ដោយ៖ អុឹង ប៊ុនថន
ថ្ងៃព្រហស្បតិ៍ ទី20 វិច្ឆិកា 2014
http://vodhotnews.com
ស្តាប់សំឡេង៖ |
ចម្លងទុក |
មើលរូបភាពបន្ថែម
បញ្ជីឈ្មោះបោះឆ្នោត ដែលបិទជាសាធារណៈនៅតាមការិយាល័យឃុំ/សង្កាត់ នីមួយ (រូបថត៖ ម៉េង)
សម្ព័ន្ធកំណែទម្រង់ការបោះឆ្នោតដែលជាបណ្តុំអង្គការសង្គមស៊ីវិល ស្នើឲ្យគណបក្សជាប់ឆ្នោតទាំងពីរប្រើប្រាស់ប្រព័ន្ធចុះឈ្មោះបោះឆ្នោតតាមបែបទំនើបកម្ម ដោយពួកគេអះអាងថា ងាយស្រួលជាងប្រព័ន្ធចុះឈ្មោះបោះឆ្នោតដែល គ.ជ.ប កំពុងប្រើសព្វថ្ងៃនេះ ។
នៅក្នុងសិក្ខាសាលាមួយ នៅព្រឹកថ្ងៃព្រហស្បតិ៍នេះ លោក គល់ បញ្ញា នាយកអង្គការខុមហ្វ្រែលដែលជាសមាជិកនៃសម្ព័ន្ធនេះ ពន្យល់ថា ប្រព័ន្ធថ្មីតាមបែបទំនើបកម្មនេះ គឺមិនអាចលុបឈ្មោះអ្នកបោះ ឆ្នោតបានដោយគ្មានការឯកភាពពីសាម៉ីខ្លួននោះទេ ។ លោកថា ប្រព័ន្ធនេះមិនចាំបាច់ចំណាយពេលទៅពិនិត្យឈ្មោះជារៀងរាល់ឆ្នាំ និងគ្រាន់តែកាន់ប័ណ្ណបោះឆ្នោតមួយអាចបោះឆ្នោតបាន ។ លោកបញ្ជាក់ថា «គោលដៅដែលយើងធ្វើនេះ គឺយើងឈរលើមូលដ្ឋាននៃសមាសភាព របស់ប្រទេសកម្ពុជាយើងផ្ទាល់ យើងមានការដកស្រង់បច្ចេកវិទ្យាមួយចំនួនពីខាងក្រៅផងដែរ ហើយយើងបានសហការជាមួយអ្នកជំនាញការខាងបច្ចេកវិទ្យាផងដែរ ដែលមានអ្នកមានចំណេះដឹងដែលរៀនសូត្រពីប្រទេសគេ ហើយក្រុមហ៊ុនផ្តល់ទីប្រឹក្សា យើងបានសហការដើម្បីធ្វើជាកម្មវិធីប្រព័ន្ធចុះឈ្មោះបោះឆ្នោតនេះ» ។
ប្រធានក្រុមការងាររៀបចំកំណែទម្រង់ការបោះឆ្នោតនៃគណបក្សសង្គ្រោះជាតិ លោក គួយ ប៊ុនរឿន ដែលចូលរួមសិក្ខាសាលានេះ ប្រាប់អ្នកសារព័ត៌មានថា លោកគាំទ្រចំពោះប្រព័ន្ធថ្មីសម្រាប់ចុះឈ្មោះអ្នកបោះឆ្នោតនេះ ។ លោកអះអាងថា នឹងលើកបញ្ហានេះទៅពិភាក្សា ជាមួយគណបក្សប្រជាជនកម្ពុជាបន្តទៀត ។ លោកថា «យើងឃើញថាជាប្រព័ន្ធមួយទំនើប ហើយទំនើបហ្នឹងវាមិនមានអ្វីភ្ញាក់ផ្អើលទេ ប្រទេសដែលគេរៀបចំការបោះឆ្នោតកន្លងមក នៅក្នុងអាស៊ីក្តី នៅអឺរ៉ុបក្តី នៅសហរដ្ឋអាមេរិកក្តី ហើយជាពិសេសនៅប្រទេសជប៉ុន ដែលមានបំណងគម្រោងក្នុងការជួយក្នុងការកំណែទម្រង់ការបោះឆ្នោតនេះ ក៏គេបានអនុវត្តដូចគ្នាអ៊ីចឹងដែរ ។ អ៊ីចឹងហើយបានន័យថា មនុស្សម្នាក់វាត្រូវមានលេខកូដសំគាល់ម្នាក់ ដូច្នេះវាមិនមានស្អីដែលធ្វើឲ្យមានការលំបាកស្មុគស្មាញទេ ហើយក៏យើងបាត់ភាពមន្ទិលសង្ស័យ នៃការលួចបន្លំ ឬមានឈ្មោះស្ទួននៅក្នុងបញ្ជីបោះឆ្នោតហ្នឹង» ។
VOD បានទាក់ទងប្រធានក្រុមការងាររៀបចំកំណែទម្រង់ការបោះឆ្នោត នៃគណបក្សប្រជាជនកម្ពុជា លោក ប៊ិន ឈិន តែទូរសព្ទមិនមានអ្នកទទួល ។
សម្រាប់ប្រធាននាយកដ្ឋានប្រតិបត្តិនៃ គ.ជ.ប លោក ហ៊ឺ រ៉ុង យល់ថា ប្រព័ន្ធចុះឈ្មោះបោះឆ្នោតថ្មីមិនទាន់ទុកចិត្តបាននោះទេ ដូចជា ការចុះឈ្មោះដោយមិនតម្រូវឲ្យដាក់អាស័យដ្ឋានអ្នកបោះឆ្នោត និងការដាក់អត្តលេខសំគាល់អ្នកបោះឆ្នោត ។ លោកបញ្ជាក់ថា «លេខសំគាល់ គឺស្គាល់សម្រាប់តែអ្នកម្ចាស់ខ្លួនគាត់ទេ ប៉ុន្តែក្នុងករណីម្ចាស់ខ្លួនគាត់ស្លាប់បាត់ អ៊ីចឹងអត់មានអ្នកណាស្គាល់លេខសំគាល់នោះទេ បើអ៊ីចឹងត្រូវការលុបឈ្មោះគាត់ គឺជាបញ្ហាលំបាកណាស់ ហើយលេខសំគាល់នេះ បើសិនជាឧបមាថាគាត់ចំណាក់ស្រុកទៅធ្វើការនៅក្រៅប្រទេស ហើយយើងត្រូវលុបឈ្មោះគាត់ ក៏អត់មានអ្នកណាអាចស្គាល់ដែរ អ៊ីចឹងហើយដែលជាបញ្ហាមួយលំបាកណាស់ អ៊ីចឹងបញ្ហាសំខាន់បំផុតដែលខ្ញុំឃើញភាពមិនត្រឹមត្រូវនោះ គឺអត់មានអាស័យដ្ឋានច្បាស់លាស់របស់អ្នកបោះឆ្នោត ហើយ គ.ជ.ប ទាមទារសំខាន់ណាស់ បញ្ហារឿងអាស័យដ្ឋានរបស់អ្នកបោះឆ្នោតមួយៗនោះ ព្រោះថាបើយើងចង់ប័ណ្ណព័ត៌មានដល់គាត់ ដូចគាត់ចង់ចែកប័ណ្ណបោះឆ្នោត បើអត់ស្គាល់អាស័យដា្ឋនរបស់គាត់ គឺថាមិនអាចចែកជូនគាត់បានទេ» ។
យ៉ាងនេះក្តី បើតាមលោក គល់ បញ្ញា ប្រព័ន្ធចុះឈ្មោះបោះឆ្នោតបែបទំនើបនេះ គឺចំណាយថវិកាប្រមាណ១៧លានដុល្លារតែម្តង គឺរួចរាល់ដោយមិនចាំបាច់ចំណាយក្នុងការឲ្យពលរដ្ឋទៅពិនិត្យឈ្មោះបោះឆ្នោតជារៀងរាល់ឆ្នាំ ដែលចំណាយថវិកាប្រមាណ១,៧លានដុល្លារនោះទេ ។
របាយការណ៍របស់សង្គមស៊ីវិល និងគណបក្សប្រឆាំងរកឃើញថា ប្រព័ន្ធចុះឈ្មោះបោះឆ្នោតចាស់ដែល គ.ជ.ប កំពុងប្រើនោះ បានធ្វើឲ្យបាត់ឈ្មោះ អ្នកបោះឆ្នោតប្រមាណជាង១លាននាក់ កាលពីពេលឆ្នោតជាតិឆ្នាំ២០១៣ ៕
សូមសរសេរមកលោក អុឹង ប៊ុនថន តាមរយៈ chanthorn@vodhotnews.com
ចេះតែនឹកឃើញ ពីទំនើបកម្ម។ វាល្អហើយ អារឿងទំនើបកម្មនេះ នរណាក៏ចង់បានដែរ គេក៏នឹកឃើញដូចគ្នា។
សព្វថ្ងៃ គជប. មានគេហទំព័ររបស់គេរួចហើយ។យើងតែងបានឃើញថា អ្វីៗ ដែលជាពត៌មាន សេចក្តីប្រកាស សេចក្តីសម្រេច នានា ព្រមទាំងបញ្ជីឈ្មោះអ្នកម្ចាស់ឆ្នោត បញ្ជីឈ្មោះបេក្ខជន ផង ក៏មាននៅក្នុងគេហទំព័រដែរ។ មានន័យថា បើអ្នកចេះប្រើកំព្យូទ័រ និងចេះប្រើវេបសាយ គឺគេអាចមើលឈ្មោះរបស់គេក្នុងវេប ក៏បានដែរ។
តែអារឿងចុះឈ្មោះ តាមវេបនេះ គិតថា ក្រែងវានឹងទទួលបានការចោទប្រកាន់ ឬអី?
កុំគិតងាយពេកណាអ្នកពហុវិទ្យាសាស្ត្រ!!
គិតថា យ៉ាងម៉េចៗ ឲ្យតែបក្សទាំងពីរឯកភាពគ្នាពីរឿងសញ្ជាតិ សិនទៅ!
ចេះណាស់ ចេះនេះចេះ! នេះ បានចំជា « អ្នកពហុវិទ្យាសាស្រ្ត» មែន» ស្អីក៏ចេះៗ បើចេះ យ៉ាងនេះៗ ស្អែកខានស្អែក ស្រុកខ្មែរនេះ មិនដឹងជាមានអ្វីខ្លះទៀតទេ!