Fri, 22 August 2014
សូ វុទ្ធី
ភ្នំពេញប៉ុស្តិ៍
ភ្នំពេញៈ រូបថតសិចស៊ីបង្ហាញល្វែងលើ ដ៏ទ្រលុកទ្រលន់ របស់តារាចម្រៀងផលិតកម្ម Diamond Music កញ្ញា ឃិត សំម៉ាលីស ជាច្រើនសន្លឹកបានបង្កការភ្ញាក់ផ្អើលយ៉ាងកក្រើកនៅក្នុងបណ្តាញហ្វេសប៊ុក អមជាមួយប្រយោគខ្លីដែលនាងសរសេរក្នុងហ្វេសប៊ុកថា៖ «ធ្វើម៉េចខ្ញុំមិនស្អាតដូចគេរាត្រីសួស្តី»។
ប៉ុន្តែនៅពេលសុំការបំភ្លឺជុំវិញការបង្ហោះរូបភាពបង្ហាញល្វែងលើមួយទំហឹងនេះ កញ្ញា ឃិត សំម៉ាលីស សុំមិនធ្វើការបកស្រាយទាំងអស់។ តែខាងផលិតកម្ម បានប្រាប់ថា កន្លងមកធ្លាប់បានហៅ តារាចម្រៀងម្នាក់នេះទៅធ្វើការណែនាំដែរ តែនាងមិនស្តាប់។
ការបង្ហាញភាពសិចស៊ីរាប់ភ្លេច របស់កញ្ញា ឃិត សំម៉ាលីស ត្រូវបានមហាជនមួយចំនួនលើកឡើងថា តារាចម្រៀងរូបនេះកំពុងតែលែងដើមទ្រូងប្រជែងជាមួយនឹងតារាសម្តែងនាង សេង សូណា ហើយក៏មានការលើកឡើងទៀតថា មុនមានតែ សេង សូណា ទេដែលមានភាពសិចស៊ី ជាងគេក្នុងពិភពសិល្បៈខ្មែរ។ តែមកទល់នឹងពេលនេះ បន្ទាប់ពី សេង សូណា ស្ងប់ស្ងាត់ប្រជាប្រិយភាពខាងសិចស៊ីនោះ បែរជាស្រីស្រស់ ឃិត សំម៉ាលីស ម្នាក់ទៀត មានចិត្តក្លាហានបញ្ចេញរង្វះទ្រូងឲ្យគេឯងបានឃើញជាចំណីចក្ខុនោះ។
យ៉ាងណាមហាជន ដែលបានឃើញនូវរូបភាពរបស់ កញ្ញា ឃិត សំម៉ាលីស ដែលមិនមែនសីលធម៌សិល្បៈបែបខ្មែរនោះ ក៏បានសូមអំពាវនាវទៅដល់សិល្បករសិល្បការិនី គ្រប់រូបឲ្យចេះថែរក្សាវប្បធម៌របស់ខ្មែរ កុំឲ្យមានការជ្រាបចូលនូវវប្បធម៌បរទេស។
ម្ចាស់គណនីឈ្មោះ វិសាល ចាន់ ដែលកំពុងរស់នៅអាមេរិក បានសរសេរថា៖«កុំធ្វើអ្វីឲ្យហួសហេតុពេក ព្រោះយើងជាខ្មែរទេ មិនមែនជាតិសាសន៍បរទេសឯណា ល្បីដោយភាពសិចស៊ីនេះ មិនបានយូរទេ ថាមិនបានបាត់ឈ្មោះពីបញ្ជីសិល្បៈមិនដឹង»។
ជាមួយការលើកឡើងនេះម្ចាស់គណនីដែលជាអាណិកជនខ្មែររស់នៅឯនាយសមុទ្ររូបនេះ បានសរសេរបែបលើកទឹកចិត្តថា៖«កុំខំបែបនេះ ព្យាយាមយកសិល្បៈជាទុនទៅ នោះល្បីបានយូរអង្វែងជាង ម៉ាលីស អើយ មើលទៅ ដាឡែន ដឹងហើយ ព្រោះជ្រុលខ្លួនភ្លេចប្រពៃណីមួយគ្រា នាងពិបាកងើបមុខណាស់ហើយ កុំដើរតាមគេនោះទៀតអី»។
យ៉ាងណាជុំវិញទង្វើឆ្គាំឆ្គងនេះ តារាចម្រៀងដែលមានកេរ្តិ៍ល្បីមធ្យម របស់ផលិតកម្ម Diamond Music រូបនេះ មិនធ្វើការបកស្រាយអ្វីទាំងអស់ ពេលដែលភ្នំពេញ ប៉ុស្តិ៍ ទំនាក់ទំនងទៅ ដោយនាងលើកឡើងថា បើនិយាយរឿងរូបថតសិចស៊ី ក្នុងហ្វេសប៊ុកនាងមិននិយាយទេ តែបើនិយាយរឿងការងារសិល្បៈនាងនិយាយ។ កញ្ញា ឃិត សំម៉ាលីស និយាយក្នុងពាក្យសំដីខ្សាវៗថា៖«ខ្ញុំមិននិយាយទេបងរឿងរូបថតហ្នឹង តែខ្ញុំប្រាប់ថា នៅថ្ងៃទី២៥ ខែសីហាខាងមុខនេះ ខ្ញុំនឹងឡើងយន្តហោះទៅច្រៀងនៅប្រទេសចិន តែមិនមែនទៅតាមរយៈផលិតកម្មរៀបចំទេ»។
កញ្ញា សំម៉ាលីស បញ្ជាក់ថា៖«ខ្ញុំទៅតាមរយៈក្រសួងទេសចរណ៍ គេហៅឲ្យទៅច្រៀង ហើយតាមគោលការណ៍ក្រសួងរៀបចំបទចម្រៀងឲ្យច្រៀងគឺបទចិន និងអង់គ្លេស»។
ប៉ុន្តែដោយឡែកខាងផលិតកម្ម Diamond Music ពោលថា សកម្មភាព ដែលរំលេចពីរូបថតសិចស៊ី របស់តារាផលិតកម្មខ្លួនពិតជាធ្វើឲ្យប៉ះពាល់ដល់ផលិកម្ម។ លោក មុំ មុន្នីរិទ្ធិ ដែលមាននាទីជាអ្នកគ្រប់គ្រងតួនៅផលិតកម្ម Diamond Music បានឲ្យដឹងថា៖«ជាគោលការណ៍ ផលិតកម្ម ហាមដាច់ខាត រាល់តារាសិល្បៈណាដែលសិចស៊ី ជ្រុលហួសពីដែនប្រពៃណីខ្មែរ។ កន្លងមកផលិតកម្មក៏ធ្លាប់បានណែនាំហើយដែរ តែនាងមិនបានធ្វើតាមទេ អ៊ីចឹងធ្វើអ្វីក៏ស្រេចតែនាង តែផលិតកម្មក៏ឈប់ទទួលខុសត្រូវនូវរាល់សកម្មភាព ដែលផ្ទុយពីគោលការណ៍របស់ផលិតកម្មដែរ»៕
Nothing wrong ………………sexy show off is ok.
Sexy is an art and it’s not wrong or mistake. But we must be careful our value khmer culture.
Sexy is an art and it’s not wrong or mistake. But we must be careful our value khmer culture.
សិចសីុមិនល្អសំរាប់សិល្បះការនីខ្មែរ។សំខាន់សមត្ថភាព