Tue, 21 October 2014
មាស សុខជា
ភ្នំពេញប៉ុស្តិ៍
ភ្នំពេញៈ ក្រុមការងាររបស់គណបក្សកាន់អំណាច និងគណបក្សប្រឆាំងបានបរាជ័យក្នុងការជជែកអំពីការជ្រើសអគ្គលេខាធិការនិងអគ្គលេខាធិការរងនៃគណៈកម្មាធិការជាតិរៀបចំការបោះឆ្នោត គឺខុសពីការរំពឹងដែលថានឹងឈានដល់ការបញ្ចប់ត្រឹមថ្ងៃចន្ទ។ ប៉ុន្តែ យ៉ាងណាការពិភាក្សាបនុ្តនឹងចាប់ផ្តើមនៅសប្តាហ៍ក្រោយ។
បន្ទាប់ពីការពិភាក្សាអស់២ម៉ោង ពាក់ព័ន្ធនឹងច្បាប់ស្តីពីការរៀបចំនិងការប្រព្រឹត្តទៅនៃគណៈកម្មាធិការជាតិរៀបចំការបោះឆ្នោតកាលពីម្សិលមិញនៅវិមានរដ្ឋសភា មេដឹកនាំក្រុមការងាររបស់គណបក្សប្រជាជនកម្ពុជាលោក ប៊ិន ឈិន និងមេដឹកនាំក្រុមការងារគណបក្សសង្គ្រោះជាតិ លោក គួយ ប៊ុនរឿន ប្រាប់អ្នកកាសែតថា ក្រុមការងារគណបក្សទាំងពីរនៅមិនទាន់ឯកភាពគ្នាអំពីការជ្រើសរើសអគ្គលេខាធិការនិងអគ្គលេខាធិការរងនៃគ.ជ.ប នៅឡើយ។ ក្រៅពីនេះគឺបានឯកភាពគ្នា ៩០ ភាគរយហើយ ហើយនៅថ្ងៃចន្ទសប្តាហ៍ក្រោយនឹងពិភាក្សាគ្នាបន្តទៀត។
លោក ប៊ិន ឈិន ថ្លែងថា៖ «អំពីអគ្គលេខាធិការ និងអគ្គលេខាធិការរង យើងមិនទាន់ឯកភាពគ្នាអំពីលក្ខណៈគុណសម្បត្តិនៃបេក្ខជន។ គណបក្សប្រជាជនកម្ពុជាទាមទារឲ្យមានអាយុ ៣០ឆ្នាំ ប៉ុន្តែ គណបក្សសង្គ្រោះជាតិតម្រូវឲ្យមានអាយុចាប់ពី ២៥ឆ្នាំឡើង»។
លោកបន្តថា៖ «អំពីសញ្ញាបត្រ គណបក្សប្រជាជនកម្ពុជាតម្រូវឲ្យបេក្ខជនត្រូវមានសញ្ញាបត្រនៅសាកលវិទ្យាល័យ រួមទាំងសញ្ញាបត្រច្បាប់ សេដ្ឋកិច្ច និងអក្សរសាស្រ្ត ឯគណបក្សសង្គ្រោះជាតិគ្រាន់តែនិយាយថា គ្រាន់តែមានសញ្ញាបត្រពីសាកលវិទ្យាល័យ»។
លោក ប៊ិន ឈិន បន្ថែមថា គណបក្សសង្គ្រោះជាតិបានស្នើថា បេក្ខភាពនៃអគ្គលេខាធិការនិងអគ្គលេខាធិការរងមិនចាំបាច់មានបទពិសោធពាក់ព័ន្ធនឹងការបោះឆ្នោតនិងសញ្ជាតិ ឯគណបក្សប្រជាជនកម្ពុជាតម្រូវថា បេក្ខជនត្រូវតែមានសញ្ជាតិខ្មែរ ហើយគណបក្សសង្គ្រោះជាតិនិយាយថា មិនចំាបាច់ឲ្យមានការតម្រូវបែបនេះទេ។
លោកអះអាងថា ច្បាប់ស្តីពី គ.ជ.បមាន៧ជំពូកនិង៦៦មាត្រា ហើយគ.ជ.ប ថ្មីមានអាណត្តិ៥ឆ្នាំដូច គ.ជ.ប ចាស់។
លោក គួយ ប៊ុនរឿន ថ្លែងថា៖ «ខ្ញុំចង់ឲ្យមានស្ថិរភាពនៅពេលការបោះឆ្នោតចប់ មិនចង់ឲ្យមានវិបត្តិដូចការបោះឆ្នោតលើកមុន នោះហើយជាមូលហេតុដែលយើងត្រូវការនិយាយឲ្យលម្អិតជាងនេះ។ គ្មានបញ្ហាទេ ពីព្រោះ យើងមានបញ្ហាជាច្រើនដើម្បីជ្រើសរើសអគ្គលេខាធិការនិងអគ្គលេខាធិការរងទៅតាមលទ្ធិប្រជាធិបតេយ្យ និងធានាគុណភាពនិងប្រសិទ្ធភាពនៃបុគ្គលដែលត្រូវបានតែងតាំង»។
លោក គល់ បញ្ញា នាយកប្រតិបត្តិនៅអង្គការឃ្លាំមើលការបោះឆ្នោត ខុមហ្វ្រែល បានថ្លែងថា ការមិនឯកភាពគ្នារវាងគណបក្សប្រជាជនកម្ពុជា និងគណបក្សសង្គ្រោះជាតិ ពាក់ព័ន្ធនឹងអាយុនិងបទពិសោធអំពីបេក្ខភាពនៃអគ្គលេខាធិការនិងអគ្គលេខាធិការរងនិងអាណត្តិរបស់គ.ជ.ប គឺត្រូវតែកំណត់ឲ្យច្បាស់លាស់។
លោកថ្លែងបន្តថា៖ «យើងត្រូវតែកំណត់អាយុ។ ប្រសិនបើគាត់លើស៦០ឆ្នាំ មិនយក។ គ.ជ.ប ចាស់ គណបក្សប្រជាជនកម្ពុជាបានយកមនុស្សដដែលដើម្បីចូលក្នុងគ.ជ.បថ្មី។ យើងត្រូវតែកំណត់ឲ្យច្បាស់ពីចំណុចនេះ ហើយការបើកចំហក្នុងការជ្រើសរើសនេះគឺល្អ»។
ពាក់ព័ន្ធនឹងកំណែទម្រង់ការបោះឆ្នោត រដ្ឋាភិបាលជប៉ុនក៏បានបញ្ជូនក្រុមតាមដានមកកម្ពុជាផងដែរពីថ្ងៃទី២១ ដល់២២ តុលា ពាក់ព័ន្ធនឹងតម្រូវការឲ្យមានការសិក្សាវាស់ស្ទង់ការអនុវត្តកាលពីខែឧសភា ឆ្នាំ២០១៤ សម្រាប់កំណែទម្រង់បោះឆ្នោតក្នុងប្រទេសកម្ពុជា។ នេះបើតាមសេចក្តីប្រកាសព័ត៌-មានកាលម្សិលមិញរបស់ស្ថានទូតជប៉ុនប្រចាំកម្ពុជា។
សេចក្តីប្រកាសព័ត៌មាននេះក៏បានបង្ហាញឈ្មោះ Tadayuki MIY ASHITA នាយកផ្នែកធ្វើផែនការជំនួយនៃការិយាល័យសហប្រតិបត្តិការអន្តរជាតិ និងក្រសួងការបរទេសជប៉ុននិងសមាជិក៤រូប មកពីអង្គការ JICA។
ស្ថានទូតជប៉ុនក៏បានឲ្យដឹងដែរថា ក្នុងអំឡុងការស្នាក់នៅក្នុងប្រទេសកម្ពុជា ក្រុមនេះនឹងធ្វើបទបង្ហាញស្តីពីលទ្ធផលនៃការសិក្សាវាស់ស្ទង់កាលខែឧសភាទៅក្រុមការងារចម្រុះនៃគណបក្សប្រជាជននិងគណបក្សប្រឆាំង បានពិភាក្សាអំពីលទ្ធភាពនៃកិច្ចសហប្រតិបត្តិការនាពេលអនាគត អំពីកំណែទម្រង់ការបោះឆ្នោតក្នុងប្រទេសកម្ពុជាជាមួយភាគីពាក់ព័ន្ធ រួមទាំងស្ថាប័នពាក់ព័ន្ធ ដៃគូអភិវឌ្ឍន៍បរទេសនិងសង្គមស៊ីវិល។
អគ្គលេខាធិការគ.ជ.ប លោក ទេព នីថា បានឲ្យដឹងថា គ.ជ.បបានបិទការចុះឈ្មោះអ្នកបោះឆ្នោត ឆ្នាំ២០១៤ កាលពីម្សិលមិញ បន្ទាប់ពីចុះឈ្មោះអ្នកបោះឆ្នោតថ្មីឆ្នាំនេះបាន១៤៨ ៥៩២នាក់។ជាមួយនោះ គ.ជ.ប ក៏បានលុបឈ្មោះអ្នកបោះឆ្នោត៥៩ ៦៥៦នាក់ពីបញ្ជីផងដែរ ហើយនាពេលខាងមុខនេះ ក៏គ្រោងលុបឈ្មោះជាង១០ម៉ឺននាក់ទៀតចេញពីបញ្ជី ដោយសារការស្លាប់ ផ្លាស់លំនៅ និងជាប់ពន្ធនាគារដែរ៕ PS
មន្ត្រីថ្នាក់ដឹកនាំជាតិ ទុកមាត់ដូចចោរ
How much Nec will cost to the Country???