ដោយ ប្រាជ្ញ ចេវ
2014-12-09
RFA
ស្ដាប់ ឬ ទាញយកសំឡេង
ជនរងគ្រោះក្នុងអំពើប្លន់ ឈ្មោះ ហេង រ៉ាវី រៀបរាប់ហេតុការណ៍ប្រាប់អ្នកសារព័ត៌មានកាលពីថ្ងៃទី៧ ធ្នូ ២០១៤។ RFA/Uon Chhin
យុវជនពីរនាក់អះអាងថា ពេលដែលពួកគាត់ធ្វើដំណើរនៅពេលយប់ ត្រូវក្រុមប៉ូលិសស្ទាក់ចាប់ និងចោទថា ជាចោរ និងជាអ្នកជួញដូរគ្រឿងញៀន រួចជំរិតទារប្រាក់ យករបស់របរមានតម្លៃជាប់ខ្លួន ហើយវាយដំយ៉ាងធ្ងន់ធ្ងរ បង្ខំឲ្យសារភាពតាមអ្វីដែលពួកគេចង់បាន។
យុវជនទាំងនោះនិយាយថា សមត្ថកិច្ចមិនបញ្ជូនពួកគេទៅកន្លែងស៊ើបអង្កេតទេ បែរជាដឹកទៅកន្លែងស្ងាត់ដើម្បីឆក់ប្លន់វាយធ្វើបាបតែម្ដង។ ក្រោយកើតហេតុ ជនរងគ្រោះបានដាក់ពាក្យប្តឹងទៅ ប៉ុន្តែគេមិនបានចាំមុខជនដែលគាត់អះអាងថា ជាក្រុមប៉ូលិសទាំងនោះទេ។
យុវជនម្នាក់ក្នុងចំណោមពីរនាក់ដែលរងគ្រោះអះអាងថា ត្រូវបានប៉ូលិសប្រើហិង្សារហូតហើមមុខដូចឪម៉ាល់ទិច បែកឈាមក្នុងភ្នែក និងសុសសាច់ស្ទើរគ្រប់កន្លែងដោយដំបងឆក់ និងត្រូវសម្រាកនៅមន្ទីរពេទ្យជាច្រើនថ្ងៃ។ ក្រៅពីរបួសរាងកាយ ទ្រព្យសម្បត្តិជាប់ខ្លួនរបស់ពួកគេ ដូចជាខ្សែក ខ្សែដៃ ទូរស័ព្ទទំនើប ដែលគិតជាទឹកជាង ២.០០០ដុល្លារ ក៏ក្រុមនោះយកទាំងអស់។ ជាងនេះទៅទៀត ម៉ូតូរបស់ជនរងគ្រោះក៏ត្រូវបានគេបង្ខំឲ្យយកទៅបញ្ចាំ ដើម្បីយកប្រាក់បង់ឲ្យពួកគេជាថ្នូរនឹងការទម្លាក់បទចោទប្រកាន់។
ដើរចង្អុលបង្ហាញដល់កន្លែងកើតហេតុ លោក ហេង រ៉ាវី រៀបរាប់ឲ្យដឹងថា កាលពីយប់ម៉ោងជាង ១២ ថ្ងៃទី៥ ខែធ្នូ លោកបានជិះម៉ូតូដឹកប្អូនតាមបណ្ដោយផ្លូវទំនប់២៧៣ នៅពេលមកដល់ម្តុំអង់តែនទួលគោក មានប៉ូលិសមួយក្រុមជិះម៉ូតូចេញតាមពីក្រោយឃាត់ឲ្យឈប់ និងបានចោទប្រកាន់ថា លោកជាចោរ។ លោកបន្តថា ក្រោយការចោទប្រកាន់ ក្រុមប៉ូលិសបានវាយលោកនិងប្អូនប្រុស បង្ខំទៅកន្លែងស្ងាត់មួយ រួចបោះគ្រឿងញៀនចូលម៉ូតូ ដោយចោទប្រកាន់បន្ថែមមួយករណីទៀត គឺជួញដូរគ្រឿងញៀន៖ «គាត់ធ្វើទារុណកម្មខ្ញុំរហូត បន្ទាប់មកសមត្ថកិច្ចយកគ្រឿងញៀនដាក់ក្នុងឃ្លុបម៉ូតូខ្ញុំ ហើយថតរូបខ្ញុំ»។
យុវជនទាំងពីរនាក់អះអាងថា ពួកគាត់ត្រូវប៉ូលិសវាយបង្ខំឲ្យឆ្លើយតាមការចោទប្រកាន់របស់ប៉ូលិស។ លោក ហេង រ៉ាវី ប្រាប់ថា ពេលនោះប៉ូលិសទះកំផ្លៀង ទាត់ធាក់ យកអាយកូមវាយក្បាលរហូតលោកដួលដេកលើដី។
ចំណែកយុវជនម្នាក់ទៀត ឈ្មោះ នួន ធួន ជាប្អូនប្រុសលោក ហេង រ៉ាវី ឲ្យដឹងថា ត្រូវក្រុមប៉ូលិសបញ្ជាឲ្យយកម៉ូតូទៅបញ្ចាំនៅហាងមួយម្តុំផ្សារឃ្លាំងរំសេវ បានតម្លៃ ៣៥០ដុល្លារ។ យុវជន នួន ធួន ប្រគល់លុយបញ្ចាំម៉ូតូអោយប៉ូលិស ហើយក៏ប៉ូលិសនៅមិនទាន់អោយពួកគេរួចខ្លួនដែរ៖ «ទៅដល់កន្លែងបញ្ចាំហ្នឹងគ្នាគេម្នាក់ចាំនៅក្រៅ ហើយម្នាក់ទៀតចូលទៅក្នុងជាមួយខ្ញុំ ក្រោយដាក់បញ្ចាំរួច សមត្ថកិច្ចនោះឲ្យលុយខ្ញុំដប់ដុល្លារជិះម៉ូតូឌុបទៅផ្ទះវិញ»។
យុវជនដែលអះអាងថា ត្រូវប៉ូលិសវាយធ្វើបាបនេះ ជាបុគ្គលិកធ្វើការវេនយប់នៃសណ្ឋាគារមួយនៅភ្នំពេញ។ សព្វថ្ងៃស្នាក់នៅភ្នំពេញ ជាមួយភរិយាដែលផ្ទៃពោះជិតឆ្លងទន្លេ។ ក្រោយកើតហេតុ លោកបានដាក់ពាក្យបណ្ដឹងទៅសមត្ថកិច្ច និងអាជ្ញាធរមូលដ្ឋាន ប៉ុន្តែលោកថា លោកគ្មានរំពឹងថានឹងរកយុត្តិធម៌ឃើញ ព្រោះគ្មានភស្តុតាងបញ្ជាក់ថា ប៉ូលិសរូបណាជាអ្នកប្រព្រឹត្តឡើយ បើទោះជាលោកបានចាំមុខសមត្ថកិច្ចខ្លះក៏ដោយ និងហេតុផលមួយទៀត គឺលោកសមត្ថកិច្ចដែលទទួលពាក្យបណ្ដឹងហាក់គ្មានចេតនាចង់ស៊ើបអង្កេតឡើយ។ យ៉ាងណាក៏ដោយ ពលរដ្ឋមួយចំនួនដែលឃើញហេតុការណ៍ អះអាងថា នឹងធ្វើជាសាក្សី ប្រសិនយុវជននេះត្រូវការ។
សាក្សីនៅកន្លែងកើតហេតុដែលឃើញរឿងរ៉ាវនេះ លោកស្រី អាដ សៀប និយាយថា លោកស្រីឮសូរសំឡេងស្រែកថា ចោរៗ និងឃើញប៉ូលិសបីនាក់កំពុងវាយបុរសម្នាក់យ៉ាងដំណំ និងបង្ខំឲ្យឡើងលើម៉ូតូ។ លោកស្រីប្រាប់ទៀតថា សកម្មភាពពេលនេះ មិនសមជាសកម្មភាពធ្វើការរបស់ប៉ូលិសឡើយ៖ «ឃើញមកពីនោះ ស្រែកថាចោៗ អាអូននោះថា ខ្ញុំមិនមែនចោរទេ»។
រឿងរ៉ាវនេះកើតឡើងនៅក្នុងភូមិទួលគោក សង្កាត់ទួលសង្កែ ខណ្ឌឫស្សីកែវ ក្រុងភ្នំពេញ។ តំបន់នោះត្រូវបានអ្នកភូមិឲ្យដឹងជាកន្លែងជួញដូរគ្រឿង និងជាកន្លែងសំបូរក្មេងទំនើងដែលតែងបង្ករឿងដល់អ្នកធ្វើដំណើរជាងរៀងរាល់យប់។ នៅចំណុចកើតហេតុអ្នកភូមិហៅកន្លែងនោះថាផ្លូវកាប់ជ្រូក។ កំណាត់ផ្លូវនេះខណ្ឌចែកដោយរបងខ្ពស់ៗ។ នៅម្ខាងនៃរបងនោះជាបុរីធំៗ បំពាក់ភ្លើងភ្លឺ និងមានសុវត្ថិភាព ប៉ុន្តែនៅផ្លូវកាប់ជ្រួកគឺងងឹតសូន្យសុង រកតែអំពូលភ្លើងមួយគ្មាន។
ប្រជាពលរដ្ឋរស់នៅក្នុងភូមិសាស្ត្រខាងលើ កញ្ញា ឈឹម លីដា ឲ្យដឹងថា ជារឿយៗតែងតែកើតករណីឃាតកម្ម។ កញ្ញាស្នើឲ្យអាជ្ញាធរមូលដ្ឋានដាក់ភ្លើងបំភ្លឺផ្លូវ និងមានសមត្ថកិច្ចយាមប្រចាំការ។ ចំណែកអ្នកនាំពាក្យក្រសួងមហាផ្ទៃ លោក ខៀវ សុភ័គ ថ្លែងបដិសេធថា កន្លងមកក្រសួងមិនដែលទទួលករណីប៉ូលិសប្រើតួនាទីរបស់ខ្លួនទៅដើម្បីជំរិតយកប្រាក់ ឬធ្វើបាបពលរដ្ឋដូចនេះទេ៖ «ខ្ញុំទើបតែឮក្មួយមានប្រសាសន៍ ពីមុនមិនដែលមានទេ»។
ទោះយ៉ាងណាក្តី លោកទាមទារឲ្យជនរងគ្រោះដាក់ពាក្យបណ្ដឹង ទើបសមត្ថកិច្ចអាចចាត់ការរឿងនេះបាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
- សមត្ថកិច្ចអះអាងថានឹងចាប់ខ្លួនឧកញ៉ាថោងសារ៉ាត់នៅពេលដ៏ខ្លីខាងមុខ
- ឪពុកម្តាយឧកញ៉ា ថោង សារ៉ាត់ ប្រកាសសុំទោសស្នងការក្រុងលោក ជួន សុវណ្ណ
- តុលាការចោទប្រកាន់អង្គរក្សឧកញ៉ា ថោង សារ៉ាត់ ៤នាក់ពីបទមនុស្សឃាតគិតទុកជាមុន
- តុលាការមិនទាន់ចោទប្រកាន់ជនសង្ស័យ៤នាក់ថាសម្លាប់ឧកញ៉ា អ៊ឹង ម៉េងជឺ
- ឪពុកម្តាយឧកញ៉ា ថោង សារ៉ាត់ ចោទស្នងការនគរបាលក្រុងថាមានចេតនាអាក្រក់
- អាជ្ញាធរខេត្តសៀមរាបមិនទាន់ស៊ើបអង្កេតករណីគំរាមសម្លាប់សកម្មជនបក្សប្រឆាំង
- អ្នកភូមិឆ្មាពួនខេត្តកណ្ដាលដាក់លូរាំងផ្លូវមិនឱ្យឡានដឹកដីធំៗចេញចូល
- គ្រួសារយុវជនស្លាប់ដោយសារផ្ទុះកាំជ្រួចទាមទារសំណងជំងឺចិត្តពីរដ្ឋាភិបាល៥ម៉ឺនដុល្លារ
- ព្រះសង្ឃខេត្តកំពតបង្កើតសមាគមលើកស្ទួយព្រះពុទ្ធសាសនា
Srok khmer. Police, pm and army men are bulldogs and ribbers. Bullshit country
ម្ងៃៗ រឹត បន្តឹង សន្តិសុខ តែប្រជាពលរដ្ឋស្លូតត្រង់ ប៉ុន្តែ នៅតែមាន ប៉ូលីស អាក្រក់ ធ្វើបំពាន ច្បាប់ !
ពេលណា ទើបចាប់ ពួក ប៉ូលីស អាក្រក់ នេះបាន !
these crook police must be put in jail ‘people must investigate and watch theses robbers ,if theses robbers are real police? or fake poluice? all people must watch and take the picture and try to catch theses crook otherwise they still do to innocent people.the head of police must investigate if they don’t that mean the police must keep the crook to rob people.people ride in the night like that should carry the knife to protect themself if they take you to dark place just used the knife to kill them because they are robbers not the police ,if police they take you to police station and another they have no right to catch you it against the law .if they want to catch they must show the I D and the warrant and they can catch and bring to the police station .people must learn the law,this case the robber police must catch these robbers.GOD bless all cambodian people’