ដោយ៖ ខាន់ លក្ខិណា
ថ្ងៃសុក្រ ទី14 វិច្ឆិកា 2014
http://vodhotnews.com
មើលរូបភាពបន្ថែម
តំណាងគណៈកម្មការនៃគណៈកម្មការទី១០ និងទី១នៃរដ្ឋសភា ចេញមកទទួលយកញ្ញតិរបស់ប្រជាពលរដ្ឋ នៅព្រឹកថ្ងៃសុក្រនេះ (រូបភាព៖ ណាត សុភាព)
តំណាងគណៈកម្មការម្នាក់នៃគណៈកម្មការទី១០ និងទី១ នៃរដ្ឋសភា ទទួលយកញ្ញតិរបស់ ប្រជាពលរដ្ឋ មានគ្នាជាង២០០នាក់ មកពីសហគមន៍បឹងកក់ និងសហគមន៍ ជាច្រើនទៀត ដែលទាមទារឲ្យមាន ការដោះលែងតំណាង របស់ពួកគាត់ទាំង១១នាក់ ដែលបានឃុំខ្លួន នៅពន្ធនាគារព្រៃស ឲ្យមានសេរីភាព ឡើងវិញ ដោយសន្យាថានឹង យកទៅធ្វើការ ពិចារណា ។
ញ្ញតិរបស់អ្នកភូមិបឹងកក់ និងសហគមន៍ជាច្រើនទៀតនេះ ក៏បានទាមទារឲ្យមានកោះហៅរដ្ឋមន្ត្រីក្រសួងយុត្តិធម៌មកធ្វើការចោទសួរ អំពីវិធានការរបស់ប្រព័ន្ធយុត្តិធម៌នៅកម្ពុជា ដែលឈានទៅដល់ការចាប់ខ្លួនសកម្មជនដីធ្លី ក្នុងករណីនៃការតវ៉ាដែលពួកគេអះអាងថាត្រូវបានធ្វើឡើងតាមលក្ខណៈអហិង្សា និងតាមគោលការណ៍ប្រជាធិបតេយ្យ ។
សូមជម្រាបថា មនុស្សដែលត្រូវបានយកទៅឃុំខ្លួននៅពន្ធនាគារព្រៃសនោះ មានចំនួន១១ រូប ក្នុងនោះមានព្រះសង្ឃ ១ អង្គ និង អ្នកស្រីទេពវនី្ន ដែលជាជ័យលាភីនៃពានរង្វាន់ស្ត្រីឆ្នើមនៃភាពជាអ្នកដឹកនាំអន្តរជាតិពីសហរដ្ឋអាមេរិក អ៊ឺរ៉ុប និងអាស៊ី ក៏ត្រូវបានជាប់ឃុំនៅពន្ធនាគារព្រៃសនោះផងដែរ ។
អ្នកទាំង១០នាក់និងព្រះសង្ឃ១អង្គសុទ្ធតែត្រូវបានកាត់ទោសម្នាក់ៗ១ឆ្នាំ និង ពិន័យជា២លានរៀលក្នុង បទបង្កការកកស្ទះចរាចរណ៍ និងប្រឆាំងរាជការសាធារណៈ ។
ក្រុមអង្គការសង្គមស៊ីវិល និង បក្សប្រឆាំងបានហៅវិធានការរបស់ប្រព័ន្ធតុលាការនៅកម្ពុជាបែបនេះ ថាជាផ្នែកមួយកំពុងបំពានសិទ្ធិ សេរីភាព របស់ប្រជាជនកម្ពុជា យ៉ាងខ្លាំងដែលត្រូវបានធានាដោយរដ្ឋធម្មនុញ្ញ និងច្បាប់អន្តរជាតិទៀតផង តែគណបក្សប្រជាជនអះអាងថា ជាចំណាត់ការតាមផ្លូវច្បាប់របស់ស្ថាប័នមានសមត្ថកិច្ច ក្នុងសំណុំរឿងពាក់ព័ន្ធនឹងអំពើប្រព្រឹត្តបទល្មើសធ្ងន់ធ្ងរ ៕
ប្រជាពលរដ្ឋប្រមូលផ្ដុំនៅមុខរដ្ឋសភា ដើម្បីដាក់ញត្តិ នៅព្រឹកថ្ងៃសុក្រនេះ (រូបភាព៖ ណាត សុភាព)
សូមសរសេរមកកញ្ញា ខាន់ លក្ខិណា តាមរយៈ khanleakhen@vodhotnews.com
… . . ក្រសួង យុត្តិធម៏ ឬ ក្រសួង អយុត្តិធម៏ ?
,, .. ចាំ មើល តើគាត់ ជាមនុស្ស ប្រភេទ ណា ?