ដោយ ជិន ជេដ្ឋា
2014-08-28
RFA
នាយកប្រតិបត្តិអង្គការការពារសិទ្ធិជនជាតិភាគតិច លោក អាង ច័ន្ទឬទ្ធិ ក្នុងវេទិកាអ្នកស្ដាប់របស់វិទ្យុអាស៊ីសេរី នៅយប់ច័ន្ទ ទី១១ ខែសីហា ឆ្នាំ២០១៤។ Photo: RFA
សកម្មភាពចុះធ្វើជំរឿនជនបរទេសនៅកម្ពុជា នឹងត្រូវអនុវត្តក្នុងពេលឆាប់ៗ បន្ទាប់ពីក្រុមការងារបង្កើតដោយក្រសួងមហាផ្ទៃ រៀបចំឯកសារ និងជួបប្រជុំបច្ចេកទេសរួចរាល់។
ទន្ទឹមគ្នានេះ មន្ត្រីអង្គការក្រៅរដ្ឋាភិបាល បានសម្ដែងក្ដីបារម្ភខ្លាចកើតមានអំពើពុករលួយក្នុងសកម្មភាពនេះ ហើយទិន្នន័យដែលទទួលបានមិនអាចយកទៅប្រើជាផ្លូវការបាន។
មន្ត្រីសង្គមស៊ីវិល ថ្លែងរិះគន់នៅថ្ងៃទី២៨ ខែសីហា ថា ក្រុមសមត្ថកិច្ច និងមន្ត្រីពាក់ព័ន្ធ អាចឆ្លៀតយកឱកាសប្រព្រឹត្តអំពើពុករលួយ ក្នុងសកម្មភាពចុះអនុវត្តការងារគ្រប់គ្រង និងស្រង់ស្ថិតិជនបរទេស ជាពិសេសទៅលើជនអន្តោប្រវេសន៍វៀតណាម។ ប៉ុន្តែមន្ត្រីជាន់ខ្ពស់ក្រសួងមហាផ្ទៃ ចាត់ទុកការលើកឡើងនេះ គឺគ្រាន់តែជាការយល់ឃើញរបស់បុគ្គលម្នាក់ ឬជនមួយក្រុមប៉ុណ្ណោះ។
នាយកប្រតិបត្តិនៃអង្គការការពារសិទ្ធិជនជាតិភាគតិច (MIRO) លោក អាង ច័ន្ទឬទ្ធិ មានប្រសាសន៍ថា កន្លងទៅខាងលោករកឃើញករណីប្រព្រឹត្តអំពើពុករលួយរបស់សមត្ថកិច្ចអន្តោប្រវេសន៍ ដោយជនជាតិវៀតណាម មួយចំនួនបានបង់ប្រាក់ចន្លោះពី ៣០០ ទៅ ៥០០ដុល្លារ ដើម្បីទទួលបានអត្តសញ្ញាណប័ណ្ណសញ្ជាតិខ្មែរ និងមានទម្រង់នៃការប្រព្រឹត្តអំពើពុករលួយមួយចំនួនទៀត។
លោកបន្តថា ជនជាតិវៀតណាម នៅខេត្តពោធិ៍សាត់ បាត់ដំបង សៀមរាប និងខេត្តកណ្ដាល ជាដើម ភាគច្រើនពុំមានលិខិតស្នាមស្នាក់នៅត្រឹមត្រូវ។ ដោយឡែកនៅខេត្តកំពង់ឆ្នាំង ភាគច្រើនមានលិខិតស្នាមត្រឹមត្រូវ ដោយមានសមត្ថកិច្ចចុះត្រួតពិនិត្យជាប្រចាំក្នុងរយៈពេល១ខែ ឬបីខែម្ដង៖ «អ្វីដែលរដ្ឋាភិបាលធ្វើហ្នឹង វាអត់ទាន់មានតម្លាភាពនៅឡើយទេ ហើយអត់ទាន់បង្ហាញនូវយុទ្ធសាស្ត្រច្បាស់លាស់ ដែលត្រូវធ្វើហ្នឹងឲ្យមានការជឿទុកចិត្តពីសហគមន៍អន្តរជាតិ ឬប្រជាពលរដ្ឋខ្មែរនៅឡើយទេ ដោយសារចំណាត់ការរបស់រដ្ឋាភិបាលនេះ គឺធ្វើឡើងដោយឯកតោភាគី ដោយមិនបានឲ្យមានភាគីពាក់ព័ន្ធ ដើម្បីពិនិត្យមើលនីតិវិធីហ្នឹង។ នេះហើយជាការព្រួយបារម្ភរបស់ខាងសង្គមស៊ីវិល»។
ទាក់ទងបញ្ហានេះ មន្ត្រីនាំពាក្យក្រសួងមហាផ្ទៃ លោក ខៀវ សុភ័គ ថ្លែងបញ្ជាក់ថា ការចុះអនុវត្តការងារគ្រប់គ្រង និងស្រង់ស្ថិតិជនបរទេសលើកនេះ នឹងត្រូវបានអនុវត្តយ៉ាងមានប្រសិទ្ធភាព ដោយសារតែក្រុមការងារដែលត្រូវចុះអនុវត្តផ្ទាល់នោះ គឺមានសមាសភាពចេញពីមន្ត្រីក្រុមប្រឹក្សាឃុំស្រុក និងក្រុមប្រឹក្សាខេត្តមកពីគ្រប់គណបក្សនយោបាយ។ លោកបន្តថា ក្នុងករណីដែលជនរងគ្រោះ ឬអ្នកដែលត្រូវគេទាមទារប្រាក់ជាថ្នូរនឹងការផ្ដល់អ្វីមួយនោះ គឺអាចទាក់ទងទៅអាជ្ញាធរមានសមត្ថកិច្ចដែលនៅជិតបំផុត ដើម្បីជួយអន្តរាគមន៍ជាបន្ទាន់៖ «គេមានសិទ្ធិលើកឡើង គេថាម៉េចថាទៅ! ប៉ុន្តែខ្ញុំចង់ជម្រាបជូនថា នៅក្នុងគណៈកម្មការដែលចុះទៅនេះ តាមគោលការណ៍របស់ក្រសួងមហាផ្ទៃ គឺប្រើប្រាស់តែបុគ្គលិកស្ថាប័នរបស់រដ្ឋ ហើយក្នុងនោះមានទាំងក្រុមប្រឹក្សា ត្រូវបានជ្រើសតាំងដោយការបោះឆ្នោតពីប្រជាពលរដ្ឋទៀតផង។ ហើយសូមអំពាវនាវផងដែរថា ប្រសិនបើមានការសូកប៉ាន់ សុំកុំភ្លេចថា អ្នកដែលសូកគេក៏ជាអ្នកមានទោសដែរ»។
លោកបញ្ជាក់ថា នៅក្រោយការស្រង់ស្ថិតិជនបរទេសលើកនេះ រដ្ឋាភិបាលនឹងមានវិធានការចំពោះជនអន្តោប្រវេសន៍ដែលកំពុងរស់នៅខុសច្បាប់ក្នុងទឹកដីប្រទេសកម្ពុជា ប៉ុន្តែវិធានការនោះមិនហួសពីអ្វីដែលមានចែងនៅក្នុងច្បាប់អន្តោប្រវេសន៍របស់កម្ពុជា នោះទេ។
រហូតមកដល់បច្ចុប្បន្ន តួលេខជនអន្តោប្រវេសន៍វៀតណាម នៅកម្ពុជា មិនទាន់មានភាពច្បាស់លាស់នៅឡើយ។ ប៉ុន្តែលោកនាយករដ្ឋមន្ត្រី ហ៊ុន សែន ធ្លាប់អះអាងថា ជនជាតិវៀតណាម ទាំងស្រប និងមិនស្របច្បាប់នៅកម្ពុជា មានជាង ១០ម៉ឺននាក់ ចំណែកប្រធានគណបក្សសង្គ្រោះជាតិ លោក សម រង្ស៊ី វិញអះអាងថា មានប្រមាណជា ៥សែននាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
- សង្គមស៊ីវិលជំរុញឲ្យមានការគ្រប់គ្រងជនអន្តោប្រវេសន៍និងជនបរទេសឲ្យបានល្អ
- ក្រសួងមហាផ្ទៃមិនទាន់មានវិធានការជាក់លាក់ចំពោះជនអន្តោប្រវេសន៍ខុសច្បាប់
- កម្ពុជាសម្រេចទទួលយកជនភៀសខ្លួនពីប្រទេសអូស្ត្រាលី
- ក្រសួងមហាផ្ទៃចាប់ផ្ដើមជំរឿនជនអន្តោប្រវេសន៍វៀតណាមនៅកម្ពុជា
- លីកាដូគ្រោងប្ដឹងទៅអង្គភាពប្រឆាំងអំពើពុករលួយរឿងប្លង់ដីបណ្ដោះអាសន្ននៅកំពត
- លោក រ៉ុង ឈុន ស្នើក្រសួងស៊ើបអង្កេតអំពើពុករលួយនៅការិយាល័យអប់រំស្រុកភ្នំក្រវាញ
- ក្រសួងអប់រំចាប់ផ្ដើមពិនិត្យបញ្ជីឈ្មោះដើម្បីបោសសម្អាតមន្ត្រីខ្មោច
- សមាគមគ្រូបង្រៀនឯករាជ្យស្នើក្រសួងស៊ើបអង្កេតអំពើពុករលួយស្រុកភ្នំក្រវាញ
- កម្មករអូសរទេះនៅច្រកប៉ោយប៉ែតចោទមន្ត្រីអន្តោប្រវេសន៍ពីបទពុករលួយ
រដ្ធាភិបាលត្រូវអនុញ្ញាត្តិឲគ្រប់ស្ថាប៏នពាក់ព័នទាំងអស់ ពិសេសសង្គមសីវិល ផង ដើម្បី អោយមានតំលាភាព និងជៀសវាងការពុករលួយកើតឡើង