ដោយ៖ ឡាយ សាមាន
ថ្ងៃពុធ ទី9 កក្កដា 2014
http://vodhotnews.com
គណៈកម្មការជំនាញច្បាប់អន្ដរជាតិ (ICJ) ថ្កោលទោសចំពោះសេចក្តីព្រាងច្បាប់ចំនួនបីទាក់ទងវិស័យតុលាការនៅកម្ពុជា ដែលត្រូវបានអនុម័តចុងក្រោយដោយក្រុមប្រឹក្សាធម្មនុញ្ញ ដោយចាត់ទុកថា រំលោភលើឯករាជ្យភាពរបស់តុលាការ ។
តាមរបាយការណ៍សង្ខេបរបស់គណៈកម្មការជំនាញច្បាប់អន្ដរជាតិ ដែលVODទទួលបាននៅថ្ងៃពុធនេះ បានចាត់ទុកការសម្រេចចិត្តរបស់ក្រុមប្រឹក្សាធម្មនុញ្ញ លើសេចក្តីព្រាងច្បាប់ទាំងបីនោះ ជាការរំលោភលើឯករាជ្យភាពរបស់ប្រព័ន្ធតុលាការ ដោយបំពានស្តង់ដារអន្តរជាតិ និងរដ្ឋធម្មនុញ្ញរបស់ប្រទេសកម្ពុជា។
របាយការណ៍នេះ បានបង្ហាញក្តីបារម្ភថា សេចក្តីព្រាងច្បាប់ទាំងនោះ នឹងរឹតបន្តឹងលើសិទ្ធិរបស់ចៅក្រមនិងព្រះរាជអាជ្ញាទៅនឹងសេរីភាពនៃការបញ្ចេញមតិ និងកង្វះនៃការការពារសុវត្ថិភាពនៃឯករាជ្យភាពតុលាការក្នុងការជ្រើសរើស ការលើកកម្ពស់ ការដកចេញ និងនីតិវិធីដាក់វិន័យលើចៅក្រម។
ក្រុមប្រឹក្សាធម្មនុញ្ញ ចេញសេចក្តីសម្រេចជាស្ថាពរ និងបិទផ្លូវតវ៉ា កាលពីថ្ងៃទី ២ កក្កដា លើសេចក្តីព្រាងច្បាប់បីរួមមាន ច្បាប់ស្តីពីការរៀបចំអង្គការតុលាការ ច្បាប់ស្តីពីលក្ខន្តិកៈចៅក្រម និងព្រះរាជអាជ្ញា រួមទាំងច្បាប់ស្តីពីការរៀបចំ និងប្រព្រឹត្តទៅនៃឧត្តមក្រុមប្រឹក្សានៃអង្គចៅក្រម។ សេចក្តីសម្រេចនោះលើកឡើងថា ជំពូកទី១ មាត្រា១ ដល់មាត្រា៧ ក្នុងច្បាប់ស្តីពីលក្ខន្តិកៈនៃអង្គចៅក្រម និងព្រះរាជអាជ្ញា ចែងពីគោលបំណងធានាឯករាជ្យនៃអំណាចតុលាការ វិសាលភាពនៃការអនុវត្ត បុគ្គលដែលត្រូវជ្រើសរើសសម្រាប់ឲ្យបំពេញមុខងារចៅក្រម និងព្រះរាជអាជ្ញា និងការកំណត់ដាក់ចៅក្រម និងព្រះរាជអាជ្ញាឲ្យស្ថិតក្នុងក្របខណ្ឌកណ្តាលរបស់ក្រសួងយុតិធម៌ គឺស្របទៅនឹងរដ្ឋធម្មនុញ្ញ។
ក្រុមប្រឹក្សាធម្មនុញ្ញចេញសេចក្តីសម្រេចជាស្ថាពរ និងបិទផ្លូវតវ៉ាលើសេចក្តីព្រាងច្បាប់ចំនួន៣ ទាក់ទងនឹងតុលាការនេះ បើទោះជាក្រុមអង្គការសង្គមស៊ីវិល ស្នើឲ្យមានការពិចារណាលើមាត្រាមួយចំនួន ដែលពួកគេរកឃើញថា អធម្មនុញ្ញភាព និងផ្ទុយពីច្បាប់អន្តរជាតិក្តី។
VOD មិនអាចទាក់អ្នកនាំពាក្យក្រុមប្រឹក្សាធម្មនុញ្ញ បាននៅឡើយ នៅរសៀលពុធនេះ៕
សូមសរសេរមកកាន់លោក ឡាយ សាមាន តារមយៈ samean@vodhotnews.com
ឆ្កែ ភ្នែកមួយ ធ្វើអ្វីគ្រប់យាំងដើម្បីអំណាច
ឆ្កែ ភ្នែកមួយ ធ្វើអ្វីគ្រប់យាំងដើម្បីអំណាច