Sat, 23 August 2014
ធិក កល្យាណ
ភ្នំពេញប៉ុស្តិ៍
លោក ខៃ ប្រសិទ្ធ អតីតតារាភាពយន្តខ្មែរ បានចូលរួមបរិច្ចាគប្រាក់សង់អណ្តូងទឹក ដើម្បីឧទ្ទិសកុសលជូនដល់ភរិយារបស់លោក គឺលោកស្រី ពិសិទ្ធ ពិលិកា តារាភាពយន្តដ៏ល្បីល្បាញដែលត្រូវបានខ្មាន់កាំភ្លើងបាញ់សម្លាប់ទាំងកណ្តាលថ្ងៃ នៅតាមផ្លូវដ៏មមាញឹកមួយ ក្នុង ក្រុងភ្នំពេញ កាលពីអំឡុង ឆ្នាំ១៩៩៩ តាមរយៈលោក សាវិន ហ្វីលីព តារាភាពយន្តម្នាក់ទៀត ដែលមានកង្វល់ក្នុងចិត្តនៅពេលដែលឃើញប្រជាពលរដ្ឋខ្មែរក្រីក្រមួយចំនួនខ្វះទឹកស្អាតប្រើប្រាស់។
ថ្វីបើ ខេត្តសៀមរាប ជាខេត្តទេសចរណ៍ដ៏មានសក្តានុពលមួយក៏ដោយ ប៉ុន្តែកង្វះទឹកស្អាតប្រើប្រាស់នៅតែជាបញ្ហាប្រឈមសម្រាប់អ្នករស់នៅតាមតំបន់ជាយក្រុង។ លោក សាវិន ហ្វីលីព ដែលជាតារាភាពយន្តជើងចាស់ដែលបាននិងកំពុងថតឲ្យផលិតកម្មល្បីៗនៅតាមបណ្តាប្រទេសមួយចំនួនកំពុងព្យាយាមដោះស្រាយបញ្ហាខ្វះទឹកស្អាតប្រើប្រាស់នៅក្នុងខេត្តសម្បូរប្រាសាទបុរាណមួយនេះ។
ក្រោយពីប្រកាសវិលចូលសិល្បៈមិនទាន់បានប៉ុន្មានផង លោក សាវិន ហ្វីលីព បានបង្កើតគម្រោងមួយដែលមានឈ្មោះថា «សាវិនកម្ពុជា» នៅដើមឆ្នាំ ២០១៤។ សព្វថ្ងៃគម្រោងនេះ បានសាងសង់អណ្តូងទឹកស្អាតយ៉ាងហោចណាស់ជាង ៤០ ក្នុងខេត្តចំនួនពីរគឺ ខេត្តសៀមរាប និង ខេត្តតាកែវ។ បច្ចុប្បន្នគម្រោងសប្បុរសធម៌មួយនេះ មានការគាំទ្រពីសប្បុរសជនខ្មែរ ជាពិសេសលោក ខៃ ប្រសិទ្ធ និងបរទេស ដែលធ្វើឲ្យលោក ហ្វីលីព មានការមមាញឹកយ៉ាងខ្លាំងក្នុងការជួយគ្រួសារប្រជាជនក្រីក្រ ជនពិការ តាមខេត្តទាំងនេះ ដើម្បីឲ្យមានអណ្តូងទឹកប្រើប្រាស់។
ក្រៅពីនេះ គម្រោង សាវិនកម្ពុជា ក៏មានផ្តល់នូវបង្គន់អនាម័យទៅដល់ក្រុមគ្រួសារក្រីក្រ ដែលគ្មានសមត្ថភាពក្នុងការសាងសង់ដោយខ្លួនឯង និងផ្តល់ជា កង់ ឯកសណ្ឋានសាលា សៀវភៅឱ្យសិស្សក្រីក្រ ផងដែរ។
លោក ហ្វីលីព បានឲ្យដឹងទៀតថា សប្បុរសជន ដែលបានជួយលោក មានទាំងខ្មែរក្នុងស្រុក និងជនជាតិបរទេសមួយចំនួន ខ្មែរនៅសហរដ្ឋអាមេរិក ប្រទេសបារាំង និង ប្រទេសអូស្ត្រាលី ផងដែរ។ ក្នុងអណ្ដូងមួយត្រូវធ្វើមានតម្លៃចាប់ពី ៣៥០ រហូតដល់ ២០០០ ដុល្លារដែលថ្មីៗនេះលោក ហ្វីលីព ទើបតែបានធ្វើអណ្តូង ២ ប្រគល់ជូនសាលាបឋមសិក្សា ព្រះដាក់ និង ៥ ទៀត ប្រគល់ជូនគ្រួសារក្រីក្រមួយចំនួននៅក្នុង ស្រុកប្រាសាទបាគង។ អណ្តូងទឹកស្អាតមួយក្នុងចំណោមអណ្តូងពីរ ក្នុងសាលាបឋមសិក្សា ព្រះដាក់ គឺជាជំនួយរបស់អតីតតារាភាពយន្តល្បីល្បាញអំឡុងទសវត្សរ៍ ទី៩០ គឺលោក ខៃ ប្រសិទ្ធ ដែលបានផ្ញើថវិកាផ្ទាល់ខ្លួនមួយចំនួនពី ប្រទេសអូស្ត្រាលី ដើម្បីសង់ជាអណ្ដូងទឹកស្អាត ក្នុងការជួយសម្រួលដល់ការលំបាករបស់ប្រជាពលរដ្ឋ និងសិស្សានុសិស្សក្រីក្រ នៅបរិវេណតំបន់នោះ។
លោក ហ្វីលីព មានប្រសាសន៍ថា៖ «ខ្ញុំនិងលោក ហេង ដានី ដែលជាតួសម្តែងដូចគ្នា បានមកដល់សៀមរាប ក៏មានចិត្តចង់ចែកសៀវភៅដល់ក្មេងៗនៅសាលាបឋមសិក្សា ព្រះដាក់ តែខ្ញុំបានសង្កេតឃើញថា សាលារៀននេះ មិនទាន់មានអណ្តូងទឹកស្អាតប្រើប្រាស់នៅឡើយ»។
លោកបន្តទៀតថា៖ «សិស្សានុសិស្សប្រមាណជាង ៧០០ នាក់ពិតជាត្រូវការទឹកស្អាតប្រើជាចាំបាច់ ហើយការសាងសង់អណ្ដូងទឹកឲ្យពួកគេនៅពេលនេះគឺជាការឆ្លើយតបដ៏ត្រឹមត្រូវ»។
លោក ហ្វីលីព បាននិយាយថា លោក ខៃ ប្រសិទ្ធ នឹងឧទ្ទិសបុណ្យកុសលទាំងអស់ដែលលោកបានពីការកសាងអណ្តូងនេះ ទៅឲ្យភរិយារបស់គាត់ គឺអ្នកនាង ពិសិដ្ឋ ពិលិកា ដែលត្រូវបានគេបាញ់សម្លាប់នៅរាជធានីភ្នំពេញកាលពី ១៥ ឆ្នាំមុន។ ឯថវិកាមួយផ្នែកទៀត ក៏ជាការចូលរួមចំណែកពីកូនប្រុសរបស់គាត់ឈ្មោះ ម៉ៃឃើលដ៍ ខៃ ផងដែរ។ លោក សាវិន ហ្វីលីព បានបញ្ជាក់ឲ្យដឹងទៀតថា រាល់ជំនួយលោកតែងតែថតរូប និងបង្ហាញព័ត៌មានលម្អិត តាមរយៈគេហទំព័រ Facebook របស់លោកតែម្ដង ដើម្បីបញ្ជាក់ពីតម្លាភាពក្នុងការប្រើប្រាស់ថវិកា ហើយលោកនឹងស្វាគមន៍ ចំពោះ តារាផ្សេងៗទៀតដែលមានចិត្តចង់ចូលរួមជាមួយគម្រោងរបស់លោកក្នុងការជួយកុមារក្រីក្រ និងជនពិការ ដែលជាជនងាយរងគ្រោះ ហើយកំពុងត្រូវការការផ្តល់ជាជំនួយ។
ម្តាយរបស់លោក ហ្វីលីព អ្នកស្រី នៅ សាវិន គឺជាអ្នកដែលផ្តល់គំនិត ក្នុងការបង្កើតគម្រោងជួយទៅដល់ជនក្រីក្រ និងជនពិការ ដែលគាត់គឺជាអតីតសាស្រ្តាចារ្យ នៅវិទ្យាល័យ សន្ធរម៉ុក។ លោក ហ្វីលីព ថ្លែងថា៖ «គ្រួសារខ្ញុំត្រូវសម្លាប់ក្នុងសម័យ ប៉ុល ពត ស្ទើរតែទាំងអស់ ទាំងឪពុក និងបងប្អូនបង្កើតពីរនាក់ទៀត ខ្ញុំសល់តែម្តាយខ្ញុំម្នាក់ទេ។ គាត់បានបង្រៀនខ្ញុំជាច្រើនអំពីការជួយទៅកាន់អ្នកដទៃ ជួយទៅកាន់មនុស្សទីទ័លក្រ។ តាមពិតទៅ ឈ្មោះគម្រោងរបស់ខ្ញុំ គឺខ្ញុំយកឈ្មោះម្តាយខ្ញុំមកដាក់ ពីព្រោះចង់អរគុណគាត់ ដែលបង្រៀននិងធ្វើឲ្យខ្ញុំមានថ្ងៃនេះ»។ លោកបន្តថា៖ «អ្វីដែលម្តាយខ្ញុំចង់ឃើញគឺស្នាមញញឹមរបស់ក្មេងៗ និងគ្រួសារក្រីក្រនៅពេលដែលពួកគេ បានទទួលនូវអ្វីដែលយើងព្យាយាមជួយពួកគេ»។
លោក ហ្វីលីព បានមកដល់ ខេត្តសៀមរាប កាលពីដើម ខែកក្កដា ពេលដែលលោកត្រូវថតខ្សែភាពយន្តភាគមួយមានចំណងជើងថា៖ «រនាតស្នេហ៍» ដែលនឹងត្រូវបញ្ចាំងនៅលើកញ្ចក់ទូរទស្សន៏ CTN ក្នុងពេលឆាប់ៗនេះ ក្នុងគោលបំណងលើកតម្កើងឧបករណ៍ភ្លេងខ្មែរបុរាណរួមទាំងបញ្ចៀសនូវការភាន់ច្រឡំ ដែលតែងកើតឡើងក្នុងការហៅឈ្មោះបទភេ្លងពិណពាទ្យ ដែលមនុស្សមួយចំនួន តែងតែហៅថា ភ្លេងសៀម។ លោក ហ្វីលីព សម្តែងជាតួអង្គ ឧកញ្ញាវង្សសា ដែលជីវិតរបស់លោក មានតែវិប្បដិសារី នៅពេលដែលតួអង្គនេះ មានកូនស្រីមិនដែលស្តាប់ដំបូន្មានឪពុក។ ប៉ុន្តែរឿង «រនាតស្នេហ៍» នេះហើយ ដែលធ្វើឲ្យតួសម្តែងទាំងអស់ រួមទាំងអ្នកដឹកនាំរឿង ត្រូវភ័យបះសក់ដោយសារតែមានរឿងចម្លែកកើតឡើង និងឃើញនឹងភ្នែកស្រស់ៗជាបន្តបន្ទាប់ ហើយលោក ហ្វីលីព ក៏បានប្រទះនឹងរឿងខ្មោចនេះដូចគ្នា ដែលភាពភ័យខ្លាចនេះតាមអន្ទងរូបលោករហូតដល់ពេលខ្លះ លោកចង់សម្រេចចិត្តឈប់ថតរឿងនេះតែម្តង។ លោកបញ្ជាក់ថា៖ «តាំងពីកើតមក និងចូលសិល្បៈមក មិនដែលជួបរឿងភ័យខ្លាចបែបនេះទេ គឺខ្ញុំខ្លាចមែនទែនរហូតដល់ទៅរកព្រះសង្ឃឲ្យជួយពេលខ្លះលែងចង់ថតឲ្យគេនិយាយរឿងហ្នឹងពេលណា គឺព្រឺសម្បុរខ្ញាក អ្នកខ្លះថា ពួកខ្ញុំចង់ល្បីប្រឌិតរឿងនេះឡើង តែខ្ញុំសូមប្រាប់ថា គ្មាននរណាម្នាក់ចង់ល្បីដល់ថ្នាក់ហ៊ានយកជីវិតខ្លួនឯងទៅលេងសើចជាមួយខ្មោចនោះទេ ទាល់តែជួបដូចពួកខ្ញុំ បានដឹងថា វាគួរឲ្យខ្លាចយ៉ាងណា»។
តារាសម្តែងជើងចាស់រូបនេះ ទើបតែប្រឡូកចូលសិល្បៈវិញក្នុង ឆ្នាំ២០១២ ក្រោយពីបានផ្អាកតាំងពី ឆ្នាំ១៩៩៦ ដោយសារតែលោកជាប់រវល់ការងារផ្ទាល់ខ្លួន ហើយការងារចុងក្រោយរបស់លោក គឺជាអ្នកគ្រប់គ្រងទូទៅនៃសណ្ឋាគារ Independence Hotel Sihanouk Ville។ បច្ចុប្បន្នលោក ហ្វីលីព ជាតារាខ្មែរមួយរូប ដែលត្រូវបានជ្រើសរើសចូលរួមថតខ្សែភាពយន្តថ្មីមួយដែលមានចំណងជើងថា «Before the Fall» មានអ្នកដឹកនាំរឿងជាជនជាតិ អូស្ត្រាលី ឈ្មោះ Ian White។ ខ្សែភាពយន្ដនេះ នឹងរៀបរាប់អំពីស្នេហាត្រីកោណរយៈពេលបួនថ្ងៃមុន ឆ្នាំ១៩៧៥ ក្នុង ប្រទេសកម្ពុជា ដែលមានតួសម្តែងជាជនជាតិ ខ្មែរ បារាំង និង អាមេរិក។ លោកបាននិយាយថា៖ «តួសម្តែងភាគច្រើនគឺជាជនបរទេសដែលក្នុងសាច់រឿងតម្រូវឲ្យនិយាយជាភាសាអង់គ្លេស។ ខ្ញុំពិតជាមានមោទនភាពណាស់ ដែលក្លាយជាតួអង្គមួយក្នុងរឿងនេះ»។ លោក ហ្វីលីព ក៏ជាតួសម្តែងក្នុងរឿង «ហនុមាន ឬ Year of the Monkey» ដែលដឹកនាំដោយផលិតករខ្សែភាពយន្ត អ៊ីតាលី លោក Jimmy Henderson។ លោក ហ្វីលីព បាននិយាយថា រឿង «ហនុមាន» នេះនឹងត្រូវដាក់បញ្ចាំងនៅ ខែកញ្ញា ឆ្នាំនេះ៕
តារាផ្សេងៗកំពុងបញ្ចេញសាច់ដើមទ្រូងបង្អួតគ្នាលើកំរាលមាសភ្លេចអស់អ្នកក្រ។
Trov chab me cho-ka-choy ka-chas -herm kadouy ja-rouss moomiss Bun Ra Ny sam-lab chol vinh terb trov