ដោយ៖ ឡាយ សាមាន
ថ្ងៃសុក្រ ទី29 សីហា 2014
http://vodhotnews.com
មើលរូបភាពបន្ថែម
អត្តសញ្ញាណប័ណ្ណសញ្ជាតិខ្មែរ
ប្រជាពលរដ្ឋនៅឃុំសំរោងលើ ស្រុកបន្ទាយមាស ខេត្តកំពត ចោទមន្ត្រីធ្វើអត្តសញ្ញាណប័ណ្ណយកលុយលើសការកំណត់របស់ក្រសួងមហាផ្ទៃ។
ពលរដ្ឋដែលបានឃើញករណីនេះលោក សំណាង ប្រាប់ VOD នៅថ្ងៃទី២៩ ខែសីហានេះ ឲ្យដឹងថា ក្នុងមួយថ្ងៃអាជ្ញាធរត្រូវប្រគល់បង្កាន់ដៃ១០០សន្លឹក ប៉ុន្តែអាជ្ញាធរផ្តល់ឲ្យតែ ៦០សន្លឹកទេ សល់ប៉ុន្មានទៀតទុកធ្វើសម្រាប់ឲ្យអ្នកដែលត្រូវការប្រញាប់ ដោយតម្រូវឲ្យបង់ប្រាក់ពី៤ម៉ឺន ទៅ៦ម៉ឺនរៀល។ លោកបន្តថា ការយកលុយលើសនេះ ធ្វើឲ្យប៉ះពាល់ដល់ប្រជាពលរដ្ឋក្រីក្រ និងក្រុមគ្រួសារទាំងមូល ជាពិសេសប៉ះពាល់ដល់ការអភិវឌ្ឍប្រទេសជាតិ។
លោកបន្តថា ប្រសិនបើថ្នាក់លើមិនមានវិធានការទប់ស្កាត់ទេ នឹងធ្វើឲ្យប៉ះពាល់ដល់ការបោះឆ្នោតផងដែរ ដោយសារប្រជាពលរដ្ឋមិនមានអត្តសញ្ញាណប័ណ្ណសម្គាល់ខ្លួនថាជាជនជាតិខ្មែរ។
អធិការរងស្រុកបន្ទាយមាស ទទួលការងារស្ថិតិធ្វើអត្តសញ្ញានប័ណ្ណលោក សន់ រ៉ូ ឆ្លើយតបថា មិនមានករណីដូចការចោទប្រកាន់នោះទេ។ លោកបន្តថា មុននឹងចាប់ផ្តើមធ្វើអត្តសញ្ញាណប័ណ្ណ ក្រុមការងារបានធ្វើការណែនាំដល់ប្រជាពលរដ្ឋ និងមន្ត្រីរបស់ខ្លួនថា មិនឲ្យយកលុយលើសពីការកំណតរបស់ក្រសួងឡើយ ដោយចំណាយត្រឹមតែ ១ម៉ឺនរៀលប៉ុណ្ណោះ។ លោកបន្តថា ចំណែកការបំពេញបែបបទ អាជ្ញាធរក៏មិនយកលុយដែរ ប៉ុន្តែអាស្រ័យលើសន្តានចិត្តពលរដ្ឋដែលគាត់ពេញចិត្តឲ្យ ១០០០ ឬ ២០០០រៀល។
តែទោះជាយ៉ាងណា ពលរដ្ឋដែលសុំមិនបញ្ចេញឈ្មោះ បញ្ជាក់ថា គាត់បានបង់ប្រាក់ចំនួន ៦ម៉ឺនរៀល ដោយសារគាត់ចង់បានអត្តសញ្ញាណប័ណ្ណរហ័សធ្វើក្នុងរយៈពេលមួយថ្ងៃ។ ពលរដ្ឋរូបនោះបន្តថា មានអ្នកខ្លះបង់ប្រាក់លើសពីនេះទៀត ប្រសិនបើពួកគេចង់បានរហ័សជាងនេះ។ តែទោះជាយ៉ាង គាត់បញ្ជាក់ថា ការបង់ប្រាក់នេះជាការស្ម័គ្រចិត្តប៉ុណ្ណោះ មិនមានការបង្ខិតបង្ខំឡើយ។
រាជរដ្ឋាភិបាលកម្ពុជា ប្រកាសថា ការធ្វើអត្តសញ្ញាណប័ណ្ណសញ្ជាតិខ្មែរ នឹងត្រូវយកតម្លៃ១ម៉ឺនរៀល ចាប់ពីថ្ងៃទី០១ខែកក្កដា ឆ្នាំ២០១៤ ដើម្បីជួយសម្រាលការចំណាយដែលជាបន្ទុករបស់រដ្ឋាភិបាល។
យោងតាមប្រកាសរបស់ក្រសួងមហាផ្ទៃ ចុះខែកក្កដា២០០៧ ប្រជាពលរដ្ឋដែលអាចធ្វើអត្តសញ្ញាណប័ណ្ណបាន ត្រូវមានអាយុចាប់ពី១៥ឆ្នាំឡើងទៅ ហើយអត្តសញ្ញាណប័ណ្ណសញ្ជាតិខ្មែរមានសុពលភាពរយៈពេល១០ឆ្នាំ។ នៅពេលផុតសុពលភាព សាម៉ីខ្លួនត្រូវស្នើសុំធ្វើសាជាថ្មីឡើងវិញ៕
សូមសរសេរមកលោក ឡាន សាមាន តាមរយៈ samean@vodhotnews.com
លោក ឱម យិនទៀង ទៅណាហើយ ឥលូវធំក្លិនមិនស្រួលពីស្រុកបន្ទាយមាស ខេត្តកំពត លើការទារថ្លៃលើសក្នុងការធ្វើអត្តសញ្ញាណបណ្ណសញ្ជាតិខ្មែរ…!!?