ដោយ៖​ ឡាយ សា​មាន​ | ថ្ងៃសុក្រ ទី10 កក្កដា 2015, 03:39 PM​
http://vodhotnews.com

ពលរដ្ឋ​ និងសង្គមស៊ីវិល លើកបដា​តវ៉ា​នឹង​ច្បាប់​សមាគម និង​អង្គការ​មិនមែនរដ្ឋាភិបាល​ កាលពីពេល​កន្លងមក​ (រូបថត៖ ទេព សូនី)

​សភា​អឺរ៉ុប​ថ្កោលទោស​រដ្ឋាភិបាល​កម្ពុជា​ថា ព្យាយាម​អនុម័ត​ច្បាប់​ស្តី​ពី​សមាគម និង​អង្គការ​មិនមែន​រដ្ឋាភិបាល ច្បាប់​សហជីព ព្រមទាំង​ស្នើឲ្យ​រដ្ឋសភា បដិសេធ​អនុម័ត​ច្បាប់​ទាំងនោះ​។​

​ញត្តិ​រួម​របស់​សភា​អឺរ៉ុប​ចេញផ្សាយ​កាលពី​ថ្ងៃ​ទី​៨ ខែកក្កដា សង្កត់ធ្ងន់​ថា ប្រទេស​កម្ពុជា​នឹង​បាត់បង់​ការផ្តល់​មូលនិធិ​គម្រោង​អភិវឌ្ឍន៍​ប្រចាំ​ឆ្នាំ​ប្រមាណ​៦00 ទៅ​៧00​លាន​ដុល្លារ ប្រសិនបើ​ច្បាប់​ស្តី​ពី​សមាគម និង​អង្គការ​មិនមែន​រដ្ឋាភិបាល​ត្រូវបាន​សភា​អនុម័ត​។ សភា​អឺរ៉ុប​ចាត់ទុកថា ការ​ដែល​រដ្ឋាភិបាល​ព្យាយាម​អនុម័ត​ច្បាប់​ស្តី​ពី​សមាគម និង​អង្គការ​មិនមែន​រដ្ឋាភិបាល និង​ច្បាប់​សហជីព ជា​ការគំរាមកំហែង​ដល់​ប្រតិបត្តិការ​របស់​អង្គការ​មិនមែន​រដ្ឋាភិបាល ដែល​ផ្តល់​សេវា​ដោយ​អន្តរជាតិ និង​ជា​ការ​បំបិទ​សិទ្ធិសេរីភាព​។​

​ទោះយ៉ាងណា​ក៏ដោយ សភា​អឺរ៉ុប​ស្នើ​រដ្ឋាភិបាល​ទម្លាក់ចោល​សេចក្តីព្រាងច្បាប់​ស្តីពីស​មាគ​ម និង​អង្គការ​មិនមែន​រដ្ឋាភិបាល និង​ច្បាប់​សហជីព ព្រមទាំង​ស្នើ​រដ្ឋសភា​បដិសេធ​អនុម័​ច្បាប់​នោះ​។ សភា​អឺរ៉ុប​បន្តថា រដ្ឋាភិបាល​កម្ពុជា គួរតែ​ទទួលស្គាល់​ភាពស្របច្បាប់ និង​អត្ថប្រយោជន៍​របស់​អង្គការ​សង្គម​ស៊ីវិល ដែល​រួមចំណែក​ក្នុង​ការអភិវឌ្ឍ​សេដ្ឋកិច្ចជាតិ និង​នយោបាយ​។ 

​នាយក​ប្រតិបត្តិ​នៃ​គណៈកម្មាធិការ​សហប្រតិបត្តិ​ការ​ដើម្បី​កម្ពុជា សឿង សារឿ​ន មានប្រសាសន៍ថា សម្រាប់​សង្គម​ស៊ីវិល​មាន​ជំហរ​ដូចគ្នា​ជាមួយ​សហគមន៍​អឺរ៉ុប ក្នុង​ការទាមទារ​ឲ្យ​រដ្ឋាភិបាល​ទម្លាក់ចោល ឬ​ពន្យារ​ពេល​អនុម័ត​សេចក្តីព្រាងច្បាប់​ស្តីពីស​មាគ​ម និង​អង្គការ​មិនមែន​រដ្ឋាភិបាល​។ លោក​សង្កត់ធ្ងន់​ថា ប្រសិនបើ​រដ្ឋាភិបាល​នៅ​តែ​ព្យាយាម​អនុម័ត​ច្បាប់​នោះ កម្ពុជា​នឹង​ប៉ះពាល់​ដល់​កិត្តិយស​លើ​ឆាក​អន្តរជាតិ ប៉ះពាល់​ទំនាក់ទំនង​ការទូត និង​សេដ្ឋកិច្ច​។ លោក​ថា​៖ «​ខ្ញុំ​គិតថា សហគមន៍​អឺរ៉ុប​ដែល​គាត់​អំពាវនាវ​បែប​ហ្នឹង ជា​ការអំពាវនាវ​មួយ​ដែល​ត្រឹមត្រូវ​នៅ​ក្នុង​កាលៈទេសៈ​បែបនេះ ។ សំខាន់​បើ​ខ្ញុំ​ជា​រដ្ឋាភិបាល​វិញ គឺ​ខ្ញុំ​ដកឃ្លា​នៅ​ក្នុង​ការអនុម័ត​ច្បាប់​នេះ គឺ​ពន្យា​រហើយ​បន្ត​ការធ្វើ​ការងារ​ជា​លក្ខណៈ​ពហុភាគី​ជាមួយ​អង្គការ​សង្គម​ស៊ីវិល និង​អ្នកពាក់ព័ន្ធ​ទៅ​លើ​សេចក្តីព្រាងច្បាប់​នេះ​ឡើង​វិញ​»​។​

VOD មិនអាច​សុំ​ការឆ្លើយតប​ពី​អ្នកនាំពាក្យ​អង្គភាព​ព័ត៌មាន និង​ប្រតិកម្ម​រហ័ស​នៃ​ទីស្តីការគណៈរដ្ឋមន្ត្រី​លោក ទិត សុធា បាន​នៅឡើយ​ទេ​។ ចំណែក​អ្នកនាំពាក្យ​រដ្ឋសភា​លោក ឈាង វុន លើក​ទូរស័ព្ទ​តែ​សុំ​មិន​អត្ថាធិប្បាយ​។​

​យ៉ាណា​ក៏​ដោយ​ថ្មីៗ​នះ លោក ឈាង វុន ឲ្យដឹងថា គណៈកម្មាការ​ជំនាញ​នឹង​ពិភាក្សា​ជាមួយ​គណៈកម្មាធិការ​អចិន្ត្រៃយ៍​រដ្ឋសភា នៅ​ថ្ងៃ​ទី​១០ ខែកក្កដា​នេះ ដើម្បី​កំណត់​ថ្ងៃ​ប្រជុំ​អនុម័ត​ច្បាប់​អង្គការ សមាគម​នេះ​។ លោក​ថា ច្បាប់​នេះ​អាច​នឹង​ត្រូវ​ដាក់​ទៅ​សភា​ពេញអង្គ​នៅ​ដើម​សប្តាហ៍​ក្រោយ​។ 

​សភា​អឺរ៉ុប​ក៏បាន​ក្រើនរំឭក​សភា​កម្ពុជា​ថា នៅពេល​បង្កើត​ច្បាប់​ណាមួយ​គួរតែ​គោរព​សិទ្ធិ​សេរីភាព​នៃ​ការទទួលស្គាល់​ជា​អន្តរជាតិ ដែល​ប្រទេស​កម្ពុជា​បាន​ប្តេជ្ញាចិត្ត​ប្រកាន់​ខ្ជាប់ខ្ជួន​នូវ​ការគោរព​សិទ្ធិមនុស្ស តាម​យ​រៈការ​ផ្តល់​សច្ចាប័ន​នៃ​កតិកាសញ្ញា​អន្តរជាតិ​ស្តីពី​សិទ្ធិ​ពលរដ្ឋ និង​សិទ្ធិ​នយោបាយ​៕ 

​សូម​សរសេរ​មក​លោក ឡាយ សា​មាន តាមរយៈ samean@vodhotnews.com