Sat, 1 November 2014
សេង ធី
ភ្នំពេញប៉ុស្តិ៍
ដោយក្តីស្រមៃចង់ដើរហើរដោយសេរីភាព និងស្រឡាញ់ការថតរូប រួមផ្សំនឹងការធុញថប់ការងារដែលនៅតែមួយកន្លែងរយៈពេលជាង៧ឆ្នាំមកហើយនោះ ចុងក្រោយស្ថាបនិកលោក ត្រាំ លីរតនៈ បានលាឈប់ពីការងារជាមន្ត្រីទទួលបន្ទុកសារព័ត៌មានម្នាក់ ក្នុងក្រសួងការបរទេស មកបើកក្រុមហ៊ុន 1g1 ដែលផ្តល់សេវាកម្មថតរូប និងវីដេអូ ដោយប្រើកាមេរ៉ា Drone តាំងពីដើមឆ្នាំ២០១៣មក។
លោក ត្រាំ លីរតនៈ ក្នុងវ័យ៣០ឆ្នាំ លេងស្ទីលទុកពុកមាត់ ពុកចង្កា សក់រួញអង្គាដី បានប្រាប់ថា មុនពេលលោកឈានចូលក្នុងការបង្កើតមុខរបរខ្លួនឯង មានមតិរិះគន់ពីបងប្អូន ញាតិមិត្ត នៅស្រុកខ្មែរថា លោកបោះបង់កន្លែងការងារល្អ ទៅប្រថុយថាននឹងការងារថតរូបទៅវិញ។កាមេរ៉ា Drone ជាបច្ចេកវិទ្យាថ្មីនៃការថតរូបពីលើវេហាដោយប្រើឧបករណ៍ Drone ហោះពីលើដោយភ្ជាប់នឹងកាមេរ៉ា(Go-pro) ដែលបង្ហាញរូបភ្លឺច្បាស់ (FULL HD)ដែលបញ្ជាដោយឧបករណ៍បញ្ជាពីចម្ងាយ(Wireless Remote control)។លោកលីរតនៈ បានឲ្យដឹងថា ឧបករណ៍នេះ អាចហោះបានរយៈពេល ១០ ទៅ១៥នាទី ដោយប្រើប្រាស់ថ្មពិសេសរបស់វា។ កាមេរ៉ា Drone ខ្លះ អាចហោះបានរយៈកម្ពស់ជាង៥០០ម៉ែត្រ ហើយមើលឃើញចម្ងាយប្រមាណជាង៦០០ម៉ែត្រ។ ឧបករណ៍នោះមានតម្លៃចាប់ពីជាង១០០០ ដុល្លារ ទៅដល់ជាង២០០០ដុល្លារ។
ភាគច្រើន គេប្រើកាមេរ៉ាប្រភេទនេះដើម្បីថតយកទេសភាពពីលើអាកាស បង្ហាញពីការកសាងសំណង់អគារ ស្ពាន ថ្នល់ ភ្នំ សមុទ្រ ទន្លេ ទីកន្លែងកម្សាន្ត កន្លែងប្រវត្តិសាស្ត្រ ឬថតក្នុងខ្សែភាពយន្ត ឬវីដេអូមុនពេលរៀបការ (Pre-wedding)ជាដើម។ គេមិនសូវឃើញមានអ្នកថតកាមេរ៉ាប្រភេទនេះច្រើនទេនៅក្នុងប្រទេសកម្ពុជា។ តាមការអះអាងរបស់ លោក លីរតនៈ លោកគឺជាម្ចាស់ក្រុមហ៊ុនខ្មែរម្នាក់ដែលប្រើកាមេរ៉ា Drone ក្នុងសេវាកម្មថតរូប និងវីដេអូលើកដំបូងគេក្នុងប្រទេសកម្ពុជា។
លោក ត្រាំ លីរតនៈ ប្រាប់ថា៖ «Drone អាចបង្ហាញរូបភាពពីលើអាកាសដ៏ស្រស់ស្អាត និងមានវិសាលភាពធំទូលាយ ធ្វើឲ្យអ្នកទស្សនាមានអារម្មណ៍ជាប់ចិត្ត និងអាចទទួលព័ត៌មានបានជាក់ស្តែង ជាជាងរូបថតដែលយើងថតនៅនឹងកន្លែង ជាប់នឹងដៃរបស់យើង»។ លោក លីរតនៈ បន្ថែមថា៖ «ជាក់ស្តែងការបង្ហាញរូបភាពពីលើអាកាស ធ្វើឲ្យអ្នកទស្សនាមានអារម្មណ៍រីករាយ និងពេញដោយសេរីភាពបំផុត»។
មកទល់នឹងពេលនេះ សេវាកម្មរបស់ 1g1 ហាក់មានភាពមមាញឹក និងទទួលបានការកោតសរសើរគួរឲ្យកត់សម្គាល់ផងដែរ។ ជាក់ស្តែង កន្លងមក ក្រុមហ៊ុន 1g1 របស់លោកត្រាំ លីរតនៈ បានទទួលថតរូប និងវីដេអូបង្ហាញពីការសាងសង់ស្ពាន ថ្នល់ របស់រាជរដ្ឋាភិបាល ហើយបានចូលរួមផលិតជាវីដេអូឯកសារនានាជាច្រើន។ ក្រៅពីនេះ ក៏មានក្រុមហ៊ុនឯកជន និងភ្ញៀវមួយចំនួនទៀតទទួលយកសេវាកម្មរបស់1g1 ទៅថតក្នុងការងារបង្ហាញពីកម្មវិធីរបស់ខ្លួន ដូចជាការដាក់តាំងបង្ហាញរថយន្ត និងការរៀបចំវីដេអូមុនពេលរៀបការ(Pre-wedding)ជាដើម។
បើតាមលោករតនៈ ការគិតថ្លៃក្នុងការថតដោយប្រើកាមេរ៉ា Drone អាស្រ័យលើប្រភេទឯកសារដែលអតិថិជនចង់បាន។ លោកថា៖ «ជាលក្ខណៈរូបភាព ឬវីដេអូធម្មតាដែលជាឯកសារកម្សាន្តផ្ទាល់ មិនសម្រាប់ពាណិជ្ជកម្ម យើងគិតថ្លៃចាប់ពី ១៥០ដុល្លារ ក្នុងការហោះថតមួយដង ហើយបើហោះច្រើនដងដោយប្រើអស់ថាមពលថ្មច្រើនគ្រាប់ យើងបញ្ចុះតម្លៃតាមហ្នឹង»។ លោក បន្តថា៖ «បើឯកសារនោះប្រើសម្រាប់ពាណិជ្ជកម្ម ខ្ញុំអាចគិតថ្លៃចាប់ពី ២០០ ទៅ៣០០ដុល្លារ ក្នុងការហោះថតម្តង ឬអស់ថាមពលថ្មមួយគ្រាប់»។
រៀងរាល់ខែលោក រតនៈ ទទួលបានអតិថិជនចាប់ពី ៣នាក់ រហូតដល់៣០នាក់ ហើយតែងតែបានដើរកម្សាន្តថតរូប តាមបណ្តាប្រទេសជាច្រើនដូចអ្វីដែលលោកចូលចិត្ត និងរំពឹងទុកមុន នៅពេលបើកមុខរបរថតរូបនេះ។ ទាក់ទងនឹងចំណូលដែលរកបាន លោក ត្រាំ លីរតនៈ ប្រាប់ថា៖ «វាមិនទៀងទេ ព្រោះអតិថិជនមានច្រើន មានតិចតាមខែនីមួយៗ ក៏ប៉ុន្តែខ្ញុំអាចរកបានច្រើនជាងកាលធ្វើការក្នុងការិយាល័យ ហើយសប្បាយចិត្តនូវអ្វីដែលខ្ញុំធ្វើ មិនតែប៉ុណ្ណោះគឺពេញដោយសេរីភាព»។
លោកលីរតនៈ បានទទួលស្គាល់ថា សម្រាប់ការបើកមុខជំនួញមួយដោយខ្លួនឯង គឺមិនមែនជាការងាយស្រួលនោះទេ។ លោកបន្តពន្យល់ថា បើយើងធ្វើការឲ្យគេ យើងមិនចាំបាច់បារម្ភអីច្រើនទេ គ្រាន់តែធ្វើការងារតាមជំនាញរបស់យើងឲ្យច្បាស់ទៅ ប៉ុន្តែ បើកជំនួញខ្លួនឯង យើងត្រូវមើលឲ្យគ្រប់ជ្រុងជ្រោយ និងចំណាយពេលវេលាជាច្រើនដើម្បីដំណើរការជំនួញឲ្យជោគជ័យ។ លោកថា ជួនកាល ពេលវេលានៅជាមួយគ្រួសារក៏មិនសូវមានដែរ។
លោក លីរតនៈ បានចែករំលែកគន្លឹះបីយ៉ាងក្នុងការគ្រប់គ្រងមុខជំនួញរបស់ខ្លួន ថា៖ «ទី១ តិច ឬច្រើនត្រូវចេះបច្ចេកទេសប្រើប្រាស់កាមេរ៉ា Drone ឲ្យបានគួរសម។ ទី២ ត្រូវបែងចែក និងគ្រប់គ្រងពេលវេលាឲ្យត្រឹមត្រូវ ហើយសម្រេចចិត្តលើការងារបន្ទាន់ ឬសំខាន់ឲ្យបានច្បាស់។ និងទី៣ ត្រូវចេះគ្រប់គ្រង មើលការខុសត្រូវលើធនធាន ទាំងសម្ភារ និងមនុស្សដែលជួយបំរើការឲ្យយើង ឲ្យពួកគាត់មានភាពសិ្នទ្ធស្នាល និងស្រឡាញ់ការងាររបស់គេ»។
ក្នុងរយៈពេល ៣ ឬ៥ឆ្នាំខាងមុខ លោក ត្រាំ លីរតនៈ មានគោលបំណងផលិតវីដេអូបទចម្រៀង និងខ្សែភាពយន្តដោយប្រើប្រាស់ កាមេរ៉ា Drone ដែលមានស្តង់ដារអន្តរជាតិ។ លោក បានផ្តាំផ្ញើដល់យុវជនជំនាន់ក្រោយឲ្យហ៊ានធ្វើអ្វីដែលខ្លួនស្រឡាញ់។ លោកបានពោលថា៖ «យើងមិនត្រូវខ្លាចនឹងការបើករបរថ្មីនោះទេ បើទោះគ្មានដើមទុនគ្រប់គ្រាន់ក៏ដោយ បើអ្នកស្រឡាញ់ និងមានទំនុកចិត្តហើយត្រូវតែចាប់ផ្តើម បើទោះជាត្រូវខ្ចីដើមគេមុនដំបូងក៏ដោយ»៕
wow my teacher MR Green :D