ដោយ៖ វង្ស សុម៉ាលីន
ថ្ងៃចន្ទ ទី23 មិនា 2015
http://vodhotnews.com
មើលរូបភាពបន្ថែម
រថយន្តរបស់អ្នកនាង ខាត់ សុឃីម (រូបថតពីហ្វេសប៊ុក)
ពេញមួយល្ងាចថ្ងៃទី២២ ខែមីនា តារាចម្រៀង ខាត់ សុឃីម និងម្ចាស់កំពង់ចម្លងព្រែកលៀបឆ្ពោះទៅកោះដាច់ បានផ្ទុះជម្លោះដាក់គ្នាដាច់ក្បាលដាច់កន្ទុយ ដែលអ្នកនាង ខាត់ សុឃីម បានហៅជម្លោះនោះថាបង្កពីហេតុផលម្ចាស់ដរទារតម្លៃឡានហួសហេតុ។
អ្នកនាង ខាត់ សុឃីម បានផ្ដល់បទសម្ភាសន៍តាមទូរស័ព្ទថាជម្លោះដែលបានកើតឡើងនោះ ដោយសារតែនៅកាលពីវេលាម៉ោង១១ថ្ងៃត្រង់ ក្នុងថ្ងៃកើតហេតុ គឺអ្នកនាង និងក្រុមការងារបានបើកឡានដឹកឆាកដែលមានទម្ងន់ប្រមាណជា២តោនកន្លះមកឆ្លងដរ ហើយត្រូវម្ចាស់ដរកំណត់ទារថ្លៃ១០០ដុល្លារក្នុងមួយបក។ អ្នកនាងនិយាយថា«ខ្ញុំអត់ដឹងថា តម្លៃឆ្លងដរនៅកន្លែងហ្នឹង គេគិតយ៉ាងមិចទេ ប៉ុន្តែសម្រាប់ឡានក្រុមការងាររបស់ខ្ញុំ គឺគាត់យក៣ម៉ឺន(រៀល) សម្រាប់ឡានប្រភេទមួយតោនកន្លះ និង៤៥០០០(រៀល)សម្រាប់ឡានប្រភេទ២តោន!»។
អ្នកនាងឲ្យដឹងទៀតថាអ្នកនាង និងក្រុមការងារបានទាំងយករថយន្តដឹកជញ្ជូនឥវ៉ាន់ប្រភេទមួយបំាងកន្លះ និងរថយន្តដឹកផ្នួងចំនួន៦គ្រឿង ឆ្លងចុះឆ្លងឡើងនៅថ្ងៃដដែលមុនពេលជម្លោះកើតឡើង ដោយការចំណាយរថយន្តមួយមិនទៅដល់១០០ដុល្លារនោះទេ។ ជម្លោះបានកើតឡើង បន្ទាប់ពីរថយន្តដឹកឆាករបស់អ្នកនាងបានធ្វើដំណើរមកដល់កំពង់ដរ ហើយត្រូវម្ចាស់ដរកំណត់ទារប្រាក់មួយជើង១០០ដុល្លារ ដោយសូម្បីតែអ្នកនាងសុំឲ្យយកត្រឹមតែ២០ ឬ៣០ដុល្លារក៏មិនព្រម។ អ្នកនាងនិយាយថា«ឡានខ្ញុំសំពីងសំពោងមែន ប៉ុន្តែទម្ងន់វាតែ២តោនកន្លះអីទេ ព្រោះខ្ញុំដឹកទៅឆ្លងស្ពាននៅកន្លែងណា ឬទៅឆ្លងដរនៅកន្លែងណាក៏គេគិតជាប្រភេទឡាន២តោនកន្លះអញ្ចឹងដែរ! អញ្ចឹងហើយបានខ្ញុំចម្លែកត្រង់កំពង់ដរហ្នឹង គាត់ទារ១០០ដុល្លារ(មួយជើង)! ពីដំបូងកូនចៅខ្ញុំខលមកខ្ញុំអត់ជឿទេ លុះពេលខ្ញុំមកជួបគាត់ គាត់ដាច់ប៉ុណ្ណឹងមែន! ប្ដីខ្ញុំអត់យកវែងឆ្ងាយសុំតែ៥០ដុល្លារក៏មិនព្រមដែរ ហើយគាត់និយាយឈ្លើយទាំងប្ដីទាំងប្រពន្ធ គឺមិនឆ្លងអត់ គាត់និយាយតែមួយម៉ាត់គត់ ថាឡានខ្ញុំធំ គឺមួយបក១០០ដុល្លារបានចម្លង!»។
អ្នកនាង ខាត់ សុឃីម ប្រាប់ថាមិនដឹងម្ចាស់ដរឈ្មោះអ្វីនោះទេ ដោយគ្រាន់តែម្ចាស់ដរនោះ ស្ថិតនៅកំពង់ចម្លងព្រែកលៀប ដោយជាកំពង់ចម្លងឆ្លងពីទីតាំងព្រែកលៀបទៅកាន់កោះដាច់ និងកោះឧកញ៉ាតី។ កំពង់ដរនោះមានចម្ងាយជិតជាងគេក្នុងតំបន់ព្រែលលៀបទៅកាន់កោះដាច់ ដោយអាចរកឃើញភ្លាមៗតាមច្រកអតីតភោជនីយដ្ឋានហង្សនាគនៅតំបន់ព្រែកលៀប។ អ្នកនាងនិយាយថា«ពេលគាត់កាត់ខ្ញុំ១០០ដុល្លារហ្នឹង អ្នកម៉ូតូឌុប និងអ្នកឆ្លងទៅជាមួយសុទ្ធតែជួយអង្វរ ព្រោះធ្វើមិចយើងអត់ចង់ទៅរកកំពង់ដរទៀតទេ ប៉ុន្តែម្ចាស់ដរហ្នឹងអត់ចុះឲ្យយើងហើយ និយាយឈ្លើយដាក់យើងទៀត! សម្រាប់ខ្ញុំគាត់កោរប៉ុណ្ណឹង ចុះក្រៅពីខ្ញុំនឹងដល់ថ្នាក់ណា? អញ្ចឹងហើយទើបអ្នកណាក៏ហួសចិត្ត ពេលខ្ញុំបង្ហោះតាមហ្វេកប៊ុក មានអ្នកតេមកខ្ញុំថា កន្លែងហ្នឹងយកថ្លៃតែអញ្ចឹង ពិសេសឲ្យតែមានឡានដឹកទំនិញអីធំៗទៅឆ្លងគឺបានដៃតែម្ដង!»។
អ្នកនាងខាត់ សុឃីម ពេលនៅកន្លែងឆ្លងដរ(រូបថតពីហ្វេសប៊ុក)
អ្នកនាង និងក្រុមការងារបានសម្រេចបើកឡានដឹកឆាកទៅឆ្លងនៅកំពង់ចម្ងងក្ដីចាស់ដែលស្ថិតនៅស្ពានទី៩ តាមបណ្ដោយផ្លូវជាតិលេខ៦វិញ បន្ទាប់ពីបានផ្ទុះជម្លោះរឿងតថ្លៃគ្នាមិនត្រូវ បើទោះជាមានភាពយឺតយ៉ាវបន្តិច សម្រាប់ការរៀបចំឆាកឲ្យម្ចាស់ដើម។ អ្នកនាងនិយាយថា«ខ្ញុំទៅដល់កំពង់ចម្លងក្ដីចាស់ គេទារខ្ញុំតែ១ម៉ឺនរៀលទេ សម្រាប់ឡានដឹកឆាកហ្នឹង អញ្ចឹងហើយទើបខ្ញុំគិតថា ត្រូវតែធ្វើឲ្យកន្លែងហ្នឹង(កំពង់ដរព្រែកលៀប)ល្បីម្ដង! ខ្ញុំឡើងប៉ុស្ដិ៍ណានឹងនិយាយប៉ុស្ដិ៍ហ្នឹង កុំឲ្យគាត់កោរគេអញ្ចឹងទៀត! ខ្ញុំឆ្ងល់មែនទែន តើមន្ត្រីដែលផ្ដល់សិទ្ធិឲ្យម្ចាស់ដរហ្នឹងរកស៊ី មានដឹងអត់ថាម្ចាស់ដរហ្នឹង កោរគេដល់ថ្នាក់ហ្នឹង នេះម៉ោងឆ្លងធម្មតាផង ចុះបើជួលគាត់ខុសម៉ោងយប់ព្រលប់ទៀត តើកាប់គេដល់ថ្នាក់ណា? នេះកោរខ្ញុំមានគេដឹងឮ ចុះមុនខ្ញុំអ្នកណាជួយគាត់?»។
VOD មិនទាន់អាចទាក់ទងសុំការបំភ្លឺពីម្ចាស់កំពង់ចម្លងព្រែកលៀបបាននៅឡើយទេ៕
សរសេរមកកាន់លោក វង្ស សុម៉ាលីន តាមរយៈvongsomalin@yahoo.com
ល្មមធ្វើករវាចោលម្តងទៅម្ចាស់ដរចាប់ជំរិត
គេយកច្រើនចំពោះតែអ្នកមានទេដឹង តែ១០០ដុល្លារ១ជើងដូចជាហួសហេតុដែរ។