ដោយ៖ យ៉ា រសាត់ | ថ្ងៃសុក្រ ទី10 កក្កដា 2015
http://vodhotnews.com
កញ្ញាសាសា និងឧកញ៉ា សុខ ប៊ុន (រូបភាពឧកញ៉ាយកពីហ្វេសប៊ុក)
មន្ត្រីក្រសួងមហាផ្ទៃឲ្យដឹងថា ឧកញ៉ា សុខ ប៊ុន ដែលត្រូវបានចោទថាបានប្រើហឹង្សាលើអតីតពិធីការិនីទូរទស្សន៍CTN កញ្ញា ឯក សុជាតា ហៅសាសា កំពុងស្ថិតនៅក្រៅប្រទេស ខណៈអាជ្ញាធរកំពុងស្វែងរកចាប់ខ្លួន។
ប្រធាននាយកដ្ឋាននគរបាលព្រហ្មទណ្ឌក្រសួងមហាផ្ទៃលោក សុខ ខេមរិន្ទ ឲ្យVODដឹងនៅព្រឹកថ្ងៃសុក្រនេះថា តាមការពិនិត្យឯកសារនៅអាកាសយាន្ដដ្ឋានអន្ដរជាតិភ្នំពេញ លោក សុខ ប៊ុន បានចាកចេញពីប្រទេសកម្ពុជាទៅប្រទេសសិង្ហបុរីកាលពីថ្ងៃទី៧ ខែកក្កដា ឆ្នាំ២០១៥។
លោក សុខ ខេមរិន្ទ បន្តថា បច្ចុប្បន្ន លោកកំពុងរៀបចំនីតីវិធី ដើម្បីស្នើសុំការឃាត់ខ្លួន លោក ឧកញ៉ា សុខ ប៊ុន ដែលបានប្រើហិង្សាលើកញ្ញា សាសា កាលពីយប់ថ្ងៃទី១ ឈានចូលថ្ងៃទី២ ខែកក្កដា ក្នុងហាងមួយកន្លែងក្នុងរាជធានីភ្នំពេញ។ ទោះយ៉ាងណា លោកថា សមត្ថកិច្ចលោកនឹងធ្វើការឃាត់ខ្លួនលោក សុខ ប៊ុន តែម្ដង ប្រសិនបើ ប្រទះឃើញទៅកន្លែងណាមួយ។ លោកបន្ដថា នៅពេលនេះសមត្ថកិច្ចក៏កំពុងស្វែងរកឃាត់ខ្លួនអ្នកជាប់ពាក់ព័ន្ធនឹងការប្រើហិង្សានេះផងដែរ។
លោក សុខ ខេមរិន្ទ មានប្រសាសន៍ថា «អត់អីទេរឿងនេះកំពុងដំណើរការនីតិវិធីស្នើសុំដីកាតាមចាប់ ហើយឥឡូវនេះប្រសិនបើឃើញ នឹងគេឃាត់ខ្លួនហើយណា …ខ្ញុំតាមចាប់គាត់រហូតតាំងពីមានរឿងភ្លាម ឥឡូវកំពុងដំណើរការនីតិវិធីរកបក្សពួកដែលនៅសេសសល់ដូចជាបក្សពួកគាត់អីចឹងណា កំពុងតែរកដែរ ពាក់ព័ន្ធនឹងបញ្ហាហ្នឹង ខ្ញុំអត់អាចផ្ដល់ព័ត៌មានបានទេ»។
លោកមេធាវី សុក សំអឿន មានប្រសាសន៍ថា ករណីជនដែលអាជ្ញាធរស្វែងរកចាប់ខ្លួនអ្នកណាម្នាក់ ប៉ុន្ដែជននោះកំពុងស្ថិតនៅបរទេស លោកថា សមត្ថកិច្ចអាចរង់ចាំជននោះវិលត្រឡប់មកចូលស្រុកវិញ ឬស្នើសុំធ្វើបត្យាប័ណ្ណពីអាជ្ញាធរប្រទេសដែលជននោះកំពុងស្ថិតនៅឲ្យចាប់បញ្ជូនជននោះត្រឡប់មកវិញ។
លោក សុក សំអឿន មានប្រសាសន៍ថា «[ជននោះ]នៅស្រុកក្រៅ បើគេ[ត្រឡប់]មកវិញ [ទើបចាប់ខ្លួន]ហ្នឹងមួយ ទីពីរធ្វើបត្យាប័ណ្ណ បត្យាប័ណ្ណមានន័យថា សុំឲ្យប្រទេសដែលអ្នកហ្នឹងស្នាក់នៅហ្នឹង បញ្ជូនមនុស្សហ្នឹងត្រឡប់មកកម្ពុជាវិញ»។
ពាក់ព័ន្ធនឹងករណីហិង្សានេះ កូនប្រុសនាយករដ្ឋមន្ត្រីនិងជាតំណាងរាស្ត្រគណបក្សប្រជាជនកម្ពុជា លោក ហ៊ុន ម៉ានី សរសេរលើបណ្ដាញសង្គមហ្វេសប៊ុកកាលពីម្សិលមិញថា «ទោះបីជាមានបញ្ហាអ្វីក៏ដោយ រាល់ការប្រើប្រាស់អំពើហឹង្សាលើស្ត្រីជាដំណោះស្រាយ គឺជាអ្វីដែលសង្គមមិនអាចទទួលយកបាន និងជាទង្វើដែលត្រូវថ្កោលទោស» ។
VOD មិនអាចទាក់ទងកញ្ញា សាសា ដើម្បីសុំការបញ្ជាក់បន្ថែមលើករណីនេះបាននៅឡើយទេ ដោយសារទូរស័ព្ទរបស់កញ្ញាមិនអាចទាក់ទងបាន។
វីដេអូឃ្លីបសខ្មៅមួយដែលត្រូវបានចែកចាយលើបណ្ដាញសង្គមបានបង្ហាញពីសកម្មភាពលោក សុខ ប៊ុន អគ្គនាយកក្រុមហ៊ុន សុខ ប៊ុន គ្រុប និងជាប្រធានសមាគមអ្នកវាយតម្លៃនិងភ្នាក់ងារអចលនវត្ថុកម្ពុជា ព្រមទាំងអង្គរក្សបានវាយដំលើអតីតពិធីការិនីទូរទស្សន៍CTN កញ្ញា សាសា។ កញ្ញា សាសា អះអាងថាបានដាក់ពាក្យបណ្ដឹងពីរដងទៅតុលាការសម្រាប់ករណីនេះ។
អតីតពិធីការិនីរូបអះអាងថា ហេតុការណ៍នោះកើតឡើងនៅពេលដែលកញ្ញា បានទៅលេងក្នុងហាងផឹកស៊ីរបស់មិត្តភ័ក្ត្រជាជនជាតិជប៉ុននៅកោះពេជ្រ កាលពីយប់ថ្ងៃទី១ ខែកក្កដា ឈានចូលថ្ងៃទី២ កក្កដា ហើយក៏បានជួបលោកឧកញ៉ា សុខ ប៊ុន និងបក្សពួកទៅផឹកស៊ីនៅទីនោះ។ បុរសដៃដល់បានហៅមិត្តភ័ក្ត្ររបស់នាងជាម្ចាស់ហាងឲ្យនៅអង្គុយផឹកស៊ីជាមួយ លុះដល់ស្រវឹងក៏អូសដៃនាងឲ្យចេញទៅក្រៅជាមួយខ្លួន ប៉ុន្តែក្រោយមិត្តភ័ក្ត្រនាងប្រកែកក៏នាំគ្នាបើកឡានចេញទៅ។
កញ្ញាបន្តថាប្រមាណតែបួនដប់នាទីប៉ុណ្ណោះ ពួកគាត់ក៏ត្រឡប់មកវិញ ហើយចាប់អូសដៃមិត្តភ័ក្ត្រនាងដែលជាជនជនជាតិជប៉ុនទាំងបង្ខំឲ្យចេញពីហាង ទើបបណ្ដាលឲ្យមានទាក់ពាក្យសម្ដីជាមួយនាងដែលចូលមកឃាត់។ កញ្ញាបន្ថែមថាក្នុងពេលនោះ អង្គរក្សរបស់លោកសុខ ប៊ុន ក៏បានស្រែកជេរនាងថា«ង៉ែងចេះអី មីចុយម្រាយមិចង៉ែងចង់ងាប់អ្ហី!»ទើបបណ្ដាលឲ្យកើតជាជម្លោះដាក់គ្នា។
កញ្ញា សាសា ទទួលស្គាល់ហេតុការណ៍ដែលនាំឲ្យកើតជម្លោះ គឺបណ្ដាលមកពីកំហុសពាក្យសម្ដីម្ខាងៗ ប៉ុន្តែនាងយល់ថាអំពើហិង្សាដែលជនល្មើសបានបង្កចំពោះខ្លួន គឺមិនអាចទទួលយកបាន ទើបគ្មានការសម្រុះសម្រួល។ កញ្ញាអះអាងទៀតថា ក្នុងពេលកើតរឿង នាងមិនបានដឹងថាបុរសដែលបានបង្កហេតុ គឺជាឧកញ៉ានោះទេ គឺរហូតទាល់តែចប់សព្វគ្រប់ ទើបមានការបញ្ជាក់ថាលោក គឺជាឧកញ៉ាសុខ ប៊ុន ដែលជាអ្នកជំនួញវ៉ាល់លាន និងមានក្រុមហ៊ុនរាប់មិនអស់ក្នុងដៃ។ ទោះយ៉ាងណាក៏ដោយ នាងអះអាងថាមិនខ្លាចចំពោះសុវត្ថិភាពនោះទេ គឺនៅតែរក្សាជំហរបន្តពាក្យបណ្ដឹងរហូតជនដែលបង្កស្នាមរបួសចំពោះខ្លួន ទទួលទោសតាមច្បាប់៕
សរសេរមកកាន់ លោក យ៉ា រសាត់ តាមរយៈ rorsart@vodhotnews.com
ក្រសួងកិច្ចការនារីថ្កោលទោសឧកញ៉ាម្នាក់ប្រើហិង្សាលើស្រ្តីអតីតពិធីការិនីទូរទស្សន៍ (វីដេអូ)
ដោយ៖ ឧស្សាហ៍ | ថ្ងៃសុក្រ ទី10 កក្កដា 2015, 06:43 PM
http://vodhotnews.com
ក្រសួងកិច្ចការនារីថ្កោលទោសឧកញ៉ាម្នាក់ប្រើហិង្សាលើស្រ្តីអតីតពិធីការិនីទូរទស្សន៍
Ar cke Sok bun chea yuon .