Tue, 18 November 2014
ឆាយ ច័ន្ទនីដា
ភ្នំពេញប៉ុស្តិ៍
ភ្នំពេញៈ អាជ្ញាធររាជធានីបានដោះលែងបុរសបួននាក់ ដែលជាកម្មករសំណង់សាងសង់អគារផ្ទះល្វែង របស់លោកស្រី ស៊ុយ សុផាន ប្រធានក្រុមហ៊ុន ផានអ៊ីម៉ិច ជាក្រុមហ៊ុនដែលមានជម្លោះដីធ្លីដ៏រ៉ាំរ៉ៃ និងក្តៅគគុកជាមួយប្រជាពលរដ្ឋនៅសហគមន៍បុរីកីឡា ក្រោយពីបានចុះផ្អាកការសាងសង់ ហើយតុលាការបានចេញដីការក្សាការពារ ដោយសារសំណង់នេះ មិនបានសុំច្បាប់អនុញ្ញាត សង់ចូលដីចំណីផ្លូវនិងដីអ្នកដទៃ។
លោក ប៉ាង លីដា អភិបាលរង ខណ្ឌទួលគោក បានឲ្យដឹងកាលពីម្សិលមិញថា បុរសបួននាក់ជាកម្មករសំណង់ ត្រូវបានឃាត់ខ្លួនមកធ្វើការអប់រំណែនាំ កាលពីថ្ងៃអាទិត្យនៅពេលសមត្ថកិច្ចអាជ្ញាធរ ខណ្ឌទួលគោក ចុះហាមឃាត់ការបន្តសាងសង់សំណង់ផ្ទះល្វែងលើដីឡូត៍នៅផ្លូវលេខ ៦១៤ ក្បែរផ្សារទួលគោក ក្នុង ខណ្ឌទួលគោក ដោយសារសំណង់នេះ ពុំមានលិខិតអនុញ្ញាតឲ្យសាងសង់។ លោកថ្លែងថា៖ «យើងគ្រាន់តែណែនាំទេព្រោះគេជាកម្មករ។ យើងសួរថា មានដឹងថា សំណង់នេះ គេហាមឃាត់មិនឲ្យសង់ទេ? ពួកគេអត់បានដឹងទេ។ យើងឲ្យទៅផ្ទះវិញហើយ»។
លោកអភិបាលរងខណ្ឌ ក៏បានឲ្យដឹងផងដែរថា សំណង់របស់លោកស្រី ស៊ុយ សុផាន នេះ ក៏ត្រូវបានសាលាដំបូងរាជធានីភ្នំពេញ ចេញដីការក្សាការពារមិនឲ្យសាងសង់ផងដែរ។
តាមដីកា ចុះថ្ងៃ ២៨ តុលា របស់លោកចៅក្រម ស្វាយ តុញ បានបញ្ជាក់ថា សំណង់នេះបាន «សាងសង់ចូលមកផ្លូវលេខ ៦១៤ ហើយជាក់ស្តែងបើតាមការវាស់របស់ការិយាល័យជំនាញ គឺមានផលប៉ះពាល់ដល់ផ្ទះអ្នកដទៃ និងផ្លូវសាធារណៈ»។
លោក ប៉ាង លីដា មិនបានឲ្យដឹងថា តើអាជ្ញាធរនឹងធ្វើយ៉ាងណា ជាមួយសំណង់នេះតទៅទៀតនោះទេ ដោយគ្រាន់តែថា «ផ្អាកការសាងសង់សិន»។
លោក ជា ស្រ៊ុន ប្រធានមន្ទីររៀបចំដែនដីនគរូបនីយកម្ម សំណង់ និងសុរិយោដីដែលបានចេញលិខិតជម្រាបជូនសាលា ខណ្ឌទួលគោក ឲ្យធ្វើការផ្អាកការសាងសង់ផ្ទះល្វែងលោកស្រី ស៊ុយ សុផាន បានបដិសេធផ្តល់អធិប្បាយ ដោយលោកឲ្យទៅសួរខាង ខណ្ឌទួលគោក។
លោកស្រី ស៊ុយ សុផាន ប្រធានក្រុមហ៊ុន ផានអ៊ីម៉ិច មិនអាចទាក់ទងសុំអធិប្បាយបានទេ កាលពីម្សិលមិញ។
នៅមួយរយៈពេលចុងក្រោយនេះករណីរបស់លោកស្រី ស៊ុយ សុផាន ត្រូវបានលើកឡើងជាសាធារណៈ។ កាលពីថ្ងៃ ទី១៦ តុលា លោកស្រី សុផាន ត្រូវបានគណៈកម្មការ ទី១០ គឺគណៈកម្មការ អង្កេត បោសសម្អាត និងប្រឆាំងអំពើពុករលួយនៃរដ្ឋសភា ដឹកនាំដោយតំណាងរាស្ត្រគណបក្សប្រឆាំងលោក ហូរ វ៉ាន់ បានកោះហៅទៅបំភ្លឺ លើរឿងជម្លោះដីធ្លីដ៏រ៉ាំរ៉ៃ នៅតំបន់បុរីកីឡា ក្នុង ខណ្ឌ៧មករា ដែលលោកស្រីត្រូវបានប្រជាពលរដ្ឋរងគ្រោះចោទថា មិនបានបំពេញទៅតាមកិច្ចសន្យាសាងសង់អគារឲ្យគ្រប់ចំនួន ១០ ចែកជូនពលរដ្ឋដែលកំពុងរស់នៅទីនោះជាថ្នូរនឹងអ្វីដែលក្រុមហ៊ុនទទួលបានសិទ្ធិក្នុងការអភិវឌ្ឍ លើដីនៅសល់ចំនួន ២,៦ ហិកតា។ ដោយសារតែក្រុមហ៊ុននេះសាងសង់តែ ៨ អគារ ទើបធ្វើឲ្យកើតមានជម្លោះរហូតមកដល់សព្វថ្ងៃនេះ។
នៅពេលនោះលោក ហូរ វ៉ាន់ បានព្រមានថា ប្រសិនបើក្រុមហ៊ុននេះ មិនព្រមសាងសង់អគារបន្ថែមពីរទៀត ឲ្យបានគ្រប់ចំនួនទៅតាមកិច្ចសន្យា ចែកជូនប្រជាពលរដ្ឋ ដើម្បីបញ្ចប់ជម្លោះ នោះរដ្ឋសភានឹងស្នើទៅរដ្ឋាភិបាលឲ្យដកអាជ្ញាប័ណ្ណពីក្រុមហ៊ុននេះ។ ប៉ុន្តែរហូតមកទល់ពេលនេះ គេមិនទាន់ឃើញមានចំណាត់ការអ្វីពីរដ្ឋសភានៅឡើយទេ។
កាលពី ខែកក្កដា ក្រសួងសេដ្ឋកិច្ច និងហិរញ្ញវត្ថុ បានស្នើឲ្យធនាគារជាតិនៃកម្ពុជា ធ្វើការបង្កកគណនីលោកស្រី ស៊ុយ សុផាន ដោយសារលោកស្រី មិនព្រមសងលុយរដ្ឋ ក្រោយពីបានទិញអគាររដ្ឋមួយចំនួន។ ស្រ្តីម្ចាស់ក្រុមហ៊ុន ផាន អ៊ីម៉ិច រូបនេះ ក៏ត្រូវបានតុលាការបង្គាប់ឲ្យបង់សំណង ២,៧ លានដុល្លារ ទៅឲ្យក្រុមហ៊ុនកូរ៉េមួយឈ្មោះក្រុមហ៊ុន Landevel ដែលលោកស្រីបានព្រមព្រៀងលក់ដីនៅតំបន់បុរីកីឡា ជាតំបន់ដែលគេបណ្តេញប្រជាជនចេញដោយហិង្សាផងដែរ ប៉ុន្តែមិនទាន់បានបង់សងនៅឡើយ ដោយសារលោកស្រីប្តឹងទៅសាលាឧទ្ធរណ៍៕
មានងារជាឧកញ៉ាតែធ្វើអ្វី ច្រើនរំលោភច្បាប់ ពេលណាទើបបានស្គាល់ជាតិនីតិរដ្ឋនឹងគេ លោកអើយ លោក !!!!!!!!!!