ដោយ៖ ស៊ុន ណារិន
ថ្ងៃព្រហស្បតិ៍ ទី25 កញ្ញា 2014
http://vodhotnews.com
លោកនាយករដ្ឋមន្រ្តី ហ៊ុន សែន ជក់បារីក្នុងពេលធ្វើជាអធិបតីភាពក្នុងពិធីមួយកាលពីកន្លងទៅ(រូបថតដោយ AP)
លោកនាយករដ្ឋមន្ត្រី ហ៊ុន សែន នៅថ្ងៃព្រហស្បតិ៍នេះ ប្រកាសថាលោកអាចផ្តាច់ការជក់បារីបានហើយ ដែលនេះជាការតស៊ូជាមួយខ្លួនឯងជិត១៤ឆ្នាំមកហើយ ក្រោយពីមានការទទូចពីក្រុមគ្រួសារ។
ក្នុងពិធីចែកសញ្ញាបត្រដល់និស្សិតសាកលវិទ្យាចំរើនពហុបច្ចេកវិទ្យានៅកោះពេជ្រ លោកនាយករដ្ឋមន្ត្រី ថ្លែងថា លោកធ្លាប់បានសន្យាជាមួយគ្រួសារកាលពី១៤ឆ្នាំមុនថាលោកនឹងឈប់ជក់បារី នៅពេលដែលលោកមានចៅពរ។ប៉ុន្តែលោកថាការសន្យានោះមិនអាចធ្វើបាននៅពេលនោះទេ។លោកនាយករដ្ឋមន្ត្រីបន្តថា នៅថ្ងៃនេះលោកប្រកាសជាផ្លូវការថាលោកអាចឈប់ជក់បារីបានជាស្ថាពរហើយ។
លោកបញ្ជាក់ថា«…មួយឆ្នាំកន្លងផុតទៅបានខិតខំតស៊ូខ្លាំងណាស់ តស៊ូហ្នឹង អត់មានតស៊ូជាមួយធម្មជាតិ តស៊ូជាមួយអ្នកណា តស៊ូជាមួយខ្លួនឯង។សម្រេចជោគជ័យហើយ ប្រកាសថ្ងៃហ្នឹងហ្មង បានឈប់ជក់បារីជាស្ថាពរហើយ»។
លោកបន្តថា រហូតមកដល់ពេលនេះលោកធុំក្លិនបារីមិនបានទេពេលចេញមកខាងក្រៅផ្ទះ ហើយ លោកអាណិតភរិយា និងគ្រួសារដែលពីមុនតែងតែនៅជាមួយអ្នកជក់បារី។លោកនាយករដ្ឋមន្ត្រី ឲ្យដឹងទៀតថាលោកមិនបានប្រើសារជាតិជំនួយអ្វីនោះទេ គឺសំខាន់ការតស៊ូ តែម្តង។លោកថាឥឡូវលោកអាចនិយាយទំនាក់ទំនងជាមួយអ្នកដទៃបាន។
ក្រសួងសុខាភិបាល ធ្លាប់បានប្រកាសសារាចរស្តីពីវិធានការហាមការជក់ និងការបង្ហុយផ្សែងផលិតផលថ្នាំជក់នៅកន្លែងធ្វើការ និងតាមទីសាធារណៈ ដើម្បីការពារសុខុមាលភាពរបស់ប្រជាជន និងទប់ស្កាត់ការរងផ្សែងផលិតផលថ្នាំជក់ ដែលបង្កឲ្យមានហានិភ័យសុខភាពអ្នកនៅជុំវិញ និងបរិស្ថាន។
រដ្ឋមន្ត្រីក្រសួងសុខាភិបាល លោក ម៉ម ប៊ុនហេង ធ្លាប់ថ្លែងថាប្រជាពលរដ្ឋកម្ពុជាប្រមាណជា៣០នាក់ បានស្លាប់ដោយសារជំងឺទាក់ទងនឹងការជក់បារី ក្នុងមួយថ្ងៃ ហើយជិត១០០លានដុល្លារ ត្រូវបានប្រើសម្រាប់ទិញបារីជក់ក្នុង១ឆ្នាំ ព្រមទាំងចំណាយលើការព្យាបាលជំងឺមហារីកមួយករណី ត្រូវការថវិកាជាមធ្យម១ម៉ឺនដុល្លារ។ លោកបានអំពាវនាវឲ្យមានការផ្សព្វផ្សាយ និងយល់ដឹងឲ្យបានច្រើនពីផលប៉ះពាល់ ដើម្បីកាត់បន្ថយអត្រាមរណៈ បណ្តាលមកពីការជក់ និងស្រូបផ្សែងបារីនេះ។
របាយការណ៍របស់អង្គការសុខភាពពិភពលោកក្នុងឆ្នាំ២០១២ បង្ហាញថា អ្នកស្លាប់ដោយសារការប្រើប្រាស់ថ្នាំជក់នៅប្រទេសកម្ពុជា សរុប៩៦៦៩នាក់ ក្នុងនោះស្ត្រី៣២២៣នាក់ និងបុរស ៦៤៤៦នាក់៕
សរសេរមកកាន់លោក ស៊ុន ណារិន តាមរយៈsun_narin@vodhotnews.com
ឈប់ជក់ផឹកតែសវិញ!!!!