ដោយ៖ ណាត សុភាព | ថ្ងៃអង្គារ ទី30 មិថុនា 2015
http://vodhotnews.com
ស្តាប់សំឡេង៖ |
ចម្លងទុក |
អាជ្ញាធរដាក់រនាំងរារាំងអ្នកហែក្បួននៅចាក់អង្រែលើ
សមត្ថកិច្ចប្រដាប់ដោយខែល និងដំបងឆក់ស្ទើគ្រប់ដៃ នៅថ្ងៃអង្គារនេះ បានរាំងខ្ទុបការដើរក្បួនដោយសន្តិវិធីរបស់សកម្មជនសិទ្ធិមនុស្សដែលជំទាស់នឹងការអនុម័តច្បាប់គ្រប់គ្រងអង្គការសង្គមស៊ីវិល ប៉ុន្តែពុំមិនមានហិង្សាធ្ងន់ធ្ងរនោះទេ។
ក្រុមសកម្មជនសិទ្ធិមនុស្ស និងសកម្មជនដីធ្លី រាប់រយនាក់បានបើកយុទ្ធនាការប្រឆាំងនឹងការអនុម័តច្បាប់ដ៏ចម្រូងចម្រាសនេះជាទ្រង់ទ្រាយធំនៅព្រឹកនេះ ដោយមានធ្វើដំណើរថ្មើរជើងចេញពីគោលដៅចំនួន៤ ឆ្ពោះទៅកាន់មុខរដ្ឋសភា ។
ប៉ុន្តែសមត្ថកិច្ចបានរារាំងពួកគេគ្រប់ច្រក ដូចជានៅម្តុំស្ថានទូតបារាំង នៅតាមផ្លូវកម្ពុជាក្រោម នៅតាមផ្លូវពីចាក់អង្រែ និងផ្លូវជាតិលេខ១ម្តុំច្បារអំពៅជាដើម ។
តំណាងសហគមន៍បុរីកីឡា អ្នកស្រី អាត សំណាង ដែលចូលរួមក្នុងការដើរហែក្បួននោះ បានរិះគន់ទង្វើរបស់សមត្ថកិច្ច និងកងសន្តិសុខនៅតាមខណ្ឌទាំងនោះថា ជាការបំបិទសិទ្ធិសេរីភាពពួកគេក្នុងការតវ៉ាដោយសន្តិវិធីដែលធានាដោយច្បាប់រដ្ឋធម្មនុញ្ញ ។ អ្នកស្រីព្រួយបារម្ភថា នៅពេលច្បាប់នេះចេញមក នឹងបិទសិទ្ធិសេរីភាពប្រជាសហគមន៍ នឹងអង្គការមិនមែនរដ្ឋាភិបាលបន្ថែមទៀត ដោយសារទង្វើរបស់សមត្ថកិច្ចនៅពេលនេះបង្ហាញថា រដ្ឋាភិបាលរបស់គណបក្សប្រជាជនកម្ពុជាមានចេតនាបង្ក្រាបលើអ្នកតវ៉ាតាំងពីច្បាប់គ្រប់គ្រងសង្គមស៊ីវិលមិនទាន់អនុម័ត «ច្បាប់ហ្នឹងមិនទាន់ចេញផង គាត់បិទសិទ្ធិពួកខ្ញុំប៉ុណ្ណឹងហើយ ចុះទម្រាំច្បាប់ហ្នឹងចេញមក តើពួកខ្ញុំជាសហគមន៍នេះ ពួកខ្ញុំព្រួយបារម្ភ ពួកខ្ញុំមានការភ័យខ្លាច មិនមែនខ្លាចអ្វីទេ ខ្លាចច្បាប់ហ្នឹងមកគាបសង្កត់ពួកខ្ញុំ និងអង្គការសង្គមស៊ីវិល ព្រោះពួកខ្ញុំសហគមន៍រាល់ថ្ងៃ គឺមានសិទ្ធិរបស់ខ្ញុំហ្នឹងហើយ បានខ្ញុំមានសិទ្ធិនិយាយស្តីទៅកាន់អ្នកផ្សេងៗ ប៉ុន្តែគាត់បិទសិទ្ធិពួកខ្ញុំ ចប់ហើយ» ។
អាជ្ញាធរប្រមូលក្រុមសកម្មជន និងអង្គការសង្គមស៊ីវិលឲ្យនៅផ្ដុំគ្នាក្បែរស្ថានទូតបារាំង និងហាមមិនឲ្យហែក្បួន
អ្នកស្រី អាត សំណាង បន្ថែមថា សមត្ថកិច្ចនិងកងសន្តិសុខខណ្ឌប្រើពាក្យអសុរោះមកលើរូបគាត់ថាបើចង់ធ្វើដំណើរទៅមុខទៀត ត្រូវដោះអាវដែលគាត់ពាក់ ដោយសរសេរថា "និយាយថាទេ ច្បាប់សហជីព ច្បាប់សមាគមនិងអង្គការ" ។ អ្នកស្រីយល់ថា សម្តីរបស់មន្ត្រីរដ្ឋាភិបាលនិយាយ បានមើលងាយប្រជាពលរដ្ឋម្ចាស់ឆ្នោត ។
អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ មានប្រសាសន៍ថា ការដាក់កម្លាំងរារាំងមិនឲ្យប្រជាសហគមន៍ សមាគម និងមន្ត្រីអង្គការសង្គមស៊ីវិលតវ៉ាប្រឆាំងការអនុម័តច្បាប់NGOនោះ ដើម្បីទប់ស្កាត់កុំឲ្យមានអនាធិបតេយ្យតាមដងផ្លូវ ។ លោកថា «យើងប្រើវិធានការដើម្បីសន្តិសុខ សណ្តាប់ធ្នាប់របស់សង្គម រាជធានីភ្នំពេញ ជារបស់ប្រជាពលរដ្ឋ២លាននាក់ មិនមែនជារបស់អ្នកតវ៉ាមួយក្តាប់តូច ដែលធ្វើឲ្យមានការបង្កចលាចល នៅក្នុងរាជធានីភ្នំពេញអ៊ីចឹងទេ» ។
អនុប្រធានផ្នែកសិទ្ធិមនុស្សរបស់សមាគមការពារសិទ្ធិមនុស្សអាដហុក លោក ណៃ វង់ដា ដែលចូលរួមហែក្បួនដែរ បានហៅទង្វើរបស់សមត្ថកិច្ច និងកងសន្តិសុខខណ្ឌចំការមនថា បិទសិទ្ធិសេរីភាពប្រជាសហគមន៍ និងមន្ត្រីសិទ្ធិមនុស្សក្នុងការប្រឆាំងនឹងរដ្ឋសភាមិនឲ្យអនុម័តច្បាប់NGO ។ លោកថា «គោលបំណងនៃការដង្ហែក្បួននេះ ដែលយើងដឹងគឺធ្វើដំណើរទៅកាន់រដ្ឋសភាដើម្បីបង្ហោះប៉ោងប៉ោងនៅទីនោះ និងផ្ញើសារដល់សមាជិករដ្ឋសភាកុំឲ្យអនុម័តច្បាប់ចម្រូងចម្រាសទាំងអស់នោះ ។ ដូច្នេះបើសិនជាគាត់រារាំងអ៊ីចឹង គឺធ្វើឲ្យចរាចរណ៍ស្ទះទៅវិញទេ ប៉ុន្តែបើសិនជាអនុញ្ញាតឲ្យទៅគឺដំណើរការបានដោយរលូន» ។
មន្ត្រីសង្គមស៊ីវិលបញ្ជាក់ថា មាត្រា៥ មាត្រា១០ មាត្រា១៥ មាត្រា២២ មាត្រា៣០ និងមាត្រា៣២ សុទ្ធតែជាការបារម្ភខ្លាំង ដែលមាត្រា៣២នេះ បានចែងពីការផាកពិន័យធ្ងន់ធ្ងរដល់អង្គការ ឬសមាគមណាដែលមិនបានបំពេញលក្ខខណ្ឌតាមច្បាប់នោះ ហើយឈានទៅលុបឈ្មោះអង្គភាពនោះចោល ។
មន្ត្រីសិទ្ធិមនុស្សអះអាងថា នៅពេលច្បាប់នេះចេញនឹងធ្វើឲ្យសមាគមតូចៗ និងសកម្មភាពការងារស្ម័គ្រចិត្តរបស់យុវជន និងសកម្មជនតាមមូលដ្ឋាន នឹងត្រូវបញ្ចប់ព្រោះតែពួកគេមិនអាចបំពេញលក្ខខណ្ឌតាមអ្វីដែលរដ្ឋាភិបាលបានកំណត់ក្នុងច្បាប់នោះ ៕
សូមសរសេរមកលោក ណាត សុភាព តាមរយៈ sopheap@vodhotnews.com
អាជ្ញាធររារាំងការហែក្បូនប្រឆាំងច្បាប់អង្គការនិងសហជីពត្រង់ចំនុចស្ពានអាកាសក្បាលថ្នល់ (វីដេអូ)
ដោយ៖ ឧស្សាហ៍ | ថ្ងៃអង្គារ ទី30 មិថុនា 2015, 11:07 AM
http://vodhotnews.com
អាជ្ញាធររារាំងការហែក្បូនប្រឆាំងច្បាប់អង្គការនិងសហជីពត្រង់ចំនុចស្ពានអាកាសក្បាលថ្នល់
អាជ្ញាធរខណ្ឌច្បារអំពៅរារាំងការហែក្បូនក្បែរវត្តនិរោធ (វីដេអូ)
ដោយ៖ ឧស្សាហ៍ | ថ្ងៃអង្គារ ទី30 មិថុនា 2015, 12:13 PM
http://vodhotnews.com
អាជ្ញាធរខណ្ឌច្បារអំពៅរារាំងការហែក្បូនក្បែរវត្តនិរោធ
សន្តិសុខខណ្ឌដូនពេញរារាំងការហែក្បួនប្រឆាំងច្បាប់អង្គការ និងសហជីពនៅក្បែរទូតបារាំង (វីដេអូ)
ដោយ៖ សីហា | ថ្ងៃអង្គារ ទី30 មិថុនា 2015, 11:28 AM
http://vodhotnews.com
សន្តិសុខខណ្ឌដូនពេញរារាំងការហែក្បួនប្រឆាំងច្បាប់អង្គការ និងសហជីពនៅក្បែរទូតបារាំង
បើមិនច្រឡំទេ លោកស្អី លោក ឡុង ឌីម៉ង់ហ្នឹងចេះវិភាគនូវសំដីដែលគាត់និយាយហ្នឹងទេ ? ពីរលាននាក់ហ្នឹងជាស្អី ? មិនគឺជាខ្មែរ ចុះអ្នកដើរហ្នឹងស្អី មិនខ្មែរដែរ យី ចំជាឆ្គួតមែន ចេញពីសាលាណាម៉ោ មិនចេះវិភាគសំដីខ្លួនឯង ឆ្គួតស្មោះ សុទ្ទតែពួកឆ្គួតមន្ត្រីថ្នាក់លើកប់ពពករបស់បក្សប្រជាជន ។