ដោយ ហ៊ុំ ចំរើន
2015-01-11
RFA
ស្ដាប់ ឬ ទាញយកសំឡេង
ប្រជាពលរដ្ឋមួយចំនួននៅស្រុកសង្កែ ខេត្តបាត់ដំបង ចោទប្រកាន់អាជ្ញាធរមូលដ្ឋានថា មិនអើពើទប់ស្កាត់សកម្មភាពកាប់បំផ្លាញព្រៃលិចទឹកនោះទេ គឺបណ្ដោយឲ្យអ្នកមានអំណាច មានលុយកាក់វាតទីយកដីនោះធ្វើជាកម្មសិទ្ធិដោយខុសច្បាប់។ អ្នកភូមិបញ្ជាក់ថា ព្រៃលិចទឹក ឬព្រៃរនាមរាប់ពាន់ហិកតារ ត្រូវគេកាប់យកដីអស់ទៅហើយ ដោយពុំមានអាជ្ញាធរណាទប់ស្កាត់ទេ។
ប្រជាពលរដ្ឋដែលប្រទះឃើញសកម្មភាពនៅតំបន់ព្រៃលិចទឹកនោះ សម្ដែងក្ដីបារម្ភយ៉ាងខ្លាំងចំពោះការកាប់រុករានយកដីនោះថា អាចនឹងហិនហោចអស់គ្មានសល់ក្នុងរយៈពេលដ៏ខ្លីខាងមុខ។ អ្នកភូមិអំពាវនាវឲ្យអាជ្ញាធរពាក់ព័ន្ធចាត់វិធានការទប់ស្កាត់ជាបន្ទាន់ ដើម្បីរក្សាព្រៃលិចទឹកនោះទុកជាជម្រកត្រីពងកូននៅថ្ងៃអនាគត។
ប្រជាពលរដ្ឋម្នាក់រស់នៅឃុំកំពង់ព្រៀង ស្រុកសង្កែ ខេត្តបាត់ដំបង ថ្លែងក្នុងលក្ខខណ្ឌមិនឲ្យបញ្ចេញឈ្មោះនិងសំឡេងថា ដីព្រៃលិចទឹកនៅក្នុងតំបន់២ និងតំបន់៣ ប្រមាណ ២ពាន់ហិកតារនៅចំណុចឃុំកំពង់ព្រៀង ស្រុកសង្កែ ខេត្តបាត់ដំបង ត្រូវអ្នកមានលុយមានអំណាចឈ្មោះ លោក ឡុង ផលគុណ ជាប្រធានមន្ទីរធនធានទឹកខេត្តបាត់ដំបង រុករានយកដីធ្វើកម្មសិទ្ធិ ក្នុងរូបភាពប្រមូលទិញពីប្រជាពលរដ្ឋតាមរយៈមេភូមិកាច់រទេះ ដោយឲ្យប្រជាពលរដ្ឋទៅចាប់យកដី ហើយកាប់ព្រៃលិចទឹកលក់ឲ្យលោក ឡុង ផលគុណ ក្នុងតម្លៃមួយហិកតារប្រមាណ ៣០០ដុល្លារអាមេរិក។ ពលរដ្ឋរូបនេះបន្តទៀតថា អាជ្ញាធរភូមិ និងឃុំសុទ្ធតែបានដឹងរឿងនេះ ប៉ុន្តែមិនអើពើទប់ស្កាត់នោះទេ គឺខ្លាចអំណាចរបស់ប្រធានមន្ទីរ។
ឆ្លើយតបនឹងបញ្ហានេះ ប្រធានមន្ទីរធនធានទឹកខេត្តបាត់ដំបង លោក ឡុង ផលគុណ មានប្រសាសន៍បញ្ជាក់ថា កន្លងមកលោកធ្វើការងារដើម្បីប្រទេសជាតិ គឺពុំមានពាក់ព័ន្ធនឹងការទិញដីព្រៃលិចទឹកដូចការចោទប្រកាន់នោះឡើយ។
ចំណែកឯមេភូមិកាច់រទេះ ឃុំកំពង់ព្រៀង លោក សុខ ប៊ុនរា មានប្រសាសន៍បដិសេធថា លោកពុំបានទិញដីព្រៃលិចទឹកពីប្រជាពលរដ្ឋតម្លៃ ៣០០ដុល្លារក្នុងមួយហិកតារ ដូចការចោទប្រកាន់នោះទេ។ ទោះយ៉ាងនេះ លោកទទួលស្គាល់ថា ប្រជាពលរដ្ឋពិតជាលក់ដីព្រៃលិចទឹកដែលពួកគាត់កាន់កាប់ខ្លះមែន ប៉ុន្តែពុំដឹងថានរណាជាអ្នកទិញដីនោះឡើយ៖ «ខ្ញុំអត់មានពាក់ព័ន្ធទេ ខ្ញុំគ្រាន់តែឃើញមានគេមកទិញដីព្រៃលិចទឹកនោះពីប្រជាពលរដ្ឋ ហើយមានការកក់លុយកក់កាក់ដល់ប្រជាពលរដ្ឋមែន។ បញ្ហានេះមេឃុំក៏គាត់បានដឹងដែរ ហើយខ្ញុំក៏បានសាកសួរទៅប្រធានមន្ទីរធនធានទឹក ចំពោះដីដែលប្រជាពលរដ្ឋកាន់កាប់នៅតំបន់៣នោះគួរធ្វើយ៉ាងម៉េច? ហើយខាងមន្ទីរគាត់និយាយថា កន្លែងណាជាដីរបស់ប្រជាពលរដ្ឋទុកដីនោះឲ្យពួកគាត់ ប៉ុន្តែមិនឲ្យរុករានទៅមុខនោះឡើយ»។
ទោះជានេះក្ដី ប្រជាពលរដ្ឋម្នាក់ទៀតរស់នៅឃុំកំពង់ព្រៀង ឲ្យដឹងថា ដីព្រៃលិចទឹកដែលជាជម្រកត្រីពងកូននៅឃុំកំពង់ព្រៀង រាប់ពាន់ហិកតារ ត្រូវគេកាប់យកដីអស់ព្រៃគ្មានសល់ ពុំមានជាអាជ្ញាធរណាទប់ស្កាត់នោះទេ៖ «បាទ! គេកាប់ព្រៃអស់រាប់ពាន់ហិកតារយកដីលក់ ក្នុងនោះមានគ្រឿងម៉ាស៊ីន មានត្រាក់ទ័រជាច្រើនគ្រឿងកាប់ព្រៃផ្ដួលចោលអស់គ្មានសល់»។
ទាក់ទងនឹងបញ្ហានេះដែរ មន្ត្រីសម្របសម្រួលអង្គការអាដហុក (Adhoc) ខេត្តបាត់ដំបង លោក យិន ម៉េងលី មានប្រសាសន៍ថា ដីព្រៃលិចទឹកនៅតំបន់២ និងតំបន់៣ ជាដីហាមឃាត់មិនអាចជនណាម្នាក់ទៅរុករានធ្វើជាកម្មសិទ្ធិបានឡើយ។
លោកថាអាជ្ញាធរពាក់ព័ន្ធគួរមានវិធានទប់ស្កាត់ដីទាំងនោះជាបន្ទាន់ ដើម្បីរក្សាទុកជាជម្រកត្រីពងកូន ជាប្រយោជន៍របស់ជាតិនៅថ្ងៃអនាគត៖ «អាជ្ញាធរត្រូវតែចាត់វិធានការទៅលើក្រុមអ្នកកាប់ព្រៃលិចទឹកដែលជាជម្រកមច្ឆាជាតិនោះឲ្យបាន។ ព្រោះការកាប់ព្រៃលិចទឹកនេះ មិនមែនតែនៅក្នុងស្រុកសង្កែមួយនោះទេ នៅស្រុកឯកភ្នំ ក៏មានដែរ ហើយកាលពីថ្ងៃសុក្រកន្លងទៅ ខ្ញុំបានចុះទៅតំបន់ព្រៃលិចទឹកជាមួយសហគមន៍អឺរ៉ុប ប្រទះព្រៃលិចទឹករាប់រយហិកតារ ត្រូវគេកាប់យកដីធ្វើកសិកម្មផង និងភ្លើងឆេះផងអស់គ្មានសល់។ អ៊ីចឹងត្រូវតែវែកមុខអ្នកដែលកាប់ព្រៃទាំងនោះយកទៅដោះស្រាយតាមផ្លូវច្បាប់»។
កាលពីឆ្នាំ២០១២ កន្លងទៅ រដ្ឋបាលជលផលខេត្តបាត់ដំបង បានចុះបង្ក្រាបការកាប់ដីព្រៃលិចទឹកនៅតំបន់ឃុំកំពង់ព្រៀង នោះម្ដងរួចទៅហើយ ប៉ុន្តែត្រូវបរាជ័យ។ ក្រោយមកសកម្មភាពកាប់រុករានដីចេះតែរីកធំឡើយជាបន្តបន្ទាប់ រហូតដល់អស់ដីព្រៃលិចទឹកប្រមាណជាង ២ពាន់ហិកតារ។ សកម្មភាពនេះប្រសិនបើអាជ្ញាធរពាក់ព័ន្ធពុំមានវិធានការទាន់ពេលទេ ព្រៃលិចទឹកនៅតំបន់នោះនឹងហិនហោចអស់ក្នុងរយៈពេលដ៏ខ្លីខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
- ពលរដ្ឋនៅព្រះវិហារប្ដឹងនាយដែនជម្រកសត្វព្រៃបឹងពែររឿងបំផ្លាញរោងការពារព្រៃឈើ
- រដ្ឋាភិបាលនិងអង្គការចំនួន៤សហការការពារព្រៃឈើនិងជលផលក្នុងខេត្តចំនួនពីរ
- ពលរដ្ឋរស់នៅក្បែរស្ពានអាកាសស្ទឹងមានជ័យត្អូញត្អែរពីក្លិនស្អុយចេញពីប្រឡាយ
- ពលរដ្ឋនៅបាត់ដំបងរិះគន់អាជ្ញាធរថាមិនដោះស្រាយបញ្ហាប្រឡាយទឹកស្អុយ
- អ្នកភូមិរិះគន់អាជ្ញាធរខេត្តកំពង់ឆ្នាំងថាមិនហ៊ានបង្ក្រាបអ្នកកាប់បំផ្លាញព្រៃលិចទឹក
- ពលរដ្ឋស្រុកកណ្ដាលស្ទឹងចោទអាជ្ញាធរមូលដ្ឋានថាបូមខ្សាច់ធ្វើអាជីវកម្ម
- អាជ្ញាធរខេត្តសៀមរាបតាមរកមេខ្លោងដែលឲ្យពលរដ្ឋចូលកាប់កូនឈើនៅភ្នំគូលែន
- ក្រុងចំនួន២៦ទទួលបានថវិកាពីក្រសួងបរិស្ថានដើម្បីគ្រប់គ្រងសំរាម
- សង្គមស៊ីវិលអះអាងថាការអភិវឌ្ឍរបស់ក្រុមហ៊ុនចិនបំផ្លាញធនធានធម្មជាតិនៅកម្ពុជា
what is this articles talking about Mr ???????????? why you are so blind and stubborn by not seeing any thing wrong at all???????????????? peace for all