Wed, 1 April 2015
ផាក់ ស៊ាងលី
ភ្នំពេញប៉ុស្តិ៍
មណ្ឌលគិរីៈ កម្មករវៀតណាម និងកម្លាំងចម្រុះរបស់អាជ្ញាធរមានសមត្ថកិច្ចស្រុកកែវសីមា ប្រមាណជា ៧០ នាក់ បានដុត និងឈូសបំផ្លាញខ្ទមពលរដ្ឋអស់ ១៣៦ កាលពីម្សិលមិញ ដើម្បីបណ្តេញពួកគេចេញពីដីសហគមន៍ដែលរដ្ឋាភិបាលផ្តល់ឲ្យក្រុមហ៊ុនវៀតណាម។
កម្លាំងប្រដាប់អាវុធចម្រុះក្នុងស្រុក កែវសីមា រួមនឹងកម្មករវៀតណាមរបស់ក្រុមហ៊ុន ប៊ិនភៀក ១ បានសហការណ៍គ្នាដុតបំផ្លាញ និងប្រើគ្រឿងចក្រឈូសឆាយខ្ទម និងរោងស្នាក់នៅរបស់អ្នកភូមិ ១៣៦ កាលពីរសៀលថ្ងៃអង្គារម្សិលមិញនៅភូមិចក់ចារ ឃុំស្រែឈូក ស្រុកកែវសីមា ខេត្តមណ្ឌលគិរី។ នេះបើយោងតាមការអះអាងរបស់អ្នកភូមិ និងអង្គការអាដហុកខេត្តមណ្ឌលគិរី។
ម្ចាស់ខ្ទមឈ្មោះ ម៉ម សារ៉ុត អាយុ ៣១ ឆ្នាំបានបញ្ជាក់ថា៖ «វៀតណាមប្រហែលជា ៤០ នាក់ទៅដល់ដុត ហើយយកអាអិចឈូសតែម្តង។ មានកម្លាំងប៉ូលិសឈចាំជួយការពារកុំឲ្យម្ចាស់ខ្ទមចូលទៅជិត»។
អង្គការអាដហុកបានហៅសកម្មភាពដុតបំផ្លាញនោះថា ជាវិធានការណ៍ «ក្តៅគគុក» នៅលើដីជម្លោះ ពីសំណាក់ក្រុមកងកម្លាំងប្រដាប់អាវុធនិង មន្ត្រីស្រុកកែវសីមា ដែលសហការជាមួយកម្លាំងក្រុមហ៊ុន។ កម្លាំងទាំងនោះមានប្រមាណជា ៧០ នាក់ដែលរួមមាន ប៉ូលិស អាវុធហត្ថ ទាហានមន្ត្រីសាលាស្រុក និងកម្លាំងក្រុមហ៊ុនវៀតណាមប្រមាណជាច្រើននាក់ផ្សេងទៀត។ ក្រៅពីនោះក៏នៅមានឡានបាញ់ទឹក ១ គ្រឿង ឡានសារ៉ែន ១គ្រឿង និងគ្រឿងចក្រផ្សេងៗទៀតផងដែរ។
លោក សារ៉ុត បានបន្ថែមថា ពួកគាត់ ២១១ គ្រួសារដែលភាគច្រើនជាជនជាតិដើមភាគតិចព្នងបានសង់ខ្ទម និងរោងស្នាក់នៅចំនួន ១៧២ ដើម្បីការពារដីកុំឲ្យក្រុមហ៊ុន ប៊ិនភៀក ១ ឈូសសឆាយរំលោភយក។ ប៉ុន្តែក្រុមហ៊ុន និងកម្លាំងចម្រុះបានប៉ុនប៉ងដុតបំផ្លាញទាំងអស់ ហើយពួកគាត់ជាង៦០នាក់បានចេញទៅរារាំងទើបគេព្រមឈប់ បន្ទាប់ពីដុតអស់១៣៦ខ្ទម និងរោងមក។
លោកសុក រដ្ឋាអ្នកសម្របសម្រួលអង្គការសិទ្ធិមនុស្សអាដហុកខេត្តមណ្ឌលគិរីបានអាជ្ញាធរ និងក្រុមហ៊ុនតែមានជម្រើសផ្សេង ក្រៅពីប្រើវិធានហិង្សា និងក្តៅបែបនោះ ដើម្បីរកដំណោះស្រាយវិញ ព្រោះថាដីនោះជាដីមានជម្លោះដែលប៉ះពាល់ដល់ជនជាតិដើមភាគតិច។
លោក រដ្ឋា បានថ្លែងថា៖ «នេះជាការដុតបំផ្លាញលើកទីពីរហើយ ដែលអាជ្ញាធរគួរតែបញ្ឈប់វិធានការហិង្សានេះ។ ងាកមករកការចរចាវិញ ហើយក្រុមហ៊ុនមកវិនិយោគនៅកម្ពុជាគួរតែគោរពច្បាប់ និងយោគយល់ដល់ជនជាតិដើម ហើយកាត់ផលប៉ះពាល់ចេញ»។
ទោះយ៉ាងណាលោក ញ៉ែម វ៉ាន់នី ស្នងការនគរបាលខេត្តមណ្ឌលគិរីបានមានប្រសាសន៍ថា ដីនោះគឺជាដីក្រុមហ៊ុនប៊ិនភៀក១ដែលរដ្ឋាភិបាលបានផ្តល់ឲ្យដើម្បីដាំកៅស៊ូ។ ប៉ុន្តែបន្ទាប់ពីក្រុមហ៊ុនធ្វើការឈូសឆាយរួច ប្រជាពលរដ្ឋទាំងនោះបានទៅចាប់យកដីអាណាធិបតេយ្យ ហើយក្រុមហ៊ុនបានស្នើឲ្យអាជ្ញាធរខេត្តជួយចាត់វិធានការតាមច្បាប់ ដើម្បីយកដីធ្វើការដាំដុះតាមផែនការ។
លោកស្នងការបានបញ្ជាក់ថា «អាជ្ញាធរបានជូនដំណឹងជាច្រើនលើកច្រើនសារហើយក្នុងរយៈពេល ២ ឆ្នាំនេះឲ្យគាត់រុះរើចេញ តែមិនព្រម មិនដឹងមកពីណាពីណីខ្លះទេ ច្រើនណាស់ ទើបកម្លាំងចុះទៅតាមសំណូមពររបស់ក្រុមហ៊ុន»៕
no brain!!!!! PM
នេះជានយោបាយឈ្នះៗរបស់កន្តួយម៉ែនិងកន្តួយប្រពន្ធ័អាចុយម៉ាយហ៊ុនសែនអុយង៉ោង
វាបំផ្លាញខ្មែរធ្វើឆ្កែចំរើនកូនមីឆ្កែពួកយួនឈ្លានពាន ។