Thu, 21 August 2014
មាស សុខជា
ភ្នំពេញប៉ុស្តិ៍
ភ្នំពេញៈ អង្គការសង្គមស៊ីវិល បានចាត់ទុកការចាប់ឃុំខ្លួន និងការបន្តកោះហៅសកម្មជនគណបក្សសង្គ្រោះជាតិពីសំណាក់តុលាការថា ជារឿងនយោបាយ និងបានអំពាវនាវឲ្យដោះលែង និងបញ្ឈប់ការកោះហៅសកម្មជនទាំងនោះដើម្បីកុំឲ្យស្ថានការណ៍នយោបាយតានតឹងជាថ្មីទៀត។
ក្នុងសន្និសីទសារព័ត៌មានដែលរៀបចំឡើងដោយគណៈកម្មាធិការប្រព្រឹត្តិកម្មនៃអង្គការសមាគមការពារសិទិ្ធមនុស្សកម្ពុជា (CHRAC) កាលពីម្សិលមិញ គណៈកម្មាធិការបានឲ្យដឹងថា បាតុកម្ម «ដោះលែងទីលានប្រជាធិបតេយ្យ» គឺជាប្រធានបទតំណាងរាស្រ្ត និងអ្នកគាំទ្រគណបក្សសង្គ្រោះជាតិដែលប្រើក្នុងបាតុកម្មអហិង្សា កាលពីថ្ងៃ ទី១៥ ខែ កក្កដា ដែលធ្វើឲ្យសមាជិកគណបក្សសង្គ្រោះជាតិត្រូវបានចាប់ឬឃុំខ្លួន និងត្រូវបានកោះហៅជាបន្តបន្ទាប់ពីស្ថាប័នតុលាការ ដោយចោទប្រកាន់ពីបទបះបោរ ឬញុះញង់ឲ្យប្រព្រឹត្តឧក្រិដ្ឋកម្ម។
លោក នី ចរិយា ប្រធានកម្មវិធីសិទិ្ធមនុស្សនិងជំនួយផ្លូវច្បាប់នៅសមាគមអាដហុក បានថ្លែងថា៖ «ពាក្យស្លោកនៅលើបដា សរសេរថា «ដោះលែងទីលានប្រជាធិបតេយ្យ» តើនេះគឺជាការញុះញង់ឬ? ផ្អែកលើអក្សរដែលយើងបានមើលឃើញនៅលើបដា «ដោះលែងទីលានប្រជាធិបតេយ្យ» មិនបង្កើតកំហឹងឲ្យអ្នកអានប្រព្រឹត្តអំពើហិង្សាទេ។
លោកបន្ថែមថា លោកស្រី មូរ សុខហួរ លោក ហូរ វ៉ាន់ និងអ្នកដទៃទៀត នៅក្នុងការតវ៉ា បានរៀបចំបាតុកម្មអហិង្សា ហើយសុន្ទរកថា របស់លោកស្រី មូរ សុខហួរ បានប្រកាសពីបាតុកម្មអហិង្សា «ដូច្នេះ វាមិនបានបង្ហាញពីឆន្ទៈញុះញង់ក្រុមបាតុករឲ្យប្រព្រឹត្តឧក្រិដ្ឋកម្មនោះទេ»។
លោក គល់ បញ្ហា នាយកប្រតិបតិ្តអង្គការឃ្លាំមើលការបោះឆ្នោត ខុមហ្វ្រែល ដែលជាសមាជិក CHRAC បានអំពាវនាវឲ្យគណបក្សប្រជាជនរបស់លោកនាយករដ្ឋមន្រ្តី ហ៊ុន សែន បញ្ឈប់ការចាប់ខ្លួន និងកោះសកម្មជន ឬបេក្ខជនតំណាងរាស្រ្តរបស់គណបក្សសង្គ្រោះជាតិ ហើយដោះលែងយុវជនទាំង ៣ នាក់ ដែលកំពុងជាប់ឃុំនៅពន្ធនាគារ ព្រៃស ឲ្យមានសេរីភាពដើម្បីបញ្ចៀសស្ថានការណ៍នយោបាយតានតឹង។
លោកបញ្ជាក់ថា៖ «ព្រោះយើងដឹងហើយថា បញ្ហានេះ គឺជាបញ្ហានយោបាយ ហើយបញ្ហានយោបាយបានប្រែក្លាយជាកិច្ចព្រមព្រៀងរួចហើយ ដូច្នេះត្រូវតែប្រែក្លាយស្ថានភាពនយោបាយឲ្យកាន់តែល្អប្រសើរ»។
លោក ហង្ស ពុទ្ធា នាយកប្រតិបតិ្តអង្គការ NICFEC ថ្លែងថា៖ «ប្រសិនបើរឿងនេះ មិនមែនជាបញ្ហានយោបាយ មិនមានការចរចានៅពេលព្រឹក ហើយនៅពេលល្ងាចតំណាងរាស្រ្ត និងសកម្មជនត្រូវបានដោះលែងនោះទេ»។
លោកបន្ថែមថា ការចាប់ខ្លួន និងការកោះហៅសមាជិកគណបក្សសង្គ្រោះជាតិ គឺជាការបំភិតបំភ័យមកលើគណបក្សសង្គ្រោះជាតិ ខណៈដែលគណបក្សប្រជាជន និងគណបក្សសង្គ្រោះជាតិ កំពុងបន្តចរចាថែមទៀត លើការធ្វើវិសោធនកម្មរដ្ឋធម្មនុញ្ញ និងការជ្រើសរើសសមាជិកគណៈកម្មាធិការជាតិរៀបចំការបោះឆ្នោតនោះ។
ប៉ុន្តែ លោក ទិត្យ សុធា អ្នកនាំពាក្យម្នាក់នៃទីស្តីការគណៈរដ្ឋមន្រ្តី បានច្រានចោលការចោទប្រកាន់ដែលបានធ្វើឡើងដោយអង្គការសង្គមស៊ីវិល ហើយថា សង្គមស៊ីវិល គួរទាមទារឲ្យកាត់ទោសក្រុមដែលប្រព្រឹត្តហិង្សា បណ្តាលឲ្យសន្តិសុខរបួស។
លោកបញ្ជាក់ថា៖ «ប្រទេសយើងត្រូវឈរលើនីតិរដ្ឋ ដូច្នេះបទល្មើសត្រូវដោះស្រាយដោយច្បាប់។ បញ្ហានយោបាយខុសពីឧក្រិដ្ឋកម្ម។ សង្គមស៊ីវិលមិនអាចចង្អុលមួយនេះប្រព្រឹត្ត មួយនោះមិនប្រព្រឹត្តនោះទេ»៕
បិសាចCPP កំពុងលេងល្បិច ស្រឡាញ់មេ បំពេកូន , ល្បិចសុំកូនមុខពុកមិនឱ្យ សុំកូនក្រោយ ចាប់បានយកចោះ និងល្បិចខោកផង អង្អែលផង។
ការប្រដូច:
មេ = តំណាងរាស្ត្រCNRP ទាំង55នាក់
កូន = រាស្ត្រដែលគាំទ្រCNRP
កូនមុខ = សកម្មជន រឺអ្នកស្មោះស្មគ្រនឹង CNRP
ពុក = សភាពការណ៍
កូនក្រោយ = អ្នករេរា, អ្នកមិនទាន់ច្បាស់លាស់នឹង CNRP
ខោក = ការចាប់សកម្មជនCNRPបីនាក់ដាក់គុក
អង្អែល = គឺការបកស្រាយយកត្រូវតាមផ្លូវច្បាប់, គឺជាការគំរាមថាគេអាចយកច្បាប់មកចាប់មនុស្សដាក់គុកបាន ដូច្នេះកុំចង់ល។ នេះជាបំណងល្អពីបិសាចCPP
តុលាការ ភ្នំពេញ មានភ្នែក ធ្វើខ្វាក់ ជា តុលាការ ទីងមោង អត់វិញ្ញាណ !
ល្បង ទិត្យ សុធា កុំ កាន់ជើង ជនពាល សន្តិសុខ , , ការ ពិត ក្រុម សន្តិសុខ កាន់ដំបងឈើ វ៉ៃ
ប្រជាពលរដ្ឋ ស្លូតត្រង់ មុន !
បើ គេ វ៉ៃ ក្បាល ទិត្យ សុធា អែង វិញ តើ គឹត យ៉ាងណា វិញ . ? !