ដោយ៖ ណុល ដារ៉ា | ថ្ងៃចន្ទ ទី25 ឧសភា 2015
http://vodhotnews.com
ស្តាប់សំឡេង៖ |
ចម្លងទុក |
លោក ទេព នីថា អគ្គលេខាធិការ គ.ជ.ប
ក្រោយការបោះឆ្នោតជាតិអាណត្តិទី៥ នាឆ្នាំ២០១៣ បក្សប្រឆាំងមិនទទួលស្គាល់លទ្ធផលបោះឆ្នោតដោយចោទថាមានការលួចបន្លំ នាំឲ្យមានវិបត្តិជាប់គាំងនយោបាយអូសបន្លាយជិត១ឆ្នាំ ។ ក្នុងរយៈពេលនោះ គណបក្សប្រជាជនកម្ពុជាបានទាក់ទងបរទេស មានជប៉ុន និងសហភាពអឺរ៉ុបជាដើម ឲ្យមកជួយធ្វើកំណែទម្រង់ គ.ជ.ប ឡើងវិញ ។ ករណីនេះទាំងបក្សប្រឆាំង ទាំងអ្នកវិភាគ គិតដូចៗគ្នាថា សូម្បីតែគណបក្សប្រជាជនកម្ពុជាខ្លួនឯង ក៏ទទួលស្គាល់ភាពមិនប្រក្រតីរបស់ គ.ជ.ប ដែរ ទើបបានជាស្ម័គ្រចិត្តចេញទៅហៅរកបរទេសឲ្យមកជួយកែទម្រង់បែបនេះ ។
ដើម្បីបញ្ចប់វិបត្តិជាប់គាំងនយោបាយក្រោយការបោះឆ្នោតនាពេលនោះ គណបក្សទាំងពីរបានធ្វើកិច្ចព្រមព្រៀងមួយនៅថ្ងៃទី២២ ខែកក្កដា ឆ្នាំ២០១៤ ដែលមាន៧ចំណុច ហើយក្នុងនោះក៏មានការផ្លាស់ប្ដូរក្បាលម៉ាស៊ីន គ.ជ.ប និងអគ្គលេខាធិការផងដែរ ។
ប៉ុន្តែចាប់តាំងពីក្បាលម៉ាស៊ីន គ.ជ.ប ថ្មីត្រូវបានបង្កើតឡើងនៅមុនចូលឆ្នាំខ្មែរ ឆ្នាំ២០១៥ រហូតដល់ពេលនេះ អគ្គលេខាធិការចាស់ នៅតែបន្តតួនាទីរបស់ខ្លួនក្នុងស្ថាប័ន គ.ជ.ប ថ្មី ។ កត្តានេះ អនុប្រធាន គ.ជ.ប លោក គួយ ប៊ុនរឿន ថ្លែងថា ការដែលមិនទាន់ជ្រើសរើសអគ្គលេខាធិការថ្មី ដោយសារ គ.ជ.ប រវល់ធ្វើការងារអាទិភាព គឺរៀបចំបញ្ជីឈ្មោះអ្នកបោះឆ្នោតមួយប្រកបដោយគុណភាព ប្រសិទ្ធភាព និងតម្លាភាព ។ លោកបន្តថា គ.ជ.ប នឹងជ្រើសរើសអគ្គលេខាធិការ និងអគ្គលេខាធិការរង នៅពេលវេលាសមស្រប ហើយខណៈដែលមិនទាន់មានអ្នកថ្មីមកជំនួសទេ អ្នកចាស់នៅតែបន្តការងាររបស់ខ្លួន ។
តើការបន្តប្រើអគ្គលេខាធិការ គ.ជ.ប ចាស់ អាចផ្ដល់ទំនុកចិត្តដល់អ្នកបោះឆ្នោតទេ?
នាយកប្រតិបត្តិអង្គការឃ្លាំមើលការបោះឆ្នោតហៅកាត់ថាខុមហ្វ្រែល លោក គល់ បញ្ញា មានប្រសាសន៍ថា សមាជិក គ.ជ.ប ទាំង៩រូប ជាអ្នកមានសិទ្ធិត្រូវជ្រើសរើសអគ្គលេខាធិការ និងអគ្គលេខាធិការរង ព្រោះអគ្គលេខាធិការ និងអគ្គលេខាធិការរង ជាសេនាធិការផ្ទាល់របស់ គ.ជ.ប ។ លោកបន្តថា ច្បាប់បង្កើត គ.ជ.ប មានចរិតមិនបង្ហាញផ្លូវច្បាស់លាស់ ព្រោះបានចែងថា បើមិនទាន់រកបានអគ្គលេខាធិការ និងអគ្គលេខាធិការរងបានទេ នោះអគ្គលេខាធិការ និងអគ្គលេខាធិការរងដែលមានស្រាប់ នៅបន្តដំណើរការធម្មតា ។
លោក គល់ បញ្ញា បន្ថែមថា អគ្គលេខាធិការ និងអគ្គលេខាធិការរងនៅក្រោម គ.ជ.ប ផ្ទាល់ គឺដូចសភា និងគណៈរដ្ឋមន្ត្រីដែរ ហើយអគ្គលេខាធិការ និងអគ្គលេខាធិការរងអាចមានអាណត្តិដូច គ.ជ.ប ផងដែរ ។ លោកថា «គ.ជ.ប សម្រេចទៅ អគ្គលេខាធិការ អគ្គលេខាធិការរងហ្នឹង ព្រោះកន្លែងហ្នឹងកន្លែងគេហៅថា ប៉ុស្តិ៍សេនាធិការសំខាន់ ដើម្បីនៅហ្នឹងយើងសិក្សាវាយតម្លៃទៅអំពី របៀបវាយតម្លៃឡើងវិញ អំពីកម្រិតនៃការទុកចិត្តអំពីអ្នកពាក់ព័ន្ធ ទៅលើអគ្គលេខាធិការ អគ្គលេខាធិការរងហ្នឹង សមត្ថភាព ដើម្បីឆ្លើយតបនឹងច្បាប់ថ្មីហ្នឹង ហើយនិងកិច្ចការងារ ប្រសិទ្ធភាពការងារស្អីៗមួយចំនួនទៀត ដែល គ.ជ.ប ពិនិត្យទៅវាយតម្លៃទៅ» ។
ទាក់ទងនឹងបញ្ហាអគ្គលេខាធិការ និងអគ្គលេខាធិការរងនេះដែរ អ្នកវិទ្យាសាស្ត្រនយោបាយ លោកសាស្ត្រាចារ្យ រស់ រ៉ាវុធ មានប្រសាសន៍ថា សមាជិក គ.ជ.ប ថ្មីទាំង៩រូប មានភារកិច្ចជ្រើសរើសអគ្គលេខាធិការ អគ្គលេខាធិការរង និងមានភារកិច្ចផ្សេងៗទៀតក្នុង គ.ជ.ប រួមទាំងការធ្វើសមាហរណកម្មបុគ្គលិក ។ លោកថា ការរក្សាទុកអ្នកចាស់ ឬក៏ត្រូវជ្រើសរើសថ្មី គឺជាការទទួលខុសត្រូវរបស់សមាជិកគ.ជ.ប ថ្មីទាំង៩រូបនោះ ។
លោកសាស្ត្រាចារ្យ រស់ រ៉ាវុធ បន្ថែមថា អគ្គលេខាធិការចាស់ ឬថ្មីមិនសំខាន់ទេ សំខាន់គឺការងារនោះអាចជឿទុកចិត្តបាន ។ លោកមានប្រសាសន៍ថា «អ្វីដែលយើងចង់បាននោះ មនុស្សចាស់ក៏ដោយ មនុស្សថ្មីក៏ដោយ សំខាន់រឿងថាតើការប្រព្រឹត្តទៅរបស់ គ.ជ.ប មានភាពយុត្តិធម៌ត្រឹមត្រូវឬអត់ ។ ព្រោះបច្ចុប្បន្ននេះខ្ញុំឃើញមានការកែទម្រង់ច្រើន គឺបានសហការជាមួយនឹងសហគមន៍អឺរ៉ុប បានសហការផ្នែកបច្ចេកទេសជាមួយនឹងជប៉ុន ។ អ៊ីចឹងខ្ញុំគិតថា ទោះបីយ៉ាងណា បើគាត់ចាស់ក៏ដោយ តែគាត់ធ្វើការផ្លាស់ប្ដូរតាមបច្ចេកទេស នោះជាការប្រសើរមួយសម្រាប់ជាតិ» ។
លោកសាស្ត្រាចារ្យបញ្ជាក់ថា មិនថាអគ្គលេខាធិការចាស់ ឬថ្មីនោះទេ បើសមាជិក គ.ជ.ប ថ្មីទាំង៩រូប មិនឯកភាពលើការងាររបស់អគ្គលេខាធិការលើចំណុចណាមួយ នោះពួកគាត់ទាំង៩រូបមានសិទ្ធិក្នុងការតវ៉ា ។
ប៉ុន្តែសម្រាប់អ្នកស្រាវជ្រាវពីការអភិវឌ្ឍសង្គមវិញ លោក កែម ឡី មានយល់ថា បើ គ.ជ.ប ពិតជាមានឆន្ទៈធ្វើការមួយឲ្យល្អប្រសើរ មានសុចរិតភាព អាចទទួលយកបានទាំងម្ចាស់ឆ្នោត នោះ គ.ជ.ប គួរតែជ្រើសរើសអគ្គលេខាធិការថ្មីមួយ ដែលមិនជាប់ពាក់ព័ន្ធនឹងស្នាមចាស់កន្លងមក ។ លោកបន្តថា បើ គ.ជ.ប ថ្មីនេះ បន្តប្រើអគ្គលេខាធិការចាស់ទៀត ទោះបីមានការធានាអះអាងយ៉ាងណាក៏ដោយ ក៏ភាពត្រឹមត្រូវយុត្តិធម៌ក្នុងការរៀបចំការបោះឆ្នោត នៅតែពិបាកជឿទុកចិត្តបានដដែល ។ លោកថា «កិត្តិយស កិត្យានុភាព អគ្គលេខាធិការចាស់កន្លងមក បានធ្វើឲ្យប្រជាពលរដ្ឋ ជាពិសេសអ្នកបោះឆ្នោតហ្នឹង គាត់មិនសប្បាយចិត្តខ្លាំងណាស់ទៅហើយ ។ អ៊ីចឹងខ្ញុំគិតថាបើយើងចង់ធ្វើកំណែទម្រង់មែន គួរតែពិនិត្យមើលសមាសភាពដដៃៗទៀត ដែលគេមានតម្លាភាពនៅក្នុងខ្លួនគេ គេមានប្រព័ន្ធសុចរិតភាពនៅក្នុងខ្លួនគេ អាហ្នឹងបានអាចជួយធានានូវការបោះឆ្នោតមួយដែលអាចជឿបាន ។ ប៉ុន្តែវាទាក់ទងទៅនឹងប្រព័ន្ធបោះឆ្នោត វាទាក់ទងនឹងនីតិវិធីផ្សេងៗទៀត» ។
ផ្អែកលើមតិយោបល់ទាំងអស់ខាងលើនេះឃើញថា ភាពអាចជឿទុកចិត្តបានពីអ្នកបោះឆ្នោតជារឿងសំខាន់ ។ បើតាមលោក គល់ បញ្ញា និងលោកសាស្ត្រាចារ្យ រស់ រ៉ាវុធ គឺសមាជិក គ.ជ.ប ថ្មីទាំង៩រូប ជាអ្នកធានា និងវាយតម្លៃលើការងាររបស់អគ្គលេខាធិការ ។ ប៉ុន្តែបើតាមលោក កែម ឡី ទោះបីជាមានការធានាយ៉ាងណាក៏ដោយ ក៏នៅតែពិបាកនឹងឲ្យម្ចាស់ឆ្នោតជឿទុកចិត្តបានដដែល ព្រោះលោកយល់ថា អគ្គលេខាធិការចាស់នោះ ដិតដាមដោយស្នាមប្រឡាក់រួចទៅហើយ ៕
សូមសរសេរមកលោក ណុល ដារ៉ា តាមរយៈ dara@vodhotnews.com
បើបានជាបង្កើត គជប ថ្មីហើយ ទៅពិបាកអីជ្រើសរើសអគ្គលេខាធិការថ្មីនោះ ព្រោះថាកាល
ណាមានស្នាមហើយ ទោះជាយកអីមកបិទ ឬក៏ជួសជុលនោះ ក៏វានៅតែមានស្នាមដដែល ។
ខ្ញុំគិតថាមិនខ្វះទេមនុស្សមានសមត្តភាព សំខាន់ គជប ខ្លួនឯងហ្នឹងមានចិត្តចង់ ឬមិនចង់
តែប៉ុណ្ណឹងឯង ។
If change new NEC why is can not general NEC .We need to change TEP NETHA .
សុភាសិតខ្មែរពោលថា ៉ត្រី១កន្រ្តក ស្អុយ១ ស្អុយទាំងអស់ ៉។ យើងបានកន្រ្តកថី្ម ត្រីថ្មី លើកលែងតែត្រីចាស់ស្អុយមួយនេះ។ តើយើងសុខចិត្តទុកត្រីស្អុយនេះ ធ្វើឲស្អុយត្រីទាំងអស់ក្នុងកន្រ្តកឬ? ។
ទុកឲ្យមនុស្សថ្មីគំនិតថ្មីរចនាបទក៏ថ្មីទៅតេីយកមកធេី្វអីអាមនុស្សស្អុយរលួយដូចកាក់សំណល់
មានជំនឿអីទៀត។នេះជាការរៀបចំប្រទេសឲ្យល្អមិនមែនរៀបចំមនុស្សស្អុយរលួយទេគិតឲ្យបាន
ច្បាស់ណាពូពូលេាកអ៊ំលេាកអ៊ំគេមិនមែនល្ងង់មួយប្រទេសទេ។