នៅមុខស្ថានទូតអាមេរិក ជនរងគ្រោះទំនាស់ដីធ្លីសុំឲ្យលោកស្រី Michelle Obama ជួយ
ហេង រស្មី
22 មិនា 2015
វីអូអេខ្មែរ
ភ្នំពេញ—
សកម្មជនដីធ្លីមកពីសហគមន៍ចំនួន៨ផ្សេងគ្នា នៅថ្ងៃសៅរ៍នេះ បានបន្តធ្វើការតវ៉ានៅពីមុខស្ថានទូតសហរដ្ឋអាមេរិកសារជាថ្មីម្តងទៀត ដើម្បីតាមដានការដាក់ញត្តិរបស់ពួកគេកាលពីថ្ងៃទី១៧កន្លងទៅនេះថា តើស្ថានទូតសហរដ្ឋអាមេរិកបានបញ្ជូនញត្តិរបស់ពួកគេទៅលោកស្រី Michelle Obama ភរិយាលោកប្រធានាធិបតីសហរដ្ឋអាមេរិកដែរ ឬ យ៉ាងណា។
កាលពីថ្ងៃទី១៧ ក្រុមអ្នករងគ្រោះបានមកដាក់ញត្តិម្តងនៅពីមុខស្ថានទូតសហរដ្ឋអាមេរិកដើម្បីជំរុញឲ្យលោកស្រី Michelle Obama ជួយធ្វើអន្តរាគមន៍ឲ្យរដ្ឋាភិបាលកម្ពុជាដោះស្រាយរឿងវិវាទដីធ្លី និងដោះលែងសកម្មជនដីធ្លីចំនួន១១នាក់ដែលកំពុងជាប់ពន្ធនាគារព្រៃស ក្នុងនោះមានអ្នកស្រី ទេព វន្នី តំណាងសហគមន៍បឹងកក់។
ក្រុមអ្នកមកតវ៉ា ដែលរួមមានកុមារតូចៗ បានកាន់ទង់ជាតិសហរដ្ឋអាមេរិក ទង់ជាតិព្រះរាជាណាចក្រកម្ពុជា កាន់ពាក្យស្លោក និងរូបថតក្រុមគ្រួសារលោកស្រី Michelle Obama ជាមួយស្វាមី និងកូនស្រីទាំងពីរនាក់ ហើយមកស្រែកទាមទារដើម្បីឲ្យដោះលែងសកម្មជនដែលកំពុងនៅជាប់ឃុំឃាំងក្នុងពន្ធនាគារព្រៃស។
សកម្មជនដីធ្លីមកពី៨សហគមន៍ បានធ្វើបាតុកម្មនៅខាងមុខស្ថានទូតអាមេរិកប្រចាំនៅប្រទេសកម្ពុជា ដើម្បីអំពាវនាវឲ្យលោកស្រី Michelle Obama ធ្វើអន្តរាគមន៍ឲ្យរដ្ឋាភិបាលកម្ពុជា ដោះលែងស្រ្តី១១នាក់ពីពន្ធនាគារ និងបញ្ហាដីធ្លីនៅថ្ងៃទី ២១ ខែមីនា ឆ្នាំ២០១៥។
បាតុករបានស្រែកទាមទារថា៖
«សូមលោកជំទាវជួយដោះលែងស្រ្តីនៅតំបន់បឹងកក់ផង! ពួកគាត់អត់មានកំហុសអ្វីទេ! ជួយដោះលែងពួកគាត់ផងៗៗ»។
លោកចាន់ ពុទ្ធិស័ក សកម្មជនដីធ្លីនៅតំបន់បឹងកក់ មានប្រសាសន៍ថា មកដល់ថ្ងៃនេះមិនមានការឆ្លើយតបណាមួយពីមន្ត្រីស្ថានទូតសហរដ្ឋអាមេរិកទេ ចំពោះញត្តិដែលពួកគេបានដាក់កាលពីថ្ងៃទី១៧កន្លងទៅនេះ។
លោកមានប្រសាសន៍ថា៖ «ទាមទារថ្ងៃនេះដើម្បីរំឭកទៅស្ថានទូតដើម្បីពាំនាំនូវក្តីកង្វល់របស់សហគមន៍ទៅដល់អ្នកស្រី Michelle Obama ឲ្យជួយធ្វើអន្តរាគមន៍ទៅរដ្ឋាភិបាលជំរុញឲ្យមានការដោះលែងស្រ្តីសកម្មជនដីធ្លីនៅតំបន់បឹងកក់ ថ្មគោល បូរីកីឡា និងអតីតអ្នកបឹងកក់ឲ្យមានសេរីភាពឡើងវិញ ហើយជួយជំរុញការដោះស្រាយទំនាស់ដីធ្លីនៅសហគមន៍នានាដែលកំពុងមានជម្លោះនោះ ឲ្យចប់ជាស្ថាពរនៅបញ្ហាដីធ្លី»។
សកម្មជនដីធ្លីមកពី៨សហគមន៍ បានធ្វើបាតុកម្មនៅខាងមុខស្ថានទូតអាមេរិកប្រចាំនៅប្រទេសកម្ពុជា ដើម្បីអំពាវនាវឲ្យលោកស្រី Michelle Obama ធ្វើអន្តរាគមន៍ឲ្យរដ្ឋាភិបាលកម្ពុជា ដោះលែងស្រ្តី១១នាក់ពីពន្ធនាគារ និងបញ្ហាដីធ្លីនៅថ្ងៃទី ២១ ខែមីនា ឆ្នាំ២០១៥។
ការតវ៉ាសារជាថ្មីរបស់សកម្មជនដីធ្លីនៅពីមុខស្ថានទូតសហរដ្ឋអាមេរិកនេះបានកើតមានឡើងចំពេលដែលលោកស្រី Michelle Obama កំពុងបំពេញទស្សនកិច្ចនៅក្នុងខេត្តសៀមរាប។
លោកស្រីភរិយាប្រធានាធិបតេយ្យសហរដ្ឋអាមេរិកមកបំពេញទស្សនកិច្ចប្រទេសកម្ពុជាលើកនេះដើម្បីផ្សព្វផ្សាយកិច្ចផ្តួចផ្តើមមួយដែលមានគោលបំណងជួយនារីនៅក្នុងប្រទេសកំពុងអភិវឌ្ឍន៍ឲ្យបានការសិក្សារៀនសូត្រ។
ពេលមកដល់ខេត្តសៀមរាប កាលពីយប់ថ្ងៃសកុ្រ លោកស្រី Michelle Obama ត្រូវបានទទួលស្វាគមន៍ពីលោកស្រីប៊ុន រ៉ានី ហ៊ុន សែន ភរិយារបស់នាយករដ្ឋមន្រ្តីហ៊ុន សែន។ នេះជាដំណើរបំពេញទស្សនកិច្ចលើកទីមួយដែលលោកស្រីភរិយាប្រធានាធិបតីសហរដ្ឋអាមេរិកដែលកំពុងកាន់តំណែងអញ្ជើញមកបំពេញទស្សនកិច្ចនៅប្រទេសកម្ពុជា៕
អត្ថបទព័ត៌មានទាក់ទង
- គោលនយោបាយសម្បទានដីសេដ្ឋកិច្ចរបស់រដ្ឋាភិបាលធ្វើឲ្យបាត់បង់ដីធ្លីជនជាតិដើមភាគតិច
- មន្ត្រីស.រ.អា.៖ លោកស្រី Michelle Obama នឹងលើកបញ្ហាសិទ្ធិមនុស្សនៅកម្ពុជា
Welcome to Cambodia the US First Lady Michelle OBama!
With great honor we wholeheartedly commend your compassionate
and historic trip to our country.
We wish your Let Girls Learn project the best success for Khmer girls.
We wish your concerns on Civil and Political Rights in Cambodia would, in general, bear great fruits and, in particular, would at least help secure the “stay out of jail on bail” for all those Khmer women and men civil and political activists, i.e. Ms. Tep Vanny’s and Mr. Meach Sovannara’s groups.
We wish you the best cultural experience and pleasant visit.
22 March 2015