សេត គឹមសឿន
Wed, 30 July 2014
សេត គឹមសឿន
ភ្នំពេញប៉ុស្តិ៍
ភ្នំពេញៈ បន្ទាប់ពីប្រកាសថា ប្រុងដកខ្លួនឲ្យឆ្ងាយបន្តិចពីវិស័យសិល្បៈដោយសាររងសម្ពាធឪពុកជាមន្ត្រីយោធានោះ ស្រាប់តែនៅពេលនេះ អតីតតារាចម្រៀងប្រចាំផលិតកម្មក្លាស៊ីក នាង កាកា ដែលមានឈ្មោះពិតថា ព្រឿង ពេជ្រច័ន្ទម៉ូនីកា បានចេញមុខគួរឲ្យភ្ញាក់ផ្អើលក្នុងនាមជាតារាចម្រៀងដ៏សំខាន់ម្នាក់របស់ផលិតកម្ម ដាយម៉ិនម្ញូស៊ីក (Diamond Music) ដែលនាំឲ្យមានការលើកឡើងថា តារារូបនេះត្រូវឪពុកដកបម្រាមហើយ។
នៅក្នុងបទសម្ភាសមុន នាងនិយាយថា៖«ការសម្រេចចិត្តចង់ឈប់ពីសិល្បៈនេះ ព្រោះតែមុនពេលចូលសិល្បៈខ្ញុំបានសន្យាជាមួយនឹងប៉ារបស់ខ្ញុំថា ខ្ញុំលេងសិល្បៈតែរយៈពេល៨ឆ្នាំប៉ុណ្ណោះ ឥឡូវនេះ៧ឆ្នាំហើយ នៅសល់តែ១ឆ្នាំទៀត ត្រូវបញ្ចប់»។
នៅខណៈពេលដែលការសន្យាជាមួយឪពុកថានឹងបញ្ចប់ជីវិតសិល្បៈជិតចូលមកដល់ ស្រាប់តែនៅពេលនេះ កាកា បានចូលខ្លួនក្លាយជាអ្នកចម្រៀងផ្តាច់មុខឲ្យផលិតកម្ម ដាយម៉ិនម្ញូស៊ីក ទៅវិញក្នុងកុងត្រាកំណត់រហូតដល់ទៅ៥ឆ្នាំ តែគេសង្ស័យថា តារារូបនេះចូលខ្លួននៅ ដាយម៉ិនម្ញូស៊ីក ក្នុងនាមជាអ្នកដឹកនាំផលិតកម្មច្រើនជាង ខណៈនៅក្នុងបទសម្ភាសមុននាងបានបញ្ជាក់ថា ដ្បិតតែនាងចង់ដកខ្លួន តែនាងនឹងលេចវត្តមានជាអ្នកដឹកនាំម្នាក់។
មុននេះ នាងបានបញ្ជាក់ថា៖«បើសិនជាខ្ញុំបញ្ចប់ ខ្ញុំនឹងមិនទៅណាឆ្ងាយដែរ ខ្ញុំអាចធ្វើសិល្បៈដែរ តែលាក់មុខ ដូចជាធ្វើអ្នកដឹកនាំជាដើម»។ ដូច្នេះគេគិតថា តារារូបនេះនឹងមានតួនាទីសំខាន់មួយនៅក្នុងផលិតកម្ម ដាយម៉ិនម្ញូស៊ីក ជាមិនខាន។
នាងមិនបាននិយាយដល់ភាពជាអ្នកដឹកនាំផលិតកម្មទេ ខណៈតារារូបនេះមិនលើកទូរស័ព្ទ តែនាងបានប្រាប់សារព័ត៌មានក្នុងស្រុកថា៖«ខ្ញុំពិតជាបានចុះកុងត្រារយៈពេល៥ឆ្នាំក្នុងផលិតកម្ម Diamond Musicពិតមែន។ ខ្ញុំបានចុះកុងត្រា ជាមួយខាងផលិតកម្ម រយៈពេលជា២ខែមកហើយ»។ ទស្សនិកជនកំពុងទន្ទឹងរង់ចាំមើលថា តើនាងនឹងមានអ្វីថ្មីសម្រាប់ផលិតកម្មថ្មីនេះ?
កាកា មានឈ្មោះដើមថា ព្រឿង ពេជ្រច័ន្ទម៉ូនីកា តែដល់ពេលចូលច្រៀងឱ្យផលិតកម្ម Classic នាងក៏បានដាក់ឈ្មោះ «កាកា» នេះជាប់រហូតមក។ ពេជ្រ ច័ន្ទម៉ូនីកា បានចូលប្រឡងក្នុងកម្មវិធីកញ្ញាឯកប៊្រីដស្តុន របស់ប៉ុស្តិ៍លេខ៩ តែមិនបានជាប់ទេ បានត្រឹមលេខ៤ ជាកញ្ញាឯកថតរូបស្អាត។ ក្រោយមក នាងក៏បានទៅធ្វើតេស្តនៅផលិតកម្ម Classic ហើយក៏បានជាប់ជាតារាចម្រៀង ដោយកុងត្រា៣ឆ្នាំ និងបានថតបទជា CD បានប្រមាណ៥០បទ តែប្រជាប្រិយភាពហាក់មានកម្រិត៕
So beautiful my darling ! I love you more than i can say. I don’t care your father but i want marry you. I love you with all my heart. Pich monika darling, love you. Jub. Jub.