ដោយ៖ ណាត សុភាព និង អ៊ឹង ប៊ុនថន
ថ្ងៃព្រហស្បតិ៍ ទី21 សីហា 2014
http://vodhotnews.com
ស្តាប់សំឡេង៖ |
ចម្លងទុក |
មើលរូបភាពបន្ថែម
ទិដ្ឋភាពនៅកន្លែងលក់គ្រឿងឧបភោគ បរិភោគ ក្នុងផ្សារច្បារអំពៅ
ផ្សារដើមគនៅកណ្តាលរាជធានីភ្នំពេញ គឺជាកន្លែងផ្គត់ផ្គង់បន្លែសំខាន់ជាងគេនៅកម្ពុជា។ ក្រុមអាជីវករឲ្យដឹងថា គ្រាន់តែនៅផ្សារដើមគនេះ ការនាំចូលបន្លែជាមធ្យម ៥០តោនក្នុងមួយថ្ងៃ ហើយអ្នកជំនាញគណនាឃើញថា បរិមាណបន្លែនាំចូលសរុបមានយ៉ាងហោចណាស់ ៣០០តោនក្នុងមួយថ្ងៃៗ។
ពលរដ្ឋឲ្យដឹងថា ទំនិញដែលលក់នៅផ្សារនេះ ច្រើនតែនាំចូលមកពីថៃ និងវៀតណាម និងភាគច្រើនប្រើប្រាស់ជាតិគីមី ដែលធ្វើឲ្យប៉ះពាល់ដល់សុខភាព។
សម្រាប់អ្នកស្រី ឡុង សុខា ដែលចូលចិត្តទិញបន្លែនៅផ្សារដើមគរប្រាប់VODថា គាត់ចូលចិត្តទៅ ទិញបន្លែ ត្រី សាច់ នៅទីនោះ បើទោះជាដឹងថា ជាប្រភេទនាំចូលពីបរទេស និងមានដាក់ជាតិគីមី ធ្វើឲ្យប៉ះពាល់សុខភាព ក៏ដោយ។
កន្លងមកអាជ្ញាធរខ្មែរ ចាប់បានសាច់មាន់នាំចូលគេចពន្ធ ដូចជា ស្លាបមាន់ ជង្គង់មាន់ ឬមាន់ក្លាសេ នាំចូលពីក្រៅប្រទេស ដែលមានដាក់សារធាតុគីមីការពារកុំឲ្យស្អុយ ហើយសារធាតុគីមីទាំងនោះធ្វើឲ្យប៉ះពាល់ដល់សុខភាពប្រជាពលរដ្ឋ។
ប្រធានសមាគមគ្រូពេទ្យគុណធម៌កម្ពុជា លោកវេជ្ជបណ្ឌិត អ៊ូច វុទ្ធី បង្ហាញក្តីបារម្ភចំពោះបញ្ហានេះ ព្រោះវាបានធ្វើឲ្យប៉ះពាល់ធ្ងន់ធ្ងរដល់សុខភាពពលរដ្ឋនៅកម្ពុជា ហើយក្រសួងពាក់ព័ន្ធគួរទប់ស្កាត់បញ្ហានេះ។ លោកថា បច្ចុប្បន្ននេះប្រជាពលរដ្ឋភាគច្រើនមានជំងឺទាក់ទងនឹងចំណីអាហារ ហើយប្រជាពលរដ្ឋខ្មែរគួរមានការប្រុងប្រយ័ត្នចំពោះចំណីអាហារនានា «ប៉ះពាល់ទីមួយ ប៉ះពាល់ដល់ឆ្អឹង ទី២ប៉ះពាល់ដល់ផ្លូវដងង្ហើម ប៉ះពាល់ច្រើនណាស់និងប៉ះពាល់ដល់ផ្លូវដង្ហើម។ ប្រឈមច្រើនណាស់ប្រសិនបើអាហារណឹងមិនសុទ្ធធ្វើឲ្យប៉ះពាល់មួយទៀត ធ្វើឲ្យអ្នកជំងឺពុល អត់ដឹងហេតុផលក្អួត ព្រោះខ្ញុំរាល់ថ្ងៃជួបអ្នកជំងឺរាគក្អួត ជាប្រចាំរាល់ថ្ងៃ គាត់មកហើយសំបូរណាស់ ក្នុងមួយថ្ងៃដូច១០០នាក់អីចឹងមក ពិនិត្យឈាមមើលគ្រុនពោះវៀន៩០នាក់បាត់ទៅហើយ»។
ជាមួយគ្នានោះ នៅតាម Facebook ក៏មានចែកចាយតៗគ្នាពីរូបភាព ដែលអាជ្ញាធរវៀតណាមចាប់បាន យឺហឺក្រៀម ធ្វើពីជ័រស្វិត ក្លែងបន្លំជាសាច់ យីហ៊ឺក្រៀមទៀតផង។
ថ្មីៗនេះទៀត ក៏មានទូរទស្សន៍ក្នុងស្រុកផ្សាយថា កម្ពុជាបាននាំចូលទឹកស៊ុបដាក់ប៊ីដុងប្រភេទទឹកថ្លា ដែលនាំចូលមកពីវៀតណាម សម្រាប់ដាក់ក្នុងទឹកស៊ុបធ្វើឲ្យសាច់ឆាប់ផុយ និងមានរសជាតិឆ្ងាញ់។
អាជីវករលក់ដូរម្នាក់នៅផ្តុំផ្សារបឹងកេងកង ឯណោះវិញ អ្នកស្រី មុំ សុគន្ធា ឲ្យដឹងថា ជារៀងរាល់ថ្ងៃគាត់ក្រោកពីម៉ោង៦ទៀបភ្លឺ ដើម្បីទៅទិញបន្លែ សាច់ នៅផ្សារច្បារអំពៅ រាជធានីភ្នំពេញ។ អ្នកស្រីអះអាងថា បន្លែ សាច់ ទាំងនោះមិនមានជាតិគីមីទេ ព្រោះគាត់ទិញពីឈ្មួញដែលនាំយកពីប្រជាកសិករដាំដោយខ្លួនឯង នៅតាមបណ្តាខេត្តនានា។ ដូច្នេះទឹកស៊ុប និងបន្លែ សាច់ ដែលគាត់ធ្វើលក់ មិនប្រើជាតិគីមីទេ ដោយសារគាត់ខ្លាចបាត់បង់អតិជន។
ពលរដ្ឋម្នាក់ទៀត លោក អេប ប្រុស ឲ្យដឹងដែរថា លោកចង់ទៅទិញបន្លែ សាច់ នៅតាម ទីផ្សារកសិកផលធម្មជាតិនៃអង្គការសេដាកដែរ តែដោយសារផលិតផលនៅទីនោះថ្លៃខ្ពស់ជាងផលិតផលដែលនាំចូលពីក្រៅប្រទេស។
អ្នកគ្រប់គ្រងផ្សារកសិផលធម្មជាតិនៃអង្គការសេដាក លោក គង់ ស៊ីណាលុច ទទួលស្គាល់ថា តម្លៃទំនិញនៅទីផ្សារនេះ ពិតជាថ្លៃជាងទំនិញទីផ្សារទូទៅមែន ដោយសារអង្គការនេះក៏លើកទឹកចិត្តឲ្យកសិករផលិតបន្លែ ត្រី សាច់ ដោយមិនប្រើជាតិគីមី ទទួលបានកម្រៃខ្ពស់។
លោក គង់ ស៊ីណាលុច បន្ថែមថា សេដាកក៏មានគម្រោងពង្រីកទីផ្សារឲ្យបាន៥០០ផ្សារទូទាំងប្រទេស ដើម្បីលក់ផលិតផលធម្មជាតិនេះដែរ តែដោយសារបច្ចុប្បន្ននេះ ផលិតផលដែលផលិតបាន មិនទាន់គ្រប់គ្រាន់ សម្រាប់ចែកចាយក្នុងទីផ្សារនៅឡើយ។
អ្នកស្រី ប្រាក់ សាអែម មានប្រសាសន៍ថា គាត់ចូលចិត្តទិញបន្លែ សាច់ នៅសាខាទី២របស់អង្គសេដាក ដោយសារមិនមានជាតិគីមី។ តែអ្នកស្រី អំពាវនាវឲ្យអង្គការសេដាក លក់ផលិតផលធម្មជាតិនេះក្នុងតម្លៃសមរម្យ ហើយពង្រីកទីផ្សារលក់ ឲ្យបានគ្រប់ទីផ្សារទាំងអស់ ដើម្បីងាយស្រួលស្វែងរកទិញផលិតផលនោះ។
អង្គការសេដាក បានជំរុញឲ្យមានការបង្កើនផលិតកម្មបន្លែក្នុងស្រុក ដើម្បីកាត់បន្ថយការនាំចូលតាមរយៈផលិតកម្មបន្លែបែបសរីរាង្គ តែការផ្គត់ផ្គង់នៅពេលនេះ បានតែប្រហែល ៤០០គីឡូប៉ុណ្ណោះក្នុងមួយថ្ងៃ។
ទិន្នន័យពាណិជ្ជកម្មរបស់ស្ថានទូតថៃប្រចាំកម្ពុជាបង្ហាញថា កម្ពុជានាំចូលផ្លែឈើពីប្រទេសថៃមានទឹកប្រាក់ប្រមាណ ៨០លានដុល្លារកាលពីឆ្នាំមុន ហើយនឹងកើនឡើង២៥ ភាគរយជាប្រចាំឆ្នាំ។ នៅកម្ពុជាទីផ្សារផ្លែឈើត្រូវបានផ្គត់ផ្គង់ភាគច្រើនពីប្រទេសថៃដែល ទឹកប្រាក់រង្វង់១០០លានដុល្លារក្នុងមួយឆ្នាំ ខណៈទីផ្សារបន្លែនៅកម្ពុជាត្រូវបានផ្គត់ផ្គង់ដោយប្រទេសវៀតណាម៕
ផ្សារកសិផលធម្មជាតិ របស់អង្គការសេដាក (រូបថត៖ ណាត សុភាព)
ទិដ្ឋភាពខាងក្នុងផ្សារកសិផលធម្មជាតិ អង្គការសេដាក
សូមសរសេរមកលោក ណាត សុភាព តាមរយៈ sopheap@vodhotnews.com និងលោក អុឹង ប៊ុនថន តាមរយៈ chanthorn@vodhotnews.com