Sat, 30 August 2014
ស៊ីវ ម៉េង
ភ្នំពេញប៉ុស្តិ៍
ផ្សារទំនើបដែលស្ថិតក្នុងអគារវឌ្ឍនៈដែលជាអគារខ្ពស់ជាងគេនៅរាជធានីភ្នំពេញនាពេលបច្ចុប្បន្ននេះ បានចាប់ផ្តើមបើកដំណើរការហើយកាលពីពេលថ្មីៗនេះ។
អ្នកស្រី ធីតា អាន អនុប្រធានប្រតិបត្តិនៃក្រុមហ៊ុន CBRE Cambodia បានប្រាប់ថា ផ្សារទំនើបនេះមានស្តង់លក់ផលិតផលចំនួន ៣០ ដោយរហូតមកទល់ពេលនេះមានអតិថិជនជាង ៩០ ភាគរយហើយដែលបានមកជួលស្តង់។ ផ្សារទំនើបនេះមានលក់សម្លៀកបំពាក់ ចំណីអាហារ និងរបស់របរប្រើប្រាស់ ជាច្រើនដែលសុទ្ធតែផលិតផលម៉ាកល្បីៗនាំចូលមកពីក្រៅប្រទេស។
អ្នកស្រីថ្លែងថា៖ «ផ្សារទំនើបនេះផ្តោតគោលដៅទៅលើអតិថិជនដែលមានប្រាក់ច្រើន ហេតុនេះស្តង់លក់ផលិតផលក្នុងផ្សារទំនើបនេះមិនមានច្រើនទេ។
អ្នកស្រីបន្ថែមថា៖«ផ្សារទំនើបនេះទទួលការចាប់អារម្មណ៍ច្រើនពីអតិថិជន ហើយខ្ញុំជឿថា វានឹងទទួលជោគជ័យ ព្រោះនៅភ្នំពេញមិនមានផ្សារទំនើបមានកម្រិតស្តង់ដារអន្តរជាតិច្រើនទេ។
ផ្សារទំនើបនេះគ្របដណ្តប់នៅជាន់ក្រោមដី ផ្ទាល់ដី និងជាន់ទី១។ ផ្សារខាងលើក៏មានរោងភាពយន្តផងដែរ ប៉ុន្តែមិនទាន់បើកដំណើរការទេ ដោយគ្រោងនឹងបើកដំណើរការនៅឆ្នាំ២០១៥ ខាងមុខ។
ទាក់ទងនឹងការិយាល័យជួលក្នុងអគារនេះអ្នកស្រី ធីតា បានឲ្យដឹងថា រហូតមកទល់ពេលនេះប្រមាណ ៣០ ភាគរយនៃផ្ទៃក្រឡាការិយាល័យទាំងមូលដែលត្រូវបានប្រើប្រាស់។ ការិយាល័យជួលក្នុងអគារនេះមានចាប់ពីជាន់ទី៣-២៣ ចំណែកចាប់ពីជាន់ទី២៤-៣៨ ជាទីតាំងរបស់សណ្ឋាគារលំដាប់ផ្កាយប្រាំឈ្មោះ Rosewood ដែលគ្រោងនឹងបើកដំណើរការនៅចុងឆ្នាំ២០១៥ ខាងមុខ។ ការិយាល័យក្នុងអគារនេះជួលក្នុងតម្លៃចាប់ពី ២៨-៣៨ ដុល្លារក្នុង១ម៉ែត្រការ៉េ អាស្រ័យលើកម្ពស់ជាន់នីមួយៗ។
អ្នកស្រីអះអាងថា៖ «វឌ្ឍនៈជាអគារបៃតងដែលបានគិតគូរជាចម្បងទៅលើគុណភាពរបស់អគារប្រព័ន្ធសុវត្ថិភាព និងគិតគូរដល់បរិស្ថានជាចម្បង»។
លោក គីម ហ៊ាង នាយកក្រុមហ៊ុនអចលនទ្រព្យ ខ្មែរ បានប្រាប់ថា អ្នកវិនិយោគសាងសង់អគារនេះហាក់មិនសូវមានគោលការណ៍ច្បាស់លាស់ និងមិនដឹងចង់ធ្វើអ្វីពិតប្រាកដទេ។ បើសង់សម្រាប់អគារការិយាល័យគួរសម្រាប់តែការិយាល័យជាការប្រសើរ តែបើចម្រុះគ្នាមានទាំងធនាគារ ការិយាល័យជួល សណ្ឋាគារ និងផ្សារទំនើបបែបនេះវាទៅជារឿងចាប់ឆាយដែលក្រុមហ៊ុនអន្តរជាតិធំៗពួកគេមិនសូវចាប់អារម្មណ៍បែបនេះទេ។
លោកបានថ្លែងថា៖ «ពេលបើកផ្សារទំនើប១០តែមានអ្នកទិញត្រឹម២០នាក់វាជាបញ្ហា ព្រោះយើងឃើញផ្សារទំនើប Aeon និងផ្សារសូរិយា ដែលមានលក់ទំនិញត្រឹមតម្លៃ១០ដុល្លារ ក៏នៅតែមិនឃើញមានអ្នកទិញច្រើនទេ ព្រោះកម្លាំងទិញរបស់យើងមិនទាន់ខ្លាំងទេ ដោយត្រូវរង់ចាំប្រហែលពី ៥ ទៅ ១០ ឆ្នាំទៀត»។
លោកបន្តថា៖«ការផ្តោតលើអតិថិជនជាពួកអភិជនទុកឲ្យអតិថិជនជាអភិជនជាអ្នកទៅផ្សារនេះចុះ ប៉ុន្តែជួនកាលពួកគេទៅទិញទំនិញនៅក្រៅប្រទេសដូចជា សិង្ហបុរី ផងដែរ»។
អគ្គនាយកក្រុមហ៊ុន ប៊ុណ្ណា រៀលធី គ្រុប លោក ស៊ឹង ប៊ុណ្ណាបានសម្តែងសុទិដ្ឋិនិយមជាងនេះ ដោយលោកមានប្រសាសន៍ថា ដោយសារវាជាផ្សារទំនើបដែលលក់ផលិតផលម៉ាកល្បីៗនិងផ្តោតទៅលើអតិថិជនជាក្រុមអភិជននោះ វាមិនមានអ្វីគួរឲ្យព្រួយបារម្ភនោះទេ ពីព្រោះអ្នកប្រើប្រាស់អគារនេះនៅជាន់ខាងលើភាគច្រើនសុទ្ធតែមានតម្រូវការផលិតផលអស់ទាំងនោះ។
លោកបន្ថែមថា ការបើកផ្សារទំនើបក្នុងអគារវឌ្ឍនៈ និងផ្សារ Aeon មិនមានផលប៉ះពាល់គ្នាទៅវិញទៅមកទេ៕
សំបើមទូងៗដូចស្គរប្រហោងក្នុង!!!!