំផ្ដាំទុកដាក់នឹងខ្ញុំ។ គ្នាគេជាង ១០នាក់ គេវាយផង គេចាប់ផង គេធាក់ផង គេវាយដៃផង។ បែកឈាម បែកមាត់ បែកក្បាល។ រួចហើយប្ដីខ្ញុំក៏រត់ទៅប៉ូលិសៗថាគេមិនហ៊ាននិយាយទេ គេឱ្យដោះស្រាយគ្នាទៅ។ ទៅទាហាន គេវាយប្ដីខ្ញុំថែម គេចាប់ដាក់ខ្នោះ»។
អង្គការសិទ្ធិមនុស្សក្រៅរដ្ឋាភិបាល កំពុងព្រួយបារម្ភជុំវិញបញ្ហាទាហានបង្កអំពើហិង្សាទៅលើប្រជាពលរដ្ឋនេះ ដោយសារតែបច្ចុប្បន្ន ករណីនេះកើតមានកាន់តែច្រើនឡើងៗ។
អ្នកសម្របសម្រួលសមាគមការពារសិទ្ធិមនុស្សអាដហុក (adhoc) ខេត្តឧត្តរមានជ័យ លោក ស្រី ណារ៉េន មានប្រសាសន៍ថា បញ្ហាទាហានបង្កអំពើហិង្សាលើប្រជាពលរដ្ឋ គឺជាការរំលោភសិទ្ធិមនុស្សយ៉ាងធ្ងន់ធ្ងរ ពីព្រោះផ្លូវច្បាប់បានការពារមនុស្សគ្រប់ៗរូបឱ្យមានសិទ្ធិស្មើគ្នា។ លោក ស្រី ណារ៉េន បញ្ជាក់ទៀតថា ករណីបង្កអំពើហិង្សាដោយទាហាន គឺលោកតែងសង្កេតឃើញសមត្ថកិច្ច និងស្ថាប័នពាក់ព័ន្ធខ្លះទៀត មិនសូវយកចិត្តទុកដាក់ការពារប្រជាពលរដ្ឋទេ៖ «ការប្រើអំពើហិង្សាមកលើប្រជាពលរដ្ឋហ្នឹង សមត្ថកិច្ចអ្នកដោះស្រាយ តុលាការអីគាត់ដូចមិនសូវហ៊ានចោទទៅលើទាហានអស់ហ្នឹងទេ ហើយរឿងមួយទៀត ពីម្សិលម្ង៉ៃនៅស្រុកត្រពាំងប្រាសាទ តំបន់ដីក្រហម គាត់ប្រាប់ខ្ញុំថា ទាហានទៅរកចាប់ពួកគាត់ ២នាក់។ បញ្ហាដីធ្លី ទាហានយកអាវុធទៅប្រើប្រាស់ដែរ»។
នៅខេត្តឧត្តរមានជ័យ ឧស្សាហ៍មានទាហានបង្កអំពើហិង្សាលើប្រជាពលរដ្ឋ ពាក់ព័ន្ធរឿងដីធ្លី និងបញ្ហាផ្សេងៗទៀត។
កាលពីថ្ងៃទី២០ ខែមីនា កន្លងទៅ ទាហាន១ក្រុមជាអ្នកការពារចម្ការកៅស៊ូ ទំរីង រ៉ាប់បឺ (Tom Ring Rubber) ក្នុងស្រុកអន្លង់វែង បានចាប់ខ្លួនយុវជនម្នាក់ឈ្មោះ ហុង វិចិត្រ អាយុ ២១ឆ្នាំ វាយធ្វើបាប ព្រមទាំងយកកាំភ្លើងបាញ់ផង នៅពេលដែលយុវជននោះរើបម្រះ ហើយព្យាយាមរត់គេចចេញពីការធ្វើទារុណកម្ម។
ចំណែកនៅខេត្តព្រះវិហារ មានសេចក្តីរាយការណ៍ថា កាលពីថ្ងៃទី២០ ខែឧសភា កន្លងទៅ ទាហានម្នាក់ឈ្មោះ ហេង សុខសាន បានស្លាប់ បន្ទាប់ពីរងរបួសគ្រាំគ្រាជាច្រើនថ្ងៃ ដោយសារទាហានម្នាក់នៅក្នុងវរលេខ៣៧៥ ចំណុះឱ្យកងពលតូចលេខ៧ ចាប់វាយ និងធ្វើទារុណកម្មធ្ងន់ធ្ងរ ក្នុងរឿងសង្ស័យថា យុទ្ធជនម្នាក់នោះជាចោរលួចគោរបស់គេមក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
- សង្គមស៊ីវិលស្នើឲ្យក្រសួងកិច្ចការនារីលើកស្ទួយស្ត្រីក្នុងវិស័យនយោបាយឲ្យបានច្រើន
- មន្ត្រីរដ្ឋាភិបាលរិះគន់សង្គមស៊ីវិលខ្លះថាប្រឆាំងរដ្ឋាភិបាលដើម្បីបានជំនួយពីបរទេស
- ស្ត្រីជនជាតិដើមភាគតិចព្រមានប្ដឹងរដ្ឋាភិបាលពីបញ្ហាបំផ្លាញធនធានធម្មជាតិ
- កម្ពុជាជាប់ចំណាត់ថ្នាក់ប្រទេសដែលពលរដ្ឋគ្មានភាពរីករាយ
- សហព័ន្ធខ្មែរកម្ពុជាក្រោមនឹងធ្វើយុទ្ធនាការថ្មីឈ្មោះថា “ផ្លូវឆ្ពោះទៅមាតុភូមិ”
- ព្រឹទ្ធសភាអូស្ត្រាលីចោទរដ្ឋាភិបាលកិបកេងថវិកាជាតិសម្រាប់គម្រោងជនភៀសខ្លួន
- សង្គមស៊ីវិលទាមទារឲ្យរដ្ឋាភិបាលបើកទីលានប្រជាធិបតេយ្យឡើងវិញ
- ក្រុមស្ត្រីជនជាតិដើមភាគតិចមកពីខេត្តចំនួន៧ពិភាក្សាពីបញ្ហាកំពុងប្រឈម
- CHRAC ព្រួយបារម្ភខ្លាំងអំពីការទទួលជនភៀសខ្លួនអូស្ត្រាលីមកកម្ពុជា
this is the gangster leader regime