Wed, 25 June 2014
Kevin Ponniah and ជាង សុខា
ភ្នំពេញប៉ុស្តិ៍
ភ្នំពេញៈ ប្រសិនគណបក្សកាន់អំណាចនៅតែស្ទាក់ស្ទើរមិនធ្វើកំណែទម្រង់ជាមូលដ្ឋានចំពោះវិធីដែលខ្លួនគ្រប់គ្រងប្រជាជនទេកម្ពុជា អាចនឹងផ្ទុះអំពើហិង្សាដែលធ្វើឲ្យស្លាប់មនុស្ស ដូចក្រោយការបោះឆ្នោត ខែកក្កដា ឆ្នាំមុនជាថ្មីទៀតនៅពេលណាមួយ។ នេះបើតាមបេសកជនសិទ្ធិមនុស្សអង្គការសហប្រជាជាតិលោក សូរិយ៉ា ស៊ូប៊ែរឌី បានព្រមានកាលពីម្សិលមិញ។
លោកបានថ្លែងនៅក្នុងសន្និសីទកាសែតក្រោយបញ្ចប់ដំណើរទស្សនកិច្ចរយៈពេល ១០ ថ្ងៃរបស់លោកមក ប្រទេសកម្ពុជា ថា៖ «ខ្ញុំសូមលើកឡើងដដែលអំពីទស្សនៈរបស់ខ្ញុំថា កំណែទម្រង់ពិតប្រាកដចំពោះវិធីសាស្រ្តអភិបាលកិច្ច គឺចាំបាច់ត្រូវតែធ្វើឡើងក្នុង ប្រទេសកម្ពុជា។ ប៉ុន្តែ ហាក់មានការស្ទើរស្ទាក់មួយចំនួននិងខ្វះឆន្ទៈស្មោះត្រង់ក្នុងការទទួលស្គាល់ដែលបានបង្ហាញយ៉ាងច្បាស់និងខ្លាំងក្លាពីប្រជាពលរដ្ឋ»។
លោកបន្តថា៖ «អ្នកដែលប្រឆាំងនឹងការផ្លាស់ប្តូរនឹងឃើញថា ថ្ងៃណាមួយការផ្លាស់ប្តូរនេះនឹងត្រូវបង្ខំទៅលើពួកគេដោយដំណើរវិវឌ្ឍន៍ដែលលើសពីការគ្រប់គ្រងរបស់ខ្លួន។ ការណ៍នេះគឺបានកើតឡើងទូទាំងអរិយធម៌មនុស្ស។ ដោយបានសិក្សាពីសង្គមកម្ពុជានិងប្រវត្តិសាស្រ្តរបស់កម្ពុជា ដោយយកចិត្តទុកដាក់និងការប្រាស្រ័យទាក់ទងជាមួយប្រជាជនគ្រប់វណ្ណៈ ខ្ញុំយល់ឃើញថា វាជាកាតព្វកិច្ចរបស់ខ្ញុំដែលនិយាយថា ប្រសិនបើកំណែទម្រង់ពិតប្រាកដមិនត្រូវបានធ្វើឡើងឆាប់ៗទេ នោះប្រទេសអាចនឹងមានហានិភ័យនៃការកើតមានហិង្សា»។
លោក ស៊ូប៊ែរឌី ជាសាស្រ្តចារ្យច្បាប់អន្តរជាតិ បានបញ្ចប់បេសកកម្មលើក ទី១១ ជាអ្នករាយការណ៍ពិសេសពីសិទ្ធិមនុស្សនៅកម្ពុជាដែលលោកកាន់តំណែងនេះតាំងពី ឆ្នាំ២០០៩។
លោកបន្តថា៖ «ការខកចិត្តយ៉ាងជ្រាលជ្រៅក្នុងចំណោមប្រជាជន» គឺជាភ័ស្តុតាងបង្ហាញឲ្យឃើញច្បាស់ ដោយសារតែភាពរីកចម្រើនយឺតចំពោះការធ្វើកំណែទម្រង់ដែលរដ្ឋាភិបាលបានសន្យា»។
ប៉ុន្តែលោក ជាម យៀប តំណាងរាស្រ្តគណបក្សប្រជាជនកម្ពុជា បានច្រានចោលគំនិតដែលថា រដ្ឋាភិបាលមិនប្តេជ្ញាធ្វើកំណែទម្រង់ដោយថ្លែងថា ការហៅរដ្ឋមន្រ្តីមកសួរនៅក្នុងសភាថ្មីៗនេះ អំពីគម្រោងវារីអគ្គិសនីចម្រូងចម្រាស គឺជាឧទាហរណ៍មួយនៃឧទាហរណ៍អំពីការផ្លាស់ប្តូរឥរិយាបថនៅក្នុងអាណត្តិនេះ។
ចលនាតវ៉ាដ៏សន្តិវិធីធំមួយដែលបានកើតឡើងបន្ទាប់ពីការបោះឆ្នោតឆ្នាំមុន ដែលដឹកនាំដោយគណបក្សសង្គ្រោះជាតិ គឺត្រូវបានបង្ក្រាបកាល ខែមករា នៅពេលដែលមនុស្សយ៉ាងហោច ៦ នាក់ត្រូវបានបាញ់សម្លាប់ដោយកម្លាំងសន្តិសុខ ខណៈកម្មករកាត់ដេរប៉ះទង្គិចជាមួយអាជ្ញាធរ។
ជនស៊ីវិលឈរមើលពីរនាក់ត្រូវបានបាញ់សម្លាប់ដោយអាជ្ញាធរក្នុងអំឡុងការប៉ះទង្គិចប៉ុន្មានខែមុននោះ ដែលម្នាក់ក្នុងអំឡុង ខែវិច្ឆិកា នៅស្ទឹងមានជ័យ ក្នុងអំឡុងការតវ៉ារបស់កម្មករកាត់ដេរ និងម្នាក់ទៀតនៅស្ពានអាកាសក្បាលថ្នល់ ក្នុង ខែកញ្ញា។
លោក ស៊ូប៊ែរឌី កាលពីម្សិលមិញបានថ្កោលទោសចំពោះការបន្តបិទទីលានប្រជាធិបតេយ្យដែលទីនេះជា «សញ្ញានៃប្រជាធិបតេយ្យ»។ ក្រុមអ្នកគាំទ្រគណបក្សប្រឆាំងត្រូវបានបណ្តេញចេញទាំងហិង្សា ក្នុងអំឡុងការបង្ក្រាបកាលដើម ខែមករា។
លោកបន្តថា៖ «វាផ្តល់នូវចំណាប់អារម្មណ៍ថា វាមានការប៉ុនប៉ងដាក់ប្រជាធិបតេយ្យនៅក្នុងទ្រុងសម្រាប់ ប្រទេសកម្ពុជា»។
បើតាមលោក ស៊ូប៊ែរឌី បានឲ្យដឹងមន្រ្តីរដ្ឋាភិបាលថ្លែងថា ទីលានប្រជាធិបតេយ្យនឹងបើកសម្រាប់សាធារណជនវិញ នៅពេលអាជ្ញាធរជឿថា ប្រជាជននឹងប្រើវាស្របទៅតាមច្បាប់។
លោក ជាម យៀប បានថ្លែងពីម្សិលមិញថា ខណៈលោកគោរពសិទ្ធិរបស់លោក ស៊ូប៊ែរឌី លើការបញ្ចេញមតិគាត់ គាត់គួរតែពិនិត្យនិងថ្លឹងថ្លែងពីអ្វីដែលបក្សកាន់អំណាចធ្វើ។
លោក ជាម យៀប បន្តថា៖ «យើងបានធ្វើកំណែទម្រង់ដូចជា រដ្ឋាភិបាលនៅក្នុងអាណត្តិនេះ ធ្វើកំណែទម្រង់ប្រព័ន្ធតុលាការ គណៈកម្មាធិការជាតិរៀបចំការបោះឆ្នោត ដែលបានព្រមព្រៀងគ្នាជាមួយគណបក្សសង្គ្រោះជាតិ និងការអញ្ជើញរដ្ឋមន្រ្តីឲ្យពន្យល់សភា អំពីគម្រោងទំនប់វារីអគ្គិសនី សេសានក្រោម២ ជាដើម»។
លោកបន្តថា៖ «រដ្ឋាភិបាលបញ្ជាឲ្យបើកប្រាក់ខែទាន់ពេលវេលាដល់មន្រ្តីរាជការនិងកម្លាំងប្រដាប់អាវុធនៅចុងខែដែលនេះក៏ជាប្រភេទនៃកំណែទម្រង់មួយដែរ។ អ្វីៗទាំងនេះ គឺជាកំណែទម្រង់ដែលធ្វើឡើងដោយរដ្ឋាភិបាលដែលអាចឃើញហើយរដ្ឋាភិបាលនឹងធ្វើកំណែទម្រង់បន្ថែមទៀតស្របទៅតាមយុទ្ធសាស្រ្តចតុកោណនៅក្នុងដំណាក់កាលទីបី»។
លោក ជាម យៀប ក៏បានថ្លែងការពារផងដែរចំពោះការបិទទីលានប្រជាធិបតេយ្យដែលលោកថា វាចំាបាច់រហូតទាល់តែព្រឹត្តិការណ៍កាល ខែមករា ដែលលោកបន្ទោសទៅលើគណបក្សសង្គ្រោះជាតិ ត្រូវបានស៊ើបអង្កេតចប់សព្វគ្រប់»។ «នេះគឺជាវិធានការរបស់រដ្ឋាភិបាលដើម្បីការពារមិនឲ្យមានហិង្សាបែបនេះ ដែលនាំឲ្យយើងបិទវាជាថ្មីទៀត។ គាត់មិនគួរស្តាប់សូរទះដៃតែម្ខាងនោះទេ។ គាត់គួរតែស្តាប់សូរទះដៃទាំងពីរ»។
ក្រៅពីការហៅរដ្ឋមន្រ្តីចូលសភា និងការព្រមព្រៀងគ្នាចំពោះកំណែទម្រង់ស្ថាប័នបោះឆ្នោតមួយចំនួនគណបក្សប្រជាជនកម្ពុជានាពេលថ្មីៗនេះក៏បានព្រមព្រៀងថា នឹងឲ្យគណបក្សសង្គ្រោះជាតិកាន់តំណែងធំៗមួយចំនួននៅក្នុងសភាពេលពួកគេបញ្ឈប់ការធ្វើពហិការផងដែរ»៕
ព្ញុសូរតែព្រមាន គំរាមប្តឹង គាបសង្កត់ ។ល។ និង ។ល។ តែអាឆើតនៅតែអាឆើត ដដែល
international community every thing they go by law, if they do not have enough evident yet they will take more investigation until they have it all . when they press charge to some one those person have to be guilty . no coffin no cry????????????? wait and see………….what ever those evil saying to him but he is the person that world community listening to. unlike our SAM DACH MAPHKAK SENA MOHA PENCHOR ( HUN SEN ) and his radical group. talking like evil acting like evil too what else Cambodian asking for?????????????Cambodia the country of tear????????????????????????????????????????????????????????my last question is who was the murder of my families???????????????????????????????????